Interview : Traffic SP

Traffic Jam chungchangah Traffic SP Lalbiakzama chuan tiang hian Zozam Weekly a hrilh:

Traffic Jam thin hi tihnep theih a ni em?
A ngaihna a awm rih lo. Motor a tam lutuk a, ‘rush hour’ lai phei chuan a bawkkhup a nih ber hi. Ngaihtuahna thar kan seng a, hmalakna thar a awm lo a nih chuan tun ang reng chuan tihthat dan a vang khawp ang.

Motor Park-na hmun tha hi awm se kan zia phah ang em?
A park-na hmun tha pawh awm se kan kawng neihhi a zau belh chuang lo a, a ruala motor an chhuak thup a nih chuan a ngaihna a awm chuang lo.

Mahse, hmun lun lai a ni emaw parking tha deuh te hi chu nei ila a ziaawm tehreng ang.

Aizawl khawpuia Traffic Jam reng hi?
Kan Aizawl khawpui chhunga land utilization hi ennawn a ngai.

Motor hi khawi lam panin nge a kal khawm thin tih hi kan chhut chian a ngai a ni. Aizawl khawpuia motor te hian chhim leh hmar atangin khawpui laili kan pan khawm a.

Chhim lam atangin Sikulpuikawn atangin Treasury kan pan a, hmar lam atangin Chanmari atangin Treasury, tichuan kan intawk khawmta thin a ni.

Hmar lam pan aiin chhim lam pan an thawl zawk ziah bawk a, chhim lam pana tlan chu an kal tluan theih laiin hmar lam pan erawh traffic jam a tan a awl bik bawk.

Tun dinhmunah engtiangin nge Traffic Jam hi tihnep a nih theih ang?
Bazar leh a chhehvela dawr neite hi Aizawl veng hrang hrang atanga kalkhawm kan ni a. Mipui mimir hma kan ngai a nih chuan a tih theih dan a awm.

Mahni motor hawl chhuah vek tum lo ila, veng khat leh in inhnaih deuhte chu motor pakhatah kal rual mai se. Entirnan, vawiin chu chumi motora kal hun ti se, a tukah motor dangin chuti chuan an haw rual leh thei tho bawk ang a, chu chuan nasa takin traffic jam hi a tinep thei ang. Mi ramahte pawh hetiang hian an ti mai thin.

Tun dinhmunah chuan motor nei zawng zawngin hawlchhuah kan tum a, parking a indaih bawk si lo, a ngaihna thlawt a awm lo a ni.

Motor a pung zel bawk si....
Motor lei hi kan inkhap deuh a ngai. Dan fel tak kan siam te a nih ngawt loh chuan kan buaina hi a nasa tial tial ang.

Tun dinhmunah chuan motor hi kan kuhva lei emaw tih mai tur a nia, a pung tam tial tial a. Kan kawng a pung ve si lo, heti reng hi chuan kan inhnawh tawt zo vek ang.

Garage nei lo chuan motor neih te hi phal lo ila, a nei thei nazawngin neih pawh tum lo ila, chu chuan nasa takin traffic jam hi a tinep thei ang.

Parking-na hmun hi a vang bawk si...
Parking-na tur mumal kan nei lo, a remchang ang apiang mai hi kan hman mai a tul lo thei si lo.

Civil Hospital bula damdawi in hmun ruak te saw chhawng hnih lek pawhin motor park-na turin siam thei ila chuan Bazar hmuna motor tawt lutuk saw nasa takin a sukiang thei ngei ang.

Motor 300 vel leng thei turah chhut ta ila, nasa takin sawlai bawr kawng tawt lutuk saw a tithawl dawn a ni.

Parking place hi chu kan mamawh ngawih ngawih a ni.

Sorkar office te hi Chanmari leh Kulikawn inkarah a inhnawh khat thup bawk sia. Hnathawk ten anmahni motor an keng bawk si a, an office kawta an park a ngai bawk nen, a tawt em a ni.

Kawngsira motor park hi...?
Kawngsira motor park ringawt hi chuan motor tlan vel a tibuai em em lo. ‘Indirect’ takin a tibuai a tih theih zawk ang chu. Kawngsira motor kan dah tlat vangin a sir vela mipui kal tur tan hel emaw a ngaih phah a, mipui che vel chuan kawngpuia motor tlan a tibuai ta thin a ni.

Ruahmanna thar kalpui tumna a awm em?
Duhthusamah chuan Dawrpui pheiah te sawn mipui kalna ‘paedestrian’ saw tizau deuh ila, chu chu hung ta ila mipui tan kawng kana tur Zebra crossing siam ila, chu chu traffic police ten veng se, mipuiin duhna hmun hmuna kawngpui kan lovin Zebra Crossing-ah chuan felfai takin an kan thei ang. Chu chu motor khalhtu te tan leh mipui tan pawh a him dawn a ni.

Tun dinhmunah chuan Dawrpui phei bikah pawh a chhak lamah two wheeler an tlan bawk a, kawngkan tum tan lah a hlauhawm, insu pawh an tam phah reng a ni.

Paedestrian traffic chu thil pawimawh tak a ni maw?
Paedestrian traffic hi kan hlamchhiah lutuk a. Mipui te hi kan nek lutuk a ni a tih theih ang chu.

Mipuite hi traffic ti jam-tu kan ni lo thei lo a, kawng kan tur awm miah lo se chuan traffic jam hi a awm mawh khawp ang. Hei vang tak hian mipui te’n him taka kawng an kan theihnan ruahmanna felfai tak kan neih a ngai a ni.

Over-bridge te hi...?
Over-bridge hi kan hmang tangkai lo. Kulikawn over-bridge te pawh saw kan hmang tangkai lo. Chu ai chuan kawngpui bawk a ni kan hman leh zel ni.

Over-bridge ai chuan Paedestrian subway siam zawk ila. Entirna atan - Bazar Bungkawn te saw a lun em em a. Over-bridge siam tum ila a rem lo a ni. Chu ai chuan Dawrpui Vengthar panthlakna atanga tuna Bung awmnaa chhuak tur sawn subway siam zawk ila a fuh zawkin a rinawm.

Subway chhungah chuan duh leh dawrte pawh a siam theih ang. Thil remchang zawk a ni pawhin a lang. FLyover hi chu kan hmangtangkai thiam thlawt lo, Zodin over-bridge te pawh inkhel enna atan bak kan hmang em aw tih mai tur a ni.

Over-bridge-a lawn hi kan peihlo ni berin a lang. Subway siam ila, kum upa lam tan pawh a awlsam zawk mahin a rinawm, chutiang tea hma kan la a nih ngawt loh chuan kan kawngpui a pung ve tawh si lo a, a buaithlak tial tial ang.

Ruahmanna thar kalpui in nei em?
Traffic dan tam tak kan siam thar a, Treasury Square-ah te pawh middle zebra te kan siam thar a. Tun hmaa chhim lama kal tur te indan tlat ang kha awm tawh lovin a kual turte chu an middle zebra kha an zawh tawh mai a ni.

Sikulpuikawn-ah te pawh kan siamtha a, a hmaa bus dingin a hnunga motor te a tihdin ang kha awm tawh lovin bus-a din pawhin motor te chu an tlang thei tawh a.

Tin, public career driver te kan educate nasa a, discipline an nei tha deuh tawh a, chu chu mipuite himna atan a pawimawh em em a ni.

Traffic Police te hi an indaih em?
Indaih lo, force te hi chu indaih tak tak hi a har hrim hrim a. Tun dinhmunah beat 32 leh point 10 vel indaihlohna avangin kan veng thei lo. Traffic point pakhat hi mi pahnihin nilengin an vil thin a. Mahse, kan dil belh mek a, kan indaih chho thei mai ang.

Aizawl-ah hian motor eng zat vel nge tlan thin ang?
Private motor hi 78,000 vel a awm a, sorkar motor hi 6,800 vel a awm bawk a, taxi ringawt pawh 5,000 vel a awm bawk a, kan kawngpui sei zawng hi kawngte reuh te te te nen vek hian 50 km pawh lo ni se motor tam dan nen chuan a inmil thlawt lo a ni.

Motor pakhat sei zawng hi a inang lo a, Maruti 800 hi meter 2 vel a nia. Motor 70,000 hi avaerage-in meter 2-ah chhut ta ila, chu chu din tirin a sei zawng tur chu km 140 vel a ni a. Aizawl atanga Silchar vel aia hla mah chu motor inzawm put daih an tlan reng tihna a ni! Aizawl khawpui tehchhuah vek pawha 50 km vela insulpel vel tur chuan a ngaihna a awm lo, tlan vek ta se Aizawl khawpui hi an bawhchhuak hneh ngawt ang.

Aizawl khawpui kawng sei zawng chu thuhran Bawngkawn atanga Kulikawn inkar hi 9 km a nia. Rush Hour lai ngat phei chuan nasa tak a ni.

Hmanni khan No Hornking Day in hmang...
Horn ri hi ‘noise pollution’ a ni. Hei hi a tihrehtheih dan kan zawng a, chu chu thil pawimawh tak pawh a ni. Aizawl te chu kan la vannei a, India ram khawpuia horn hmehrik tlem berna a ni hial ang. Horn pek leh a petu nih pawh hi zahthlakah i ngai ngam ang u.

Bosnia leh Kosovo-ah kum khat ve ve motor ka khalh a, chumi chhung chuan vawi 10 horn ka pe ansg em aw tih vel a ni. Horn pek ngai lo hian hawihawm takin motor hi a khalh theih a, hawihhawmna a pawimawh khawp mai.

Traffic Police te hian training an nei tha em?
Training chu kan pe tha thawkhat.. Senior tawh lam te phei hi chu thiam tak vek an ni a, a junior lam erawh la kaihhruai ngai deuh pawh anni ang.

A buaithlak lai ber chu Aizawl khawpui traffic thunun tur chuan thiam a ngai em em mai hi a ni. Entirnan Bazar Bungkawna phar dan leh Vaivakawn vela phar dan chu a in ang tlat lo. Motor a tam si a, traffic police te hi thiam tak an nih a ngai reng a ni.

Related Posts :