Mihring inlaichinna ngai pawimawh ila

Mizote hi kan hrisel lo hle nia sawi a ni a, a sawi uar deuh phei chuan Mizoram hi khawvela cancer vei tam berna hmun ni hialin an sawi thin. Kan hrisel loh chhan hi tuman an zirchiang lem lo a, zuk leh hmuam kan tih nasat vanga hrisel lovah kan inngai ber niin a lang.

Zuk leh hmuam hi thil tha a ni hauh lo a, hrisel lohna thlentu lian a ni ve hrim hrim. Chu chu hriain keini paw'n zuk leh hmuam hi kan do ta tawp mai a ang.

Zuk leh hmuam hian hrisel lohna a thlen ngei mai; mahse, hei chauh lo pawh Mizote min tihresel lotu hi a awm ngei ang, kan zir lem lo mai mai a ni.

Mihring inlaichinna lamah kan hlawhtling nge kan hlawhchham? Ngaihdan hrang hrang a awm thei ang. Thil chiang erawh chu- hetia hmasawnna kawng nia kan hriat kan zawh lai hian mihring inlaichinna lam kan ngaihthah tial tial a ni tih hi.

India ram pawh hian chu chu a ngaihthah tial tial a, tuna an buaina ber pakhat pawh chu chu a ni. IIT te an tia, an ngaisang em em a, keini pawhin kan lo ngaisang ve hle a nih hi. Technology lama hmasawnna ringawt ngaihtuah chuan a ngaihsanawm reng bawk a, mahse, a tihchhiat hi a rapthlak tham khawp mai. India ram mithiamte chuan hemi chungchang hi an vei hle a ni.

IIT atanga zirchhuakte'n hna an hmu lo ngai lo a, an hmu lo ngai lo mai ni lovin an zir lai atang te'n hna an hmu sa hial thin zawk. Tichuan, a tawi zawngin sawi ta ila, an zirchhuak a, an hausa ta em em a.

An hausa em em tih chin kan hria a, an corrupt zia erawh kan sawi zui khat khawp. Mitha chu an awm ang, mahse, a tlangpuia lakin an hlemhle a, mahni hlawh phu lovin an hausa hlawm. A sawi uar deuh phei chuan mi hlemhle chherchhuahna hmun ti hialin an sawi thin.

Chiang ta chu- social science zir lo tih takah social science an hre lo a, mihring kan inmamawh tawn dan leh khawtlang nun nuam kan mamawhzia te an hre ve lo. An khawvel chu technology a ni tawp.

India ram mithiamte'n IIT-ah social science zir ve rawh se te an ti a, mahse, zir ve mah se eng ruai an nih phah lo ang tih chu mi tam tak ngaihdan a ni. BA-ah GFC te, Man and Environment te zir mah ila kan kal pah mai mai ang deuh hi an nih a rinawm.

Khawl thil leh hmuihmer, hausakna leh nawmsakna ringawt khawvelin a tuipui changin khawvel a buai thin. Chutianga khawvel a awm changa a rawn chhanchhuaktu chu social science a ni ziah ti ila kan sawi uar em?

'Development' hming pu tawh phawt kan awt a, changkanna nia kan hriat kan bawh ruak ruak lai hian he hnam nun leh khawtlang nun hi kan tichhe mek.

Mihring inlaichinna, khawtlanga nunhona te, chhungkuaa nunhona te kan ngaihthah tial tial. Khawl ropui ber ber nei mah ila mihring hi mihring a nih chhung chuan duattu leh duat tur a mamawh reng ang. Khawlin a duat thei che em? Tuna ram changkang kan tihte hi 'age of machinery'-ah an cheng a, materialism chu an rohlu berah an ngai. Mihring inlaichinna lama hlawhchham, Pathian hlau bawk si loah an chhuak a, mi-kawrawng an tam ta hle. Chumi avanga an harsatna chu hmasawnna kan sawi chang hian i sawi tel thin teh ang u.

Chu thil chuan mihring hriselna atan pawh nghawng; mihring inlaichinna a chhiat poh leh rilru leh thinlung lama harsatna a hluar ang. Mahni intihlum kan ngah tial tial bawk ang. Chu chuan taksa hrisel lohna a thlen thei. Nuho hrisel lo lutuk mai te hi zuk leh hmuam kan puh leh ngawt thin a, a dikna chen chu a awm ang, mahse, nupa nuna an hlim loh vang leh chhungkaw nuna an hlim loh vang te a ni thei. Kan zirchiang lo mai mai a ni.

Valentine's Day kan hmelhriat ve ta hle. He ni hi hlimhlawp bawlna ni-a hmang an awm thin. Chutiang tawk chu an awm ve tur pawh a ni. Mahse, mahni tawka 'kei ka ni' intite hi chuan mihring inlaichinna hlutzia hriattharna ni atan hmang thei se a va lawmawm dawn em! Tangka leh rangkachak aiin 'relationship' a hlu zawk si a!

Related Posts :