April ni 1, 2008 leh March ni 31, 2009 inkara Mizoram budget-ah khan sorkar hnathawk hlawhah cheng vaibelchhe 708.37 a kal a, chu chu revenue expenditure atanga 34% zet a ni. Budget sum hman ral zawng zawng atanga chhut chuan (total expenditure in the consolidated fund) 27.73% a ni.
Mizoram sorkar hian ama thawhchhuah tlem a zawng leh sorkar laipui atanga lo kal atang tein sum a hmu ber ti ila a dik mai awm e. Hmun hrang hrang atangin a puk bawk thin. Chutianga a sum hmuh zawng zawng belhkhawm atanga 27.73% chu sorkar hnathawk hlawhah a kal tihna a nih chu. A kum hmasaah (financial year hmasa) khan sorkar sum hmuh zawng zawng atanga za zela 26.49% chu sorkar hnathawk hlawhah hian a kal a, nikumah a pung a nih chu.
Chu chu budget bu atanga chhutna a ni a, a takah chuan chu ai chuan a tam daih. Office inrelbawlna te, lirthei enkawlna te leh thil dang dangah a liam teuh teuh thin. A nihna takah chuan Mizoram budget za zela 50 vel lai hi sorkar hnathawk hlawh leh inenkawlna behbawm velah a liam zel tiin a chhut peihte chuan an sawi thin. Chu mai a ni lo, eiruk tam tak a awm kumtin bawk!
Sorkar hnathawk te hi Mizoram population atanga chhut chuan 7.8% chauh an ni a, 93% vel chu sorkar hnathawk lo an ni si a, chu tak chu a manganthlak lai chu a ni.
2007-2008 chhunga Mizoram mipui sum thawhchhuah/lakluh chu cheng vaibelchhe 3,287 leh nuai 89 nia chhut a ni a, heta sum lakluh zinga za zela 67.12 zet chu sorkar hnathawkte lakluh a ni. Thil siamchhuahna lama thawk (industrial sector)-te lakluh chu za zela 17.65 a ni. Kuthnathawktu - loneih leh huan thlai bakah ran vulh, sangha dil siam leh ramngaw hausakna hmanga eizawngte lakluh erawh chu za zela 15.23 chauh a ni.
Kuthnathawktute hi Mizoram mihring tam ber an ni a, Mizoram mihring zawng zawng atanga chhutin zaa 70 vel an ni. Chu mite lakluh chu zaa 15.23 a ni a, chutih laiin zaa 5 vel (sorkar hnathawkte lakluh) chu za zela 67.12 lawih a ni thung. Chu chuan Mizoram hi ram rethei leh rorelna that lohna hmun a ni tih a tarlang.
"Statistical Abstract of Mizoram 2007"-ah chuan Mizoramah sorkar hnathawk 47717 an awm tih tarlan a ni a, 2001 chhiarpuia Mizoram mihring zat 8,88,573 atanga chhut chuan mi 1000 zelah sorkar hnathawk 53 vel an awm zel tihna a ni. Mizoram mihring zinga za zela 5.3 an ni tihna a nih chu. Nikum kum tawp lamah khan finance deptt. lam chuan 7.8% vela an ngaih thu Zozam Weekly an hrilh a, "Statistical Abstract of Mizoram 2007" pian atanga kum 1 vel liam hnu a ni a, sorkar hnathawk pun dan han en hian 7.8% vel chu a dik hmel hle.
Hetih lai hian March ni 23-ah khan finance secretary C Lalsawta chuan thuthar lakhawmtute hmaah, 2008-ah khan Mizoram sorkar sum non-plan atangin sorkar hnathawk mi 48,000 velin 54.5% an ei (hlawh an la) tiin a sawi.
Plan sum hman ral zinga za zela 25 pawh sorkar hnathawkte ei a nih thu sawiin, "Sorkar hnathawk hi state dang ngaihtuah leh Mizoram mihring zat atanga chuan an tam lawr hle a ni," a ti nghe nghe.
Chief minister, finance changtuin House-a interim budget a pharh hnuah finance secretary hian thuthar lakhawmtu thenkhat a kawm a, state dang aiin Mizoramah sorkar hnathawk hlawh a sang zawk hle tih sawiin, hmasawnna hnathawhna tur awm lo khawpin sorkar hnathawk hlawhah sorkar sum a kal a ni tih a sawi a ni.
Mizoram sorkarin sorkar laipui atanga sum a dawn thin dan sawiin, sum tam ber chu Central Sponsored Scheme (CSS) a ni a, mahse a doletna (matching share) atan 10% pek ve a ngai tih a sawi a, "Mizoramin a doletna hi a neih theih thin loh avangin dil ngam loh tam tak a awm a ni," a ti. A doletna sum awm loh chhan chu sorkar hnathawk an tam vang leh an hlawh a san vang a nih ber thu a sawi bawk.
Mizoram chu sorkar hnathawk tamna ram a ni a, Mizoram chu mi tlem tein sorkar budget an insem zawhna ram a ni tihna a ni tak ber chu!
Sorkar hnathawk tam zawngah chuan a ram mipui zat atanga chhuta za zela 5.3 emaw 7.8 emaw chu a tam tham hle a, chutih rual chuan mipui thawhchhuah zawng zawng zaa 67.12 lawih thawkchhuaktuah chuan an tlem hle thung. Mizoram mipui sum thawhchhuah a pung tiin ram hruaitute'n an sawi thin a, chutiang chuan ziak pawhin chhinchhiah a ni. Mahse, mi tlem tein sum an ngah hluai avang chauhvin a pung a, chawhrualin a pung ta mai mai tihna a ni. Mi tam takin an thawkchhuak ve meuh lo a, chutiang chu khawi ram leh hnam tan mah hian a him ngai lo. Mizoram hi a buai tihna a ni ber.
Chutiang chu sorkar hnathawkte dinhmun a nih laiin August ni 25-27, 2008-a Council of Ministers thukhawm chuan sorkar hnathawk hlawh chu step khatin an han tisang leh a, "Thil mak a thleng a nih loh chuan Mizoram hian hma a sawn rih dawn lo tihna a ni thei hial ang," tiin Zozam Weekly chuan a lo tarlang tawh a nih kha.
Tunah sorkar a inthlak a, mahse, sorkar thar hmalakna langsar zinga mi chu sorkar hnathawkte hlawh tihsanna tur thil a ni leh ta tlat!
March ni 19-ah khan Assembly House-ah chief minister Lal Thanhawla, finance changtu ni bawk chuan Mizoram sorkarin 6th Pay Commission rawtna chu Mizoram sorkar hnathawkte tana hman ve Mizoram sorkarin a duh tia sawiin, "Hmang thei tura inpuahchah mek a ni," a ti a nih kha.
6th Pay Commission rawtna tihpuitlin a nih theih nan hian Mizoram sorkar chuan committee a din a, anni hian hma an la mek. An hun a zo tawh a, mahse, May thla thleng hun an dil belh a, an thu chu Mizoram sorkar chuan a ngaichang ta a ni.
Nikum December ni 2-ah khan Mizoramah inthlanpui neih a ni a, Congress, MNF leh UDA te'n sorkarna siam tumin kil thum atangin an chuh a nih kha. An pathum khan sorkarna an chang a nih chuan 6th Pay Commission rawtna hman a nih tur thu intiamin an inzuar vek a, ziak chauh ni lo, tawngka pawhin an sawi ri mawlh mawlh hlawm. Congress-in sorkarna an chang ta, an thutiam tihlawhtling turin hma an la ta mek niin a lang. Economist pakhat - Dr James LT Thanga erawh chuan khatia party tinin Mizoramah 6th Pay Commission hman an tiam kha mak a ti a, pawi a ti bawk.
"Engtin nge an ngam ka hre lo, game mai maiah ka ngai. Political game mai mai a nih kha," a ti hial.
Mahse, 6th Pay Commission rawtna tihpuitlin chu sorkar hnathawkte'n a karin an kar a, sorkar hmasa lakah pawh an lo kar fe tawh. Politician te leh sorkar hnathawkte hi he thil hrisel lohna hrechiangtu an ni a, mahse, an duh tlat si!
March ni 4, 2008-ah khan Federation of Mizoram Government Employees & Workers (FMGEW) chuan thuchhuah siamin central pay pattern zawm an duh thu an lo puang tawh a, "State naupang te kan nih bawk avangin infrastructure development lamah pawh kan la hnufum em em a. Industry lian leh corporation innghahna tham kan la nei lova. Chuvangin sorkar hnathawh hi kan innghahna lian ber a ni lo thei lova, Mizoram chhunga pawisa leng vel pawh sorkar hnathawkte hlawh atanga chhuak deuh vek a ni," an ti a nih kha.
Hei hi sorkar hnathawkte ngaihdan tak tak a nih chuan he ram mipuite tana thawktute hian an hnen atanga pawisa luangchhuak hi mipuiin lo dawng ve mai mai se an duh tihna a ni.
"Mizoram chhunga pawisa leng vel pawh sorkar hnathawkte hlawh atanga chhuak deuh vek a ni," tih hi a dik. Chu chu Mizoram retheih chhan leh hmasawn theih loh chhan pakhat a ni a, finance secretary pawhin thuthar lakhawmtute hmaah a sawi a nih kha. Thil dik lo a nih avangin siamthat a ngai. Siamtha lova sorkar hnathawkte vur belh zel hian hnemhnanna a thlen lo ang.
Dr LT Thanga chuan: "Tun dinhmunah chuan 6th Pay Commission rawtna hman ve hi Mizoram tan thil tih chi-ah ka ngai lo a, harsatna nasa tak hmachhawn inhuam chung lo chuan hman pawh tum ngamah ka ngai lo," a ti tawl mai.
Economist a ni a, 'A study of social consumption behavior in Mizoram' tih thupui hmangin research a zo tawh. Mizoram mipuite sum hman dan a lo zirchiang tawh a ni. Thingtlang mipuite leh sorkar hnathawk ve lote dinhmun chu chhia a ti hle a, sorkar hnathawkte thuhnuaiah an awm hle tih a hmuchhuak. Chu chu Mizoram sorkar sum zawng zawng deuhthaw sorkar hnathawkte hnena a luanluah vang tih a hmu a, chutiang a nih laia 6th Pay Commission rawtna hman vea sorkar hnathawk hlawh tihpun chu hrisel a ti lo.
"Mizoram budget-a sum tam fe chu sorkar hnathawkte hlawhah a kal tih chu kan hre vek a, hei hi thingtlang mipuite leh sorkar hnathawk ve lote'n an tuar a, ramin a tuar bawk. Sorkar hnathawk ve lote chu a tam zawk fe an ni si. Tin, 6th Pay Commission rawtna angin sorkar laipui hnuaia thawkte chu an hlawh hi 21%-in a pung a, chutiang chuan Mizoram sorkar hnathawkte hlawh hi pung ta se khawia pawisa nge sorkar hian a pek ang? Lei kan bat belh fe a ngai dawn a ni," a ti.
"6th Pay Commission rawtna hi kan hmang a nih chuan thingtlangmite a nghawng dawn a, 'thalaite khawvel' kan tih fo te pawh hi a nghawng ang. Tin, sorkar hnathawk leh hlawh lo kar a zau ang," a ti bawk.
"Mizoram economy driving force hi sorkar hnathawk an ni chiang a, an hlawh a san chuan thil man a sang zel. Chutih laiin labour law te kan ngaihthah leh si. Minimum wage te hi dik takin kan kalpui si lo," tiin a nghawng tur thil te a sawi a ni.
"Peon pawhin ni khatah Rs 300 chuang an hlawh ang a, chutih laiin sorkar hnathawk lote chuan ni khatah Rs 100 te an hlawh ang. Chu chu kan tuar dawn. Sorkar hnathawk hlawh a pun chuan thil man a lo sang ngei ang a, chutah chuan kan society hian a tuar dawn a ni," a ti.
"Thil man hi a pung a, chu chu sorkar hnathawkte hlawh milin a kal thin. Vawksa, arsa te pawh a rate chu tunah hian control theih a ni miah lo a, a hralh theih tih a chian miau avangin a rate hi duh zat zat a chhiar theih tlat a ni. Sorkar hnathawkte'n sum an lalut tam tih hi mipuiin an hre tlat. Chu chuan thil man a tipung a, mahse, lakluh pung kha chu sorkar hnathawkte chauh an ni si ang," a ti bawk.
Research a lo tih tawhah thingtlangmite dinhmun a tha lo hle tih sawiin Dr James LT Thanga chuan, "Health care leh education-ah pawh khawpui mite hman zat hmun sawma thena hmun khat pawh hmang pha lo an tam," a ti a, "Sorkar hnathawk hlawh a sang zel a nih chuan plan sum hian thingtlang a thleng dawn lo chiang a ni. Income generation lama kan kal a tul a, chutih rual chuan social justice - intluktlanna kan hmaih thei lo," a ti. Sikkim chuan an plan sum 70% chu rural development-ah an dah hmiah tih sawiin, "An awhawm khawp mai," a ti.
"He commission rawtna hi a hmang chat chat an awm tawh em tih te pawh ngaihtuah tel thain ka hria. Inthlan dawnah party tinin an tiam kha a vanduaithlak ka ti a, tunah rih chuan kei chuan kan state tan a hrisel lo ka ti," a ti bawk.
Mizoram sorkar hnuaia hnathawkte hlawh hi a buai em em a, inthlan dawnah a buaizia a rawn lang thar leh thin.
Mizoram hi Central pay pattern-a kal a ni a, mahse, central hnuaia thawkte aiin Mizoram sorkar hnuaia hnathawkte hlawh basic chu a sang zawk deuh vek thung. Mizorama central sorkar hnathawk LDC te aiin State hnuaia LDC hnathawkte hlawh basic a sang zawk. MCS te pawh 10,000 scale-ah an thu tawh dawn a, IAS te chu 8000-ah an thu reng zawk a ni. A nihna takah chuan central hnuaia hnathawkte hlawh Scale aiin Mzoram sorkar hnuaia thawkte chu an sang zawk deuh vek.
Hna hlawk leh hlawk lo
2001 chhiarpui chuan Mizoram puma hnathawktu zawng zawng zinga 60.6% chu agriculture-ah an inhmang niin Survey chuan a tarlang a, leilet leh thingtlang loneiha eizawng chhungkua 88819 an awm niin a tarlang bawk. Chutih laiin 2006-2007 khan agriculture and allied sector hian GSDP (Mizoram gross state domestic product)-ah 16.02% lek a thawh thung. 2007-2008 chhung phei chuan 14% chauh a thawh a ni.
2001 chhiarpuiin Mizoram hnathawktute dinhmun a tarlan Survey-in a lakchhawna a lan dan chuan mihring 8,88,573 zinga 4,67,159 (52,57%) chu hnathawh nei (worker) an ni a, thingtlangah hnathawh nei tam zawkin 57.20% chu hnathawh nei (thawkchhuak) an ni a, khawpuiah chuan 47.87% chauh hnathawh nei an ni. Hnathawk zinga 57.28% chu mipa niin 47.53% chu hmeichhia an ni.
Survey atanga a lan danah chuan Mizoram mipui tam berte hnathawh chu a hlawk lo hle tihna a ni. Loneiha eizawng chu Mizoram mipui zinga a chanve aia tam ni mah se GSDP-ah chuan 14% vel chauh an thawkchhuak ve a, chu chuan he hna hi a hlawk lo hle tihna a ni.
Mizoram economy-ah hian hna penhleh zawk deuha ngaih tertiary sector (service) chu a thawhhlawk ber a ni reng a, GSDP-ah 2007-2008 khan 65% chu he sector thawh hi a ni.
State pum economy-ah hian secondary sector chu GSDP-a thawhhlawk lamah tertiary sector dawttu a ni a, 20% vel a thawh a ni. Tihian, secondary leh tertiary sector amiten GSDP-a an thawh chu 85% bawr tihna a lo ni a, chu chu hnathawhtu zinga 39.45 vel thawhchhuah a ni.
6th Pay Commission
Sorkar laipui hnuaia thawkte hlawhbi siamthat dan tur ngaihtuahtute rawtna chu pawmfel a ni tawh a,
India ram prime minister-in Independence Day thilpek atan a puang a nih kha.
Sorkar laipui hnuaiah hian mi maktaduai 5 chuang an thawk a, 6th Pay Commission rawtna ang chuan an hlawh hi chawhrualin za zela 21-in a pung ang.
Sorkar laipui hnuaia basic pay hniam ber chu Rs 6,660 atangin Rs 7,000-ah a pung ang a, chuti a nih chuan a hlawh hniam ber pawhin thla khatah Rs 11,000 vel an hlawh dawn tihna a ni.
January 2006 atanga hman tan anga chhiar tur a ni a, hei hi sorkar hnathawkte chuan arrear-in an la ang.
Mizoram sorkar hian ama thawhchhuah tlem a zawng leh sorkar laipui atanga lo kal atang tein sum a hmu ber ti ila a dik mai awm e. Hmun hrang hrang atangin a puk bawk thin. Chutianga a sum hmuh zawng zawng belhkhawm atanga 27.73% chu sorkar hnathawk hlawhah a kal tihna a nih chu. A kum hmasaah (financial year hmasa) khan sorkar sum hmuh zawng zawng atanga za zela 26.49% chu sorkar hnathawk hlawhah hian a kal a, nikumah a pung a nih chu.
Chu chu budget bu atanga chhutna a ni a, a takah chuan chu ai chuan a tam daih. Office inrelbawlna te, lirthei enkawlna te leh thil dang dangah a liam teuh teuh thin. A nihna takah chuan Mizoram budget za zela 50 vel lai hi sorkar hnathawk hlawh leh inenkawlna behbawm velah a liam zel tiin a chhut peihte chuan an sawi thin. Chu mai a ni lo, eiruk tam tak a awm kumtin bawk!
Sorkar hnathawk te hi Mizoram population atanga chhut chuan 7.8% chauh an ni a, 93% vel chu sorkar hnathawk lo an ni si a, chu tak chu a manganthlak lai chu a ni.
2007-2008 chhunga Mizoram mipui sum thawhchhuah/lakluh chu cheng vaibelchhe 3,287 leh nuai 89 nia chhut a ni a, heta sum lakluh zinga za zela 67.12 zet chu sorkar hnathawkte lakluh a ni. Thil siamchhuahna lama thawk (industrial sector)-te lakluh chu za zela 17.65 a ni. Kuthnathawktu - loneih leh huan thlai bakah ran vulh, sangha dil siam leh ramngaw hausakna hmanga eizawngte lakluh erawh chu za zela 15.23 chauh a ni.
Kuthnathawktute hi Mizoram mihring tam ber an ni a, Mizoram mihring zawng zawng atanga chhutin zaa 70 vel an ni. Chu mite lakluh chu zaa 15.23 a ni a, chutih laiin zaa 5 vel (sorkar hnathawkte lakluh) chu za zela 67.12 lawih a ni thung. Chu chuan Mizoram hi ram rethei leh rorelna that lohna hmun a ni tih a tarlang.
"Statistical Abstract of Mizoram 2007"-ah chuan Mizoramah sorkar hnathawk 47717 an awm tih tarlan a ni a, 2001 chhiarpuia Mizoram mihring zat 8,88,573 atanga chhut chuan mi 1000 zelah sorkar hnathawk 53 vel an awm zel tihna a ni. Mizoram mihring zinga za zela 5.3 an ni tihna a nih chu. Nikum kum tawp lamah khan finance deptt. lam chuan 7.8% vela an ngaih thu Zozam Weekly an hrilh a, "Statistical Abstract of Mizoram 2007" pian atanga kum 1 vel liam hnu a ni a, sorkar hnathawk pun dan han en hian 7.8% vel chu a dik hmel hle.
Hetih lai hian March ni 23-ah khan finance secretary C Lalsawta chuan thuthar lakhawmtute hmaah, 2008-ah khan Mizoram sorkar sum non-plan atangin sorkar hnathawk mi 48,000 velin 54.5% an ei (hlawh an la) tiin a sawi.
Plan sum hman ral zinga za zela 25 pawh sorkar hnathawkte ei a nih thu sawiin, "Sorkar hnathawk hi state dang ngaihtuah leh Mizoram mihring zat atanga chuan an tam lawr hle a ni," a ti nghe nghe.
Chief minister, finance changtuin House-a interim budget a pharh hnuah finance secretary hian thuthar lakhawmtu thenkhat a kawm a, state dang aiin Mizoramah sorkar hnathawk hlawh a sang zawk hle tih sawiin, hmasawnna hnathawhna tur awm lo khawpin sorkar hnathawk hlawhah sorkar sum a kal a ni tih a sawi a ni.
Mizoram sorkarin sorkar laipui atanga sum a dawn thin dan sawiin, sum tam ber chu Central Sponsored Scheme (CSS) a ni a, mahse a doletna (matching share) atan 10% pek ve a ngai tih a sawi a, "Mizoramin a doletna hi a neih theih thin loh avangin dil ngam loh tam tak a awm a ni," a ti. A doletna sum awm loh chhan chu sorkar hnathawk an tam vang leh an hlawh a san vang a nih ber thu a sawi bawk.
Mizoram chu sorkar hnathawk tamna ram a ni a, Mizoram chu mi tlem tein sorkar budget an insem zawhna ram a ni tihna a ni tak ber chu!
Sorkar hnathawk tam zawngah chuan a ram mipui zat atanga chhuta za zela 5.3 emaw 7.8 emaw chu a tam tham hle a, chutih rual chuan mipui thawhchhuah zawng zawng zaa 67.12 lawih thawkchhuaktuah chuan an tlem hle thung. Mizoram mipui sum thawhchhuah a pung tiin ram hruaitute'n an sawi thin a, chutiang chuan ziak pawhin chhinchhiah a ni. Mahse, mi tlem tein sum an ngah hluai avang chauhvin a pung a, chawhrualin a pung ta mai mai tihna a ni. Mi tam takin an thawkchhuak ve meuh lo a, chutiang chu khawi ram leh hnam tan mah hian a him ngai lo. Mizoram hi a buai tihna a ni ber.
Chutiang chu sorkar hnathawkte dinhmun a nih laiin August ni 25-27, 2008-a Council of Ministers thukhawm chuan sorkar hnathawk hlawh chu step khatin an han tisang leh a, "Thil mak a thleng a nih loh chuan Mizoram hian hma a sawn rih dawn lo tihna a ni thei hial ang," tiin Zozam Weekly chuan a lo tarlang tawh a nih kha.
Tunah sorkar a inthlak a, mahse, sorkar thar hmalakna langsar zinga mi chu sorkar hnathawkte hlawh tihsanna tur thil a ni leh ta tlat!
March ni 19-ah khan Assembly House-ah chief minister Lal Thanhawla, finance changtu ni bawk chuan Mizoram sorkarin 6th Pay Commission rawtna chu Mizoram sorkar hnathawkte tana hman ve Mizoram sorkarin a duh tia sawiin, "Hmang thei tura inpuahchah mek a ni," a ti a nih kha.
6th Pay Commission rawtna tihpuitlin a nih theih nan hian Mizoram sorkar chuan committee a din a, anni hian hma an la mek. An hun a zo tawh a, mahse, May thla thleng hun an dil belh a, an thu chu Mizoram sorkar chuan a ngaichang ta a ni.
Nikum December ni 2-ah khan Mizoramah inthlanpui neih a ni a, Congress, MNF leh UDA te'n sorkarna siam tumin kil thum atangin an chuh a nih kha. An pathum khan sorkarna an chang a nih chuan 6th Pay Commission rawtna hman a nih tur thu intiamin an inzuar vek a, ziak chauh ni lo, tawngka pawhin an sawi ri mawlh mawlh hlawm. Congress-in sorkarna an chang ta, an thutiam tihlawhtling turin hma an la ta mek niin a lang. Economist pakhat - Dr James LT Thanga erawh chuan khatia party tinin Mizoramah 6th Pay Commission hman an tiam kha mak a ti a, pawi a ti bawk.
"Engtin nge an ngam ka hre lo, game mai maiah ka ngai. Political game mai mai a nih kha," a ti hial.
Mahse, 6th Pay Commission rawtna tihpuitlin chu sorkar hnathawkte'n a karin an kar a, sorkar hmasa lakah pawh an lo kar fe tawh. Politician te leh sorkar hnathawkte hi he thil hrisel lohna hrechiangtu an ni a, mahse, an duh tlat si!
March ni 4, 2008-ah khan Federation of Mizoram Government Employees & Workers (FMGEW) chuan thuchhuah siamin central pay pattern zawm an duh thu an lo puang tawh a, "State naupang te kan nih bawk avangin infrastructure development lamah pawh kan la hnufum em em a. Industry lian leh corporation innghahna tham kan la nei lova. Chuvangin sorkar hnathawh hi kan innghahna lian ber a ni lo thei lova, Mizoram chhunga pawisa leng vel pawh sorkar hnathawkte hlawh atanga chhuak deuh vek a ni," an ti a nih kha.
Hei hi sorkar hnathawkte ngaihdan tak tak a nih chuan he ram mipuite tana thawktute hian an hnen atanga pawisa luangchhuak hi mipuiin lo dawng ve mai mai se an duh tihna a ni.
"Mizoram chhunga pawisa leng vel pawh sorkar hnathawkte hlawh atanga chhuak deuh vek a ni," tih hi a dik. Chu chu Mizoram retheih chhan leh hmasawn theih loh chhan pakhat a ni a, finance secretary pawhin thuthar lakhawmtute hmaah a sawi a nih kha. Thil dik lo a nih avangin siamthat a ngai. Siamtha lova sorkar hnathawkte vur belh zel hian hnemhnanna a thlen lo ang.
Dr LT Thanga chuan: "Tun dinhmunah chuan 6th Pay Commission rawtna hman ve hi Mizoram tan thil tih chi-ah ka ngai lo a, harsatna nasa tak hmachhawn inhuam chung lo chuan hman pawh tum ngamah ka ngai lo," a ti tawl mai.
Economist a ni a, 'A study of social consumption behavior in Mizoram' tih thupui hmangin research a zo tawh. Mizoram mipuite sum hman dan a lo zirchiang tawh a ni. Thingtlang mipuite leh sorkar hnathawk ve lote dinhmun chu chhia a ti hle a, sorkar hnathawkte thuhnuaiah an awm hle tih a hmuchhuak. Chu chu Mizoram sorkar sum zawng zawng deuhthaw sorkar hnathawkte hnena a luanluah vang tih a hmu a, chutiang a nih laia 6th Pay Commission rawtna hman vea sorkar hnathawk hlawh tihpun chu hrisel a ti lo.
"Mizoram budget-a sum tam fe chu sorkar hnathawkte hlawhah a kal tih chu kan hre vek a, hei hi thingtlang mipuite leh sorkar hnathawk ve lote'n an tuar a, ramin a tuar bawk. Sorkar hnathawk ve lote chu a tam zawk fe an ni si. Tin, 6th Pay Commission rawtna angin sorkar laipui hnuaia thawkte chu an hlawh hi 21%-in a pung a, chutiang chuan Mizoram sorkar hnathawkte hlawh hi pung ta se khawia pawisa nge sorkar hian a pek ang? Lei kan bat belh fe a ngai dawn a ni," a ti.
"6th Pay Commission rawtna hi kan hmang a nih chuan thingtlangmite a nghawng dawn a, 'thalaite khawvel' kan tih fo te pawh hi a nghawng ang. Tin, sorkar hnathawk leh hlawh lo kar a zau ang," a ti bawk.
"Mizoram economy driving force hi sorkar hnathawk an ni chiang a, an hlawh a san chuan thil man a sang zel. Chutih laiin labour law te kan ngaihthah leh si. Minimum wage te hi dik takin kan kalpui si lo," tiin a nghawng tur thil te a sawi a ni.
"Peon pawhin ni khatah Rs 300 chuang an hlawh ang a, chutih laiin sorkar hnathawk lote chuan ni khatah Rs 100 te an hlawh ang. Chu chu kan tuar dawn. Sorkar hnathawk hlawh a pun chuan thil man a lo sang ngei ang a, chutah chuan kan society hian a tuar dawn a ni," a ti.
"Thil man hi a pung a, chu chu sorkar hnathawkte hlawh milin a kal thin. Vawksa, arsa te pawh a rate chu tunah hian control theih a ni miah lo a, a hralh theih tih a chian miau avangin a rate hi duh zat zat a chhiar theih tlat a ni. Sorkar hnathawkte'n sum an lalut tam tih hi mipuiin an hre tlat. Chu chuan thil man a tipung a, mahse, lakluh pung kha chu sorkar hnathawkte chauh an ni si ang," a ti bawk.
Research a lo tih tawhah thingtlangmite dinhmun a tha lo hle tih sawiin Dr James LT Thanga chuan, "Health care leh education-ah pawh khawpui mite hman zat hmun sawma thena hmun khat pawh hmang pha lo an tam," a ti a, "Sorkar hnathawk hlawh a sang zel a nih chuan plan sum hian thingtlang a thleng dawn lo chiang a ni. Income generation lama kan kal a tul a, chutih rual chuan social justice - intluktlanna kan hmaih thei lo," a ti. Sikkim chuan an plan sum 70% chu rural development-ah an dah hmiah tih sawiin, "An awhawm khawp mai," a ti.
"He commission rawtna hi a hmang chat chat an awm tawh em tih te pawh ngaihtuah tel thain ka hria. Inthlan dawnah party tinin an tiam kha a vanduaithlak ka ti a, tunah rih chuan kei chuan kan state tan a hrisel lo ka ti," a ti bawk.
Mizoram sorkar hnuaia hnathawkte hlawh hi a buai em em a, inthlan dawnah a buaizia a rawn lang thar leh thin.
Mizoram hi Central pay pattern-a kal a ni a, mahse, central hnuaia thawkte aiin Mizoram sorkar hnuaia hnathawkte hlawh basic chu a sang zawk deuh vek thung. Mizorama central sorkar hnathawk LDC te aiin State hnuaia LDC hnathawkte hlawh basic a sang zawk. MCS te pawh 10,000 scale-ah an thu tawh dawn a, IAS te chu 8000-ah an thu reng zawk a ni. A nihna takah chuan central hnuaia hnathawkte hlawh Scale aiin Mzoram sorkar hnuaia thawkte chu an sang zawk deuh vek.
Hna hlawk leh hlawk lo
2001 chhiarpui chuan Mizoram puma hnathawktu zawng zawng zinga 60.6% chu agriculture-ah an inhmang niin Survey chuan a tarlang a, leilet leh thingtlang loneiha eizawng chhungkua 88819 an awm niin a tarlang bawk. Chutih laiin 2006-2007 khan agriculture and allied sector hian GSDP (Mizoram gross state domestic product)-ah 16.02% lek a thawh thung. 2007-2008 chhung phei chuan 14% chauh a thawh a ni.
2001 chhiarpuiin Mizoram hnathawktute dinhmun a tarlan Survey-in a lakchhawna a lan dan chuan mihring 8,88,573 zinga 4,67,159 (52,57%) chu hnathawh nei (worker) an ni a, thingtlangah hnathawh nei tam zawkin 57.20% chu hnathawh nei (thawkchhuak) an ni a, khawpuiah chuan 47.87% chauh hnathawh nei an ni. Hnathawk zinga 57.28% chu mipa niin 47.53% chu hmeichhia an ni.
Survey atanga a lan danah chuan Mizoram mipui tam berte hnathawh chu a hlawk lo hle tihna a ni. Loneiha eizawng chu Mizoram mipui zinga a chanve aia tam ni mah se GSDP-ah chuan 14% vel chauh an thawkchhuak ve a, chu chuan he hna hi a hlawk lo hle tihna a ni.
Mizoram economy-ah hian hna penhleh zawk deuha ngaih tertiary sector (service) chu a thawhhlawk ber a ni reng a, GSDP-ah 2007-2008 khan 65% chu he sector thawh hi a ni.
State pum economy-ah hian secondary sector chu GSDP-a thawhhlawk lamah tertiary sector dawttu a ni a, 20% vel a thawh a ni. Tihian, secondary leh tertiary sector amiten GSDP-a an thawh chu 85% bawr tihna a lo ni a, chu chu hnathawhtu zinga 39.45 vel thawhchhuah a ni.
6th Pay Commission
Sorkar laipui hnuaia thawkte hlawhbi siamthat dan tur ngaihtuahtute rawtna chu pawmfel a ni tawh a,
India ram prime minister-in Independence Day thilpek atan a puang a nih kha.
Sorkar laipui hnuaiah hian mi maktaduai 5 chuang an thawk a, 6th Pay Commission rawtna ang chuan an hlawh hi chawhrualin za zela 21-in a pung ang.
Sorkar laipui hnuaia basic pay hniam ber chu Rs 6,660 atangin Rs 7,000-ah a pung ang a, chuti a nih chuan a hlawh hniam ber pawhin thla khatah Rs 11,000 vel an hlawh dawn tihna a ni.
January 2006 atanga hman tan anga chhiar tur a ni a, hei hi sorkar hnathawkte chuan arrear-in an la ang.
No comments:
Post a Comment