Thlem tlu lo ve chiang
Thuziakmi, fiamthu duh tak George Bernard Shaw kha, vawi khat chu amah ngaisangtu hmeichhe pakhat hian a duh ngang a, khawsakpui atan a sawm a ni awm e.
"Lady X hi Thawhlehni tlai dar 4 atanga dar 6 thlengin inah a awm dawn," tiin zei takin lehkha a thawn a, a hnuaiah chuan Shaw-a chuan tiang hian a lo ziak a:
"Mr Bernard Shaw pawh chutiang hunah chuan inah a awm dawn," tiin. Tichuan, chu lehkha chu a thawnlet nghal!
Nang pawh politician i ni!
US president hlui Harry Truman (1884-1972) kha, vawi khat chu zirlai naupang pakhat hian politician ni turin engtika bultan tur nge tih a zawt a ni awm e.
"Bul i tan daih tawh. Nangma thawhchhuah ni lo, midang thawhchhuah sa sum leh pai a ni lo'm ni i hman?" tiin a lo chhang.
Haihawt mah mah
America rama ukil hmingthang Dwight Whitney Morrow (1873-1931) kha pa haihawt ve tak zawng a ni.
Tum khat chu, a rel chuannaah tui taka lehkha a chhiar laiin conductor hian ticket a rawn dil a, ani lah chu, a'n indap chiam pawhin a ticket dahna a hrechhuak zo ta tlat lo. Pa challang leh hriat hlawh a ni a, conductor chuan, "A pawi hlei nem Pu Morrow, i hmuh hunah dak-in office-ah i rawn thawn mai dawn nia, i neih ngei ka ring e," a ti ta hlauh mai.
Mahse, chutia conductor-in a'n ngaihnathiam chung pawh chuan Morrow-a chu a thaw ta huai tlat lo; "Neih zawng ka nei tih ka chiang. Ka buaina ber zawk chu khawi lam pan tuma kal nge ka nih reng ka hre ta lo hi a ni," a ti ta heu mai!
He pa hi ukil thiam lar mai a ni lo, 1927 atanga 1930 thleng khan Mexico-ah US ambassador hna a thawk tawh ngat.
Monday, June 15, 2009
Chanchin Maksak 31
Subscribe to:
Post Comments (Atom)
No comments:
Post a Comment