¢ Tuikhuahthanga
An sawi teh chawk bawk a, khawnge zu chung chang hi i han tuihnih ve teh ang. Zu zawrh that leh that loh lam te, kohhran ngaihdan lam te sawi ka tum lo va. Mahni lawina kohhranah pawha bawih thahnem lo tak nih laia, Synod ngaihdan emaw a do zawng emaw a lo tlangau chu ka tih loh tur ti ka ni dawnin ka hria a. Kan hla thu in ka tih loh tur ka ti a, sualah ka lo tlu a, a tihte pawh ngaihtuah a ngaiin ka hria. Tih loh tur ti hi kan ramah hian kan tam viau mai a. Kohhran hruaitu ni si a, eiru tlat te, Kohhran ni reng si a sawrkar rorelna a inrawlh a thuneih tum tlat te, NGO ni si a sawrkar kaihruaitu emaw inti a, tam chhuanga sawrkar chunga thuneih tum tlat te hi tih loh tur ti a suala tlu te pawh an ni ve mai awm e.
Ka sawi tum tak zu ngaihhlutna lam hi a ni. Rangvamual leh Phunchawng lam hi ka sawi tum tak pawh a ni lo a. Phai ram atanga sen chi lo lut hlu ta em em mai hi a manganthlakin kan ram tan a tha lo hle in ka hria a. A sen chi anih dek dek tawh chuan um khat Rs 500 atanga 700 vel a ni tlangpui a. Pi pu hun lai atanga kan chanchina zu in hmun a luah pawimawh reng ang tho khan tunah pawh Mizo nunah hian zu hian a rukin hmun pawimawh a la chang reng niin a lang a. Zu khap burna dan kenkawhna ramah hian zu chu ngaihhlut a lo ni chho zual ta zel a. A hmang tangkai thiam phei chuan Chhura sekibuhchhuak ang hialin an hmang ta niin a lang. Mizoram chief minister hlui Laldenga khan zu chu a hun lai khan THIL a ni a ti thin a. Tunah chuan Thil ni mai tawh lovin kan thlaite nghaihtuahnaah hian THIL HLU ni ta hialin a lang a ni. Contractor pakhat chuan “officer hnena pawisa fai cheng sanghnih sangthum pek ai chuan a sen chi umkhat pek an lawm zawk daih” a ti a. Pawisa fai chu neih dan kawng an nei deuh a, zu erawh chu han zawn duk duk te a zahathlak a, in duh bawk si, midang mitmei veng bawk si tan chuan a ruka neih chu a lawmawm viau pawh a ni ang. Lehlamah contractor tan hlawkna a lo ni leh bawk si. Zu chu hmanraw tangkai a ni.
Hmeichhia leh mipate hi tunlai Mizoramah hian zu ah chuan kan inthliar lem lova. Nula ho hian an in duh tlangpui a. Vantlang hriat erawh chu an duh hauh lova. Chutianga a ruka in tur chuan an sawm kal theih tlangpui a ni, tiin hetiang lama hrat ve tak pakhat chuan a sawi a. A bik takin a rim na lo chi Vodka lam hi hmeichhe ho hian an lawm zual a. Pa tam tak chuan hmanraw tangkai ah an hmang mek zawng anih hi. “Vodka ka nei asin lo leng lawk la, han ti ila. Ka thiannu nen kan lokal ang an ti thuai zel a ni,” kan thianpa chuan a ti. YMA hruaitu pakhat pawhin an veng zaipawl tan ruai a theh sak a. A tukah ka hmu fuh hlauh mai a. “In ruai ei chu in tlai em” ka ti a. Ani chuan “kan puar e, mahse a thil lam kha ka lo inring tlem deuh a, hmeichhe ho khan an lo duh ve vek si a, rin aiin kha lam kha kan phang ta deuh alawm mawle” tiin min chhang a.
Silchar tlangdunga awm thin excise hotu pakhat chuan “kan zu man sa hi kawl chin a awm lo thei lova, kan kawl a ni tih hria a hmelhriat min diltu hi an tam em em mai a. Pawl anga chaw eikhawm tur hi chuan dil ngei ngei turah min ngai niin ka hria. Pek loh hleihtheih pawh an ni bik lo. Kohhran committee chaw eikhawm ho hian min dil lova a ni deuh mai” tiin tumkhat chu min hrilh bawk.
Silchar kawng lama khualzin ho huphurh ber chu Vairengte gate hi a ni a. Sawrkar department hrang hrangin gate an neih fur laia a lar ber chu excise gate hi a ni a. Mipui nawlpui hi chuan department dang gate hi a awm tih pawh an hre mumal awm love. He gate kaltlanga zu hawn hi khualzinte tum ber pawh a ni. Man lah an man tam, man loh pawh a tam nangiang. Zoram gate lar ber nih a hlawhna chhan chu zu bawk a ni.
Thingtlang lamah hian sipai ho camp lam hi a lun deuh a. Sipai officer in khawchhung pa an kawmngeihna hmanraw pawimawh ber pakhat chu zu hi a ni bawk. Mizo rilru hi an hrechiang viau zel zawng anih hi maw. A bik takin Lunglei lamah hian zu a to zual a. Umkhat Rs 700 ah a intan deuh vek niin sawi a ni a. Chumi kara zu mamawh bawk si a sipai officer kawmngeih chu a tangkai ngawt ang le.
Lengpui airport a duty pakhat chuan “thlawhna a bungraw lo thleng hi en vek ta ila suitcase tam zawkah hi chuan zu a awm ang, a chhan chu an suitcase hi a hmel en aiin a rit vek mai a, tihpalh thil thu a suitcase hnam ta tuam tuam te pawh a awm fo a ni” a ti bawk. Mahse, khap burna dan chuan a sen chi chu mi naran ban phak lovah a dah a. A duh ve tan chuan a ti thei deuh leh a rem hre deuh, pawisa nei deuh biak that mai kha a kawng awmchhun a ni si a. Zu chu a lo hlu tam em em mai a. Thil hlu hauh lo, mi ramah mi pangngai chuan an kalpelh mai mai kha a nei thei chu an lo inti thei a. Inti thei lo thei loah danin a siam a ni zawk mah awm e.
Zu enkawl dan hi kawng hrang hrang a awm. Pakhat chu tuna kan hman mek khap beh bur hi a ni. Mahse, a ram mipuiin an lawm em em khap beh chu a harsa viau a ni ang. Vawiin ni thlengin kan la buaipui chu a ni a. Tin, khap bet tlat tur chuan kan excise department mi leh sa neih hian a tlin lo hrim hrim Mizoram pum enkawl turin a hotu ber a tanga a hniam ber thlengin mi 400 vel chiah an awm. Engtinnge an tlin ang? Kan khap bet duh tak tak a nih chuan a thawktu hi mi sang tela tihpun a ngai ngei ang a, tihpun kan cho em aw?
A dang leh chu ngaihhlut hauh loh hi a ni. Mahse, Mizoram mipuiin an ngaihlu mek chu a ni si. Ngaihhlut loh dan i inzirtir ang u, han ti ngawt dawn ila mi thil ngaihhlut ngaihlu lo tura inzirtir theih lah chu a ni si lo. Chanchinbuah a that lohna kan ziak kur liai luai a, mahse, a thawk na mang hlei lova. Thil hlu nilovin, thil ah khan tawp se a tha a ni ber mai awm e. Engtin chuan kan ti dawn ni maw le?
No comments:
Post a Comment