KHAW’NGE JUSTICE?

¢ HC Vanlalruata

Ka thianpa Hmingdailova Colney, IFS (Fam) kha tum khat chu kan Governor hlui Pu Amolak Rattan Kohli khan chawimawi a duh tlat mai a. Sorkar thil tak tak pawh ni lem lovin phuahchawp ang reng tak hian City Park-ah function kan han nei rup mai a. Governor meuh a lokal a, band party-in India Hnam Hla an ham rem chuan a ropui chho ta fu a. Keini thiandun titi-ah erawh chuan, “Mizoram dung leh vang fanga sorkar hnathawkte hauh kual hna bera nei kan Larsap-in a chawimawi chhun chu a ropui a lawm,” tiin thu kan han vaw thlu ve ngawt a. Mahse, dawn a ti sei ve ngawt mai.

Kan sorkar han tih hian Congress, MNF emaw PC emaw tih bikna ni lovin Mizoram sorkar hi kan vai hmer lo thei lova. Tunhma atanga ka an-hla chu hnathawk thalo, eiruk hmangte hrem tak tak ngam lova, chawimawi phute chawimawi theilo sorkar hi kum tam kan lo nei tawh tih hi a ni. Hnathawk thate ‘Nopui’ dawm tir a, thawk thalote (Mizo danah chuan pawnfen fentir kan ti dawn nge, tunlai mila hremna chu a awm ngei ang) kan diriam hma loh chuan Mizote hian ngaihsan tur dik kan hre thei dawn lova. Eng anga sorkar chak pawh nei ila a mipuiin chumi lama takna kan neih loh chhung chuan hnam tak takah kan inchher chhuak chuang lovang tih hi ka ngaih dan nghet tak a ni.

Chanchinbu-ah kan ziak kur ngiai nguai a. Misual tak tak hrem a midik chhuah theihna thuneihna nei Pu K.L. Liana te pawhin dikna tak tak a awm loh zia an ziak ve tho mai a. Zu funte hnih/khat kawl kha ‘crime’ a nih miau avanga (MLTP Act vangin) chutiang kawl hmeithai rethei te te tanin-a an thawn hnem hle laia a zu tha ber ber kawlte man hleih theih an nih loh dante, man an nih pawha tanina an tan ve ngailoh dante leh pawikhawih nasa zawka ngaih mipui sum eirutute hrem an awm siloh thu an ziah thinte hi kan chhiar liam ve mai mai a ni thei. Mahse, kei chuan mangang au aw ni hian ka hre fo thin.

Pu K.L.-a te an-hla hi dik deuh a sin. A saptawngin han phuah ve ta ngawt ila - kan Mizo ‘social justice system’ te hi rapthlak deuh a nia. Ar pakhat ru khawtlangin kan phingchil a, kan that a (hei hi Aizawl ngeia thil thleng a ni), tunhnai lawkah naupang rualbanlo mobile ru chu Aizawl khawpui chhungah ngei kan khawih hlum leh niin a lang a. Kum hnih/khat kalta maiah khan pawisa tlemte a ruk avangin tlangval pakhat chu a awmna veng YMA phur zualin an vawhlum tawh bawk. Chutih lai chuan mipui chanai tur cheng nuai chu sawi loh vaibelchhe tam tak eiru nia puhte chu hrem an nih kan la hre lo.

Hei hi India ram kalphung a ni a, keini Mizoram chauh pawh a ni lo. Ram changkang kan tih mai-ah chuan an President/Prime Minister-te ngei pawh an thiltih dikloh leh eiruk avanga hrem tak tawp tawp an awm a. An nihna ropui tak an nih tawhloh hnu-ah pawh mipui chanai eiru na na na chu an hrem tho thin tih chanchinthar chhiar, ngaithlaa en thin chuan kan hriat vek hi. India ramah chuan eirukna lian thama puhna nasa tak awm, kan rama eirukna chungchanga hnuchhui thiam bera ngaih CBI-te’n an chhui ngeite pawh thuneihna changtu leh chang thintu an nih phawt chuan a taka hrem kan la hre lo.

Jain Hawala thubuai kha kan la hria em aw? Khatihlaia Prime Minister Pu Narasimha Rao atanga eptu pawl lian ber BJP hruaitu hlun Pu Lal Krishna Advani thlenga puhmawhna eiruk thubuai a ni a. Tumah tak tak an hrem tak kan hre lo. A taka bawhzuitu journalist Veneet Narayan te, ukil hmingthang Prasanth Bushan, Anil Devan leh midang thawkthate hming pawh a dai tep tawh zawk a ni. Chumi hnu-ah Bihar Chief Minister ( a nih lai) Lalu Prasad Yadav te, thubuai an siam laia CM hlui Jaganath Mishra leh midangte bawngchaw leina tur eirukna (fodder scam)-a chiang taka puhna, Comptroller and Auditor General of India (audit) report-ah pawh chiang taka ziahte chu tun thlengin an hrem kan la hre lo.

Tamil Nadu Chief Minister hlui Pi J. Jayalalitha eiruk thubuai pawh politics ngaihventute tan chuan a lar hle a. Mahse, an state-a politics-a nu lian tak, a khingpuite an nin deuh apianga an thlan tlin leh thin a nih miau avang ni maw, tuma’n tun thleng chuan a takin an la hremlo chu a ni a. Kan sawi tak zingah chuan Lalu hi tanin bang zut hnai ber a ni awm a, mahse chu pawh chu a nupui hnena chief minister nihna hlan thei khawpa a mipuite’n an duh lai hun a lo nih vang nge, a nupui (CM) ngatin taninah pawh an vai buhchangrum (roti leh a chawhmeh) a barh thin zu nia.

Mizoramah pawh hei hi a takin kan hmu mek a. Chumi avang tak chuan thuneihna hi a chuhin kan inchuh a. Sorkara nihna pawimawh neite chu hrem theihloh thawkin an thaw a, India Danpui-a ‘Mi zawng zawng dan hmaah chuan an intluk vek a ni’ tia ziah hi kan pawm hleithei tawhlo chu a nih hi. Central YMA president thuneihna chu a sang khawp a, sorkar officer a nih chuan a duhna hmun hmunah a awm theiah ngaih a ni a. Chutiang chu kan kalpui dan a ni a. Chuvangin democracy ram invuah ve-ah hian dikna (justice hi a taka awm lo ang a ni a. Mao Zedong-a thupui thiltihtheihna chu silai kawhmawrah a awm tih hi kan hnaih sawt khawpin ka hria.

Related Posts :