666

¢ Lalthlamuana Ralte

Bible-a Thupuan leh Daniala lehkhabu-ahte hian hrilhlawkna mak pui pui leh rapthlak tak tak a awm avangin Kristiante zingah pawh ngaihdan ngaihdan leh pawmdan a inang lo hle a ni.

Hrilhlawkna buaipuitu tan chuan Daniala lehkhabu leh Thupuan hi zir tham a ni a, tam tak chuan an tuipui mai a ni lo, an buaipui a, Bible thu dang zawng aiin an hre bel zawk. Buaipuitu an tam ang bawkin hrilhfiah dan pawh a inang lo a, Pathian thu zirho ngaihdan leh mahnia inzirho ngaihdan phei chu a inperhsan viau bawk.

Thupuan-a kan hmuh Sakawlh nambar 666 hi tunlaia numbar tihbaiawm ber a ni hial awm e. A inziak ang tak chuan hei hi mihring nambar a ni nghe nghe a. Sakawlh leh 666 chungchanga chhuizauna thenkhat han tarlang ila.

Sakawlh nambar 666 inziahna hi Thupuan bung 13-ah a ni a, puithuna lam thil ngai pawimawh mi thenkhat chuan 13 hi numbar vanduai niin an ngai hrim hrim bawk.

Kristian fir deuh leh fir vak lo zingah he nambar awmzia hi ngaihventu an tam hle. Roman Catholic inzirtirna tlanglawnah chuan 666 hian Kristian tihduhdahtu Rom Lal Nero kha a kawk niin an sawi. Hei hi Kohhran chanchin chhuitu leh Pathian thu zirho zinga tam tak pawhin an tawmpui bawk.

Chhuitu thenkhat chuan a sakawlh numbar hi ziahsual niin an ring ve thung. Thupuan bu an hmuhchhuah zinga hlui ber chu Aigupta rama khaw hlui pakhat 'Oxyrhynchus' an laihchhuaha mi a ni. Chutah chuan sakawlh nambar hi 616 tiin a inziak.

Hei vang hian mi thenkhat chuan Thupuan ziak chhawngtute hian an ziaksual palh ang a, a tira 616 tih chu 666 tiin an ziak ta niin an ring. |henkhat thung chuan tihsual palh ni lovin chhan pawimawh tak a awm vangin an ziak dik lo lui niin an ngai thung.

Engpawhnise, 666 hi Kristian tam tak chuan sakawlh chhinchhiahnaah an ngai a, chu sakawlh chu 'Krista Dodaltu' leh 'Titiautu tenawm' niin an ngai bawk. Hun lo la awm turah thuneihna sang tak pek a nih dawn avangin chu sakawlh lo lan hun tur chu hlau takin an thlir mek a ni.

Thupuan bu zirtute zir dan hi a inang lo a, an hrilhfiah dan pawh a hrang nuai reng a ni. |henkhat chuan a inziak ang hian ngialngan a thleng tur niin an ngai a; a then chuan entirna thil leh thil dang/mi danga hmehbel tur chi niin an ngai thung.

Zirtu tam tak chuan hrilhlawkna hi kum zabi (AD) pakhatna lai vel khan a thleng kim vek tawh niin an ngai. A tuipuitu zinga thenkhat chuan nakin huna lo thleng thut tur niin an sawi. Chutih laiin, engahmaha ngai lo an tam hle a, Johana thil hmuhsual vel mai mai niin an ring thung.

Sakawlh leh a nambar buaipuitu hi khawvel hmun hrang hrangah hian an tam hle a. Sakawlh nia an puh pawh an tam khawp mai, chung zinga thenkhat chu: Rom lal pahnih (Kristiante tiduhdahtu) Nero leh Domitian, Pope Leo X, Saladin, Napoleon, Hitler, Bill Gates, Saddam Hussein, George W. Bush, Barak Obama, etc. te an ni.

Thupuan 13:16-17-a inziak hi mi tam tak tibuaitu chu a ni. Tiang hian kan hmu: "...an kut ding lamah emaw an chalah emaw chhinchhiahna a neihtir hlawm a. Chhinchhiahna - Sakawlh hming emaw a hming nambar emaw - neite chauh lo chuan tuman engmah an lei leh an hralh theih loh nan."

Tunlaia chhiarpui neih mekah hian mimal chhinchhiahna bik (UID) tih tel a ni a, hei hi sakawlh chhianchhiahna nena sawizawm pawl an awm avangin mi tam takin an chiai phah hle a ni.

Ram dangah pawh hei hi an lo buaipui ve tawh thin. Sakawlh chhinchhiahna nia an puhte chu: Ram hrang hrangin ID Card an neih te, Social Security Number te, taksa a microchip an phum te, pawisa hmanga indawrna thil credit/debit carr, smart card, etc., te hi.

Bible zirtu thenkhat chuan sakawlh hi mi pakhat sawina chauh ni lovin Kristian tiduhdahtu Rom lalho zawng zawngte leh a hnu lama Kristian dodaltu zawng zawng sawina niin an ngai.

Tun hma atangin Mizo zingah pawh sakawlh buaipui tawk hi an awm reng. An reh vang vang a, ngaihbel tur leh sawi belh tur thil a awm apiangin thawm an thawm a lian leh hluai thin a ni. Tuna chhiarpui leh a kaihhnawih (UID) thil avanga sakawlh buaipuitute thawm hriat tur a awm leh ta pawh hi thil mak a ni hran lo. Engtiang chiahnin nge nghawng a neih chhoh dawn tih erawh hriat a la ni lo.

Related Posts :