NLUP - Congress Party “Waterloo”

¢ M Lalmanzuala

Hun rei tak chhûng tuma hneh theih loh hiala ngaih, Napoleon-a chuan WATERLOO hmunah khan a ngam loh a tawng ta hlauh mai a, a tlâwm tâ a nih kha. Kha ta tang khan chhiat hlenna sawi nan, “My/His Waterloo” tih hi hman thin a lo ni ta a. Chutiang hawi zâwng chuan ABBA pawhin thiam takin ‘Waterloo’ an sak thin kha.

Khawvel hnam tin leh mi tin tân ei leh bara intodelha mahni kê-a din hi thil pawimawh hmasa ber a ni a. Hei hi hria ni awm takin kan politician-te pawhin hetiang lam hawi programme, Garden Colony, LUP, Jhum Control, NLUP, MIP te chu a hming tal chuan an ngaih pawimawh ber pakhat a ni thin. Hetiang programme-te hi ‘mipui’ kan tih, kuthnathawktute/loneitute dinchhuah nana duan a nih avangin a pawimawh zual a ni.

Congress sorkar thar chuan NLUP chu “Flag Ship Programme” hming meuh put tîrin an ngaih pawimawhzia an aupui a. A hlawhchham hlauh chuan a mawhphurtu chu mipuite an ni ang tiin Lal Isua hmai tibâltu-a ngaih an nih tur thu hial an sawi a ni. Heti taka ngai pawimawh anga an lan avang leh ram leh hnam tana thil pawimawh ber pakhat a nih avangin NLUP hi an hlawhtlinpui chuan thil dangah titha vak lo mah se, inthlan leh hunah pawh Congress chuan sorkar an siam leh phah ngei a rinawm a. An hlawhchhampui hlauh erawh chuan thil dang tihthat te nei ve nual mah se, an “Waterloo” a ni ngei ang.

Politics thilah Congress party/sorkar hi ka tan tihna ni lo-in NLUP hlawhtlin hi ram leh hnam tâna thil pawimawh, chêng vaibelchhe tam sênna tur, awmze nei leh tangkai taka hman a niha, kan thingtlâng unau, kuthnathawktute’n dinchhuahna nana an hman ka duh êm avangin hetiang rawtnate hi ka han siam ve a ni:-

1. NLUP hi development department-te nena kaihkawp (integrate) a nih loh rau rau chuan, ‘trade’ thlan tur hi, thei/thlai chin lam a ni emaw, ranvulh a ni emaw, chi hnih aia tam lo ni se, a fuh ang. Khawpuiah erawh chuan NLUP hming pu kher lovin tun hmaa an tih ang deuh khan Special Development Scheme tih hming te emaw-in sumdawnna tenau, ranvulh tiam lovin, din turin mi taima leh rinawm ni ngeia hriat tanpui se; chutiang mi tan chuan an sumdawnna tur atâna sum mamawh zat chu, chêng nuai khat pawh ni se, tum khatah pe ngam se, an hlawhtlinpui ngei a rinawm a ni. Xerox khâwl emaw, workshop khâwl emaw lei nana kum khata cheng 40,000/- emaw pêk chuan, account te vawng fel ve thliam mah se, a tak hmuh tur awm lovin ‘vawkpui zai thei’-ah te a chang thin tih kan hriat tawh kha. Mirethei tan chuan kum khat chhunga khawl cheng 40,000/-a lei chu thil harsa mai ni lovin thil THEIH LOH a ni.

2. Mizo-in ‘tam’ kan tih hi ‘vai’ leh sap-ho hian tam an ti lo a. Eng thei emaw, eng thlai emaw pawh hi, company lian aulût tham khawpa tam kan neih phawt chuan NLUP atan a tha deuh vek a ni. Environment tichhe lo tur leh sawhthing te anga a tam lutuka a chhiat mai hlauh bawk si avanga tlawm taka hrialh (distress sale) ngai lo thlang fuh se; chutiang bawkin ran vulh pawh thlang se; buaipui tham leh “International Brand” nei thei tura company liante’n a tam tham avanga an rawn luhchilh tham neih a ngai a ni.

3. Sorkar tan thil hralhna zawn buai a tûl lo ang. Sorkar sum leh tha ringa hlawhchham tawh, an hlawhchham dan bâk experience nei lote ai chuan kan thalai mithiam tam takte an rintlâk zawk ang.

4. Thlai chi hnih leh ran chi hnih ram pum tan tlêm kan ti tâlh a nih chuan, ‘crop zone’ tal siam ni se; kuthnathawktute tan dinchhuahna kawng a awm ang. A pawimawh ber chu, thei/thlai chin tur leh ran vulh tur sorkar hian thlang fel hmasa phawt se, mipui lam chuan, “NLUP tanpuina dawn ka duh si a, chutiang thei/thlai emaw, chutiang ran emaw chu ka thlan a ngai tlat” ti se, kan tharchhuah chu a tam ngei ang.

5. Himachal Pradesh-ah chuan an chief minister YS Parmar-a’n American scientist pakhat consultant atan a hmang a. An ram leilung, sik leh sa mil, apple an malthlûr a; tunah India ram state hausa ber pâwl an nih phah tawh a ni. Himachal Pradesh-in apple an tuipui tak tak lâi kha chuan, “Kan chief ninister Y.S. Parmar chuan a men chhung zawng apple a ngaihtuah a, a mutin a mumangah a mang bawk a. Hetiang hian kan state kan dingchhuak ta a ni,” tiin an state-a hnam dang lo kalte chu an hrilh mawlh mawlh thin a ni.

Chutianga an state hmangaihtu chief minister Himachal Pradesh-in an neih lai khan a ram leh hnam hmangaiha a lo changkan ve nana rualawt ngawih ngawihtu Pu Lalhmingliana Tochhawng chu chief secretary a ni a. Pu Parmar-a nena an remhriatna te chu Mizoram tân hman tangkai ve dan a awm dah law’maw tiin Aizawl-ah a rawn zinpui a. A mite’n kan zir ngang lo a ni ang, an thahnemngaihna chuan kan tan rah tha a thlen ta lêm lo a ni.

Y.S. Parmar-a te anga ram leh hnam dinchhuah duh tak tak leh vei tak taktu kan mamawh a ni e.

Related Posts :