Thalaite lungawi loh chhan

Hmarchhakah Youth Revolt a thleng fo a, chu Youth Revolt chu thalai rilru na leh tawtte inhrikthlakna nia sawi a ni. Hel pawl lian pahnih - NSCN leh FKJGP (Federation of Khasi, Jaintia and Garo Peoples te ngei pawh hi thalai lungawi lote bultanna atanga lo piang a ni a, Assam-ah pawh All Assam Students' Union chu 1985-ah khan na takin an lo inhrithla tawh bawk. He'ng thil chhemalhtu, hmarchhaka Youth Revolt chhuahtir thintu nia mithiamte sawi tlangpui lo en ila:

1. Illegal Immigrants
1971-ah East Pakistan-in independence a hmu a, khami tuma indona kha Asia khawmualpuia refugee siamtu lian ber pakhat a tling. Mi maktaduai 10 vel zet an raltlan a nih kha. He'ng raltlante hi engemaw zat chu mahni ramah let leh mah se a chambang zui tate'n hmarchhak an tibuai hle. Tripura, Assam leh Meghalaya te chu a khawihbuai zual an ni. Bangladesh (East Pakistan) zalen hnuah pawh hian a ram retheih leh chhiatna nasa a tawh fo avangin he ram atang hian mi engemaw zat chu hmarchhakah an pem lut ruih ruih reng a, chu chuan vawiin thlengin hmarchhak a tibuai ta a ni. A tiralti bawk.

He buaina hian Mizoram pawh a khawih a, Chakma leh Tuikuk-ho an rawn lut reng a nih tak ber hi. Hei hian revolt em a siam loh pawhin movement lian tak zawng a siam khawp mai. |halai pawl pakhat - MZP chuan a do reng a, a do hneh hlei thei lo thung. Tuna MLA ni ta Lalchhandama Ralte ngei pawh hi Chakma foreigner-te duh loh lantirin Chawngte thleng kein a lo inpal luhai tawh a nih kha.
Thil chiang tak mai chu, hmarchhak politician-te hian he'ng foreigner-te hi anmahni vote-tu atan an duh fur a, an lamtang an nih phawt chuan hum an duh tlangpui bawk tih hi a ni. Eng pawh ni se, he thil hian thalaiteah nationalism chi a tuh ta deuh reng mai zawng a nih hi.

2. Corruption
Hmarchhak state tin mai hi corruption-in a tibuai a, mi tam takin hausaknan mai ni lo thuneihna neihna hmanruaah an hmang mek. North East Youth Movement, tuna North East Regional Youth Commission ni ta dintu CL Thomas-a chuan corruption hi hmarchhakah chuan political power leh economic power neihna hmanrua ni hialin a sawi a, hei hian thalai lungawi lo a siam niin a sawi bawk.

3. Unemployment
Hmarchhakah chuan education hi finna leh thiamna pur chawkna ni lovin, milian nih theihna kawng awmchhun nia ngaih a ni tih hi pawm dan tlanglawn a ni. Hmasawnnan ni lo, mi tangkai nih nan pawh ni lo, hna hmuh nan lehkha kan inzirtir a, sorkar hna ngei thawk turin kan inbeisei bawk. Kan tum angin thil a kal thei lo a, hna nei lo an chhuak ta tuam tuam mai. Sorkar hnain a daih lo a, sorkar hna ni lo thawh tlak a awm si lo. Chu chuan thalai lungawi lo engemaw zat a siam tawh.

4. Pawisa
Hmarchhak thalai lehkha zira ram pawna awmte hian mahni tradition leh khawsakphung paihin mi hmuhah intichangkang takin an awm thin niin CL Thomas-a chuan a sawi. Sorkar laipui leh state sorkar ruahmanna hrang hrang avangin a thlawna dawn theihin pawisa a luanglut a, chu chuan hmarchhak thalaite hi sum leh nawmsakna chauh um thin - materialist-ah a chhuah ta niin a sawi bawk.

5. Loss of Traditional Values
Hmarchhaka hnam hrang hrangte hi engtin tin emaw khawvel thar - civilised world-ah an lut a, an hnam inkaihhruaina leh dan tha hrang hrang - zawlbuk leh ngaihsan zawngte an paihthla ta. Mahse, an inkaihhruaina leh nunphung - traditional value-te hian thlaktu tha tak a nei leh si lo. Hei vang hian thalaite chu mahni tal talin an tal a, a sawp chu na tak a ni.

Related Posts :