Mizo footballer tha Zomuana kan chan ta

¢ Hmingsanga

Bicycle kick/back volley, volley thiam tia sawi thin, goal thun thei leh leadership nei tha tak, Mizo footballer zinga arsi eng hmasa Zomuanthanga chu kan chan ta.

Mizo tlangval, India aiawha khel hmasa ber chu K Kawla a ni a, 1977 khan India aiawhin Kabul Football tournament-ah a khel. 1978-ah Bangladesh-ah a khel leh bawk. 1986-ah Zomuanthanga'n Asian School Games 86, Brunei-ah India aiawhin a khel ve leh a ni.

Zomuanthanga hian a hun laia club tha MAP leh PWD tih lohah chuan a khel kim vek. Mizoram footballer ropui ber zinga mi, 1986-a India ram aiawha India School team-a khel phak Zomuanthanga, Mission Veng chu April 2 zing khan Kum 46 mi niin pum na vangin a thi a ni.

Football a khelh tan tirh lamah Aizawl South team inngahna ber chu Zomuanthanga a ni a, a inkhelh pui thin leh amah lo kaihruai fo thintute zinga mi Lalremtluanga, tuna Mizoram Football Association Hony. Secretary ni mek chuan, "Ani ang tluka player talented kha an vang ngawt ang, a taksa a vawng uluk a, a pian pawh kha a footballer hliah hliah a, leadership a nei tha a, goal a thun thei a, penalty box chhungah ani anga hlauhawm leh goal thun thei kha, Mizo zingah a la awm lo a, Zomuanthanga ang kha MFA chuan kan nghak leh mek a ni," a ni tiin Zozam Weekly a hrilh.

1985 khan khatih laia club lar El El Football club-ah bul a tan a, a hming a chher nghal hle. Hemi hnu hian khatih laia department club-te kha chuan an club-a khel turin an sawm deuh vek a, he'ng sawmna te hi hnawlin AFC a zawm ta zawk a ni.

Mizoram Football chanchina sawi hmaih loh tur chu 1989-a Bordoloi Trophy-a Mizoram XI te chet that thu kha a ni awm e. Mizoram team chuan India ram club tha Mohammedan SC te, East Bengal te an hneh a nih kha. Khami tum pawh khan Mizoram player pawimawh leh chakna ber pakhat chu Zomuanthanga kha a ni a, hemi tum hian Iran club tha Esteghal, Tehran lakah an tlawm ta hlauh a nih kha.

1986 khan India School aiawhin Brunei-ah a kal a, hemi tum hian India rawlthar chuanvawr Bruno Coutinho te nen an kal khel tlang a ni. Hemi tum hian No 10 ha tur Bruno nge Muanthanga tiin sawi a ni thin a, Zomuanthanga hian goal a thun theih zawk vangin No 10 hi a ha ta zawk niin sawi a ni.

1991-ah NE Sports Festival-ah Mizoram football team captain a ni a, final-ah Nagaland nen an intum a, khami tuma Zomuanthanga volley goal kha Lammual khat tlata pungkhawm mipuite khan vawiin thlengin an la sawi thin awm e.

1992-ah a vawi khatna atan Mizoram Football Association chuan Durand Cup-ah team a tir a, chutah chuan Zomuanthanga hi an thiampuipa pakhat a ni. 1995-ah CYMA Football Tournament-ah Mission Veng YMA N Branch team-ah a tel a, football a chawlhsan hnu-ah YMA tournament-ah hian a khel leh a ni. 1996-ah an veng- Mission Veng Sporting Club tana khel turin ball boot a bun leh a, naupang zawkte a kaihruai leh a ni. 1997 velah pawh a la inkhel zak zak a, 1998/99 velah chuan a kumin football field atangin a nawrchhuak ve ta.

Zomuanthanga, 'Mizo footballer lehkhathiam' tia sawi thin chu kan chan ta!

Related Posts :