Thursday, September 29, 2011

JOYCE MEYER HI

American nu tling, hlei tling zuah mai Pathian thu hril thin Joyce Meyer hi tam tak chuan kan hriain a rinawm. Khawvel huapa rawngbawltu hmingthang a nih bakah Pathian thu lam lehkhabu tha tak tak 90 chuang zet a ziaktu a ni a.

Joyce Meyer hi kum 1943 khan St. Louis, Missouri (USA) ah a lo piang a, a laiah hming chu Pauline Joyse Hutchingson a ni a. A pa hi sipaiaha a tang a, Indopui pahnihna a zawh hnu khan a lo haw a, Joyce Meyer hian chutih hun lai chuan a pain a pawngsual thin thu a sawi. O'Fallon Technical High School ah a lut a, a zawh hnuah car zuar thin nen an innei a. Mahse, kum nga chhung an inneih hnuah an inthen leh a.
An inthen hnu lawk chuan Dave Meyer, engineering draftsman, nen kum 1967 khan an innei a. A pasal hi a fel hle mai a, sum leh pai lamah pawh a pui fo thin a, a nun phung inthlakthlengna atana mi pawimawh ber a ni ta nghe nghe. Ama insawi danin an inneih tirh lam hi chuan nu nasa ve tak mai leh mahni hmakhawsial zet mai a ni thin awm e.
Meyer hian kum 1976 khan Pathian hnen atangin thuchah a dawn thu a sawi a. Chuta tang chuan rawngbawlna a tan ta a, Bible zirna a hawng a, rei lo teah Fenton, Missouri a kohhran nung tak maiah associate pastor-ah a tang zui a.
Chuta tang chuan an tual chhung radio programme-ah nitin minute 15 chhung thuchah a sawi thin a. Kum 1985 khan associate pastor atang chuan a bang a, ama pualin radio hmanga rawngbawlna "Life in the Word" tih chu a tan zui a. A pasalin a rawn angin TV hmanga rawngbawlna pawh an tihbelh leh ta zel a.
Tunah hian Joyce Meyer ministries zinga TV programme "Enjoying Everyday Life" hi tawng hrang 42 a lehlin a ni thin a, TV leh radio station 900 ah chhuah a ni thin bawk. Missouri a an headquarters-ah hian hnathawk 597 an awm a, khawvel hmun hrang hranga an office-ah hnathawk 300 chuang an awm bawk.
Naupanh lai atanga mipat hmeichhiatna lama khawih bawrhban tawk tawh leh nupa nun kawng bumboh tak lo zawh tawh Joyce Meyer hi tunlai khawvela Pathian thu hriltu hmingthang leh rawngbawltu langsar ber pawl a ni mek a, Pathian thu lam lehkhabu hralh kal tak tak 90 chuang a ziak tawh nghe nghe a ni.
Meyer-i website in a tarlan dan chuan an pawl hian nikum chhung khan international feeding programme kal tlangin mi maktaduai 29 hnenah chaw ei tur an pe a, khawvel hmun hrang hrangah naupang enkawlna hmun 40 vel an nei a, mi dang sang tam takte damdawiin an enkawl mek a, US leh ram danga chhiat tawkte tanpuina an sem thin bawk. Heng bakah hian khawpuia chengte zingah rawng an bawl a, lung in tangte an buaipui a, tui mamawhte hnenah an pe a, mihringa hmanga sumdawnna dotute nen an tangho thin bawk.
Rawngbawltu hmingthang tak ni mahse Joyce Meyer hian beihna pawh a tawk nasa hle tho mai. Kum 2007 ah khan U.S. Senator Charles Grassley, Republican party a mi chuan Pathian Thu hriltu langsar tak tak mi parukte a chhui a. A chhui chhan hi an khawsak a san em vang leh an hausak em vang a ni. Chu'ng zingah chuan Joyce Meyer Ministry pawh hi a tel ve a ni. Chuta tang chuan Meyer pawh hian ama hlawh leh a pasal hlawh a tihhniam phah a, a lehkhabu ziak atanga a sum hmuh te hi an chhungkaw sum hmuhna hnar pawimawh tak a nih phah ta a ni.
Pathian thu hriltu hausa thenkhat angin Joyce Meyer hian an pawl (ministry) atangin sum lehpai bakah hamthatna a dawng hnem hle a, chungte chu : ama mimal thlawhna (private jet), ama mimal in changkang leh nuam zet bakah a fate pali puitling tawhte hian anmahni pual theuhin in ropui leh nuam tak an nei vek a, car manto chi engemaw zat a nei a. Heng bakah hian an headquarters building ropui zet mai chu bungraw tha ber bera thuam an nei bawk.
Meyer thung chuan ama in, feet 10,000 bial zet a zau, swimming pool leh mikhual thlenna bik in hrang awmna, ropui zet mai chu kohhran tam takin an pastor-te chenna tur an pek aiin a ropui bik chuang loin a sawi thung. An nun phung hautak ang reng tak chungchangah pawh inthiam lohna leh pawi tihna a neih loh thu a sawi a, Pathian thu a awih vang leh a rawng a bawlsak vangin hausaknain a vur niin a ngai hmiah.

Related Posts :



2 comments:

  1. Hetia Pathian thu hril thin te hausa ta viau thin hi ka zawhna ani fo a, a tha nge tha lo hriat a har hle mai. Lalpa hausakna ren rual loh an tawmpui pawh ani mahna. Lo ngaihtuah ve chhin ta che u.

    ReplyDelete
    Replies
    1. Kei pawn I ngaihdan chu ka ngaih ve dan ang tho a nia..

      Delete