¢ HC Vanlalruata
Hmanlai khawvel lal ho khan an lalna kha Pathian atanga an chanvo dawn niin an sawi thin a. Political Science zirte chuan ‘Divine Rights of Kings’ chu in hre hne hlei hlui ang chu. Mahse, tunah chuan khawvel ram tam zawkah lal ban a ni tawh a, a la chhawm zui United Kingdom te pawhin an lal kutah thuneihna tak tak an dah tawh lo. Mipui rorelna hi inrelbawlna tha berah kan pawm a. ‘Divine Rights of Kings’ kha ‘Divine Rights of Individuals’ a lo ni ta a ni.
Chuti chung chuan democracy hi divine rights of mob emaw ti pawl kan la awm a. A tam tam thuneihna hi democracy a ni lova, mimal tin zalenna ram hi democracy dik tak chu a ni.. Tlem lai deuh khan tam chhuanga mahni kut zala dan kenkawh ching kan tam em em a. Dan (law) leh dan rorelna (rule of law) hian awmzia a nei tawhlova, thuneitu (authority) zahna chang pawh hrelo khawpin kan awm a. Mipui rorelna (democracy) pawh a tam tam leh a pawr thei thei-in an duh ang anga dan an kenkawhna (mob rule)-ah kan chantir titih tawh a ni. A chhan chu tam chhuanga a duh duhin dan an kenkawhna chu ‘democracy’ ni lovin ‘anarchy’(rorelna mumal awmlo) tihna a ni dawn a. Mihring leh mihring inawp hi a diklo nia ringtu (anarchist) te’n an duhthala chet an thawhna hmunah kan siam dawn tihna a ni bawk.
Dan zahna leh dan rorelna zulzui-a kal hi democracy lungphum pawimawh ber a ni a. Chumi thuthlung innghahna chu chhia leh tha hriatna, sap tawnga ‘reason’ an tih hi a ni. Mihring thlahtu nia Bible-in a sawi Adama leh Evi te kha an bawhchhiat hnu khan chhia leh tha hriatna an lo nei ta tih kan chhiar thin a. Kha chhia leh tha hriatna kha fim leh dik taka kan hman phawt chuan kan ram zimte hi ram nuamah kan siam ang a, chutiang zela kan tih chuan khawvel pawh hi a nuam zual zel dawn a lo ni reng mai.
Mahse, chu chhia leh tha hriatna chu bosala zauthauna (emotion) emaw hmanga kan kal chuan a chhan chu engpawhnise kan buaina zakhua tur a ni dawn a ni. Chhia leh tha hriatna tel hauh lova sakhaw ruihchilhna thinlunga phawklekna leh zauthauna te angin a hrin chu Iran ram inkaihhruaina ang chite, Taliban ho chet dan ang chite kha a ni.
Hman deuh tawh khan kan Presbyterian Kohhran Moderator-in (tunah chuan a pension tawh) Geneva-a khawvel huap Pastor khawmpui-a a kal chungchang a sawinaah ramdang pastor-te’n chaw ei hmaa zu chi hrang hrang tha tak tak an in huai huai thu a sawi a. Min fiam hlut hnu-ah Mizorama zu khapna dan chungchang kan sawi kai a. Ama mimal ngaihdanah chuan zu khap hi tul a tihloh thu leh awmze neia thunun erawh chu thaa a hriat thu a sawi a. Kei lah chuan ka’n chhuahchhal nghal mai pek a: “Kan Kohhran hruaitute hian mimal taka in chhia leh tha hriatna in hman chuan ‘ti hian in sawi a, a hu hova in awmkhawm a, Synod Committee-in neih chuan pawr takin zu khap thatzia in sawi leh lawi ziah si a,” ka ti a. Min hnial thuilo viau.
Mizote hi kum 40 bawr lek chhunga kan la hriat ngai reng reng loh sakhua ‘Kristian’ a inlet vek thei khawpa hnam rilru nghetlo kan ni a. Chu mai bakah chuan kan hnam ziarang (custom leh culture) bakah kan hnam nun tha ‘Zonunmawi’ kan tih mai (cultural values) bosal thak khawpa khawthlang lam mingo ho zia senglut hnam kan ni. Hei hian Mongolian thlahte chu rilru-a belebut awlsam (emotional) nia miin an sawi thin hi a nemnghet chiang khawpin ka hria.
Khum laizawla patlingin tha leh thalo ngun tak leh rilru fim taka a ngaihtuaha a thutlukna siam hi a huhova haw haw-a kan beih emaw chuan a thutlukna lo siam ruk kha a thlak daih thin. I awihlo a ni mai thei. Mahse, khai aw - JAC/SRS member phusa tak kan nihnaah chuan khawtlang pawikhawih emaw pawisawi emaw nia kan hriat chu kan vaw hrep mai a, YMA (SRS ni lovin) nihnaa kan punkhawm chuan vin deuh mah ila tha takin kan zilh a (tunhma deuih kha chuan). KTP nihnaa kan kalkhawm chuan kan tawngtaisak thin. Chu Mizo chu mi pakhat a ni a, JAC-ah a tel a, YMA member a ni a, KTP mai bakah Kohhran Zaipawl member a ni bawk. Chutiang chu kei chuan ‘lemchanna’ ka vuah a, mahni chhia leh tha hriatna hmang ngam lova mi phawklek hmate ziaah ka puh a ni.
Hei hi chu a tha a, hei hi chu a thalo tih thutlukna siam thin hi hnam changkang an ni a. Khawvela hnam changkang kan tihte sawi danah chuan ‘suahdur hi chu suahdur a ni mai’ tihte, ‘a dum chu a dum, a var chu a var’ tih a ni. Chutianga chhia leh tha hriatna, a chhia leh a tha rilru fim taka thliar hran theihna chu Mizote mamawh lian ber a ni a. Chumi atang chuan thutak leh thudik kan hria anga, chu chuan phur hlut vanga pawikhawih thinna bawih atangin min ban dawn a ni.
Miin sakhaw hming chhala tu-in emaw mi a buma thihna hial emaw harsatna engpawh a mihring pui laka a thlentir chuan hrem tur a ni a, mahse, mi tupawhin a sakhaw duh a vawn theihna chanvo chu zah sak tur a ni a. Midang harsatna a siam sak loh chhung chuan a duh ang taka a sakhua chu a biak a thiang a, a duh duh ang sakhuaah a inleh a thiang bawk. Muslim a nih chuan a duh leh ‘Allah, O, Akbar!’ (Pathian chu a ropui e) tiin a au thiang a, midang tana bengchheng a siam erawh chu dan kalh a ni. Kristian a niha Bible chang ami la chhuaka pulpit tlang atanga ‘Rul thlah te u..’ tia a thusawi ngaithlatute pulpit tlang a ben khum pawh a thiang a, mahse zanreha mi mu duh tawh mu theilo khawpa aurinna hmanga aukhum erawh chu a thiang bik lovang.
Hetianga chhia leh tha hriatna (reason) chungchanga sakhua ka bitum bikna chhan hi eng dang ni lovin khawvelah hian chhia leh tha hriatna bo thak khawpa sakhaw atchilhna-in min bualat avang leh a bik takin Mizoramah pawh chu chu kan buaipui nasat ber pawh a nih vang mai a ni. Chumi piahah chuan kan sakhaw (kohhran) hruaitute’n sorkar sedai thiata an duhdan sorkara barhluih an tum luat dan ka hmuh chian vang pawh ni fa hmiang.
“In God We Trust” tih thupui-a an hman avang khuan United States sorkar ropui khu Kristian sakhaw pawm ram leh sorkar emaw kan lo ti ngawt ang e. Sakhaw bil ruihchilhna leh polititics thuneihna kalkawp hlau bertute an ni. Kum 1797 khan US Senate chuan hemi chungchangah hian thutlukna siamin President John Adams-a’n a ziah hnan chu thutluknaah chuan, “United States hi Jewish emaw Mohammedan sorkar a nilo ang chiahin Christian ram pawh a ni lo,” tih an puang a ni. US-in lal lalna British Empire hnuai atanga zalenna a hmuh khan lal lalna kawl an kheng thla satliah a ni mai lova, an inrelbawlna chu mimal zalenna lungphuma nghatin chhia leh tha hriatna chu an sakhaw vawn ta bur mai a, ram ropui tak a lo ding chhuak ta a ni.
US Vice President hlui Al Gore khan heti hian a ti: “Kan ram democracy tikaltu pawimawh berah hian thlarau khawl a awm a, mahse hei hi ‘thianghlim’ tih tello thlarau a ni a. Chu thlarau chu chhia leh tha hriatna dik a ni,” a ti a. Chu thlarau (chhia leh tha hriatna dik) changtu mipuite chu ‘well-informed citizenry’ tiin a vuah a ni.
No comments:
Post a Comment