Finance leh Planning changtu mawh a ni em?

Kum dang ang bawkin pawisa kum a tawp dawn ruaiah sum chinfel hman tumin sorkar a buai phili leh chuk a, chhun zan zawma thawkin sorkar hnathawkte'n sum an buaipui a ni. March ni 31 zan dar 8:30 a lo thleng ta a, Mizoram annual plan sum Cheng vaibelchhe 68 chuang zet chu hun tiam chhunga a buaipuituten an tihfel hman loh avangin a hman theih lohin a tawl (lapse) ta a ni.

Nikum October thla khan Congress kaihhruai sorkara budget pum (regular budget) hmasa ber chu pharh a ni a, hemi thla tawp lamah hian rorel khawlin a pawmpui a nih kha. Chuta tang chuan budget pawisa leh plan pawisa kan hmang tan a, Annual Plan pawisa hi kum khat chhunga hman zawh vek tur a ni kher lo a, kum khat chhunga khawih chet tur leh ruahman dan anga hman tan nghal tur a ni zawk. Chuvang chuan pawisa kum a tawp hma ngeia hman theih tura tihfel vek tur a ni a, a buaipuitu department leh ministry lam pawhin chumi hre reng chuan hma an la tur a ni bawk.

Treasury-in a pass annual plan sum heti zat a tawl mai hi mahni inthiam chawp tum vanga sawi nawi mai mai chi a ni lo a, chief minister leh a khawnbawlte pawhin an ngai thutak a, assembly session-ah pawh chiang beng bawngin an sawichhuak a nih kha. Home minister phei chuan chhui chiang tura chanchinbumite a duh thu sawiin, "Dem ngai chu na takin dem rawh se, sorkar an nih pawhin dem mai rawh se," ti hialin Vanglaini a hrilh a ni.

Sum hman theih loh tawl ta zingah hian mipui vantlang mamawha hman tur te, sorkar hnathawhna tur pawimawh tak tak te a tel a. Chung zingah chuan Vaivakawn police station building sakna tur te, thingtlang lama rangva semna (Rural housing scheme) tur te, ni za inhlawhna (NREGA) pawisa te, chaw tha (nutrition) leina tur te a tel a. Heng sum tam tak hman theih loh a a liam mai tur hi a uihawm a, a maawhphurtu ni chung si a mahni inthiam duh vanga 'state dangah pawh an plan sum a lapse ve tho...' ti-a sawi mam chi a ni lo.

Chu ai chuan he thil thleng chungchanga fel lo lai te zawnchhuaha, kum danga a thlen nawn tawh lohna tura a kalphung siamthat ni se a duhawm khawp mai.

A Kaikuang
Hun tiam awm sa leh kalphung pangngai zawh tur awm sa vek a ni chunga plan sum heti zat hman theih loha a awm thei hi a mak a, a chhan ber hriat hleih theih lohin chief minister atanga sorkar hnathawkte an inmelhkual mek. A bul a bal hre lo leh a awmzia pawh hre mumal lote thlengin titi berah kan neih ta a nih hi. Sorkar kalphung felfai tawk loh vanga ngai an awm laiin thenkhat chuan minister-te'n an department chan an vil hneh tawk lo niin an sawi a, a then chuan plan sum chungchanga thuneitu Planning department leh Finance department bakah a hmawrbawktu Treasury an dem deuh thung.

Chutihlaiin, Mizoram finance leh plan kalhmang hre deuh zingah department hrang hrangte hi an vuaicha hlawm a, a hma lama buaipui mang loin financial year tawp dawn hnaiah an buaipui leh chuk a, file a inhnawhtawt nasa lutuk a, chuvang chuan peihfel hman loh plan sum tam tak a 'lapse' ta nia ngai an awm. Engpawhnise, thuneihna sang tak neia chhuichiang tur committee emaw din a nih loh chuan a kaihhnawihte hi an inpuhkual zel dawn niin a lang.

Dik tak chuan Planning Commission-in annual plan a tihfel atang khan hma a lak theih nghal a, kum dang aiin annual plan nei tlai mah ila financial year a liam hmain hun rei tak a awm. Kum tharah pawisa kum a liam dawn a ruaiah an buaipui chauh mai hi a fuh lo tak niin a ngaih theih. Kum tin March thla atanga plan sum buaipui chiam hi thil fel lo tak a nih thu leh thil fel lo a tam phah duh thu pawh hi sawi a ni fo thin. Chuti chung chuan he kalphung hi an kalsan thei tak tak lo. Hemi chungchanga chhuanlam awm fo thin chu 'sorkar laipuiin pawisa an release har' tih te, 'fur ruah tlak chhung a rei a, thal lai lo chuan hna a thawh theih loh' tih te a ni thin. Mahse, heng hi chhuanlam tling tak tak a nih hmel loh a, tum tak tak loh vang zawk niin a lang.

Plan sum Cheng vbc 68 chuang hman theih lohva a awm ta chungchangah hian state finance leh planning lama tawnhriat nei hnem tawh tak, hmun danga awm Mizo officer pakhat chuan department lam aiin ministry lamin mawh an phur zawk nia a ngaih thu Zozam Weekly a hrilh.

"Leadership hlawhchhamna a nih kha. Kan state-ah chuan minister te'n thla tin an department enkawlte monthly review an neihpui a, an plan leh estimate te, an chet dan leh sum 'chalai' dan reng reng an thlirho thin. Chutah chief minister leh finance minister hovin minister-te chuan thla 2 danah emaw an thlirho leh thin a, chutiangah chuan pawisa 'lapse' tur a awm thei lo," tiin chu officer chuan a sawi.

"Pawisa 'lapse' awm thei a ni tih kha minister te'n a hma fe- December atang te'n an hre tur a ni a, chumi an hre lo thei a nih chuan an department an hneh lo hle tihna a ni ang. Keini-ah chuan minister te'n preassure min pe reng," a ti bawk.

"State Plan zawng zawng December hmain sanction vek thin a ni a, October leh November atangin kan buai tan thin. A hmain, September-ah te kan lo discuss thin bawk. Chutianga tih chuan March thlaa 'rush hour' ang chi hi a awm ve ngai lo. Mizoramah chuan engkim hi 'last minute'-ah an ti a, engkim a buai," tiin Mizo officer pakhat chuan a sawi a, state hrang hranga a lo awm ve tawhnaah chutiang chuan an ti thin niin a sawi.

Mizo IAS officer pakhat chuan, "Plan hi kum 5 chhunga non plan-a leh tur a ni a, Mizoramah chuan 1979 atang te'n plan chu plan-ah a awm char char mai a, chu chuan financial management chhiatzia a entir a ni. Chutiang khawpa financial management chhiatnaah chuan pawisa 'lapse' hi awm tur a ni," tiin Zozam Weekly a hrilh.

Sorkar laipuiah leh state thenkhatah chuan minister-te hian an department chan theuh hi an vil hneh viau a, a khat tawkin official-te plan sum an hman dan leh an hnathawh dan an sawiho thin. Chutiang a nih chuan officer-te leh staff-te tan inthlahdah a har thin. Zep lohvah chuan kan minister thenkhatte hi chuan an department chante hi an vil hneh vak lo, plan sum lapse tur chungchang pawh hi an hre hma vak bik lo mai thei a ni. Chuvangin, he thil thleng hi insiamthatna atan hmang se a duhawm hle ang, ti-a ngai pawh an awm.

Annual plan kalphungah chuan planning & implementation atangin annual plan hi siam a ni a, department hrang hrangin an insem thin. Department tin hian ruahmanna mumal tak an siam hnua phalna (Administrative approval) la turin planning leh finance department-ah an thawn leh a, finance-in a sanction hnuah bill hi treasury-ah thehluh thin a ni. Treasury-in an pass hnu-ah a hman theih chauh a ni. Chutianga file a kalkual chhung chu a rei duh hle a, a then chu dawhkan 94 te kaltlang a ngai thin.

Tuna plan sum thahnem lapse chungchangah hian tu thiam loh ber nge ni anga tunge mawhphurtu ber tihah official-te bakah mipui ngaihdan pawh a inang lo khawp mai. Department head pakhat chuan Zozam Weekly zawhna chhangin, "Finance lam hi an khirh lutuk a, an che muang bawk si a. An hun tiam chhunga kan thehluh pawh an kawl veng veng a, kan tlai phah," tiin a sawi.

Planning department lamin department hotute dem an hlawh lutuk lo niin a lang.

Hemi chungchanga sawikai tak mai pakhat chu Aizawl North leh Aizawl South Treasury te hi an ni. Hun rei tak chhung chu ni khata bill an pass theih zat hi cheng nuai 50-ah bituk a ni a, March ni 18 atang khan cheng nuai 500-ah tihsan a ni. Pawisa kum tawp dawn hnai a nih tawh avangin bill a inhnawhkhawm nasa hle tawh a, harsatna a lo thleng ta angin a ngaih theih. Treasury bill pass theih zat hi sorkarin a tisang tlai khawhnu nia ngai an awm a, chu chuan harsatna a thlen ta niin an hria a ni.

Officer thenkhat chuan Finance-in an sanction har bakah Treasury hian bill pass lawk loin an kawl rei hle niin an sawi bakah pass hman ngei tur pawh 'lapse' zingah hian a tel niin an sawi bawk. Chutihlaiin, Treasury lam pawh hi bill pass tur tlingkhawm a tam avangin an mangang hle ni-a sawi an awm a, ni khata an pass theih tur chin bituk a nih avangin an che hlei thei lo niin official thenkhat chuan Zozam Weekly an hrilh bawk.

Pawisa kum tawpa buai rum rum venthawnna atan hian Planning-in March ni 15 hmaa bill thehlut vek turin thupek an chhuah a, Finance department pawhin March ni 22 hmaa bill thehlut vek turin an hrilh bawk. Chuti chung chuan department thenkhat chu an muang viau a, hun tiam chhunga thehlut hman lo te, planning a thehluh hmaa finance deptt-a thehlut te, bill dik lo siamthat ngai te a awm. Chu'ng avang chuan sum tam tak hi chu a 'lapse' ta niin a lang.

A chhan langsar tak pakhat chu Mizoram sorkar sum kawltu State Bank of India-in March ni 31 tlai dar 6:30 hnu lama bill an pawm tawh loh tur thu March ni 15 khan sorkar a hriattir tawh. Hemi chungchangah hian hriattirna chhuah a ni a, mahse department hrang hrangah thawn darh nghal a ni lo. An dawn tlai hlawm avangin kum dang anga zan dar 12 thleng pawm thei tura ngai an lo awm. Department thenkhat phei chuan he circular hi an dawng lo niin an sawi a, zan dar 10 hnu lama bill la buaipuite pawh an awm a ni. Cheng vaibelchhe 68 chuang a tawl chhan pakhat chu 'Communication gap' vang a tih theih ang. Department hrang hrang inkungkaihna ennawn a ngai hle tihna a ni thei bawk ang.

Hetia Finance department leh Treasury lam an mawhpuh luai luai lai hian chief minister-in Mizoram sum dinhmun that vak loh thu a sawi hian ngaihtuah a tithui khawp mai. Cash balance pawh cheng vaibelchhe 32 chauh niin April ni 5 khan a sawi a, April ni 6-ah chuan cheng vbc 70 a awm tawh niin official-te hnen atanga thu dawn a ni. Plan sum tam tak a tawl tak nachhan bulpui pawh hi a ni thei mai thei. Finance lam hian Mizoram sum dinhmun that loh avangin an hrek pawh a ni thei a, chuvang chuan bill tang leh sanction loh a tam phah pawh a ni mai thei. Chu'ng thil chu ministry hian a hriatpui kil kelh lo ang a, mipui laka thiamchan tumin mawhpuh tur an zawngkual pawh a ni thei.

Bill-in Treasury a thlenna tur kawng a kual kawi lutuk hian hun a duh rei phah hle niin a ngaih theih bawk. Tih dan phung nghet a lo nih tawh avangin thil tih zung zung a har nia sawi a ni. A chhan sawi tur a tam a, a inang lo nuaih hlawm. Chuvangin a kaikuang ber zawn dawn chuan a buaithlak viau mai thei. Chief minister-in, "Sorkar hnathawkte inthlahdah rei tawh avang te, budget pass lâwk a nih loh vang te, Treasury-a sum pass tura thuneihna sang zawk pek loh vangte leh a chhan dang tam tak a awm thei a ni," a tih kha a chhan pui deuh deuh chu niin a lang. Thil kalphung hre tak thenkhat chuan plan sum 'lapse' tir pawiti vak lo hi thuneitu sang chinah hian an awm niin Zozam Weekly a hrilh nghe nghe.

Chutihlaiin, chief minister hi hruaitu lu ber a nih avangin amahah hian thil thui tak a innghat a ni. Finance leh Planning changtu a nih avanga mawhphurtu a nih thu a sawi kha a awm khawp mai. Rilru tak taka mawhphurtua inngaihna (moral responsibility) nei a nih ngei pawh a rinawm bawk.

Engtianga tih tur nge ni ang?
Plan sum hman theih loh tam tham tak hi hman leh theih a ni ang em tih chungchangah hian mithiamte ngaihdan hriat a chakawm khawp mai. Chief Minister chuan, "A bo vek anga sawi hi Supplementary Demand pass hunah a thun luh leh theih niin mithiam te'n min hrilh a ni. Bo hlen ta vang vang tur ang maia chî-âina tur chi a ni lo," tiin House-ah a sawi a. Principal Secretary (Finance), Lalsawta pawhin Treasury-in an pass hman loh cheng vbc. 68.95 chu hman leh theih a nih tur thu Vanglaini chanchinbu a hrilh a, Assembly House-in hman a phal hun huna hman leh theih mai niin a sawi.

Pawisa lapse te hi RBI-a Mizoram account-ah a lut vek tawh niin Zozam Weekly chuan thu a dawng. Heti a nih avang hian engtin emawa hmuh let leh theih mai inbeiseina pawh a awm. Mahse, hun tiam chhunga peihfel tur a ni a, an peihfel hman lo a, bill pass a nih loh na na na chuan awlsam te a hmuhlet leh theih chu niin a lang lo. Assembly session koh a, suplementary demand siam a pass hnu a hmuh let leh theih anga sawi phei hi chu a kalphung nen a inmil lo mai thei a ni.

Congress MLA pakhat chuan, "Supplementary Demand sawihova hnawhkhah leh theih nia sawi hi mithiam pakhat hnen atanga kan hriat a ni a, 'chuti a nih chuan han bei chhin ila' kan ti a ni ber," tiin Zozam Weekly a hrilh.

A nih tur ang a ni tawh a, a hun laia pass a nih loh vangin hunin a liam hnan tawh. Chuvangin, hmu let leh tur chuan theihtawp chhuaha beih a ngaiin a rinawm. Chutih laiin, Mizoram pawisa tur liau liau a ni a, Mizoram sorkar account-a dah luh fel vek tawh a nih bawk avangin a kir leh mai chu a rinawm loh thung. Sorkar official level bakah political level a nawrchhuah leh chi pawh niin a lang.

A kawng hi a ping viauin lang mah se tih dan awm thei tur chu niin a lang. Kum tawp lama kan plan sum hman zawh hnuah revised estimate (RE) siamin, a ngai ang chiaha hmuh leh theih dan pawh a awmin a rinawm. Engpawhnise, ram hruaitute leh official-te chetna tur thil a ni e.

Hetiang thil hi a thlen tawh lohna turin sorkar a harh thar hi thil lawmawm tak a ni a. Ruahmanna tha tak an siam turah pawh ngai ta ila. Bill pass tura a kawng thui lutukte hi tihtawi dan awm ta sela, state dang angin Secretary-te hian financial power nei ve ta sela, bill lian tham lo chin te hi chu anmahni level atangin phalna pe thei mai sela a ziaawm viauin a rinawm. Chutiang bawkin Treasury-in ni khata bill nn pass theih zatte financial year tawp dawnah hi chuan tihsan ni ta se, limit awm lo hiala siam pawh a chi maithei.

Thil hnawk ang reng tak, langsar vak si lo chu 2002-a Finance department thuchhuak pakhat non-work department (PWD ni lo zawng) ten engineer te nei mahse proposal an siam reng rengin PWD chief engineer in a hmingziah hnan zel a ngai ang, tih hi a ni. Hei hian department thenkhat plan sum a engineering work nei ho chu a tikhawtlai viau thin a ni. Chubakah, super-department anga ngaih theih tur bik an awm hi a fuh vak loin a rinawm bawk.

Tun thil thleng hi insiamthatna atan leh harchhuahna atan hman nise, harsatna leh buaina atang hian malsawmna a awm thei zawk dawn a. Chuvangin, plan sum hman theih loh hman leh theih tuma an buaipui mek lai hian insiamthat dan tur zawn hi thil tul tak niin a lang.

Congress Legislature Party secretary Lalrinmawia Ralte chuan Mizoram pawisa a luanral tawh loh nan kawng hnihin hmalak an tum tih a sawi.

"Sorkar tan chuan khatiang thil House-a sawichhuah kha mualphona a nih theihna lai pawh a awm a, amaherawhchu, mualpho huamin kan hruaitute'n sawiho tul an ti a, Mizoram sum enkawl danah siamthat ngai siamthat a nih theih nan tiang khan kan sawiho ta a ni. Siamthat ngai siamthat kha kan tum chu a ni," tiin Zozam Weekly a hrilh a ni.

House-a hemi chungchang sawiho tura puluttu, Hachhek bialtu Lalrinmawia Ralte chuan Mizoram sorkarin sum enkawl dan siamthat a tum dan sawiin, "Awlsam zawka kalpui leh thuneihna semzai tih te kan sawi a, tunah 'chutiang khatiang chuan hma kan la ang' tia sawi pur pur theih ni lo mah se chuti zawnga hmalak chu kan sawi. Kan chief minister pawhin House-ah chuti zawng chuan a sawi tawh kha," a ti.

"Department hrang hrangin an chanpual chang tura an beih hian a kawng a kual thuiin a buaithlak em em a, chu chu siamthat a tulin kan hria," a ti a, House-ah cheng vaibelchhe 68 chuang hman lohva riral tur chungchang sawiho tura a putluh tuma a thusawi, department pakhat chuan an sum chang turin dawhkan 94 a kaltlang a ngai tih chu sawi nawnin, "Kha department khan planning deptt-ah ringawt dawhkan 22 a kaltlang a ngai, kan pawisa kawng hi a thui lutuk. Thawktute hi mihring ve tho an ni a, chhiat ni that ni-ah office te an thulh chang a awm a, dawhkan 94 kaltlang turah tu emaw office kal loh ni an tawng a nih chuan chuti hlauh chu a ni mai. Chu chu siamthat tul kan tih pakhat chu a ni," a ti.

Thuneihna (finance power) semzai pawh tul an ti a, an ngaihtuah tih sawiin, "Department tin hian finance leh planning kal tlang lo chuan sum an nei thei lo a ni ber a, department secretary-te hian pawisa sanction theih chin nei ve se tih te pawh kan ngaihtuah. Chuti a nih chuan finance leh planning deptt. phur pawh a rit lo sawt dawn tihna a ni," Congress Legislature Party secretary chuan a ti.

"Mizoram hian pawisa kalraltir kan tlin lo a, a vaia hmang vek tur kan ni. Mipui pawhin chu chu hria se kan duh a, hetia hman lohva cheng engemaw zat a kalral avang hian sorkar a lawm lo a ni tih hi kan vaiin hria ila kan duh," a ti bawk.

Related Posts :