Assembly House-ah fiamthu II

Budget Session-ah, March ni 26-ah khan Aizawl West I bialtu Lalduhoma resolution putluh- "Kan dan hman lai (Act) leh Rules zawng zawngte hi Mizo tawnga dah ve vek ni rawh se" tih chu member te'n an sawiho a nih kha.

Rulling member lam chuan huphurhawm an tih an sawi tlangpui a, dan leh hrai lehlin harsatzia leh hautakzia te an sawi tlangpui. Rulling member pahnih- PC Zoram Sangliana leh KS Thanga te chuan Zofate inpumkhatna kawng a dal ang tih an hlauh thu an sawi.

'Heti khawp hian kan la inpumkhat lo a, 'Mizo' inti lova 'Zo' ringawt tuipui te, a 'Mi' lai la pawm thei lo te kan la awm a, Zohnahthlakte hi kan la inpumkhat lo hle. MZP te paw'n 'i insuihkhawm ang u' an la ti tawk tawk a ni a. Tin, Zo hnahthlakte hian tawng hrang hrang kan nei a, chu'ng zinga pakhat- Duhlian tawng kan tih hetia kan lo chawivul vak hian Duhlian tawng hmang ve lote rilru te pawh kan ti-na thei a, kan inpumkhatna kawng a dal thei, a la hma lutuk rih e,' ti hawi zawngin anni pahnih hian an sawi a ni.

A tawpah resolution puluttu Lalduhoma'n a khaikhawm a, chutah chuan he ngaihdan hi chhangin, inpumkhat hnu-a lehlin chauh chu a hriatthiam ve loh thu a sawi a, "A nih leh Tripura khu, Kristian an nih vek hnu-ah missionary kan tir dawn em ni?" a'n ti a.

Heta Lalduhoma chhanna hi 'wit and humour' dik tak a ni a, 'repartee' tha tak a ni.

Repartee chu tawi fel tek tawk, mei nei zeta midang chhan dan a ni a ni mai awm e; Churchill-a te thiam zawng tak kha!

March ni 31-ah khan House-ah repartee tha ang reng tak kan hmu leh, Champhai North bialtu TT Zothansanga hnen atangin.

Hemi ni hian minister PC Lalthanliana demand sawihonaah LAD hnuaia housing loan chungchangin tuipui a hlawh hle a, member-te chuan a dawng thei zat tihpun an duh thu te, a pawisa pawh tihpun an duh thu te an sawi tlangpui. Palak bialtu PP Thawlla chuan a dawng thei an tlem avanga a mangan thin thu leh a board member-ah sorkarin telh ve se a duh thu te fiamthu ti takin a sawi a, rulling member TT Zothansanga hian chu chu rawn chhangin, "Sakawr varah rawn chuang ve rawh," a ti a!

Hemi ni hian Aizawl West III bialtu R Selthuama pawh a uang ve. Thlipui leh ruahpui vanga chhiatna, an bial chhunga a thlen dan MLA-te hian an report thin a, R Selthuama pawhin a bial chhung dinhmun a sawi; Maubawk-ah in 11 a chhiat thu te, Nursery Veng-ah in 3 a chhiat thu leh Mission Vengthlang-ah in 3 a chhiat thu a sawi a ni. A rawn ding a, 'Pu Pianmawia te, Pu Robiaka te khan an bial dinhmun kha an sawi a...' a'n ti te te a, "An tawngtai tlem deuh emaw'n chu aw ka lo ti rawk a..." a'n ti leh a, a bial dinhmun chu a sawi ta a ni.

Hemi ni vek hian pa tawnghmang thiam lo Col ZS Zuala pawh a uang ve. chief minister Lal Thanhawla demand sawihonaah Assembly Secretariat leh Governor compound enkawlnaah sum a pun avanga a lawm thu a sawi a, hei hi a vei thu leh House-ah pawh a lo sawi tawh thu sawiin, "Ka sawi vang emawni..." nui chunga a'n ti chu member te'n an lawm ngei mai.

Col ZS Zuala hian, "Sipai bang te'n zu an lak hi, a tax hi a sang lutuk bik a, Mizoramah hian..." tiin sipai bangte chungchang a sawi a, "A sawi tur awm tak pawh ka niin ka hria a," a tih lai chuan member-te an lui nui hak! House leader Lal Thanhawla paw'n amah Col ZS Zuala hi a en a, a nui vur vur! A thil sawi nen hian inhmeh an ti ve reng nge pa tawnghmang thiam lo han uang vel kha an lawm ve hrim hrim tih erawh hriat a ni lo.

April ni 1-ah khan speaker-in lawm a hlawh khawp mai. Hemi hi hian Lunglei South bialtu S Laldingliana resolution putluh- "Chhim bial mipuite harsatna sukiang tura Lunglei bula Airfield siam a nih theih nana hmalak a ni ta hi lawmawm kan ti a. Airfield hi siam thuai a nih theih nan sorkar laipuiah nawr zui zel ni rawh se," tih chu member te'n an sawiho a, lungrual takin an pass a ni.

An pass hnu hian house leader Lal Thanhawla chuan resolution dang an ngaihtuah dawn leh dawn loh speaker a zawt a, speaker chuan ban a hun thuin a lo chhang a, Hawla chuan Chalfilh bialtu Chawngtinthanga resolution putluh, mahse sawi hman tak loh- "Churachanpur (Lamka), Manipur-ah Mizoram House sak a nih theih nan hma lak ni rawh se," tih chungchang chu speaker remtihnain tawi tein a hrilhfiah ta a ni.

Hawla chuan Churachanpur-a Mizoram House sak nan hma an la tawh tih sawiin, pawisa pawh cheng nuai 6 an sikchhuak tawh a, contractor atan pawh Churachanpur khawtualpa an thlang fel tawh niin a sawi. Hawla'n chu thu a sawi zawh rual rual chuan speaker R Romawia chuan, "Chu ber ai chuan maw ka pu..." tiin a lo chhunzawm a, Shillong-a Neigrihms damdawi in pantu Mizote tan khualbuk mamawh a nih thu a sawi ta a ni. Member te'n an lawm hle a, amah Hawla pawh a nui dir char char.

Speaker R Romawia Mizopa takin fiamthu a thawh zeuh zeuh reng reng a, House boruak a tinuam thin hle. Entirnan- April ni 5-ah Mizoram budget sum cheng vaibelchhe 68 chuang hman lohva a riral chungchang sawiho a nih lai khan, thusawi tura member-te a sawm dan kha member thenkhatin an hrethiam lo deuh a nih kha. Eptu pawlte chu legislature party pahnih- UDA leh MNF hmingin a sawm a, Lalduhoma leh Dr R Lalthangliana te'n an sawi a ni. Chu'ng velah chuan member thenkhat khan 'anni lamah chuti zatin an sawi a, keini lamah chuti zat chau' ti zawngin an phun a, speaker chuan darkar hnih chhung chauh sawi tur a nih thu leh hun ren a ngaih thuin a chhang. Chutah home minister R Lalzirliana a lo ding a, 'Pu Speaker, darkar hnih chhung han tihah khan darkar hnih chhung sawi tlin ngei ngei tur tihna a ni chuang lo a, i duh chuan a hma paw'n i titawp thei,' ti hawi zawngin speaker chu thurawn a rawn pe. Member dangte'n thuthmun atangin eng engemaw an lo sawi ve tliar tliar bawk. Speaker chuan nui vur vur chungin, "Khalam kha chu min relpui lo ula," a ti ta sup a!

Sum riral chungchang an sawi zawhah chief minister Lal Thanhawla'n paper pathum a pharh a, 'Report of the Comptroller and Auditor General of India for the Year ended 31st March, 2009' tih te, 'Report of the Comptroller and Auditor General of India on State Finances for the year ended 31st March, 2009' tih te, 'Statement on Six Monthly Review of the Finance Minister on the fiscal position of the Government of Mizoram for the first half of 2009-2010 (APRIL-SEPTEMBER,2009)' tihte a ni.

He'ng paper hi member te hnena sem a nih laiin speaker chu tiang hian a lo titi a:

"Lehkha, thu bengvar thlak tak tak kan sem kan sem a. Inlengte nen kan ri luai luai a, tarmit phenah kan han chhiar a, mut a lo chhuak a, darkar 1 bak kan chhiar peih tak tak tawh lo a, kan khup mawi mai mai chu a nih hi," tiin.

Fiamthu ni lo, mahse, nuihzatthlak ve mai mai chu- chief minister hian ruah leh thli vanga chhiatna thlen dan House-a report a pek hian, in chhe sawm vek hi 'chhe lailet der' ti char charin a sawi!

Related Posts :