Vairengte Total Bandh: Infuihpawrh vang?

Vairengte Police Station thuam thatna tur sum chu Saitual Police Station thuam that nan Mizoram sorkarin hman a tum a, hei hi duh lovin Vairengteah Vairengte NGO Co-ordination Committee din a ni. Vairengte Police Station sakna tur sum pawtpeng lo turin Mizoram sorkar an ngen a, an ngenna tihhlawhtlin a nih tak loh avangin September ni 21-ah Vairengte NGO Co-ordination Committee chuan zing dar 6 atanga tlai zar 6 thleng Total Bandh an huaihawt ta a nih kha.

Home minister chuan Total Bandh hi MNF fuihpawrh-a neihah a puh a, chief minister chuan mi dawihzepte thil tih niin a sawi. Vairengte NGO Co-ordination Committee lam chuan hei hi an pawm lo a, tuma'n an fuihpawrh lo niin an sawi.

September ni 25-ah khan chief minister Lal Thanhawla chu a thubuai chungchangah court-ah a inlan a, court-a a inlan hnu-ah hian Congress Bhavan-ah thuthar lakhawmtu thenkhatin an kawm a, hetah hian Vairengte Total Bandh chungchang sawiin chief minister chuan, "Mi dawihzep te'n National Highway danchah an tum kha a thiang lo," a ti.

"Hma tawngah mipa-hovin naupang leh hmeichhia an dah te kha a Mizo lo, a dawihzep thlak," tiin a dem thu a sawi bawk.

Total Bandh neih ni-a hmeichhiate'n kut an tawrh chungchangah MHIP te'n FIR thehluh an tum ni-a sawi a ni a, hemi chungchang sawiin chief minister chuan, "MHIP te'n an hriatthiam loh thu an sawi a, keini pawhin kan hrethiam lo, engatinge an lo tel ve awr awr?" a ti.

Hemi tuma chief minister bula thu home minister R Lalzirliana chuan Vairengte thil thleng chu politics inrawlhna nia a ngaih thu a sawi a, "Nimin khan Rajya Sabha MP Lalhmingliana te Vairengteah an zu kal niin ka hria a, boruak reh tawh hnuah zu fuihpawrh an tum a nih chu ka ti mai," a ti.

"MNF fuihpawrha thil ti an ni a, an VC te'n an hriatpui reng reng lo," a ti a, Police Station sak thatna tur Saituala sawn chungchangah, "Sorkar thu thu a nia, sorkar-in tul a tihna apiangah a ti mai ang," a ti bawk.

September ni 7-ah khan Mizoram Police chuan thuchhuah siamin, Vairengte NGO Co-ordination Committee hmalakna chu "Vairengte mipuite hian ngun taka an ngaihtuah chuan an thlawpin a rinawm loh" an lo ti tawh bawk.

Vairengte NGO Co-ordination Committee chuan total bandh an huaihawt chungchang, chief minister leh home minister te'n an sawi dan chu thudik lo a ni tiin September ni 26 khan thuchhuah hmangin an chhanglet.

"Vairengte Police Station sakna tur police modernisation scheme central atanga an rawn 'sanction' chu kan home minister-in ama bial Saitualah min laksak tih kan hriat veleh MZP te Aizawlah kalin amah Pu Lalzirliana hi hmuin Vairengte anga sawnchhuak lo hram turin nasa takin an han ngen a, hemi rual hian Vairengte ah rawn zin turin an sawm nghal a ni," an ti a, "Tichuan Vairengte-ah a rawn kal ngei a, hemi tum hian kan VC te leh NGO te'n he thil hi Vairengte atanga sawnchhuak lo turin an lo ngen nawn leh a. Mahse home minister hian chapo tak leh hmusit aw takin 'ka sawn tawh' a tih avangin khawtlang hruaitute'n hrehawm an ti hle," an ti.

"Tichuan MZP Sub-Hqrs. Vairengte-in all NGO, VC I & II leh all political party te kokhawmin, meeting an neihpui a, he meeting-ah hian kan kal kim vek a ni. Hetah hian ruling paty hote'n an hmalak tawh dan leh bialtu MLA pawhin nasa taka a lo nawr tawh dan te leh an beidawn tawh thu te an sawi a, pawi kan ti tlang hle a ni. He meeting-ah hian home minister thil tih hi tha ti eng pawl mah an awm lo a ni. Lungawi lo tak leh hmalak dan tur relthluk chiah awm loin tihtawp a ni," an ti bawk.

"Hetianga boruak a'n kal takah cuan all NGO te kalkhawm lehin Vairengte Co-ordination Committee chu a lo din ta a ni. He committee-ah hian political party leh Govt. Servant te tel phal a ni lo a, hetiang hi thil awm dan a nih avangin kan chief minister leh home minister hian Zoram mipui hriatah dawt sawi a, opposition party te fuihpawrh anga min sawi fo hi titawp tawh rawh se. Vairengte Co-ordination Committee hi a din chhan chu Zorama dikna leh kan chanvo humhalh tur atana din a ni," an ti.

"Chanchinbu lama kan lo hmuh angin home minister-in mipui lamte'n police lamte khawih hmasaa a lo sawi kha, thu diklo hulhual a ni. Police lamin mipui an khawih hmasak a nihzia video-ah pawh hmuh theihin a awm a ni. He kan bandh ni-ah hian kan sipai lam pangten naupang, tar leh hmeichhia, mipa tumah thliar hrang loin mipui min phek vuak mai bakah tear gas-te kap puakin mimal in chhungah pawh vawm luh luih a ni. Hei mai ni loin boruakah silai a tlirin an tlir bawk a ni. Hetiang khawpa min sawisak tawh pawh a, hmusit zawnga Zoram mipuite hmaa chief minister leh home minister-ten min la sawi fo hi na kan tiin kan lung a awi lo hle a ni," an ti bawk.

Thu a saisa ta hle a, Rajya Sabha MP Lalhmingliana chuan Vairengte NGo Co-ordination Committee chu an party-in an fuihpawrh lo niin a lo sawi ve bawk.

MP Hminga hian September ni 26 khan Aizawl Press Club-ah thuthar lakhawmtute a kawm a, "Congress party leh sorkarin Vairengte mipui MNF fuihpawrh anga an sawi thin leh thu an thehdarh thin hi MNF chuan tha a ti lo a. MNF fuihpawrh theih pawh an ni lo a, an dikna leh chanvo hum tuma lungrual taka hmala an ni zawk," a ti.

Chief minister-in "Uihum lekin buaina an siam" a ti leh hmeichhe hliam tuarte "engah nge an tel ve awr awr?" a ti chu demin, "Vairengte mipui hmuhsitna tawp a ni," a ti a, "Home minister zahawm takin mipui lam hawia silai kah duhna tawngkam a chhakchhuak phei hi chu ram hruaitu tih chi a ni lo mai ni lovin mi pangngai sawi awmah MNF chuan kan ngai lo," a ti bawk.

Vairengte NGO Co-ordination Committee hruaitu pakhat chuan tu party mahin an fuihpawrh lo nia sawiin, Congress sorkar hma, MNF sorkar lai atang tawhin Vairengte Police Station thuam that chungchang hi Mizoram sorkar hnenah an lo thlen tawh thin tih a sawi a, "Party kan dawr lo a, sorkar kan dawr a ni. MNF sorkar pawh Congress sorkar pawh kan dawr. Chutiang chu a nih avangin a tu emaw zawk lama tanga an fuihpawrh theih kan ni lo hrim hrim. MNF-in min fuihpawrh thei a nih chuan Congress leh party dang pawhin min fuihpawrh thei ang," tiin Zozam Weekly a hrilh.

Related Posts :