Eiru Thlanah Politician Him Rih, Sorkar Hnathawkin Hmahruai

Mizorama corruption dona lama Prism leh a thawhpui pawl dang panga – SOSA, FOMTU, Y4M, SDYC leh LDDVC te’n ‘Eiru Nia Rin Thlanna’ an kalpuia thlangtute thuziaka finfiah tawh mi 42-te chu sorkar hnathawk vek an ni. Politician leh midang an la tel lo.

Finfiah leh tura chhawp mi 127 leh finfiah ngaihna awm lo leh thuziak a dik lo tih finfiah tawh mi 55 zingah erawh politician lawk tak tak leh village level politician te, sumdawng leh contractor hming te pawh a lang nawk. Tualchhung Kohhran hruaitu leh ram pum huapa sakhaw rawngbawltu pawla hruaitu langsar tak tak hmingte pawh a lang bawk.

Mizoramah corruption a nasa kan ti a, a zual zel niin kan sawi reng bawk. Hetihlai hian eiruk avanga dan hmanga hrem leh khawtlang endawng hlawh erawh an tam lo hle.

Hei vang hian kum 2005-a Right to Information Act siam a nih hnu khan Mizoramah eiruk dotu pawl engemaw zat a piang a. Chu mai ni lovin pawl dingsa te pawhin eiruk do kawngah tun hma aiin ke an pen thui ta zawk a ni.

Prism president Vanlalruata chuan, “Hetianga corruption nasat lehzual zel chhan hi tam tak a awm rualin a chhan bulpui ber berah ‘dan hremna an tawh loh leh kan endawng loh vang’ te ni berin a lang a. Dan hremna an tawh loh leh kan endawng loh chhan hi ‘tu te nge ram hmasawnna tur leh mipui chanai eiru thin tih mipuiin kan hriat loh vang’ niin a lang leh a. Hei vang hian ‘tu te nge eiru’ tih hriatchian nana hmalak tul ti leh mipuiin eiru te chungthu an rel tul ti a, chumi kawnga hma la tura min nawrtu an tam hle,” tiin pawl paruk ten ‘Eiru Nia Rin Thlanna’ bul an tan ni August ni 1, 2009 khan Aizawl Press Club-ah a lo sawi tawh.

Hetianga hma an lak tak chhan hi sawi zawmin, “Eirukna tihtlem dan tur ngaihdan tam tak zingah ‘THIH HUAMIN AW’ tih lehkhabu, kan ram rorelnaa hmun pawimawh bera awma MLA hial ni tawh te intelkhawmna pawl Former Legislators Association of Mizoram (FLAM) in an chhuahah khan ‘khawtlanga zaka siam’ te, ‘Kohhran leh tlawmngai pawl hmanga nawr’ leh man chhuaha dan hmanga hrem lam hawi te kha hmalakna tha ber ber tur niin an lo sawi tawh a. He ngaihdan hi mipui pawhin kan tawmpui thlap niin kan hria a. Bawhzui chi tak turah kan ngai a ni,” tiin a lo sawi tawh bawk.

Chhan hrang hrang avanga kalpui an hreh em avanga hma an lak ngam mai loh dan sawiin hmalakpui atana pawl hrang hrang an sawm dan te, Society for Social Action (SOSA) te, Federation of Mizoram Trade Union (FOMTU) te, Youth for Mizoram (Y4M) Lunglei te, Serchhip District Youth Convention (SDYC) Serchhip te leh Lawngtlai District Development Vigilance Committee (LDDVC) Lawngtlai ten an sawmna an pawm sak tak dan te Prism ho chuan an sawi.

August 1, 2009 khan Prism, SOSA leh FOMTU hruaitute chuan Joint Press Conference neiin khawpui chhung hmun 4-ah Eiru Nia Rin Thlanna Bawm an hung nghal a. SDYC chuan Serchhip khawpui chhung hmun 3 leh Chhiahtlangah August 24 khan programme pui tham tak nen bawm an hung leh a.

August 25, 2009 khan Mamit khawpui-ah thianhoin bawm an hung leh a. September 1, 2009 khan Lunglei khawpui chhung hmun 3-ah Lunglei Press Club-a Press Conference an neih zawhah Y4M bawm an hung leh a. Kolasib khawpui-ah pawh FOMTU hruaitu ten bawm an hung a. September 14 khan Areopagi-a programme an hman hnuah LDDVC ten Lawngtlai khawpui-ah bawm an hung leh bawk.

An ruahman lawk angin September 16, 2009 khan Aizawl, Lunglei leh Serchhip-a hun bawm te chu hawn a ni a. Aizawl-ah chuan Dawrpui Hall-ah mi sawm bikte nen bawm hi hawn niin lehkha tla chhiar nghal a ni a, lehkha tla zat chu 188 a ni a. Lungleia lehkha tla zat chu 69 niin Serchhipa lehkha tla zat chu 175 a ni. Kolasib, Mamit leh Lawngtlai te chu ni danga hawn a ni a. Kolasib-ah hian 15 tlain, Mamit-ah 5 a tla a, Lawngtlai-ah 85 a tla bawk a ni.

Lehkhate hi enfiah a nih hnuah envelope pakhata lehkha pakhat aia tam awm te, Eiru Nia Rin hming ziah si loh lehkha awmze nei lo te a lo awm a. Tin, lehkha tam takah chuan an hming ziahlan a inang hlawm bawk. Enfiah a nih hnua lehkha tlak dan dinhmunah chuan lehkha tla zawng zawng 549 niin hming lang zat chu mi 235 niin lehkha awmze nei lo zat chu 10 a ni ta a. Heng te hi Aizawl-a 138 te, Lungleia hming lang 26 te, Serchipa hming lang 20 te, Kolasib-a hming lang 11 te, Lawngtlaia hming lang 36 te leh Mamita hming lang 4 te a ni.

Lehkhate hi uluk taka enfiah a ni a. Thuziak chhiarin an thuziak finfiah nghal theih te chu enfiah char char a ni a. September 30 thleng a theih ang anga thuziak enfiah a nih hnuah pawl parukte chuan thu hlawm siamin:-
1. Lehkhaa an ziah a dik ngei tih finfiah chin mi 42
2. Lehkhaa eiru nia rin hming leh rin chhan chiang taka an ziah la enfiah hman si loh mi 127
3. Lehkhaa an ziah chian loh avanga enfiah ngaihna awm lo mi 55 a ni ta a ni.

Hetianga finfiah chin 42 chauh an nei leh lehkha lut zinga a tlem zawk chauh finfiah a ni hi pawl pakhat - AMEF te chuan thuchhuah siamin ‘Eiru Nia Rin Thlanna’ rintlak tawk lohzia tilang tu nia an ngaih thu an lo sawi tawh. Prism president erawh chuan hemi chungchang zawhna hi chhangin, “Kan hun neihin a tlin tawk kan buaipui a. Kan enfiah hi 42 mai ni lovin kan enfiahna atanga thuziak a dik tih kan hriat theih chin 42 a awm kan tihna mai a ni a. 127 te hi chu finfiah tura RTI hmanga sorkar atanga document lak ngai te, hmun hla tak tak zin ngai te an ni a, kan la bawhzui zel dawn a ni,” a ti.

Finfiah tawh 42-te zingah hian Aizawla mi 26, Lunglei atangin 15 te leh Lawngtlai atangin 1 te a ni.

La finfiah chiah loh 127 te zingah Aizawl atangin 67, Lunglei atangin 9, Serchhip atangin 16, Kolasib atangin 7 leh Lawngtlai atangin 25 te leh Mamit atangin 3 te a ni a. Lehkha a ziah chian loh avanga enfiah ngaihna awm lo mi 55 te hi Aizawl ami 40, Kolasib atangin 2 leh Lawngtlai atangin 13 te a ni thung.

Hming lang zingah sorkar hnathawk lawk tak tak leh hna sang vak lo thawk te, politician lawk fe fe leh tualchhung politician te, sumdawng leh contractor te, kohhran hrang hranga mi langsar tak tak te, NGO hruaitu te leh mi dang dang hming a lang a. “Hei hian kan rama corruption kairual zia a tilang chiang hleah kan ngai,” Prism president chuan a ti.

Prism Convention thurel anga Chief Vigilance Officer hnena thehluh tur mi 42-ah hian politician pakhatmah an tel lo a, sorkar hnathawk mek leh sorkar hnathawk thin, tuna pension tawh anni thung. “An vai hian sap hovin ‘big fish’ an tih ang thalh an ni a. Sorkar department hrang hrang ami an ni a. Heng mi te chungah hian dan hmanga dik taka rorel anih chuan kan ram kalphung hi a danglam dawrh thei ang,” tiin siamthat beiseina sang tak anneih thu sawi pahin Vanlalruata chuan a sawi.

Mi 42 baka la chhuizui tur mi 127 zinga a tam ber hi sorkar hnathawk an ni. Heng zingah hian politician pawh engemaw zat an awm a. Bawhzui ngaihna awm lo ho pawh hi a ziaktuin chiang zawka an sawifiah theih chuan la bawhzui tho tura tih a nih thu Prism hruaitute chuan Zozam Weekly an hrilh bawk.

Eiru Nia Rin Thlanna bawhzui zel dan tur ngaihtuah hian October 3, 2009 khan Venghlui-a Central Hall-ah Eiruk Do Khawmpui (Anti Corruption Convention) neih a ni a. He khawmpuiah hian mi 71 (hming ziak) an kal a. Kum 2007-a Millenium Centre chungzawla Prism huaihawt Eiruk Do Khawmpui-a kal an zat lo hle a. Prism president Vanlalruata chuan, “Khami tum khan CBI Consent chungchang relin tun tumah hi chuan mimal chungchang rel a ni a. Hei hi kal an tlem chhan pawh a ni mai thei,” a ti.

He convention-ah hian SOSA general secretary F Hmingthanga chuan thu sawiin Mizorama corruption nasat zia sawiin a tifiah turin sorkar hmalakna anga sawi dik si lo thenkhat a sawi.

FOMTU president PB Lalsawmliana chuan eiruk do a tul zia sawiin sual haw zawnga piangthar tura mipui a duh thu a sawi.

PRISM president Vanlalruata chuan, “Hawh u, uluk takin ro i rel teh ang u. Kan ram mamawh ber chu heng sangha te hi man a, anmahni’n an simna tur leh midangin an thilsual tih ang an tih duh loh phah a, taksa leh thlarau tam tak kan chhanhim theihna tura Dan hmanga hrem a ni si a,” tiin rilru fim hmanga ro rel turin kakhawm te a sawm a ni.

Lecturer pension Vara Hmar chuan eiruk hmangte thih nana tawngtai tul a tih thu a sawi a. “Ni tin eiruk nasat dan indawta thi turin tawngtai ang u,” tia rawtin chu chu eirukna dodan awlsam leh hautak lo ber anih a rin thu a sawi. “Ruihhlo do inkhawma kal leh thusawi tam dan leh tuna kal kan tlem si zia en hian corruption do harsat zia a lang chiang hle a ni,” tiin Dr. LH Chhuanawma chuan eirukna do ngam kan la tlema a hriat thu a sawi bawk.

F Lalnienga leh Vanlalmawia te erawh chuan khawmpui hi a pawimawh poh leh kal an tlem thin nia sawiin, khawmpui kal an tlem chu khawmpui pawimawh vang a ni tiin kalkhawmte an hnem thung a ni.

Hetihlai hian Prism thil tih duh lo hi an awm. “Mipui pawisa mahni hamthatna tura lo chheprelha mahni tana hlawkna tura hmang 'Eiru' thlanna PRISM, SOSA leh FOMTU ten an buatsaih chu October 3, 2009 hian mipui hriata puanchhuah an tum tih ka lo hria a, an ti.

Eiru nia rin thlanna buatsaih a nih dan hi a mawlmang hle a, hming leh nihna emaw chenna hmun (address) emaw tak ngial pawh tarlan ngai lo a ni a. Mimal thil leh politics thila midang puh hmingchhiat theihna remchang tak a ni thei. Eirukna vengtu tura mawhphurhna nei, Anti Corruption Bureau (ACB) leh Central Agency dangte pawh an awm reng laia hetianga pawl thenkhatin eiru nia rin thlanna an buatsaih mai pawh hi thuneitu tan chuan maimichhin san ngawt chi niin a lang lo a ni, tiin social worker nia inchhal K. Laldinthara, Khatla, Aizawl chuan chief secretary hnenah lehkha a thehlut thung.

Lehkha thehluhah chuan, “Heng pawl thenkhat ruahmanna siam anga 'eiru nia rin'-te hi puanchhuah lo ni ta sela, kan khawtlang nuna kan chenhonaah nghawng tha lo tak a nei ngei dawnin a lang a, mimal inhuatna leh khawtlang endawng hlawh mai theihna a ni dawn bawk a ni.” a ti.

“Hei mai ni lovin, khawtlang inlungruaina tichhe thei a ni a, kan hnam nunphungah a tha lo zawnga nghawng nei ngei tur nia a lan bakah, kan sakhua 'Kristianna' thlenga tihmelhem a, kan rawngbawltu missionary-te hnathawh thlenga tithuanawp thei tur niin a lang bawk a,” a ti a, “Ruahman anga 'eiru nia rin'-te puanchhuah a lo nih chuan, dan !eh thupek kenkawh kawngah pawh harsatna nasa tak thleng thei a ni a, khua leh tuite himna tur ngaihtuah pawhin he hmalakna hi tihtawp a tul hlein a lang a ni,” a ti bawk.

K. Laldinthara chuan, “India dan hnuaia mi tinin chanvo kan neih angin, sorkar leh mipui sum tichingpenleh eiru nia kan hriatte hi chhuifiah tura zualkona tur dik tak a awm reng laia NGO thenkhatin, rin ngam tur tak tak ni chuang lova thilsual ti leh eiru nia hriat puang zar tura an hmalakna hi Mizoram leh mipuite tan a tha lo mai ni lovin, a him lo em em niin ka hria a. Khawngaih takin, Prism, Sosa leh FOMTU in eiru nia rin thlanna an lo siam mipui hmaa puanzar an tum hi phallo tur leh remti lo turin ka rawn ngen tak meuh che a ni,” tiin Chief Secretary hnenah ziakin thu a thehlut a ni.

Related Posts :