HOW TO CHOOSE COSMETICS

¢ Debbie Chawngthu

Incheina hi duh ang tak lei thiam / fuh a har thin a, i lei dawn anih chuan a hnuaia ziahlan te hi hre reng ang che.

Mascara i lei dawnin i leina tur dawrah inhnawih chhin suh. Chu ai chuan lehkha nem fai tak dil la, tah chuan hnawih chhin rawh. Chutah chuan a thatdan leh i duh ang rawng a ni em tih i hre thei ang. A brush hmawr hi i kutin khawih lo la, chuti lo chu natna hrik a kai palhin i mit tan a tha lo ang. Eye-shawdow pawh hi mita hnawih chhin ai chuan i kutphahah tat chhin la, chu chu i mit zawnah han dah la, i mit nen a inmil em tih i hre thei ang.

Eye pencil pawh hi a that leh that loh hriat duh chuan kutphahah rin hmasak chhin phawt tur a ni. Blusher leh cream rouge pawh hi mahni vun mil lei thiam a har duh hle a. I lei dawnin lapua keng la, chu chuan tlem i kutah han hnawih la, i hmai zawnah dah chho la, i vun rawng nen a inmil leh mil loh a hriat mai ang. Foundation pawh hi vun rawng nen a inmil tur a ni a, i vun mil zawng i hriat duh chuan i kutah tlem hnawih la, nuai pherh la, i mil tur leh mil loh tur i hre thei ang.

Powder pawh foundation ang thovin i kutah han hnawih chhin la, i vun rawng nen a inmil em tih i hmu thei ang. Powder i mil chu a tle deuhin a nal bawk ang. I hnawih hnu deuhah han en chiang la, khal deuh awma i hriat chuan lei suh. I vun nen a inmil lo tihna a ni. Lipstick pawh hi mahni rawng mil lo inhnawih chuan min tih that aiin min tichhe thei zawk a, lei dawnin fimkhur hle tur a ni. Lipstick i lei dawnin i hmuia hnawih chhin lovin i kutphah hnunglamah hnawih chhin la, i hmui bulah dah la, i inhmmeh tur leh tur loh i hre thei ang. Lipstick hi man tlawm lutuk chu hman tur a ni lo, a reiah hmui a ti duk a, hmui duk tawh chu lipstick bawk lo chuan a tih sen leh theih tawh lo ania. I hmui langsar tura i duh chuan lipstick i hnawih hnuah blusher i inhnawih thin aia duh deuh i hmui hnuai lamah hnawih thin rawh. Lipstick hnawih hian ha a ti lang var duh zual a, mahse a uk leh coral rawngte hi chuan a ti lang eng duh a, ha var tha nei i nih loh chuan hetiang rawng hi chu inhnawih suh. Rawng sen hian ha a ti lang var nalh thei ber a, mahse hetah hian hriattur pawimawh tak mai chu kuhva khawr i ei thin anih chuan lipstick sen bawk, hmui leh ha sen bawk hi chu a nalh lo teh ania. Ha var fai that mai leh lipstick sen hnaih rual tak hi chuan hmel a chawi em em thung a ni. Khua te pawh a vawt chho tan leh mai dawn a, hmui rep avangin mitin kan buai hunlai a ni. Zan i mut dawnah vaseline hnawih la, zankhuain chiah la, a tukah chuan i hmui vun a nem ang a, lipstick hnawih pawh a nalh thei ang. Khaw vawh lai hi chuan lip gloss hman a tha a, hei hian hmui a vawng hnawng a, a ro tur a veng a ni. Lipstick rawng inanglo hman pawlh pawh hi rawng inhmu tak anih chuan hmui a ti nalh ve duh riaua, i la ti ngailo anih pawhin han chhin ve teh.

Cleansers, toners leh hmai hnawih chi reng reng hi a zuar tuten an dah thianghlim ve a ngai a, bawlhhlawh lut thei tura an dah chuan vun a thalo thei a ni. Hmai hnawih chi reng reng i hman tirha i vun a thak deuh anih chuan rang takin phihfai ang che. I vunin a ngeih lo tihna a ni a, hmang leh tawh suh.

Vun enkawlna siamsa hi lei mai a awlsam a, a hman theih mai bawk a. Mahse, mahni pawhin a siam ve theih tho a, pawisa renna tha tak a ni bawk. Fanghma te hi ei atan chauh a ni lova, vun enkawlna atan pawh a tha em em a ni. Zai lep la, i hmai khuh nan hmang teh, i vun a lang tharlam sawt mai ang. Hmai phihna sahbawn hi a rimtui apiang kan duh a, mahse hei hi vun tan a tha ber lo. Rim nei lo apiang hi vun tan chuan a tha zawk a ni. Sahbawna hmai phih hi fai viau mahse vun mawmna a ei chhe thei a, nangmaha i siam duh anih chuan khawizu 1 oz, serui fiante khat leh artui varlai pum hnih ami chawhpawlh vek la. I chawhpawlh that hnuah a diak theih nan oatmeal telh ang che. I hmaiah hnawih la, minute 15 hnuah tuilumin phihfai leh ang che.

Shampoo pawh hi artui neih chuan mahniin a siam theih a. Artui pahnih chhungmu kha tuilum no khatah chawk la, chu chu i sam leh luleiah hnawih ang che. Minute 10 chiah la, sufai leh ang che. Spirit of Camphor (cosmetics dawrah leitur a awm thin) i neih chuan artui pakhat var lai nen chawk la, i arngengah hnawih ang che. Spirit of Camphor hi far hnih vel chauh telh tur a ni. I arngengah chuan minute 20 chiah la, a ro hnuah phihfai ang che. Carrot pawh hi vun hmelhem enkawl nan a tha a. Carrot pathum intia deuh la la, a hawng i tihfai hnuah rawt sawm la, chu chu i hmaihah hnawih ang che. Minute 20 i chiah ang a, i phihfai leh dawn nia.

Related Posts :