July ni 20, 2007-ah khan MPCC te chuan kuthnathawktute chawikanna leh retheite chhanchhuahna tur tia 2008 inthlanpui huna mipui hnena an zawrh tur NLUP chu an tlangzarh a nih kha.
MPCC president Lal Thanhawla chuan thu sawiin, NLUP chu tunhmain an lo kalpui tawh tih a sawi a, "Khatih lai khan bul tan tir kan nih avangin sorkar lam leh mipui lam pawhin tih dik tawk loh leh felhlel a awm ang tih kan ring," a ti.
Chutih lai chuan MPCC chu eptu pawl an ni a, an president pawh MLA fang a ni.
2008 inthlanpuiah hnehna changin Congress chuan sorkarna an siam ta a, MPCC president chu Mizoram chief minister a lo ni ta.
April ni 30, 2009-ah, Mizoram chief minister a nih hnu-ah MPCC president Lal Thanhawla chuan Chief Minister Office-a Conference Room-ah thuthar lakhawmtute a kawm a, NLUP-ah an sorkar hmasak lai khan an hlawhchham tia puhna chu a pawm loh thu a sawi ta thung.
"Sorkar chu a thutiamah a ding a, chhungkaw sing tel hnenah rahbi tuksakin NLUP pawisa a sem a, nasa takin a hlawhtling a. A dawngtu mipuite an rinawm loh vangin an hlawhchham mai a ni," a ti.
Eptu pawl an nih laiin Congress president chuan NLUP hlawhchhamna a pawm a, sorkar leh mipui thiam lohah a ngai ve ve. Sorkar-na an siam hnuah erawh Congress president chuan NLUP chu a hlawhtlingah a ngai ta thung a, a dawngtu mipui zinga a rinawm lo an hlawhchham mai niin a ngai ta. Thuthmun sawn hian ngaihdan a thlak thei a ni ngei ang.
Tuna health minister ni ta Lalrinliana Sailo pawhin eptu pawl an nih laiin NLUP a hlawhchham tih a pawm thu a lo sawi tawh.
December ni 19, 2006-ah khan Zawlbuk Group te'n "Mizoram Perspective 2026" tih thupuia hmangin seminar an huaihawt a, sawihonaah Congress MLA Lalrinliana Sailo chuan an party sorkar laia an policy pui ber New Land Use Policy (NLUP) chu a hlawhchham tih a pawm thu a sawi a ni.
Economic Development chungchanga sawiho tura chhawpchhuah pakhat MIP leh NLUP te sawiin Lalrinliana Sailo chuan, NLUP hi mi thenkhat lo hlawhtlinpui awm mah se a pumpui thuah chuan a hlawhchham tih a pawm thu a sawi a, a kalpui dan pawh dik a tih chiah loh thu a sawi nghe nghe.
Hemi tum hian sawihona hunah KC Lalliana, Mizoram Cultivators and Labours Union (MICLUN) president chuan thu sawi vein, Mizorama development programme leh project te hlawhtlin theih lohna chhan chu officer te corrupt vang nia a ngaih thu a sawi a, MIP leh sorkar hmalakna sum pekchhuah dan pawh politician-te hian thil engmah tak tak hriatpui lo leh inhnamhnawih lova, officer te'n an duh duha lo ti vela, lo tichingpen thin nia a ngaih thu a sawi.
He thu hi sawi chhunzawmin Lalrinliana Sailo chuan, sorkar hmalakna hlawhchham \hinah hian politician-te chu mawhphurtu ni ngeia a pawm thu a sawi. Mawhphurtu nih ngam tura a inngaih thu leh thil dik loah hian mipuiin lo kawk pawh ni se awm a intih thu te pawh a sawi.
Tuna minister ni ta, Congress party hruaitu Lalsawta pawhin KC Lalliana thusawi chungchang sawiin, sorkar sum reng reng hi minister te hriatpui loha hman theih a nih loh thu a sawi a, "An hriatpui loh chuan bang sela a ni mai alawm," a ti.
Lalsawta chuan sorkar hmalaknaah reng reng a thlawna sum inpek chu hlawhtling ngai lova a hriat thu leh a hlawhtlin a rin loh thu a sawi bawk.
"Keini'n tun hma tun hnu kan ti, nangin tun i ti fo..."
No comments:
Post a Comment