Kohhran-in 'sakawlh' hmachhawn ta

Mizoramah 'sakawlh' laka inralring mek chhungkaw engemaw zat an awm a, chu'ng mite hlauh 'sakawlh' chu Kohhran lamin an hmachhawn mek.

Mizoramah chhiarpui hi sakawlh lo lanna a nih ringa inziaklut ve duh lo an awm nual thuin sawi a hlawh hle a, chhiarpui neih mek pawh a tibuai nghe nghe. Chhinchhiahna thar berah chuan hetiang hi Mizoramah chhungkaw 1355 an awm a, Mizoram sorkar chuan thil awmzia hrilha chhiarpuia tel tura thlem a rel. Kohhran lamin thil awmzia sawiin he'ng mite hi a thlem mek bawk.

Mizoram Synod chuan tunlaia India ram chhiarpui leh National Population Register (NPR) kalpui mekah zirtirna dik tawk lo a awm nia sawiin Kohhran tina chhiarchhuah tur thuchah a tichhuak a, "'Isua hnenah hlauh tur a awm lo...' tih hla sa thintute hian tu pa zeldin thubawl emaw avangin sakawlh kan hlau tur a ni lo a, sakawlhin min hlau zawk tur a ni," an ti.

Seventh Day Adventist chuan 'sakawlh' hmachhawnna hi a bu-in an tichhuak a, Pastor VL Biakchhawna ziah a ni. UPC (Mizoram) te'n Upa K Vanlalvena sermon (CD-in) an tichhuak tawh bawk.

Kohhran hrang hrang inthlunkhawmna- Mizoram Kohhran Hruaitute Committee (MKHC) te pawhin June ni 21-ah khan sakawlh nena sawizawm vanga mi thenkhatin chhiarpuia inziahluh an duh loh chungchang hi an sawiho a, chhiarpui leh UID (unique identification) siam tur hi thil hlauhawm a ni lo tih mipuite'n an hriat nan thuchhuah siam an rel.

MKHC hi an chairman Rev C Chawngliana, Mizoram Synod Moderator hovin an thukhawm a, MKHC hminga thuchhuah siam bakah hian MKHC-a tel Kohhran tinte chu mahni Kohhran theuhah chhiarpui leh sakawlh inzawm loh dan leh chhiarpuia tel vek tura an Kohhran member-te ngen ni se tiin an rel.

MKHC hnuaiah hian kohhran 12 - Mizoram Presbyterian Church, Baptist Church of Mizoram, Catholic, UPC-NEI, Salvation Army, Seventh Day Adventist, Methodist Church, Lairam Isua Krista Baptist Kohhran, Evangelical Church of Maraland, Congregational Church of India, Evangelical Baptist Convention Church leh Zomi Baptist Church te an tel a ni.

Hetihlai hian Mizoram hmun hrang hranga sakawlh leh chhiarpui sawizawmtute kawmin chhiarpui buaipuitu sawrkar aiawh ten chhiarpuia an inziahluh theih nan hma an la mek a, hmun thenkhatah chuan kohhran hruaitute pawh an pun nghe nghe.

Synod-in chhiarpui hlau lo turin a mite hrilh
Mizoram Synod chuan tunlaia India ram chhiarpui leh NPR kalpui mekah zirtirna dik tawk lo a awm nia sawiin Kohhran tina chhiarchhuah tur thuchah a tichhuak a, "'Isua hnenah hlauh tur a awm lo...' tih hla sa thintute hian tu pa zeldin thubawl emaw avangin sakawlh kan hlau tur a ni lo a, sakawlhin min hlau zawk tur a ni," an ti.

"Tunlaiin India ram chhiarpui leh sakawlh sawi zawmin thu belhchian dawl lo hmangin tuten emaw mi an sawi thaih a, chumi ziakna booklet pawh an sem a. India sorkarin chhiarpuiah UID (Unique Identification) a hman tur leh chu chu sakawlh number 666 hlimthla a nih tur thu te, chutianga chhinchhiahna chu lei leh zawrh khap a nih tur thute tarlangin, zeldin thubawlin census lo awm tur hi a hlauhawmzia an sawi a," tiin, UID awmzia leh a tangkaina tur te an sawi a, "Hlauh tur a ni lo a, tihluihnaa neih tur a ni lo a, amaherawhchu, zin veivak, foreign-a kal thinte leh hnathawhna hmun a zirin neih ngei a tulna hun leh hmun a awm a. India rama cheng kan nih phawt chuan neih vek pawh a him ber zawk ang," an ti.

"Website chhinchhiahna www te pawh 666 tihna nia sawi an awm a, hetianga puhtute hian heng hmingte hi nimin lawka an hmelhriat ve chauh a ni a. Khawvel zau zawkah tunhma atanga an lo hman tawh a ni si a, tunah an kawlh thar phutin a rinawm loh hle," an ti bawk.

Synod chuan sakawlh hlautute hian hman atanga thil danglam deuh apiang sakawlh ni-a an lo puh fo tawh thu te, puh fuh an la neih loh thu te, a hlau laklawh tawh ten thil danglam deuh, sakawlh nena hmehbel theih nia an hriat apiang an puh thu te leh puh tur remchang an la zawn zel tur thu te tarlangin, "Chhiarpui-a tel duh loh chu khua leh tui tha nih kawnga rinawm lohna, sorkar pawi sawina lian tak a ni a. Kohhran mite chuan hlau loa sorkar tanpui zawk tur a ni a. Sakawlh hlau apiangte chu sakawlhin a hneh turte an ni," thuchhuah chuan a ti.

“Kohhran member-te chu he thilah hian tumah chi-ai loh tur a ni. Sakawlh hi a puha inpuh chi a ni lo a, a lo lang dawn a nih pawhin hai rual a ni lo ang. Krista-ah kan awm phawt chuan sakawlh hi a hlauhawm lo chauh pawh ni lovin, kan hneh sa a, kan la hlauh chhung chuan rinnaah kan la chiang lo tihna a ni,” thuchhuah chuan a ti bawk.

India ram chhiarpui neih mekah hian Mizoram-ah sakawlh nena sawi zawm avang tea inziaklut duh lo hi tun thlengin district hrang hrangah chhungkaw sang an chuang tawh nia hriat a ni. A buaipuitu sorkar aiawh lamin chhiarpui leh National Population Register chungchang hrilhfiahin kawm kual pawh an nei tawh a, hmun thenkhatah chuan Kohhran hruaitute puihna an ngen nghe nghe.

National Population Register (NPR)-ah hian kutzungtang thla (finger print) leh mit thla (Iris Scan) te laa mimal leh chhungkaw dinhmun chipchiar taka lak tur a nih avangin, Bible-a Thupuan-in lei leh hralh chungchang a tarlan nen sawizawmin, ‘Sakawlh’ hmahruai ni tura ngaihna leh heti lam zawnga inzirtirna thuchhuah te pawh a awm a ni.

Chhiarpuia tel duh lo chhungkaw 1355
June ni 11-ah khan Population Census of India 2011 thawh khatna leh hemi ruala National Population Registeration (NPR) neih meka hmalakna leh harsatna tawhte, mi pawimawhte'n chief secretary Vanhela Pachuau hovin I&PR Conference Hall-ah an sawiho a, sakawlh a nih rin vanga tel duh lo chhungkaw 1355 an awm thu an report bakah chu chu an harsatna ber a nih an sawi.

"DC zawng zawng te'n an district theuha an hmalakna leh hna zawhfel tawh chin an sawinaah district zawng zawng-ah harsatna an tawh lian ber chu ‘sakawlh’ hlauh vanga census-a inziaklut duh ve lo chhungkaw 1355 la awm tlatte chu an nih thu an tarlang," tiin sorkar thuchhuah chuan chief secretary hova DC te thukhawm thu leh hla a tarlang.
He thutkhawmah hian GAD commissioner C Lalsawta leh census operation official-te bakah district tin DC te, tlawmngai pawl leh Kohhran aiawhte an tel a ni.

He thutkhawm kaihruaitu chief secretary chuan chhiarpui hi India ramah kum 10 dana neih thin a nih thu a sawi a, Census Act, 1948-in India ram khua leh tui tawh phawtte tan chuan tih makmawh a tih thu leh chhiarpui-a inziaklut duh lote chu he Act Section 11(d) & (g) hmangin Rs.1000/- chuang chawitir emaw kum 3 lung in tantir theih a nih thu a sawi.

Mizorama chhiarpuia inziaklut duh lo chhungkaw 1355 la awmte chu inziahluh hun la hawn chhung ngeia census awmze dik tak leh an inziahluh lova thil pawi thleng thei zawng zawng chungchang hrilhfiah a, Census leh NPR hi hlauh tur engmah a awm loh thu hrilhnawn leh a rawt a ni.

District level-ah DC te'n hma la chhunzawm zel se, khawtlang leh Kohhran hruaitute nen tanghova heng chhungkuate chhiarpuia inziah luhtir tura sawm ni leh se, tiin an rel.

"Hun tiam chhunga inziaklut duh lote chu a tul chuan dan-in a sawi angin hrem an nih tur thu sawilan a ni," sorkar thuchhuah chuan a ti.

Population Census of India 2011 hi ram chhiarpui vawi 15-na tur a ni a, nakum February-March, 2011-ah peihfel tum a ni. Chhiarpui hi kum 10 dana neih thin a ni a, National Population Registration erawhmihring an pun ang zela ziah luh belh theih a ni ang.

Mizoram-ah chuan chhiarpui thawh khatna hi kumin May ni 15-ah khan tan a ni a, June ni 30-a zawh tura ruahman a ni.


Chhiarpuia inziaklut duh lote:
Aizawl District-ah chhungkaw 400 chuang
Lunglei District-ah chhungkaw 106
Kolasib District-ah chhungkaw 328 (mi 13-te chu sorkar hnathawk an ni)
Lawngtlai District-ah chhungkaw 173 (sorkar hnathawk mi 5),
Serchhip District-ah chhungkaw 50
Champhai District-ah chhungkaw 167
Saiha District-ah chhungkaw 64
Mamit District-ah chhungkaw 18

Related Posts :