FOR A GOOD LOOK-2

¢ Debbie Chawngthu

Thau hi a then chuan an hlau em em a, a then chuan thau duhin eitur tui hnai chitin reng an ei a, damdawi nen tan an la nasa em em a. Thau duh vanga thau lampang ei vak ringawt hi taksa tan a tha lem lova, a chhan chu thau tawh hnu chuan intih cher leh hi thil harsa tak a tling a ni. Sap ho hian hnam dang zawng aiin thau an hlauh avangin an tleirawl lai atangin slimming pills an ei a, thau hi an hlau takzet a ni. Thau chu a in thazo lova, inchei a nalh theih lova, cher aiin na neuh neuh an ngah zawk bawk a. Sapin slimming tablet an ei hi lo chin ve mai a tha lova, a chhan chu an ei leh kan ei hi a inang lovin a inthlau em em a ni tih hriat a tha.

Balanced diet hi taksa hriselna atan chuan a pawimawh em em a. Mi a ei leh in inbuk tawk lo chu a hrisel thei lova, insawiselna a ngah em em zel a ni. Eitur reng reng hi a hmina ei ngei chi nilo chu tlema a hel lampang nise taksa tan a tha bik a. Entirnan, zikhlum he hi chhum hmin ta vak ila, a chakna kha a bo then a, taksa tana a that tur angin a tha lo thin a ni. Thlai hring a hela ei chi ho hi taksa tan an tha veka, a theih chuan chaw ei apianga telh nise a tha a ni. Thlai hel ei tam mi chu a hrisel a, natna pawh a nei tlem bik a ni.

Raw food hi taksa tan a tha a, raw food ah hian thei, thlai hel, thei tui, khawizu te hi a tel veka,heng hi keini ramah pawh hmuh tur tam tak an awm a ni. Raw food ho hian taksa a vawng tha a, taksaa thur leh al awm pawh a inbuk tawin a siam a ni. Eitur chhum hmin ho hian taksaa awm sodium a ti tam a, a hel ho hi chuan sodium/potassium awm te a inbuk tawkin a siam bawk a ni.

I ei leh in reng rengah a hela ei chi ho hi telh tam la, mahse vawikhata ei vak lovin zawi zawiin pun chho zawk la, i taksain a thatpui zawk ang. Tunlaiah chuan a hela ei chi leitur a tam a , carrot, raddish te pawh hmuh tur a tam a ni. Heng hi to lutuk a ni lova, lei la, nitin ei tum teh.

Iron hi kan taksa tan a pawimawh em em bawk a, iron hian red blood cells a ti pung a, chuvang chuan vun natna pawh a tinep a ni. Arngeng nei tan pawh iron hi a pawimawh hle bawk. Beans, thingfanghma ah te hiam a tam a, heng hi a theih chuan ei hram hram tur a ni.

Kan ei leh in in a zir loh chuan ha pawh hi a chhe thuai a , chuvang chuan ha nei tha tur chuan ei leh inah fimkhur a tul hle a ni. Naupang thil thlum pek vak vak te hi tih miah loh a tha a, thlum khan an ha a ei chhia a, naupangtein a hun lovah an ha phawi a lo ngai ta thin a ni. Ha hrisel tur chuan calcium hi taksa mamawh tawk ei a tha a, a hmuh theihna tha ber chu bawnghnute leh thei atangin a ni. Chocolate te hi naupangin duh hle mahse pek loh a tha zawk. A aiah bawnghnute, bawnghnute atanga eitur siam te leh tuei tui pek zawk a tha a, an hrisel phah zawk bawk a ni. Naupangin thil an ei/in reng rengin an ei zawh veleh tuiin kamthuah tir ziah ang che. Hei hi puitling tan pawh a tha tho.

Thil ei reng reng sawm takin thial la, a sawm that loh chuan i pumin a zo lo anga, pumpui thalo i nei thuai ang. Thingpui leh coffee hi tui viau mahse in chintawk neih a tha. Ngaih mai ai hian taksa tan a tha lova, chintawk neia in thin a tha a ni. I chhawlhal anih chuan thingpui in lovin theitui emaw tui pangngai emaw in thin la, i taksa tan a tha zawk ang. Tui hi taksa tan a tha em em a, nitin no 8 tal in thin tum la, vawilehkhata tam tak in lovin darkar tinin no 2 in ziah tum la. A rei hnuah chuan i taksain ngaiah neiin a hunah i tui in a lo hal chawp chho zel thei ang.

Related Posts :