Sorkar Hnathawk Hlawh A Pung Dawn

Mizoram sorkar Council of Ministers (Cabinet) chu December ni 1 leh ni 2-ah khan an thukhawm a, 6th Pay Commission rawt anga Mizoram sorkar hnathawkte'n hlawh an lak theihna tura siamrem ngaite ngaihtuahtu, Mizoram sorkar din, Fitment Committee Report chu an pawm a nih kha. He Fitment Committee Recommendation ang hian Mizoram sorkar hnathawkte chuan hlawh hi January ni 1, 2006 atangin an la dawn a ni.

Council of Ministers inkhawm thu rel zinga mipui leh sorkar hnathawkte ngaihven hlawh tak, sorkar hnathawkte'n an ngen, 6thCentral Pay Commission Recommendation anga hlawh pek remtih a nih thu hi chief minister Lal Thanhawla chuan CM Office Conference Hall-a press conference-ah December ni 3-ah khan puangin Mizoram sorkar hnathawkte sorkar neitu nihna kawngah an puitling a tih thu sawiin a fak nghe nghe.

Sorkar hnathawkte hnenah 6th Pay Commission Recommendation tihpuitlin hi an tiam tih sawiin sorkar thar din atanga kum khat dawnah pawh zawl dawh takin an nghak thei, a ti.

Neitu rilru puin sorkar sum leh pai harsatnate an hrethiam a ni, tiin lawmthu a sawi. Sorkar hnathawkte chuan hun kal tawh huap (retrospective) lo pawhin, hma lam hun bitiam (prospective) pawhin tiin inphah hnuai takin an ngen tiin a sawi a, mahse, sorkar chuan retrospective effect-in a pe dawn ta a ni.

Hawla chuan Mizoram UT atanga state puitling a nih khan sorkar hnathawkten sorkar laipui hlawh (central pattern) anga kal an thlang tih sawiin 3th leh 4th Central Pay Commission Recommendation-te pawh a kaihhuai sorkar chuan a lo tihpuitling tawh a ni, a ti. 5th Central Commission Report pawh a thuphunga tihpuitlin tura an remtih chu an tlaksan niin a sawi a, an hnua sorkar lo ding chuan 5th Central Pay chu a tihlawhtling ta a ni, a ti. 6th Pay Commission Report hi sorkara an luh leh hmaa chhuak a nih thu a sawi bawk.

Chief Minister chuan Fitment Committee rawtnaah hian sawrkar hnathawkte lawmkim lo mah se Mizoram sawrkar hnathawk 50,000 velah 40,000 vel chuan an pawm thei nia an hriat thu leh a pawm lote pawhin an hriat chian tawk loh vang a nih theih thu a sawi a. Fitment Committee hian sawrkar hnathawkte grouping siam/categorise chu an hna a ni lo tih sawiin sawrkar hna a ni a ti a. Hemi atan hian senior Minister Pu H.Liansailova hovin Committee din a ni a ti.

Chief Minister chuan 6th Pay hlawh hi Mizoram sorkar hnathawkte hnenah Krismas hmaa pek an tum dawn tih sawiin hun a tlem tawh hle a ni, a ti.

Finance commissioner Lalsawta chuan tahrik ni 1, January 2006 atanga 30.3.2009 thlenga sorkar hnathawk zawng zawng hlawh punna arrear cheng vbc 151 vel chu General Providend Fund (GPF)-ah dah a ni ang a, hei pawh hi a la duhte tan chuan hrensak emaw control emaw a ni chuang dawn lo a ni, tiin press conference-ah hian a sawi. An dahkhawm tlingkawm pawh a tam tho a, tin, sorkar hnathawkte an puitling a, GPF-a an dah tam hi an tan a tha tih an hria a, anmahniah sorkarin rinna a nghat tawk a ni, a ti.

Chanchinbumite zawhnate chhangin finance commissioner chuan 6th Pay atana sorkar hnathawkte hlawh pek tur hi budget-ah dah sa vek tawh a ni, a ti. Chu chu GPF account-ah hian sawnluh mai a ni dawn a ni, a ti bawk.

Ni 1.4.2009 atanga sorkar kum kal lai chhunga 6th Pay hlawh pek avanga Mizoram sorkarin a sen belh (mamawh belh) tur chu Rs.68.7 crore vel a ni ang, a ti. Kum 2010-11-ah Rs.89.2 crore, kum 2011-12-ah chuan Rs.102 crore vel, kum 2014-15 thlenga kum tina mamawh belh tur chu a vaiin Rs.771 crore vel a ni dawn a ni, a ti.

1.1.2006 atanga ni 30.3.2009 thlenga sorkar hnathawk hlawh bat tur Rs 151 crore velah hian pension hlawh a tel lo a, pension hlawh chu chhut tur a la ni a, a pun vek ngei a rinawm, a ti bawk.

Mizoram economy hi tax hmanga revenue tlem lakkhawm leh pawisa puk a innghat a ni ber

Chumi lanchianna chu 2007-08 khan Mizoramin tax hmanga pawisa a lakluh chu 77.52 crore a ni a, non-tax revune atangin Rs130.30 la lut bawkin a vaiin 207.82 crore a la lut a ni.

Chutih laiin central nena tax intawm leh central atanga grants awmte nen Rs 1831 crore lai a ni a, state sorkar total revenue-a thawhchhuah zat chu 12.39% chauh a ni.

2005-06 budget atang khan state sorkar thawhchhuah ch 10% aiin a tlem ngai lo. Mizoram state hi a nihna takah chuan central-ah a innghat bur a ni. 10th leh 11th finance commission hun lai phei kha chuan Mizoram leiba chu manage hleih theih loh tluk hialin a tam a ni.

2003-04 ah phei kha chuan Mizoram chu India ram puma leibain a tihbuai ber state a ni hial!

2006 khan Fiscal Responsibility and Budgetary Management Act siam a ni a, a tum ber chu fiscal deficit sang lutuk tihhniam a ni. Mahse, he ruahmanna hi a hlawhchham thung.

2007-08 khan Mizoram sorkar chuan a hnathawkte hlawhah Rs 757.06 crore a seng a, pension atan Rs 98.89 crore a seng bawk. Chutih laia tax leh non-tax revenue-a a lak luh chu Rs 207.81 crore a ni a, chu chu total expenditure atangin 8% chauh a ni.

2008-09-ah pawh tax leh non-tax revenue-a a lakluh chu Rs 256.54 crore a ni a, chu chu total expenditure atangin 8% chauh a ni. A hnathawkte hlawha a sen ral zat erawh pung lehin Rs 981.43 crore a seng a, pension atan Rs. 108 crore a seng bawk.

2008 March thla thleng khan Mizoram-ah sorkar hnathawk nghet 48,453 an awm a, contract leh MR 10,467 an awm bawk. Heti chung hian District Councils, Corporations, Boards, Agencies leh Commissions a thawkte chhiar tel an la ni lo zui.

2008-09-a hlawh leh pension-a kal ral zat chu budget atanga chhutin 32.72% lai a ni. 2009-10-ah phei chuan sorkar hnathawk hlawha kal ral tur zat chu Rs 1247.56 crore ni tura ngaih a ni a, pension atan Rs 150.41 crore ni tura ngaih a ni bawk. Hrut rualin sorkarin a hnathawk pakhat hlawha a pek zat chu kum khatah Rs 1.65 lakhs ang zel a ni a, sorkar hnathawk hlawh leh pension atana senral tur chu budget atanga chhutin 43.59% a ni daih tawh dawn a ni.

2001 atang tawh khan India ram pumah state mihring awm zat anga chhutin Mizoram chu sorkar hnathawk tamna ber a la ni ta reng.

2001 chhiarpuiah khan Mizoram-ah mihring nuai 8,88,573 an awm. Sorkar hnathawk nghet chu an chhungte panga zel anga chhutin an vaiin nuai 2.42 an awm.

Mizoram mipui awm zat atanga chhutin sorkar hnathawk leh an chhungte chu 20% vel an ni. Chu’ng mite chuan state budget pum pui atanga 43.59% chu an eiral. A bak 56.41% chu sorkar hnathawk lo zawng, mipui 80% velte nen chuan an la insem leh tho a ni.

India ram pumah Mizoram chu infrastructure development, industry leh agriculture lamah a pachhe ber tia sawi thin a ni. Thawhchhuah a nei chhe ber bawk a, India ram pum state zingah mipui tam dan a zira chhutin sorkar hnathawk tamna ber a ni. Central sorkar hnuaia thawkte mai bakah state danga an rank puite ai pawhin hlawh an la sang zawk.

Mizoram sorkar tan chuan a hnathawk tam tham takte enkawl nan chuan a sum sen a sang lutuk a, capital expenditure leh mipui mimir tana hamthatna tur pawhin hma a la thei lo. Budget pum pui atangin hnathawk hlawhah 43.59% a kal ral ringawt a, hmasawnna hnathawh tur dang a dal lo thei lo. India ram hian a hnathawkte hlawhah kum khatah budget atangin 13% a sengral a, chu chu a tam lutuk tia sawi a ni. Mizoram erawhin 43.59% lai a seng a, manganna tham a ni.

Mizoram sorkar chuan inrenchem policy kalpui mah se state sum dinhmun chuan ziaawm lam a pan thei tak tak chuang lo. State-in thawhchhuah a neih ve a tlem si a, tih ngaihna a awm tak tak lo. Infrastructure a nei tha lo a, chuvangin major industry a nei ve thei lo. Agriculture leh allied sector te'n GDP-a an thawh ve pawhin tlakhniam lam a pan zel zawk. State GDP-a primary sector te'n kum 2006-07-a an thawhchhuah zat chu 16.02% a ni a, 2007-08 ah erawh 14.90%-ah a tla thla a ni.

Sorkar hnathawk lalna Mizoram-ah hian mi sang khatah sorkar hnathawk 45 awm zel ang khawpa tam an awm.

Sorkar chu a hnathawkte a enkawlna kawngah a la buai zel dawn a, he buaina hi reh mai thei a ni lo. Sorkar hnathawkte pension pawh buaipui tham a ni a, 2004-05 khan pension atana sorkar sum senral zat chu Rs 88.82 crore a ni a, 2008-09-ah erawh Rs 108.00 crore a ni daih tawh a, kum 5 chhung lekin pension atana sum senral chu 21.59% in a pung tihna a nih chu! 2009-10 budget-ah pawh pension atan hian Rs 150.41 crore lai dah a ni a, a kum hmasa nena tehkhin phei chuan 39.26% laiin a pung tihna a nih chu!

Mizoram sorkar hian pension scheme pawh hi a duh chuan a ti danglam thei. Tun atanga tidanglam nghal pawh lo ni ta se, kum tam tak hnuah chauh a kal dik thei chauh ang.

Entirnan, sorkar hnathawk a thihin a nupuiin a pension a la thei a, a dam chhung zawng a la thei a ni. A thih palhin a fapain a la leh thei a, chutiang zel chuan chhawng tam tak a awm. Huaisen taka he thil hi tihdanglam a nih loh chuan sorkar hnathawk an tam si a, kum tam tak chhung chu state sum hi an eiral zel dawn a ni.

Proffessor Tlanglawma chuan Mizoram finance system chu tha lo a ti hla; "Kan finance system hi a tha lo. Nakina kan la buai theihna tur a ni. Kan manage that loh chuan hun rei lo te hnu-ah buaina nasa tak kan tawk ngei ang," a ti.

“Sorkar hnathawk kan tam si a, sorkar hnathawkte hian an hlawh atangin GPF leh CPF te an dahtha a, tlema senior deuh tawhte phei chuan pawisa dahthat nan tiin sing chuang dahte pawh an awm. Sorkar hian a khawlsak kan ti thei ang a, mahse, hei hi an invest-in ka hre lo. Nakinah buaina nasa tak siam thei a ni,” a ti.

“Sorkar hnathawk pension an la tam lo a ni thei a, nakinah chuan pension dawna pawisa lak theih loh te pawh a la awm thei. Hei hi mut mawh hnar mawha neih ngei chi a ni,” tiin Zozam Weekly a hrilh.

Hnathar siam chungchangah pawh Prof Tlanglawma chuan, “Employment generation kan sawi ziah a, hnathawh tur awm silova post siam leh ringawt hi buaina siambelhna ang chauh a ni,” a ti.

Sorkar hnathawk tam lutuk chu a vei thu sawiin, “Sorkar inrelbawl dan hi kan ngaihtuah chian deuh chu a ngai a ni. Mamawh aia tam daih an awm vang hian plan sum hi pawhpen a ngai lo thei lova, chumi tel lo chuan kan in-manage zo si lo,” a ti.

“Mizoram-ah hian sum a awm a, sum chuan production a siam tur a ni a. Central atanga kan pawisa dawn te'n production siam si lovin a thamral a, circulation of money a sang a. Thil man state dang zawng aiin a to lo thei lova, kan pawisa dawnin thil hlu engmah kan siam si lo, kan sum neih chu hmun dang atanga thil lakluh nan kan hman a ngai si a ni,” a ti a, “Kan sum neihte lah sorkar hnathawk hlawhah a kal ral nasa si a, sawi tawh ang khan sorkar hian a hnathawkte hlawh a dah thatsak hi a invest si lo. Hei ringawt pawh hi hun lo la kal turah sorkar tan chuan buaina tham a la ni dawnin a lang,” a ti bawk.

Mizoram hi thenawm state te lakah chuan centrally sponsored scheme hmu chhe ber a ni. Kan hmuh tlem chhan hi min duhsak loh vang a ni lo, planning leh system monitoring lama kan chak tawk loh vang leh CSS hmuh theihna tura thil pawimawh kan neih loh vang a ni.

Budget pumpui atanga 43.59% lai sorkar hnathawk hlawha a kal ral chuan state-in CSS a hmuh theihna tur ngei ngeiah pawh state matching share tur tak ngial pawh thawh tur kan nei ve lo a ni.

Related Posts :