Football Leh Mizo

¢ Hmingsanga

Mizote’n infiamna kan ngainat ber chu football a ni. Mizo mipa tawh phawt chuan kan khel a ni deuh ber. Mizo zingah football tuipui lo kan vang hle. Mahse Football kan khelh tanna erawh a la rei lo. Kum 100 em pawh kan la khel lo.


1954-ah Pu Lalsangliana Ex.MP, Pu HK Bawihchhuaka, Pu Lalhmingthanga (P&Sons) te leh midangte'n Aijal Sports Association tiin pawl an din a. Anni hi Mizote tana football kawng sial hmasatute an ni. Tlang ramah zawl a vang bawk nen football field mumal pawh a awm lo, zawl remchang deuh, awih tlan deuh te thleng khan inkhelh nan hman a ni. Football chu tihlar tumin Aijal Sports Association chuan theihtawpin hma an la a. Khatih lai pawha field tha ber Sipai lammualah heng hruaitu hmasate hmalakna hian football chu an khel ve tan a ni.

Football tuichilh an pung tual tual a, Pachhunga Memorial Football Trophy leh Chhota Lal Seth Shield inchuhin tournament hlawhtling tak an lo piang ta. Hetih hunlai hian India ram chhung football tournament lian ber Santosh Trophy te chu a rim a ra pawh kan la hre pha lo.

1962 khan 1st RK Jain Memorial Football Tournament-ah Aizawl XI an champion a. Hockey lar vanglai a ni a, mahse football khel an kiam phah chuang lo. 1972-a UT-ah Mizoram hlankai a nih hnuah Aijal Sports Association chu Mizoram Sports Association tiin a hming thlak a ni a, 1973 khan football pawl pawh a hrangin a lo ding ve ta. Hei hi Mizoram Football Association din kum a ni.

Mizoram Football Association mumal taka din a nih hnu kum thumna, 1976-ah khan inthlanna mumal tak neih a ni a, chuta president hmasa ber chu Pu Lal Thanhawla, tuna Mizoram chief minister hi a ni.

1987-ah All India Football Federation hnuaia inziah luh a ni a, MFA chuan AIFF hnuaia a inziah luh kum hian a vawi khatna atan Santosh Trophy-ah team a tir nghal.

Kan Chhehvela Kan Chetna
Mizoram chu AIFF hnuaiah a inziah luh tawh avangin India ram chhung hmun hrang hrang leh ram pawn thlengin inkhelin kan feh chhuak ve ta mawlh mawlh mai. Kan state thenawma tournament lian tham tehchiam lovah te phei chuan hlawhtlinna kan hmu ve ta zeuh zeuh. Heng hian 'phurna' nasa tak siamin India ram pum huapah pawh kan nep bik lo ang ti chungin theihtawpin hma lak chhunzawm a ni.

India ram pum huap anga kan chetthatna hmasa chu 1989 khan National Junior Football Championship, Shillong-a khelh kha a ni a, Mizoram chuan semi final a thleng a nih kha. Hei hi Mizoram football chanchin ziaknaah chuan thil chhinchhiahtlak leh hriatreng tlak a ni.

1991-ah Thimphu khawpuiah, Bhutan lal King Jigme Dorji Wangchuk Gold Cup-ah Mizoram Police an champion a, hei hi India ram pawna Mizoram team champion hmasak ber a ni. Champion team lo hawte kha Lammualah mipuiin ropui takin an lo hmuak nghe nghe.

1980’s tawp lam leh 1990's tir lamah Mizoram chhung, a bikin Aizawl khawpuiah inkhel hmuhnawm tak tak en tur a awm deuh reng a, Mizo mipuiin football kan hlutin kan ngaisang a, football star-te pawh an langsarin mite hriat an hlawh hle. Rawltharte an inlar tan a, Mizoram chu India ram football inelnaah a fehchhuak ve ta deuh reng bawk.

A te Lamah Kan Lian
National Under-16 Football Championship-ah team kan tirchhuak a, champion em ni lo mah se result tha tak tak an hawn deuh zel. Sports Department pawhin kum tinin Subroto Mukherjee Cup khel turin team a tir ve reng bawk a, India ram naupang zingah a ti tha pawl kan ni reng.

Vanneihtlak takin 1998 khan Subroto Mukherjee Cup Under-14 team chuan final an thleng a, hemi kum hi alawm Mizoram Football chanchin kan sawi apianga kan hriatreng tur chu ni. India ram hian Mizote hi football-ah chiang lehzuala min hriat theihna tur atana kan bultanna hmasa chu a ni.

Mizoram team-a an striker, he tournament-a top scorer, South Vanlaiphai naupang, Chhinga Veng-a seilian S Malsawmtluanga chu India rama football zirna tha ber, Tata Football Academy chuan an hnuaia football zir turin an thlang a nih kha. Hei hian Mizoram Football hmel chu a thlak danglam dawrh a ni ber e.

Hemi hnulawk hian Malsawma (Bawngkawn), Vanlalrova (Kolasib) Jerry Zirsanga (Khawlailung) te chu TFA zawm tur hian thlan an ni ve leh. Heng mite hian Mizo naupang rilruah chona a siam a, a fuih bawk. Tih tak zeta football khelh duhna chu an thinlunga 'aw rawl" ring a ni ta.

Chu awrawl chu Mizo naupang thinlungah a ri zui ta zel a, 2001 a lo her chhuah meuh chuan Subroto Mukherjee Cup U-17-ah a vawi khatna atan champion kan ni ta hial mai. Thuk zawka football luhchilh tum Mizo rawlthar zingah an pung a, hmalama 'eng' awm chu panin an kal ve ta.

Chanchin tha Thlentute chu
2001 kha 1998-a Tata Football Academy zawmtu S Malsawmtluanga (Mama) TFA atanga a chhuah kum a ni. India rama club tha ber ti hiala chhal ngam East Bengal a zawm a, Kolkata Derby-ah an hmelma kumhlun Mohun Bagan nena an inkhelh tum pawhin hnehna goal a khung tih thawmte chuan Mizo mipuite a tiphurin chakna thar a siam ti ila kan sawi sual awm lo e.

Mama chuan India ram chhungah Mizote hi tute nge kan nih tih pholangin, India ram football ngaihventute chuan Mizoram lam an lo hawi ta fur mai. Mama chuan Kolkata khawpuiah ngaihsan a hlawh , chumi rual chuan he hnam hi football hmangin sang takah a pholang a ni. A pet goal changin mipuiin an bawr nasat lutuk avangin thuhruk te pawh a ngai ta hial mai.

'Tulunga' a ni emaw 'Mama' a ni emaw, S Malsawmtluanga chu Mizo tlangval a ni reng a, a ropui zual zel. Indian football-ah a lai luma min hruai luttu leh hmahruaitu chu Mama hi a ni chiang.

Hemi kum vek hian Asian Under-17 Football Championship-ah India aiawh turin Jerry Zirsanga, Vanlalrova, Malsawma leh Lunglei rawlthar Lalmuankima te thlan an ni a, anniho hian India team chu ropui takin an chetpui. Malsawma leh Jerry Zirsanga phei chu Asian All Star team an thlan zingah an tel ve hial. National level mai ni lo, Asian level-ah pawh Mizo rawltharte chanchin tha thlen hian Mizo naupangte leh mipuite thinlungah football a tinung zel a, Subroto Mukherjee Cup under 14-ah Mizo naupangte an champion kum a lo ni leh zel bawk.

2003- kum tha
2003 a lo herchhuak a, he kum hi Mizoram Football tan kum tha a ni, Mizo football ngainatute chuan an theihnghilh tawh ngai lo ang.

Mizoramin football khawvela a tawn san ber kum a ni a, Mizoramah football boruak a alhin a alh a ni ber mai. Aizawl khawpuiah Central YMA-in football inelna lian tham tak a buatsaih a, chumi hnu lawkah National Under-16 Football Championship, North East Zone Qualifying Round chu Lammualah nghah a ni.

TFA lama Mizo player-te’n chanchin duhawm an thlen zel bawk a, Ireland-ah khawvel rawitharte inelna lian ber pawl, Milk Cup-ah India Under-18 aiawhin Jerry, Rova leh Malsawma te an kal a, an khel tha em em. Amaherawhchu an thleng sang lutuk lo.

Ireland atang hian 2003 July thlaah Wales ram an pan a, chutah chuan Ian Rush Inter National Youth Tournament an khel a, India chu champion team an ni ta. Europe-a India an champion vawi khatna a ni a, champion team-a an player pawimawhte chu Mizo rawlthar pathumte an ni. Malsawma chu top scorer a ni nghe nghe.

Heng thawm ngaihnawm tak hian Mizoram a fan a, footballer lo hawte hmuahna inkhawm ropui tak buatsaih a ni thin bawk nen, Mizoram Football boruak a alh hluah hluah a ni ber e.

August thlaah National Under-16 Football Championship chu Lammualah khelh a ni a, he football intihsiakna hi Mizo mipuite’n an hlut hle. |um danga an la tih ngai loh angin Mizoram team kawr rawng, kawr sen hain Lammualah mipui an khat tlat thin a nih kha.

Mizoram team-in final an thleng a, final-a Meghalaya nen an inkhelh tuma mipui pungkhawm chu, Mizorama tum khata mipui punkhawm tam ber tum a ni hial mai thei. Mizoram chu an champion a, Mizoram lamah hian goal khat mah a lut lo.

He Mizoram team atang hian India aiawha khel turin player thahnem tak thlan an ni.

Kum tawp lamah Subroto Mukherjee Cup khelin Mizoram chuan Under-17 leh Under-14 team a tir a, he Mizoram team hnih hi an champion leh ta ve ve bawk a, football boruakin Zoram a chiah hneh hle.

2004 leh 2005-ah National Under 16 Football Championship-ah Mizoram chu an champion leh a, Mizote hi India ram football-ah a ber ni thei turin talent kan nei tawk tih chu kan naute result-in a nemnghet zel tia sawi zui a ni.

Tunah phei chuan Mizo player-te'n India ram club tha ber berah an khel pha tawh a, India ram champion club-a team captain te hial kan ni phak ta.

Mizoram chu ‘football thiam state’ tiin min hre tan tawh. All India Football Federation honorary secretary meuh pawhin football-a Mizoram than chakzia chu India ram football hruaitute kalkhawmnaah a sawi chhuak tawh bawk.

Hetiang taka football-a hma kan sawn theihna kawngah hian media lam an thawk hlawk hle a, TV leh radio kaltlanga international media hrang hrangte thu kan dawn piah lamah, local chanchinbu leh TV-te hnathawh hi a fakawm tak zet a ni.

1954-a Aijal Sports Association dintute kha chuan tuna kan dinhmun tawn mek hi an thlir lawk thiam kher lo ang a, hruaitu hluite kha la dam kim se, lawm avangin kut an beng ve ngei ang. Mahse,tunlai thangtharte hi an dinhmun tawn mekah kan lung a la awi kim lo a, player tlem tete hlawhtlina hi hnam pum hlawhtlinna a la tling lo a, hei aia sang hi kan thleng thei tih hriaiin, India ram football-a Mizote rorel hun thlirin hun an hmang mek a ni.

Related Posts :