Chanchin Maksak 62

Hre hnem si, hre tlem bawk si!
Hungarian mathematician Paul Erdos-a (1913-1996) khan mathematics lama a sangawizawnpuite phone number a hre vek a, khawvel ram hrang hranga a methematician puite phone number hi a bu en lovin a hre vek tiin an sawi thin.
He pa hi a mak khawp a, phone a hmang nasa em em mai a ni awm e. Khawvel hmun hrang hranga mathematician ropuite hi a phone kual reng a, a rilru-a a luh tawh chuan a tlai tawh tih emaw, a la hma tih emaw a nei ngai lo. Biak a duh chuan eng hunah pawh a phone tawp zel.
Mahse, chutia an phone number zawng zawng a hre chung chuan an hming hmasa (first name) erawh a hre ngai lo thung! First name, middle name leh surname (chhungkaw hming) a awm a, thian tha leh chhungkhat chu first name-in an inko thin. Paul Erdos-a hi chuan a thiante phone number hre vek mah se an first name a hre ngai lo!
First name-a koh theih pakhat a nei, Tom Trotter-a. He pa hi 'Bill' tiin an ko thin a, Erdos-a chuan 'Tom' tiin emaw 'Bill' tiin emaw a ko ve chat chat thei. A thian dangte chu hmelhriat satliah leh mikhual inkoh danin, surename-in a ko thin!



Rel lu ang mai, khu luai luai reng mai
Novelist hmingthang Mark Twain-a kha meizial heh deuh mai a ni a, heh naran pawh ni lo, inzawm zata zu chi a ni awm e. A novelist thian pakhat William Dean Howells-a phei chuan, "A awmna tawh phawt hi chu boruak tizing khawp hian a khu luai luai zel. Tukthuan eikham atanga a muthilh thleng rak hian chhum lo chat lovin a'n zu tual tual zel mai mai si a. Mei zu chung hian a muhil thin ni berin ka hria," ti hialin a sawi.
Amah Mark Twain-a lah chuan, a zuk tlem zia mawlh a lo sawi thung; an han hnial chuan, awlsam fe hian, "Vawi khatah pakhat zel chauh alawm ka zuk," a lo ti sam et a! "Vanramah pawh hian," a tia lawm, "mei ka zuk theih dawn loh chuan ka kal lo mai ang."

Related Posts :