Naupang riangvai kha

"Fahrah nun khawharthlak taka lut turin em ni
Zuapa'n a lo hawnsak vahvaihna khawvel kawngkhar ngei chu..."
- Vincy

August ni 12, 2007-ah khan Aizawl veng pakhata kudam pakhatah mipa naupang pakhat ruang chhar a ni a, inawkhlum nia ngaih a ni. Kum 13-mi a ni a, a la naupan em avang hian a thih dan hian mak tih leh sawi a hlawh hle.

He nau hian a pa a hre lo; 1993-a piang a ni a, a nu 1994-ah pasal dang a nei a, fanu an nei.

A nu hi mi inah a awm thin a, chutia mi ina a awm lai chuan a rai a, he nau hi a lo piang ta a ni. A fa paina hi a sawi ngai lo a, a fapa thih thlengin tunge a pa hi ni ang tih chu zawhna a ni ta a ni.

A rai a, a sawichhuak lawk lo. Mahse, thla sarih a pai hnuah a fa paina hnenah a sawi a, ani chuan, "Hnuchham inah kan dah mai dawn nia," tiin a lo chhang niin thudawn chuan a sawi. A fa paina chu pawmlai nei a ni a, a nupui pawh chuan a pasala fa a ni tih hre loin an awmpui raipuar chu a buaipui thin nia sawi a ni. A hrin dawnah pawh he nu hian damdawi inah a kalpui nia sawi a ni nghe nghe.

Nau a piang ta. Fa atana la (adopt) duh an awm leh awm loh an zawt a, Hortoki-a mi te'n an lo duh hlauh mai. Anni hi fanu pahnih nei, fapa awt em em an ni a, tichuan, doctor te hriatpuinain faah an la ta a ni.

Mahse, a nu chuan mahni fa ngei, mi kuta a'n awm tur chu ngaingam loin a rilru a lamlet a, damdawi in atanga a chhuah veleh a latu te nupa chu zawngchhuakin a fa chu a lalet leh ta a ni.

A lo leikan hnu-ah pawh he nau hian Hortoki-a mi, fa atana amah latu te hi Hortoki-ah a la pan fo nia sawi a ni.

August ni 9, 2007 atangin he nau hi an inah a haw lo a, khatia an ina a haw loh pawh khan Hortoki-ah an kal nia rinna a awm nia sawi a ni reng a ni.

Kum 13-mi, inawkhlum ta hi pawl 6 zirlai a ni a, Sande Sikul lamah chuan Intermediate pawla mi a ni.

Thudawnna pakhat chuan Peka hi naupang hlim lo tak niin a sawi a, hlauh nei hmel a pu nia a hriat thu a sawi bawk. A nu chuan "naupang harh ve deuh" niin a sawi a, fiamthu te pawh a duh ve hle niin a sawi thung. An venga tlangval pakhat pawhin, "Naupang hlim lo tak nia sawi a ni a, a awm pawh ka ti a, mahse, a pa nena an chhuak, an inchhaiha an nui dun lai te pawh ka hmu fo," a ti.

A rualpui zingah a te pawl a ni a, zirna lamah pawh a chak lo. Sikul kai turin a inakchhuak thin a, mahse, sikul thleng lova tei rawlai tum a ngah. A sikul kalpui pakhat chuan, "A tlanbo thin a, sikul nuam a ti loin ka hria. An chhungkua an hlim lo kan ti thin," a ti.

Naupang pakhat, kum 10-mi, amah hrechiangtu chuan, "Kan in nuam ka ti lo, mi ina awm daih ka duh," tiin a bulah ngei a sawi niin a sawi. "Khawimah nuam a ti lo, a thiante bulah nuam a ti. A thiante bul leh a nau bulah a hlim," a ti bawk.

"A thiante zingah a thla a ngam tak tak thei lo a, an in nuam a ti hek lo," tih te, "Hreh chung chungin sikul a kal a, hreh chung chungin inah a haw thin," tih te, "In lamah zirtira enpuitu tur a nei lo a, duat leh ngaihsak a hlawh lo," tih te, "A thiante zinga a infiam ve pawhin an chhungkaw boruak vangin hlim takin a infiam ve thei lo," tih te, "Hlauh nei hmel a pu," tih te chu he nau mizia chungchanga amah hretute sawi dan a ni.

Related Posts :