FRUITY FACIALS

¢ Debbie Chawngthu

Thei awm hunlai a ni leh ta a, thei duh mi tan chuan thei ei tur tui tak tak a tam leh ta mai. Taksa sawizawi hi a tha em em a, mahse hei mai hi a tawk lo. Kan vunah hian kan ei leh in te a lang thei a, kan taksa mamawh tawk kan ei chuan mahni rau rauah kan eng ve sawt thin. Vun tha tur te, mit tha tur te, sam leh taksa nalh tur chuan kan thil ei leh inah ser/thei leh theitui te a tel thin tur a ni.

Chaw nghei hi thenkhat chuan kan ngaithiam vak lova, thenkhat erawh chuan an pumpui tih hahdamna hun atan hmangin karkhatah vawikhat chaw an nghei a, chumi chhung chuan a aiah thei tui te an in thin. Apple pum li leh carrot pakhat rawt sawm la, ti tui la, chutah chuan serthlum pum thum tui leh ser thur pumkhat tui telh bawk la, fridge-ah dah vawt rawh. Hei hi karkhatah i chaw nghei ni ah lo in thin la, vun thatnan i hmang duh anih pawhin nitin in a pawi lo.

Ser/thei te hi ei tur chauh an ni lova, vun enkawl nan pawh an tangkai em em a ni. Dawnfawh hi thei tui tak, a hmel en pawha itawm hliah hliah a ni a. Tui a ngah a, hei hi hmaia hnawihin vun tifaitu tha tak leh vun pawt martu tha tak a ni. Vun ro nei tan phei chuan a tha lehzual. Tin, vun chuar tan tir, inrin neuh neuh la nghet si lo tihreh nan a tha bawk.

Ser thurte hi vitamin C an pai a, facial mask te, skin tonic leh cleansing cream siam nan an hmang nasa hle a ni. A thur avang hian vun ro leh vun pangngai nei tan chuan hman thiam a tul a, a chhan chu vun a ti ro lehzual thei a ni. Vun tihfai nana i hmang duh anih chuan buttermilk fianthum leh ser tui sawrhlim chawhpawlh la, i hmai leh nghawng velah ren vak lovin hnawih rawh. Chutah lapaw hnawmin i hrufai leh dawn nia. Cleansing scrub atan pawh a hman theih bawk a, ser hawng hi paih mai lovin chhu sawm la, badam rawt sawm bawk la, oatmeal i neih chuan chu chu telh bawk rawh. A vai hian i chawhpawlh tha ang a, i hmaiah i mit bul tel lovin hnawih la, minute 2-3 vel dimtein i kualin i hmai nuai ang che. Tuiluma tleuhfai leh tur a ni a, he cleansing scrub hi eng vun atan pawh a tha a ni.

Sertui hi sam tleuh nan pawh a tha em em a, ser pali hawng tui tam vak lovah chhum la, minute 10 chhung vel so cher cherin dah rawh. Mei atangin la la, darkar hnih vel dah dai rawh. A daih hnuah thingpuife thlitnain a tui chauh thli chhuak la, chutah chuan ser pali tui kha sawe rawh. Um-ah i dah ang a, darkar 48 chhung dah ang che. I sam i sukfai hnuah i sam tleuhna tur tuiah khan i thil siam chu tlem telh la, i sam ro hnuah i sam chu a tle sar mai ang. Kan sawi tak hi sam mawm nei tan a tha lehzual a ni.

Sertui hi kut tihfai nan pawh tha deuh mai a ni a. Chini diip tha tak leh sertuiin i kut nuai thin la, chini i nuai ral thlengin nuai la, minute engemaw zah i nuai hunah tuilumin tleuhfai ang che. Hei hian kuta reh theilo kai te a tireh thei a, kut a ti novin a ti ngo thei bawk a ni. Strawberries hi thur deuh a ni a, a thlum viau te pawh a awm bawk a, vitamin C a pai tam em em a ni. Ei atan a tui mai bakah face mask siam nan pawh a tha em em a ni. Strawberry lian deuh pathum rawt sawm la, chu chu i hmaiah hnawih la, minute 10 i chiah hnuah rosewater in phihfai leh la, hei hian vun a tifai em em a ni. Bawnghnute nena chawhpawlh pawhin a hman theih a ni. Nisa hnuaia awm hian vun a thimin a em ut ve thei a, chutiangah pawh chuan strawberry rawt sawm hi hnawihin a tha hle.

QUERIES & ANSWERS
Q. Facelift hi enge a niha, engtinnge an tih?
= Facelift awmzia chu vun chuar tawh leh vun vuai tawh an pawh mar hi a ni a. hmai pum hi a tih theih a, duh chuan a then lai chauh pawh a tih theih tho. Vun chuar tawh lai kha an zai thla a, an zai thlak hnuah a mar theih nan an thui zawm ta thin a ni. Vun an zai hian sam to-na chinah an zai thin a, a ser thup nana tih a ni.Vun hmun tlemte an zai kak a, an zai kak hnuah an thui a, a tlangpuii ka bul leh hnar bul vel vun hi hetiang hian an ti thin. Mit vun chuar tawh pawh tha takin an pawt mar thei a ni.

Q. Lipstick hi an siamin eng bawlhlo te nge an telh?
= Lipstick hi a tlangpuiin dyes(rawng), fat leh titanium dioxide pawlh khawm atanga siam a ni a. Dye hi a senna hi a ni a, a rawng tih danglam nan rawng pawl leh sendang te pawh an telh thin. tunah chuan lipstick rawng chi hrang hrang an siamchhuak tawh a, fat hian a hnawih a ti bet rei a, hnawih a ti rualin a ti awlsam bawk.

Related Posts :