Mizoram buhfai an rut fai

¢ Vanlalremruata Tonson

"Hengho hian tunlai buhfai an ngah ang em aw?" tiin nuih deuh ruh ruh chungin Muana chuan |huampui leh Muanna Godown inkara a kal changin a sawi thin. Mautam vanglai khan miin an tir a, buhfai an va la a, Mizoram pawn lamah tam tuarte tanpui nante an lo thawn thin. Thil dang sawi tur vak a hre lo a ni ang, "in chhe deuh deuh emaw i tih kha rin aiin a chhung lam a lo muk phian zel" a ti leh mai thin.

Ngaihdan mawlmang tak a neih chu an buhfai lak thin kha supply deptt. ta a ni a, department hotu lamte hian an phal a ni ang, tih hi a ni. A chang chuan mak a ti thin.

Mizoram chuan buh khamkhawp a tharchhuak lo a; Food, Civil Supplies and Consumer Affairs (FCS&CA) chuan Food Corporation of India (FCI) atangin Mizoram mipui zat atanga chhutin buhfai a chawlut thin. Sum pawh a seng tam hle. Thla tin cheng vaibelchhe tam tak a seng ziah. Chutiang buhfai chawkluh hralhchhuah hna buaipui tur chuan hnathawktu tam tham fe a ruai a, an zingah hrem ngai an awm fo. Sorkar buhfai hralhchhuah hna hi 'matriculate' chinin an thawk thei.

Chu'ng mite chu training hranpa pek an ni lo a, buhfai hralhna vawngfel lo leh hemi chungchang dan zawm lo pawh an tam reng a ni. Sorkar chuan buhfai atana sum hloh hi a huam em a, dan zawm lo leh sum vawnghim zo lote lakah pawh zah a ngai thei hle. Chu a zahngaihna chu supply department-a group C hna thawkteah hian a lang nasa. Thingtlangah chuan khuai ang maiin an lun a, mipui nawlpui chuan group A officer emaw an ti a, pawl zawng zawng deuhthawin thil engemaw tih nikhuaah pawh khuallian atana sawm an ni fo. Gypsy leh 407/409 truck chu an hna chhinchhiahna emaw an ti fur bawk.

Hetiangho hian buhfai an ngah lo nia hriat a nih chuan mipui an thla a phang a, tam an hlau thin. Mahse, buhfai chinchang hria chuan an hlau ve kher lo.

Sorkar chhek ina (kudam) buhfai tam leh tam loh ai chuan 'challan a thlawh (thlawk)' that leh that lohah tam leh tam loh chu an innghat zawk niah an ngai a ni. Challan thlawk hi a bel deuh chuan 'fly' an ti thin.

Kudam tam ber chu thingtlanga awm a ni a, mahse, thingtlanga chengte innghahna pui ber chu buhfai ai mahin buhhum a ni. Mizoram sorkarin buhfai quota FCI-in a pek chanve lek a khul zawh pawhin tampui mitthi a thleng ngai lo. Buhhum a tam chuan an khuaa mi tura sorkar buhfai chhekkhawm hi an ban meuh lo. Sorkar buhfai ei tur chuan a leina tur neih a ngai a, mahse, a tui lo zawk si. Buhhum tamna khuaa mi tur buhfai challan chu a thlawk ta thin a ni.

Lehkhaah chuan thingtlang buhfai tur hian a hmun a thleng thlap a, a buhfai tak tak zawk chu Aizawl leh khawpui lian deuh thenkhatah a awm thin thung. Chuti taka rang chu 'fly' an tih chu a ni a, challan atanga engkim tihfel a nih avangin 'challan thlawk' ti an awm bawk. He thil hi storekeeper level-a tih mai theih a ni lo; "A 'fly' tir tam thei apiang hi thawk tha an ti a ni mai lo'm ni?" tiin buhfai sumdawnnaa lo inhnamhnawih tawh pakhat chuan a sawi. Storekeeper thenkhat chuan an kudam tha lo chhuanlamin challan thlawhtir mai dan an dap thin niin buhfai chinchang hriate chuan an sawi bawk.

"Thingtlangah chuan buh an thar ve tho a, tam a hlauhawm tak tak ngai lo. Aizawl hi kan tam a, kan ei nasa bawk a, tam hlauhawm ber chu kan ni thin zawk," tiin Aizawla buhfai zuartu hlun tak pakhat chuan tun hnaia Mizorama buhfai harsatna thleng chungchang hi a sawi nghe nghe. Aizawlah chuan retailer-te'n an hralh bak hi chu bazar-a mi rin a ni a, challan a thlawh that loh avanga sorkar buhfaiin bazar a thlen that loh hian bazar leh bazar chiah loah pawh buhfai supply a tlem a, a man tlawm tur pawh a awm tawk thin lo. Retailer-te hi buhfai a hralh dan tur dik takin an hralh ngei tih finfiah hlei thei lo an ni fur ang. Buhfai a that tawk loh emaw huntiam chhunga la hman an tam loh emaw avanga ration card nena retailer atanga buhfai la an tlem hian bazar leh kawng dang atanga mipui hnen thleng tur buhfai a tam tihna a ni. Chu chuan buhfai man sang lutuk tur lakah mipui a chhan ve tlat a ni.

"Retailer fapa a ni a," an tih fiam zauh chuan, an hausaa an ngaihtuah awm loh tia infiamna a ni. Thutaka hman ni ngai lo mah se thil awmzia a sawifiah hle.

Tun hnaia Aizawla buhfai a van khan buhfai sumdawnnaa lo inhnamhnawih tawhte chuan sorkar buhfaiin bazar a thleng tha lo ni-ah an ngai mai. A zuartute tak erawh chu he rin dan chungchangah hian tawng tam nih an duh lo a, an sawi hreh vek.

"Rel kawng a tha lo a, kan hria a, buhfai lo thlen that loh avangin retailer lama a tlem lai leh phai atanga lo lut a awm loh lai a innang fuh a ni ber," tiin buhfai zuartu pakhat chuan a sawi.

Mizoramin sorkar supply ni lo buhfai a ei nasat ber arham chu kumtin vawi hnih/vawi thum awm loh lai a awm ziah niin a sawi.

"A chhan pawh kan hre bik lo, hei hi chu kumtin dan a ni a, company lam atangin a awm lo a, kumtin vawi hnih-thum chu hetiang hi a awm ngei ngei a ni," a ti. Buhfai a van khan a man pawh a to nia sawi a ni a, a zuartu lam chuan buhfai man to nia sawi chu an pawm lo thung. "Arham hi phai lam atangin quality chi hrang hrangin an rawn siam a, bag-ah 1000 chuang te pawh a awm ngei a, a quality an hre fuh lo a ni ang. A to chuan kan hre lo," tiin buhfai zuartu pakhat chuan a sawi.

Buhfai zuartute hian an sawi duh emaw sawi duh lo emaw sorkar buhfai hi bazar-ah zawrh a ni a, zawrh tur a awm loh chuan Aizawl khawpui tan tam a hlauhawm tih hial tur a ni. Sorkar buhfaiin bazara zawrh a nih dan pakhatna chu 'fly' a ni a, a pahnihnaah chuan retailer-in ration card hmanga a hralh bang a ni. A dang chu Mizoram hian FCI-in quota a pek chu a lei zo thin lo a, chu a lei zawh loh chu vaihoin lo leiin Aizawla buhfai zuarte hian an la chhawng thin. Nikumte pawh khan Mizoram chuan FCI-in quota a pek hi a zatve vel chauh a lei thei thin. Mahse, hei hi chu tunhnaiah chuan a awm hmel loh thung. A hmunpui ber nia sawi Silchar vel pawh buhfai chuan a thleng tha thei lo a, Guwahati-a zuk lak a ngai a, chu bakah rel a kal that theih loh chhung khan fur ruahtui tlak laia ei tur pawh Mizoram chuan a ei zo hman ti tih a, arham buhfai awm that loh lai leh rel kal mumal loh lai a innangching a, Aizawl khawpuiah pawh buhfai a vang hman a ni. Mahse, mautam laia FCI-in Mizoram buhfai quota a rawn tihhniam a, sorkarin a khul zawh bak vaiho khul sa lakchhawn tur a awm loh khan buhfai man chu a to zawt zawt mai niin buhfaia sumdawng thinte chuan an sawi.

Sorkar buhfaiin bazar a thlen dan dang leh chu bukna dik lo hi a ni. Sorkar chuan FCI atanga leiin buhfai a chawlut a, Rengtekawn leh Tanhrilah kudam lianpui maiah a chhekkhawm thin. Chuta tang chuan supply centre leh kudam hrang hrangah semdarh a ni ta thin a ni. Chu'ng buhfai thiar tur chuan 'carrying contractor' an awm a, buhfai tam tham tak mai chu carrying contractor tan pawh thiar a lo hautak bawk si, a thiarna tur motor lian (truck) pawh an nei daih seng lo a, truck thawhchhuahpui thei mi engemaw zat chu a thiarin an inhlawh ta thin a ni. A phurh manah hlawkna hmuh tur awm vak lo mah se hlawk dan awm tho tura ngaih a ni. A tih dan thiam leh thiam lo kar erawh a hla deuh thung.

Carrying contractor-in buhfai thiarna tur tender a han chhang a, buhfai chu kawnglaka phurh a ni emaw, dah mai mai a ni emaw, a rih dan hi danglam/ tlahniam (short) thin tura ngaih a ni. Chutianga a short hnu pawha che chhe lo tura an ngaih chinah contractor chu tender chhang tura ngaih an ni.

FCI kudam atanga supply centre hrang hranga buhfai thiarchhuah tur awm chu truck neituten an thiarchhuah hian carrying contractor chuan a tana chawi tur awm lo thei ang ber tura buk tling, short awm miah lova buhfai thlentir chu a mawh a ni a, a tum ber pawh a ni lo thei lo. Tichuan, engti kawng zawng pawha a hmun thleng tur zat dik tak thlen tura mawhphurhna chu truck driver-ho kutah chuan a hlan leh chhawng ta a.

Truck driver-ho intelkhawmna - Mizoram Truck Drivers Association chuan Tanhril FCI kudam pui bulah site office hawngin buhfai thiar dan chu an buaipui ta a ni.

Buhfai phur duh truck driver te chu an motor a ruah veleh MTDA office-ah chuan an motor ruak nen an in-report a, duham leh 'phakar' bik an awm lohna turin motor ruak show a ngai ngei bawk. Motor in-report te chu a 'tahna' man Rs 20 an pek hnuah an lo 'tat' (register) ta thin a ni.

An hun a lo thlen hunah truck driver te chuan carrying contractor hovin buhfai phurh buaipui tura an dah manager an va bia a, anni'n an phurh tur leh a dahna hmun tur engkim an lo hrilh thin. Contractor hovin phurh tur an neih dan a zirin an duhzawng contractor an thlang thin a ni. Mahni duhzawng thlan theih miah loh chang te pawh an nei ve bawk.

FCI kudama buhfai phurh tur a awm hian a phurtu tur truck chu an buk phawt thin. Chutianga bukna chu weight bridge an ti. Weight Bridge-ah hian truck chu a han tlan kai a, a rih zawng an lo chhinchhiah a, chumi hnuah buhfai load an va la a, an rawn tlan chhuak leh a, truck chu a phurh zawng zawng nen an han buk leh a, chuta a rihna atang chuan truck ruak rihna, an lo buk tawha kha an paih ta thin a ni. Chu chu an buhfai phurh rihna chu a ni ta. Hei hi dik tawk viaua ngaih a ni nghe nghe. Truck driver pakhat pawhin weight bridge-a buk chu a 'dik khawp mai' a ti.

Hei erawh zawng finfiah ngaihna a awm lo. FCI Godown bak Mizoram supply centre-ah hian weight bridge hman a ni hlawm lo a, a awmchhunte pawh hman theih loha chhia a ni hlawm. Khawiah mah buhfai hi FCI atanga buhfai phurh chhuah zat hian a thlenna tur hmun a thleng ngai lo bawk. Tunah hian FCS&CA chuan kudam lian chinah chuan weight bridge hman vek tur a ti leh mek a ni. Danglam tak ang maw?

Weight bridge chu a dik khawp mai ti chungin a thawkte hian an tidanglam thiam viau niin truck driver-te chuan an sawi thung. Hman deuha FCS&CA-in weight bridge an hman lai pawh khan buk dik tawka ngaihah pawh short sain (chawibelh sa) a lo phur chhuak thin a, a hnu feah a inhre chhuak niin driver pakhat chuan a sawi.

Mahse, a thawktute lam pawhin truck driver-ho chu an tana a hlawk loh avanga weight bridge hi tichhe thinah an puh ve tho.

"Minister-in a ti tlat a, kan hmang tak tak thei ang emaw, kan ti hlei thei thin lo, a chhe leh vat zel a, a siam that a hautak si," tiin FCS&CA-a hna sang vak lo thawk pakhat chuan a sawi.

"Hmana kan hman lai pawh khan handyman an khawngaihthlak lutuk, motor ruak an buk dawn hian a tirit turin eng eng emaw an dah ru theuh a, a thenin tui, a thenin lung, a thenin buhfai bag, anmahni an bet ngei bawk a," tiin an phurh ruk theih rih zat chu an buhfai tih riral ruk theih zat tur a nih thu a sawi.

Buhfai phurtute leh FCS&CA-a thawkte chu weight bridge duh loah an inpuh tawn ve ve a ni ber a, Mizoram sorkar hnuaia weight bridge chu a tha rei tak tak thei lo niin an sawi ve ve. FCI ta erawh chu a chhe ve vak ngai lo thung.

Truck driver pakhat weight bridge hman duh nia insawi chuan "FCI-in an hmang thei reng a, supply centre-ah erawh chuan hman theih a ni lo, 'a chhia' tiin an hmang duh lo. 'A repair-na a hautak, vawi khat repair tur pawhin phaia mi chahchhuah a ngai a, a senso a hautak lutuk' an ti. "FCI ta te hi a chhiat pawh kan hre ngai si lo a," a ti.

FCI kudam-a awm buhfai phurchhuak tur chuan truck-a load a ngai. Chutiang ti tur chu FCI hian vai mutia a ruai teuh a, mahse, vai mutia chuan load manah Rs 100 an phut leh kher thin. A ti tur hlawh nei an awm reng chunga sen belhna hmasa ber a nih chu.

A dahna tur hmun an han thleng ta. "Dik tak pawhin phur thleng mah ila, a buktu chuan a buk tling lo tur a ni deuh ber mai," tiin driver pakhat chuan a sawi.

"I rawn thlen tha hle mai tih a awm ngai lo a, a tling lo lam hretin an buk ngei ngei. A buk thiam bik an awm a, chutiang buk thiam bik (scaleman) chu eng emaw thila a remchan loh hlauha buk turin a midang pakhat tal an awm thin," a ti bawk.

A buk thiam sa ni lo midang buk chu a rem lo a, scaleman emaw, a aiawh thei tura thiam sa mi tu emaw an awm lohva buk tho a ngaih chuan, midang inrawlh ai chuan storkeeper ngei hian an buk duh thin.

Scaleman thiam tak chuan scale hi an control vek a, an duh zat zat an buk chhuak tawh mai thin a ni. Chuvangin buk hma hian scaleman chu tih lungawi dan zawn ngei ngei a ngai.

"A chang chuan kan bag te hi pahnih khat chu lo ziah bo talh an han tum a. Kan inveng nasa thei mai. En reng an ngai a, chuti lo chuan buk tir ngam mai mai pawh an ni lo," tiin hun engemaw chen buhfai lo thiar tawh truck khalhtu pakhat chuan a sawi.

Unload lam pawh hi a lo buaithlak khawp mai. Sorkarin porter-a a dahte chu an lo tar tawh a, an tlem bawk si. Truck trip buhfai unload tur chuan an tlak tawh meuh loh. A nih loh pawhin an lawmman a hrana siam sak a ngai niin truck driver pakhat chuan a sawi. Rs 700-800 te unload tura porter emaw midang rawih nan emaw an sen leh thin thu a sawi bawk.

"Chutiang pek phal loh chuan an unload duh lo emaw a ni a, kan tang reng a ni mai," a ti.

Buk a nih hmaa scaleman a lungawi tawk lo a nih chuan pelhe miah lovin an phurh ang ang thlen pawh ni se a tling thei thin lo. Chu a tlin lohna 'shortage' atang chuan 'sawt' tawngkam a lo piang chhuak ta a ni. Quintal khata a tlin loh chuan Rs 930-a payment tur te a lo ni a, bag te a nih erawh chuan Rs 465 a ni thung. Mahse, storekeeper chuan rem an lo ti leh lova, indawn fe te a ngai thin niin driver te chuan an sawi. Rs 930-a payment tur chuan vanneih leh inhmelhriat fe a lo ngai a, kudam tinah payment rate a inang lo zung niin an sawi nghe nghe. Storekeeper lungawina tawka payment loh chuan 'challan' a tang a, chuti hlauh chu!

A bag atangin a bo leh bo loh a hriat theih mai loh, a bag zawng chuan a tira an phurh zat a thleng hrim hrim. Mahse, a bag kha phurh chhuah laia a rih dan leh a thlenna tur hmun a thlen huna a rih dan chu a inang tawh thin lo. Kawng lakah lo baw tawk chu awm tur a ni, bag tha lo deuhte pawh a awm thei. Chuvangin FCI chuan a bo thlau tur pawm theih chin an nei lawk nghe nghe a ni.

Area manager chin chuan a bothlau 0.5% thlengin a ngaidam thei. Hei aia tam a bothlau a nih chuan a bothlau chu buhfai khera rulh tur a ni. FCS&CA-ah chuan ngaihdan theih chin a awm ve si lo a, a buk thiam a ngai ta a ni. Buktling thlen tura beisei an ni lo a, a tling lo hnawhkhat tura beisei erawh an ni. Buhfai ni kher loin sum pawhin a hnawhkhah theih a, tichuan hnawhkhat thei lo, 'challan' titang chu chu driver tling lo, ban tur an ni mai!

Buhfai chu a buk thiamin an buk tur a nih avangin a bag chu siam a ni thin. Mau emaw hmawlh emaw suih zumin bag chu an han hawlh pawp a, Kg hnih/khat an lak chhuah hnuah a hawlhna kua kha an hai deuh nawk nawk a, a tira mi ang chiahin buara hrui a intah fel leh thlap ta thin a ni.

An buhfai hawlh chhuah kha buara ip ruakah an han thun chhawng leh a, 'hawlh' leh 'bag siam' an tih tawngkam a lo chhuak ta a ni. Engkim ready-a hawlh leh siam sa thlap loh chuan a thlenna tur hmun thlen chi a ni lo. Ready vek tawh hnuah chuan danah hralh phal loh, pawisa chawi baka jail bang zut theihna pawh ni se, 'bag siam sa' an tih chu Rs 500 hisapin, dawrah/inah/kawng dungah driver ten an hralh ta chur chur mai a ni. A kawng tawi leh thui dan a zirin Rs 500 lo deuh te pawhin an pe thin.

Driver hian a hralhna atangin a hlawh teuh thei a, scaleman puihnain a hlawh teuh thei bawk. Scaleman tan lah 'side income' tha lutuk a lo ni bawk si. Rs 500 aia tlem lo, Rs 3000/4000 thlengin driver-in scaleman a tham thei tlat. Bag siam sa, kg 50 tling lo kha kg 50-in emaw, kg 49-in emaw buk tir se, trip khat (bag 300/400) ah chuan quintal sawm a over chuan, driver-in cheng sing tel a hlawh thei ta der mai. "Sing khat ka hawlh pha e" tih tawngkam a lo chhuah phah ta a ni.

Scaleman-in buhfai a buk rih thiam hian sorkarin a tuar tur ni awm tak a ni, mahse, chutiang a ni ngawt lo. Scaleman hian buhfai special emaw, retailer emaw, thingtlang lamah emaw a thawnchhuah dawnin a aia rit zawkin a buk leh thei tlat. Buhfai, a lo thlen hlima kg 50-a a buk theih kha a chhuah dawnah kg 50 veka a buk leh theih chuan hlauh tur vak a awm dawn em ni? Pawisa siamna hlawk tak leh nghal. Chuvangin, sorkarin a tuar teh chiam lovang a, mipui ten an tuar thung ang.

Buhfai hawlh phai tawh kha retailer te'n kudam atangin Rs 50 vel hisapin an han la chhuak leh a, a tlin lohna 'cover' tum chu sawi loh, a aia rita chantir tumin buk lung dik lo hmangin an han buk leh a, chu chu mipui ten kan lo lei ve leh ta a ni.

Porter te hian an hlawh ngau ngau bakah 'unloading' man an la, chu lo pawh sum siamna an la nei thei. Driver ten unloading man 'bonus' an pek theih chuan buhfai bag thawl tak an ti khat thiam tlat. Patla thlen kher lo pawhin 49/50 tiin an kaltlang pui thei thin niin driver-te chuan an sawi nghe nghe.

A thlenna hmun tur thleng lova buhfai bothlau chungchang hi FCS&CA chuan an lo buaipui fe tawh. Inspector-te chu hetiang buhfai bothlau man chhuah tumin an vir vut vut thin. Hman kum phei kha chuan an buhfaiah reng reng hian FGSD tih ziak tur a ni a, chutiang inziak dawrah hmuh a nih chuan man nghal tur an ti. A man theitu inspector-te chu buhfai dawrah an lut kual thin. 'Fly' te pawh an man thin. An ti ve a ni, tih bak chu, "Dawrah an la zuar tel reng tho alawm," tia buhfai chinchang hriate sawi chu a ni leh mai. Tun hma deuha buhfai phurh man chhe lutuk leh chumi avanga buhfai hawlh a, bag siam loh theih loh anga sawi thin pawh a rate an han tisang a, a hma aiin buhfai phurh chu a hlawk lehzual ta a ni.

Kudam thleng lova buhfai a bo thin bakah a thlen hnuah pawh a la bo fo. Storekeeper tam takin suspend an tawh phah tawh a, buhfai chungchangah pawh hian a hmingchhe berah an ngaih theih ang. Hetih lai hian buhfai enkawltu pawl ve tho FCI chuan an kudamte hi Central Ware Housing Corporation emaw, Central PWD emaw an saktir a, buhfai dahna chhuat chu lei atangin, a lo berah feet 3.5-a sang a ni tur a ni, tih dan an nei. Chutah buhfai dah hmain chhuat hnawng leh thil dang avanga buhfai chhe tur ven nan polyplate phah tur a ni, an ti leh kher bawk. Heti chung hian kudama buhfai a awm hnua bothlau chu area manager-in 1.5% thlengin a write off (ziak bo/ngaidam) thei a, general manager-in 5%, executive director-in 10%, managing director-in a vaiin a ngaidam thei a ni.

Mizoramah chuan kudam hi private contractor lian vak lovin an sa tlangpui a, party induhsakna thil a ni deuh emaw tih theih a ni. A chhuat chu leia rora chhunga cement-a char mai a ni duh hle. FCI anga kudam tha tak sak chu thil harsa a ni a, chu chu mipui leh storekeeper te'n an tuar ta a ni?

Sorkar chuan buhfai lei chu a tih turah a ngai a, a sum neih theih ang angin a lei leh tawp thin. Chu a buhfai lei nana a sum hman atang chuan 'eng zat nge a hmuh let a, eng zat nge a subsidise?' tih pawh a chhut ngai lem lo. A leina a hria a, a hralhna a hre leh. Chu chuan a subsidise dan a hrilhfiah miah lo. Sorkar atanga Rs 1000 a hmuha buhfai a lei mipuia a hralhchhuah leh atang khan eng zat nge a hmuh let a hre lo a, sum pawh eng tin nge a kal ral a hre hek lo. Awmze nei loah sorkar sum tam tak a luangral hem hem mai a ni. Mumal taka enkawl chu ni se sorkar hi kum tin cheng vaibelchhe tel tak meuh hum thei tur a ni a, tunah rih chuan a vaibelchhe tel khawhral chiah a buaipui rih a ni. Manmohan Singh chu ni se privatise a duh hial mahna?

Related Posts :