Lei enkawltu

¢ Lalhruaitluanga Chawngte

Lui lian deuh mai hi a awm a, a chungah chuan lei (bridge) a indawh khamphei put mai. Rel a rawn tlan changin chu lei chu a zawh a, lui chu a tlan tlang thin.

Chu lei chu engtik lai pawha indawh a ni lo, vaukamah chuan an tluk a, rel rawn tlan changin a enkawltupain khawl hmangin a lo dawh thin a ni.

A enkawltupa chuan nilengin a thutchilh a, rel rawn tlan hunah lei chu khawl leh kawlphetha chakna hmangin a lo dawh thin. Relin lui a tlan tlang hnuah a sut leh a, chutiang chu a hna a ni.

Ni khat chu, tlai lam a ni a, lei enkawltupa a hna chu a thutchilh ran mai. Rel a rawn tlan leh ang a, chumi ni-ah chuan rel dang a rawn tlan tawh dawn lo, a haw ve thei tep e.

Nakinah chuan rel chu a rawn tlan ta; ral khat atang chuan a rawn thum tluk tluk mai. Lei enkawltu chuan relin chuti lai chu a thlen chiahah lei hi dawh tur tiin engkim a hre sa vek a, a lo inring ta ran mai a ni.

Lei chu lui ral lehlama dawh phei a hun ta. A enkawltu chuan khawl chu a'n khawih a, mahse, khawl chu a chiang ta hauh lo mai.

Lei chu ral lehlamah a indawh phei ngei a, mahse, a lo zawmtu tur nen a intawng fuh lo tlat. Chuti a nih chuan rel chu luiah a tla daih ang. Rel lah chu khualzin phur a ni a, mi an chuang hnem nasa mai si!

Hmanhmawh takin lui ral lehlam panin leiah chuan a tlan phei ta a, karfung va lak a tum a ni. Chu karfung hmang chuan tha tawpa a beih chuan lei chu a inzawm fuh chat thei ang tih a beisei a, chutia a tih loh chuan rel chu a tla dawn tlat.

Rel lah chu a rawn hnai tial tial a, lei enkawltupa chu a hmanhmawh hle. Karfung chu a va la ta. Theihpatawpa chakin a tlanlet leh nghal.

Karfung hmang chuan lei dawhna chu a kar ta ngat ngat mai a, a tha chakna bakah a taksa rihna thlengin a hmang a ni. Lei chu ral lehlama lo zawmtu tur nen a inzawm theih nan a kar ta tang tang mai, a kutah mi tam tak nunna a innghat tih a hre bawk a, a tang ngat ngat ngang mai.

Lei leh a lo zawmtu tur chu a inhmu fuh lek lek tawh a, rel pawh a rawn thleng lek lek tawh. Mahse, thawm dang a hre ta tlat mai.

"Pa, A-pa, khaw'nge i awm?"

Ral lehlam chu a'n hawi phei a, lei-ah chuan naupang pakhat hi a lo hawi vel ruai mai! A fapa a ni.

Karfung la tura a ral lehlama a tlan phei kha, a fapain a lo um a ni ngei ang. Ani lah hmanhmawh phelengin a tlan let leh nghal a, a fapa pawh a lo ngaihsak hman si lo. A fapa chuan a pa chu a hmu lo a, a au vel ta ruai mai a ni.

A fapa chu va pawm sawn a tul. Mahse, a fapa la tura a tlan phei a nih chuan a thil kar chu a thlah a ngai. A thlah a nih chuan lei chu a inzawm fuh lo ang a, rel chuan ral lehlam a thleng lo ang. Tuiah a tla ang a, khualzin zawng zawng an thi thei hial ang.

A thlan chu a tla bawrh bawrh a, a chau tawh hle. A ban te chu a kham lutuk a, a thil kar lai chu thlah daih mai a duh. Chutah a fapa chu rel tlanna turah a ding lehnghal!

A fapa nunna nge a ngaih pawimawh ang khualzinho nunna?

Rel chu a rawn tlan thleng a, tluang takin lei chu a zawh ta. Khualzinho chuan lei enkawltuin an tan eng nge a tih reng an hre lo. Anmahni vangin thi lo chauh khawpin a chau a, a let tawp tih an hre lo a, a fapa an su tih an hre hek lo. Tluang takin an tlan zel a, lei enkawltu erawh tap chungin a haw a, a thil tih leh a fapa chungah eng nge thleng tih chu a nupui hnena sawi a huphurh hle tih te chu an ngaihtuah pah lo hrim hrim.

Khawvel tan Pathian-in eng nge a tih tih pawh hi mihringte hian kan hre lo thin. Chatuan nunna nena kan inzawm theih nan kan inkarah lei a dawh a, chu chu a Fapa-in a thih phah tih pawh kan hre lo thin.

('The Bridge Keeper' tih lehlin a ni a, a ziaktu hriat a ni lo.)

Related Posts :