Tangka sum ngainat hi court case neihna bul a ni!

Vawi khat chu, Aizawl District Council Court-ah hian patling a tap zawih zawih mai.

Pawisa puknaa dahkhamah a ram a hmantir a, a hmangtute chuan an pawisa puk chu an rul leh thei si lo. A ram chu a chan dawn ta mai. A tih ngaihna a vang ngei mai.

Chu ram chu a pa ro a chan ve a ni; 1972-ah a pain a lei a, LSC pawh an nei thlap. An veng pa pakhatin dahkham atana hman a dil a, hman man a awm dawn bawk nen, a phal ta mai.

A hmangtu chuan cheng nuai 5 a puk a, thla 1-a 10% zela pungin. Mahse, a pawisa puk chu a rul thei ta si lo. A dahkham chu pawisa puktirtu chan tur a ni ta tlat.

Chu inhmun chu inhmun tha tak a ni a, mihausa te pawhin lei an dil fo. Cheng nuai 15 te pawhin an dil thin a, mahse, a phal ngai lo.

A ram neitupa chuan bangbo takin court a bel ta a, roreltu leh ukil-te hmaah chuan patling mah ni se a insum zo ta lo a, chutia a pa ram a chan mai tur chu ngaingam lovin a tap ta zawih zawih mai a ni.

Chutiang chu sawi tur a awm nual. Dahkham inchuha court-a inkhing te, mahni pawisa puktirte'n an rulh leh si loh avanga inkhing te.

Ukil pakhat Lalawmpuia Ralte chuan, "Ka thawh ve chinah chuan sum inpuktir chungchang case hi a tam khawp mai, sumah hian kan lo buai a nih hi," tiin Zozam Weekly a hrilh.

District Court-a ding thin ukil, Zozam Weekly-in a biakpawhte chuan Mizo zingah sum vanga court case nei an tam thu an sawi vek a, hetiang case-ah hian mi hrang hrang, mi chi tin chi tang an tel tih an sawi bawk.

"Zu case a tam ber ang a, a dawtah chuan pawisa chungchang hi a ni mai awm mange. Pawisa inpuktir, rul leh si lo emaw pawisa invest a, an invest-na te bo ta daih te, hetiang case hi a tam khawp mai," ukil pakhat chuan a ti.

Zu case chu a tam berin an ring a, chu chu Mizoramah MLTP Act hman a nih vang a ni. A dawtah chuan pawisa inpuktir chungchang vel hi a nih an ring. "Civil case-ah chuan hetiang hi a tam, money suit kan siam ngun malh malh khawp mai," ti ang zawngin an sawi hlawm.

"Pawisa puk tur kan zawng nasa a, tin, a pung awma mi pawisa puktir kan uar bawk. Sum leh pai hi kan buaipui a ni ber ang, officer te, Pastor te, mi hrang hrang hi hetiang lamah hi chuan an rawn lang nawlh nawlh fo mai," ukil pakhat chuan a ti.

"Mi challang pui pui te, Pastor te pawh an bang chuang lo, A pung awma mi pawisa puk kan uar a, bank leh financial institution-ah te pawisa puk a har vang hi emaw'n dawn le te ka ti mai mai thin. Tin, a nei deuh chuan a pung awma midang puktir an ching a, puk chawpa a pung awma midang puktir lehchhawng pawh an tam. A tawpah an buai a, court an thleng ta thin a ni ber mai. Dan leh hrai awm tak tak lova sum hmanga sumdawnna hi a nasa khawp tiin a sawi theih ang," a ti bawk.

"Dan leh hrai awm miah lova sum hmanga sumdawnna hi a hlawk phawt chuan kan pawisa lo em em a, a rethei a hausa hian kan lawm vek ni maiin ka hria. Lehkhathiam leh a hawizaute pawhin an lawm tho. Chu chu Chiahpuam-ah khan a lang a ni," tiin hemi chungchang hi a sawi zawm a ni.

Zozam Weekly-in a biakpawh ukil-te chuan Chiahpuam lar hma khan a pung awma mimal pawisa inpuktir a lar a, chutiang case, mi pahnih inkar ang chi chu court-ah pawh a tam niin an sawi hlawm. Chiahpuam lar hnu khan chutiang chu a reh ta duk niin an sawi bawk.

"Chiahpuam lar hma kha chuan mimal inpuktir case hi a tam a, an inrul thei lo an inkhing chawt chawt thin. Chiahpuam lar hnuah erawh miin an neih ang ang mai ni lo, puk belh thlengin Chiahpuam-ah an dah ta a, Chiahpuam lar vanglai kha chuan mimal inpuktir hi a awm meuh lo niin a lang," ukil pakhat chuan a ti.

Related Posts :