EI LEH IN ATANGA MAWINA

¢ Debbie Chawngthu

Bawnghnute hi a tangkaina tam tak kan hre tlang theuh ang a, ei leh inah phei chuan a hrisel ber pawl a ni. Vun ngo neih i duh chuan almond engemaw zah rawt sawm la, bawnghnute hmanga ti diakin i mut hmangin i hmai chiah nan hmang thin ang che. Chana dal hi bawnghnuteah zankhuain chiah la, zingah diak takin rawt sawm ang che. Chutah chuan turmeric powder leh sertui telh leh la, i hmaiah hnawih ang che. Darkar chanve i chiah hnuah phihfai leh la, i vun a ngo sawt mai ang. I vun lang tharlam tura i duh chuan bawnghnute fianlian khatah carrot rawt sawm fiante khat, serthlum tui leh khawizu chhuan sat pawlh la, i hmaiah hnawihin minute 20 hnu ah i phihfai leh thin dawn nia.

Face mask i siam duh chuan dawnfawh, fanghma chi (seeds) rawt sawm fiante chanve leh bawnghnute chawhpawlh la, rawt sawm ang che. A diak that hnu ah bawnghnute fiante chanve leh rosewater tlemte far leh la, i hmaiah hnawihin minute 20 chhung chiah nan hmang ang che. Olive oil fiante khatah masoor dal fiante khat kang ro la, a ut sen that hnu ah bawnghnute telhin rawt sawm ang che. A diak that hnu ah i hmaiah hnawih la, a ro that thleng nghakin dim thei ang berin i kutin nuai thla ang che. A fai tha thei lo chu tuia sil mai tur a ni.

I vun a thak thin anih chuan mustard fiante khat rawt diak la, bawnghnute khat fianlian khat telh rawh. Chumi chu i vun thak thin laiah chuan hnawih la, minute 20 hnu ah i silfai leh dawn nia. Sandalwood leh bawnghnute rawt diak la, turmeric powder fiante chanve telh bawk ang che. Hei hi i hmai minute 20 chhung chiah nan i hmang dawn nia. I vun a ro a a thap anih chuan bawnghnute khar fianlian hnihah almond oil fiante khat leh rosewater tlem far la, i vun ro laiah hnawihin darkar chanve hnu ah i phihfai leh dawn nia.

Artui hi vun ro leh chuar tawh enkawl nan a tha em em a. Artui pakhat chawk phuan la, i hmai leh nghawngah mask angin hnawih ang che. Minute 20 chhung nghah ro pahin mu hahdam la, tuiin tleuhfai leh ang che. Artui hian vun kua a tizim thei a, a ti nung thei bawk. Chhuna hah taka hna i thawh zawhah zanah inhnawih thin la, i harh sawng sawng mai ang. Artui var lai hi vun tih faina atan a tha hle bawk. Artui hi hmai hnawih atan chauh ni lo, sam tan pawh a tha em em a. I sam i suk hma darkar chanve velah i samah tat chhuak vek la, i sukfai hnuah i sam a danglam dan i hre mai ang.

Vun ti hnawngtu tha ber chu khawizu hi a ni a. Vuna hnawihin vun a ti mam a, a ti nem bawk. Vun mawm nei i nih chuan artui var lai hi phuan takin chawk la, khawizu nen pawlhin i hmai chiah nan hmang ang che. Vun ro tan erawh chuan cream tlem nen chawhpawlh tur a ni. I taksa a chauh riau chuan i inbualna tur tuiah khan khawizu tlem telh la, i hahdam sawng sawng mai ang. Tin, khawizu hi hritlang damdawi tha tak a ni a, fiante hnih thum ei mai tur a ni.

Tomato hmun hnihah zai phel la, i taksa dum lai bik nawh nan hmang ang che. Minute 5-8 chiah la, tuilumin silfai leh ang che. Regular taka i tih peih chuan i taksa dum lai pawh a var sawt mai ang. Tomato bakah nimbu hi atha khawp bawk.

I vun mar nalh tura i duh chuan artui var lai hi chawk phuan la, chu chu i hmai chiah nan minute 20 chhung hmangin tuilumin i phihfai leh dawn nia. Mit vun bawr hi a chuar hma bik a, lang lo tura i duh chuan artui var lai hi brush te hmangin i mit vunah hnawih la, a ro hnu-ah make up hnawih hnan ang che. Khawizu tui pawlh loh hi face mask tha tak a ni a, thingfanghma tui pawh hi minute 5 chhung i hmai chiah nan hmang la, a tha khawp mai. Carrot leh tomato hi chhum pawlh la, chu chu rawt diak la, i hmai chiah nan hmang thin ang che. Minute 30 chhung i chiah ang a, lapua bawnghnute-a chiahin i hrufai leh dawn nia. Hei hian vun a tih that mai bakah vun a ti fai bawk a ni. Hmai enkawl khat lutuk chuan vun a mam loh mai bakah a khawng ur duh a, chutianga i vun a awm anih chuan olive oil emaw almond oil han inchulh la, chutah tuilumin dimtein hru la, chumi hnuah sertuiin hru leh la, minute rei vak lovah i kut zungtangin i hmai nuai la, i vun a bal anih chuan a fai sawt mai ang.

Related Posts :