Builum leh kei

¢ PB Lalrammawia

Tunhma chuan Mizoramah larna a nei lo, mahse, tunah chuan Mizorama khaw lar berte zinga chhal ngam a ni, a lar dan erawh a lawmawm lam ni lovin a lungchhiatthlak lam a ni, Builum khaw lar dan hi.


Thingtlang khaw tam tak ang thovin Builum khua hian kawlphetha chakna a mamawh. Builum khua hian eng a mamawh ngawih ngawih a, mahse, a mamawh em em eng chu a dawngtu ni lovin a pechhuaktu tur a ni ta hlauh thung.

June ni 10, 2009 khan Builum khua hi human rights activist Ruatfela Nu hnungzuiin ka tlawh ve a. Builum khua kan tlawhna chhan hi eng dang vang ni lovin, hmasawnna ruhrel lianpui maiin Builum khua chu a dawlh mek a, a chhunga cheng chhungkaw 24-te pawh a dawlh tep tawh tih thuthang kan hriat vang a ni.

Mitinin kan mamawh em em kawlphetha chakna siamchhuah nan tui khuah a ngai a, tuikhuah chuan mihring chenna khua te, thlai chinna huan zau pui pui te a chim ngei dawn si. Mahse, democracy ramah chuan sorkar dan hi a ngilnei em em mai a, i huan thlai, in leh lo hlut zawng ang kha a chhutchhuak ang a, a pe mai ang che. Chu bakah chhawmdawlna chi hrang hrang nen a la umzui bawk ang che. Mahse, engatinge Builum chhungkaw 24-te hian tui chimhlum pawh pawisa zo tawh lova khua an chhuahsan duh loh?

Sorkar hian hleih nei takin thil a ti ta mai em ni, hnai lo e; sorkar dan chuan thlei bik neiin ro a rel ngai hlei nem, thil dik lo a thlen fo avangin hetiang tawrhna thil hi a thleng thin mai niin a lang.

Darkar hnih deuhthaw kan tlan hnua kan luhna Builum khua chu Kolasib thlang Bawktlang bul kawng peng atanga Km 17-a hla a ni. Kawng a chhiatzia sawi hman ka ni lo, Gypsy lo chakzia leh lo thatzia erawh ka hriatchhuah phah.

Builum kan thleng a, Serlui kama awm a ni a, boruak pawh a lo lum zawk a. Di in chhe te tea lo inkhungkhawm nunaute chu an lo dak hiang hiang a, thawmhnaw inbel mumal pawh an awm lo. Builum khaw sangha man thiam, Peter-a an tih mai Pu Zoramsiama chu khawtlang hruaitu kan hmuh hmasak ber a ni. Kan duh a hria a, tuiin a chim chhiat mek huan leh leilet hmun lam panin min hruai a. A hnuah khawtlang hruaitu thenkhatin min rawn fin a, naupangin min zui dal dal a.

Leilet hmuh tur a awm tawh lo, teak kung te, kuhva kung te chu hmuh tur a la awm a, a ler lam chu. Tuiin a chim hma kha chuan kuhva rah lo turin mautlawn sei taka hawlh a ngai thin, tunah chuan mau tlawn an tel khawm a, chu chu Mau pum an ti a, tui chungah a lang a, chuta tang chuan duhtawkin kuhva rah pawh a lawh phak tawh. Mau pum-ah kan chuang a, leilet chung zawnah kan tawlh kual a.

"Kan in chu tunhma chuan mual pawng chunga awm a ni a, tunah chuan thliarkar a ni ta a, saw lamah sawn a awm," Pu Zoramsiama chuan a ti a.

Mau pumin kan inkar phei a, Mau pumah naupangte'n chuankai ve an tum a, upa lam chuan, "Nangni chu mau pumah in leng lo, rawn hleuh phei rawh u," an ti mai a! A khuaah chuan an thawl hle a, mahse, an leng tawh lo. Mau pumah takngial pawh naupangte chu an leng lo a, hmun an chang lo, tui an hleuh a, min rawn zui ve zel a.

Mau pumah chuan Builum khaw pa, a hmel han en thuak pawha a kum zat tur rin dik harsa vak tawh lo tur khawpa upa tawh hi kan chuanpui a. Builum khaw sattu, a orginal zinga la dam awmchhun pahnih zinga pakhat zawk a ni. Pu Rokhuma chu kum 70 chuang a ni tawh a, mau pumah chuan a thu tung a, a khup chungah a khabe a chhuang a, kan inkawm ta a ni.

A chanchin leh Builum khaw chanchin min hrilh a. Builum khua, kum 1942 atanga mei mit lova a lo awm dan te, hna an thawh nasat thinzia te, tuikhuahin an khua a chimpil mek chu hmuh hrehawm a tih thu leh a rilru nat thu te pawh a sawi.

A aw chu a zawi hle a, mahse zangnadawmna an hmuh tur ang an hmuh loh thu leh huan lo-ram nei fumfe lo zawkin an hmuh tur aia tam, a let tam taka an dawn hlauh zawk thu erawh chiang takin a sawi ri thei.

Hetiang bawk hian Builum khaw dintu Pu Laithuama, kum 81 mi pawhin a ram hlut dan sorkar lamin an chhutsak chu awm lo lutuk a nih avangin a la duh ta lo niin a sawi bawk. "Tuiin a chim dawn lo an ti a, a chim mek si," a ti.

Khawmual pakhat kan chuangkai a, kan innghak khawm a. Naupangho pawh an rawn thleng chawpchilh ve nghal mai a. Engatinge sikul an kal loh tiin ka ngaihtuah a, mahse zawhna atthlak tak a ni. Sikul kal lovin kum hnih leh a chanve an lo awm tawh.

Ka han zawt chiang a, khawtlang hruaitute chuan kum 2006 atanga sikul an neih tawh loh dan min hrilh a. Sorkar order anga Bawktlanga insawn tura hriattir an nihna chu an hai pawh a ni bik lo, mahse an chan tur ang dawng lova Bawktlanga insuan chu an tan awmzia a awm lo a, thirbel sa atanga meipuia zuanluh ang hialah an ngai; an innghahna ber, an chawbel hu tal sum an dawn loh chuan!

Sangha man thiam Pu Peter-a te chenna in awmna lam pan turin mau pumah bawk kan chuangkai leh a. Naupangho pawh a ngaite bawkin an rawn hleuh phei leh a. TV leh chanchinbu thenkhata thlalak kan hmuh thin, Serlui chunga lei inkhai (suspension bridge) chu hmuh tumin ka hawi kual ruai a, mahse hmuh tur a lo awm tawh lo. Lei khaitu thir hrui inbah liamna thing ban sang tak thin kha tuiin a lo chim pil mek a. Teak kung thenkhat chu tuiin a chim pil tep tawh bawk a. Tui chu a dam dup mai a, mahse a tihbaiawm ru tlat thung!

VCP chenna inah kan lut a, kei chu ka kawlhrawng fal deuh a, chu thliarkar chu fan kual ka chak tlat. A khawmi pakhatin min hruai a, naupang hovin min zui dal dal a.

"Mami, sikul kal loh chu hreawm i ti em?" tiin an zinga pakhat chu ka zawt a. A zak deuh a, a kimki chaih chaih a; "Aw" ti ringawtin min chhang a. Theihai kungah an lawn a, kekawrte chauh ha an ni bawk a, seh theitu apui an tam a, an inhiat sarh sarh reng a. Kei pawh fanghmir chikhatin min luhkhung a, min seh a, kekawr chhanah ka inhiat ve nasa mai.

Naupanghovin theihai hmin sawithlak tuma theihai zar an suk lauh lauh lai chuan hreawm ti awm pawhin an lang lovin ka hria. Mahse, zanah an han mu ang a, an rilru chu a vak thui ve thin khawpin ka ring. Khum laizawla an nu leh pate rilru hah rum dat dat thawm pawh an hre fo ngei ang. An rualpui te chuan lehkha an zir ang a, zanah 'homework' an ti ang a, a tukah sikul kai turin an insiam leh sang sang thin ang a, chutiang dinhmuna din chu an awt ngawih ngawih ang. Tuna an thiam thil chu tui hleuh leh thing lawn a ni a, chu chu an hmalam hringnun kawng an zawhna turah a hman tangkaina a tam lo ngawt ang!

Upa lam ka han mitmei ru leh a, tui chim phak bak phaitual hnimah an thu ngawi vang vang a, AR Lammuala inkhel tur lam an suangtuah hauh lovang tih a hriat reng mai. Kum tam tak an eibel ber, hah thikula an lo sualchhuah, an damchhunga an innghahna awmchhun, tuiin a han chim duai duai mai chu, hmuh har an ti a, en hrehawm an ti. Chutih laiin an innghahna ber pakhat, a hming pawh an lam thiam mang loh 'compensation' lah chu pha leh pha lovin an ban ve tawk tawk a, an la ban pha mang si lo.

An chunga thil thleng mek hi an zawmthawt vang te, an inthlahdah vang te, an thatchhiat vang te a ni hauh lo, taima takin an thawk a, sawrkar puihna dawng mumal lovin mahniin an damkhawchhuahna tur chu an sual chhuak ve nameuh mai. Mahse an eibel ber chu khawvel hmasawnna rahbi atan hman a lo tul tak vang mai a ni.

Hmasawnna rahbi-ah an tang a, rahbeh kher tur tihna an ni chuang lo.

(A ziaktu hi The Aizawl Post Joint Editor a ni.)

Related Posts :