Eng vangin nge Traffic a jam? Duat hlawh lo Aizawl Khawpui

¢ Vanlalremruata Tonson

"A pawi ngawih ngawih a ni, sorkar leh mah ila tih ngaihna ka hre tawh lo. Lir lo nghing se mi tam tak an thi ang a, a rapthlak lutuk. Kei zawng chutih hunah chuan ka dam tawh kher lo ang. Kei chu ka upa tawh a, ka thi mai dawn a. |hangthar lo awm turte hi an ni…," tiin Brig T Sailo chuan a sawi a, a hmai zut thuak thuak mai.


A ban vei lam phar chhuakin, a in chhung atangin a in a kawk a, "Kei chu hei in ka lo nei hman hlauh mai a, ka vannei hle," a ti.

Aizawl khawpui chu Luangmual lamah tawlh thlain, ram leilung rualrem zawkah a awm ang. Bairabi Hydel Project kalpuiin Tlawng lui khuah a ni ang a. Tichuan Sairang chu port (Lawngchawlhna) tenau a lo ni ang a. Bairabi-ah rel a lut dawn bawk a, Mizorama bungraw thiar velna man pawh a tlawm hle dawn a ni. Khawpui lah chuan Sairang-a lawng chawlhhmun chu a hnaih hle ang a, kawngpui lah chu tha tawk takin sial a ni bawk ang. Chu chu PC sorkar laia chief minister Brigadier Thenphunga Sailo thlir dan a ni. A hlawhtlin loh zia chu a chiang hle awm e.

Aizawl khawpui chu kham karah an uai tang a ni ber a, kham kara in sak chu a hautakin a rit lo thei lo tih chu tlang hriat a ni. Kum tin furpui a lo thleng a, lei min vangin chhungkaw tam tak an buai thin. Tih ngaihna a awm lo chu a nih ber hi. Lir hi a nghing a nih vaih chuan in nei lian leh nei tha apiangin an chan nasa mai dawn ni awm tak a ni. Thenawm nei changkang apiang tan a hlauhawm bawk ang. Zar inzo rau rauah a hlauhawm pawl tak a ni awm e.

Chung zawng zawng pumpelh tura beih chu kum 100 kal taa zirna pangngai hmelhriat ve chauh leh 'civilised society' nena inhne (contact) ve chauh tan chuan thil theih a ni lo a ni mai thei. Tuihawk luankawr mumal lo chuan ram a tichhia a, mahni ram chin humhalh tumin silpoline-in lei an khuh a, a khuh phak loh chinah chuan leimin tur a insiam leh thin.

Kawngpui a tawt a, kawngpuiah ngei chuan hnathawhna tur hun tam tak a ral thin. Mipui punkhawmna lian deuh chu Aizawl khawpui lunlaia Assam Rifles lammual leh Vaivakawna YMA field-ah te hman a ni thin. Khawiah pawh ni se, chutiang punkhawmna puithamah chuan mihring traffic
thlengin a 'jam' tawh. Sumdawnna thlenga nghawng lo thei a ni tawh lo. Kawngpuite chu han zauh dawn ila, sorkar pawhin an zah tur leh sorkar siam tura party khaidingtute chu kawngsirah an ding khup a, tu tan mah han tawh chet ngaihna a awm tawh lo. A pherh vel vek.

Sipai officer hlui Brig T Sailo chuan thui tak a lo thlir a, a hun lai boruak ni lovin khawvel hmasawnna avanga thil danglam chak dan a hmu a ni. Engtin nge mipui kha zozai Luangmual lama an tawlh thlak duh ang? Chu ai chuan tuna Aizawl khawpuiah hian inbengbel ila, sum sen pawh a tlem zawk ang. Civic amenities awmsa tam tak i chhawm nghal thei dawn si. Mahse, a chiang chho ta zel a, khawpui tawt hahthlak tak karah kan innek nulh nulh a, in hmun rualrem lo zet zet pawh kan awt ngawih ta chu a nih hi.

"Kum 1982 velah khan Aizawl khawpui than dan tur ka thlir a. kha tih lai kha chuan Chanmari-Dawrpui-Kulikawn tlangdung mai hi a ni a. Kan thang chho zel dawn a ni a. heti hian kan awm kumkhua thei dawn lo, zauh a ngai a ni, ka ti a. Hmar lamah chuan Durtlang kham a ni mai a. Chhim lamah Ngaizel kham a ni leh mai a. Zemabawk lamah Zemabawk piahah hmun a awm lo a. Tanhril lam chu a awm chhun a ni mai," tiin Brig T Sailo chuan khawpui zauh tura ruahmanna a siam dan a sawi.

"Pawisa Delhi-ah zuk sawiin, central minister, urban changtu ka sawm a, khawpui awm dan tur ka thlirpui a. 'Go Ahead' min ti ta a. 'Estimate in siam ang a, pawisa kan provide thei ang che u' min ti a," tiin Brigadier chuan hna an tan zui tak thu leh ram pawh a tul anga an lak thu a sawi.

"Mi an tha a, 'ram tan' an ti a, compensation pawh an phut tam lo," tiin sorkarin ram a lak (acquire)-ah pawh harsatna an tawk lem lo niin a sawi.

"An ti tawp ta hmiah a. A mak hle mai!" tiin a ruahmanna leh bul an lo tan tawh, Aizawl khawpui thawl tha taka a awm theih dan tura a ngaih, kawng pawh thui fe an laih tawh hnua 1984-a an tlak avanga chhunzawm tak loh chu a ui thu a sawi.

A tawp chhanah hian 'mi pakhat chiah' mawhphurtu an awm a ti a. Chu mawhphurtu erawh a sawi lo.

Chu chu vision ropui tak neitu vision a ni. Ani chuan a hun laiin mite pawh an tha hle niin a hria.

Mahse, PC sorkar thlaktu Congress ministry-a minister pakhat chuan town expansion project kha a that rualin sorkar hmasa khan ram an 'acquire' pawh a ram neitu nihna an la tel lo, sorkar hmun han bun tak tak dawn chuan ram a hrana lak (acquire) leh a ngai thin niin a sawi.

Department hrang hrang awmna tur hmun te pawh an ruahman a, tuna Home Guard hmunte pawh a ram neitu te lak atangin an lei a ngai leh tho niin a sawi bawk.

Sorkar hnathawkte awmna tur quarters engemaw zat sorkarin a sakna hmun, Aizawl khawpui zauhna tur, Government Complex tia hriat lo ni taah chuan tumah an awm duh lo a, a awm chhunte pawh thingtlang atanga khawpui lut, khawpui chhunga in luah ngam lote an ni zawk a, kum 1983 khan a luah tur an awm meuh lo. Mahse, khami kuma Sihpui a min vak avanga awmna tur in nei lote leh Vaivakawn khi vak avanga hmun him zawng te sorkarin a dah chiam atang khan mumala luah tan chauh a ni. Chhiattawh avanga complex-a inbengbelte chuan he hmuna awm hi an hreh hle nia sawi a ni nghe nghe. Tam tak chu a hnuah an chhuak leh a, chhuak leh ta lo an awm a, anmahni belhchhahtu an awm bawk a, tunah chuan chhungkaw 150 chuang fe an awm ta.

Government complex-a sorkar hnathawk ni lo awm hmasa ber T Laldikzuala chuan Complex-a sorkar in tur PWD-in an sak khan an hotute chuan thingpui dawr siamsak turin an sawm thin a, an awm nghet theih dan tur te pawh ngaihtuah pui an inhuam hial hnuah thingpui dawr siam
tur chuan an chhuk ta niin a sawi. Tichuan sorkar hnathawkte awmna hmun tura siam complex-ah chuan tumah an awm duh lo a, hnathawkte'n thingpui dawr tal mamawhin an inhre bawk si a, sorkar hnathawk lo chu a awm hmasaah an tang ta a ni.

Chhiat tawh vanga tlankhawmho chu mahniin an inrelbawl ve a, 1987-a Luangmual VC-a nominated seat pakhat pek an nih hnuah 1990 khan VC puitlingah hlankai an ni. Sorkar hnathawk rual awm khawmna turah chuan chhiattawh vanga tlankhawm hovin khua an din a, political party a ding ta bawk!

C Pahlira, Mizo Union sorkara Executive Member (EM) ni thin pawhin Aizawl khawpui leh Mizoram tan thlirna leh ruahmanna thui tak neiin, chu ruahmanna tih hlawhtlin tum chuan hma a lo la chiam tawh thin.

Aizawl khawpuiah hian mi nuai 5 vel tal cheng khawm se, chutiangin khawpui dang engemaw zat pawh awm se, mihring nuna ni tin mamawh hrang hrang (civic amenities) chu sorkar hian tha tawk takin dah se, mipui tan khawsak a awlsamin eizawnna pawh a remchang zawk em em dawn a ni, tiin a ngaihtuah thin.

Mi nuai 5 vel chen theih nana Aizawl khawpui ruahmanna siam tum chuan ni tin tukthuan pawh ei hman lovin a thawk chhuak thin, a hlawhtling ta lo mai pawh a! Mi nuai 5 vel lo la cheng turte tana inkalpawhna kawngpui tha tak a awm theih nan kawng zawngin a thawkchhuak ni tin a, ram sem dan tur ruahmanna te chu a buaipui hle.

Ram an sem a, a kawng tur an ruahman bawk. Chu ram sem feet 100X60 chu kawngin a pawh a ngai. Ram neitu chuan jeep kal theihin ama kawng tur a insial tur a ni. A ram thleng kawng a sial hnuah district council sorkar chuan 'pass' siam sakin a lo pe chauh thin. Sorkar sumbawm a hranpaa sawk hek lovin kawng engemaw zat chu sial zawh a ni ta hial mai. Mahse, harsatna dang a la awm ta cheu; ruam leh kawrin kalkawng a dangchat a, inkalpawh mumal theih lohna hmun a awm nual. Sorkar atangin chung ruam leh kawr chunga lei dawhna tur sum chu beisei ngaihna a awm si lo. Lei tel lo chuan kalkawng hi kalkawng a tling lova, chutah pawh, thing dawh kai ringawt ni lo, hautak zawka siam te a la ngai leh ta nghal. Kawng siala ram neitute hnenah chuan 'cheng 50 zel rawn thawh rawh u le' an ti ta ringawt mai. Anni pawhin phunnawi lovin an thehkhawm liam liam ve mai bawk. Mahse, sorkar sumbawmah erawh an thehlut phal lo. "Sorkar sum chu hman leh dawnin dan zawm tur tê tê a lo awm a, a buaithlak," tiin thlirlawktu C Pahlira chuan a sawi. District council-a an head clerk hnenah an pekhawm a, ani'n him takin a lo vawng a, chu chu ruam leh kawra inkalpawhna tur siam nan an hmang ta a ni.

Mi nuai 5 pawh an len halh halh theihna tura riruat Aizawl khawpui tur chu a zau tham hle; chhim lamah Melriat, Hmar lamah Sihphir, chhak lamah Tuirial, thlang lamah Sairang. Mahse, chu chu riruatna mai a nihna chen a awm, kawng zawnna chin chu chu ai chuan a zim zawk deuh. Zim zawk deuh e ti lovin kawng zawn chiah lohna hmunah pawh ngaihruatnain kawngpui tur chu ruahman a ni tho. Dik tak chuan kawng zawnchhuah sa tam tak chu sial pawh sial zawh loh a ni a, a then chu hnawhpin leh te a ni bawk. Chutih laiin, kalkawng sira kawngpui la zauh zelna tur feet 15 reserve thin pawh kawngthlang lam chuan an nek lui ve zel bawk si. Kawngpui anah In a ding fur a, motor chesualin a su leh bur thin a ni. Venghnuai field atanga kawngpui rawn kala, Republic-a rawn phei, Venghlui rawn tan tlanga Babaji venga kal zel a, Lammual hnuaia kal zel, Modern English School bul kawng kawi lai taka chhuak tur pawh tun thlengin a la lang tlang lo a nih hi.

Sorkarin Lammuala Jawaharlal Nehru Sports Complex sak a tum lai khan chu kawngpui ruahmanna awm sa zui chuan, mahse, Babaji Venga chhuk thla lova Dak Inpui sira Treasury Square pawh turin kawngpui siam chu a tum ngei. Mahse, chu pawh chu engmah a ni leh ta chuang lo. Tlak lampang kawngpui, CP Road tia vantlangin a sawi mai, Khatla kawna chhuak tur pawh Assam Rifles lamin an hnawhping leh tawh bawk.

Rambuai hma chuan New Market a awm lova, Nilaini leh Inrinni-ah te Sabji Bazar a awm thin. C Pahlira chuan chawhmeh zawrhna bazar neih tulin a hria a, Delhi khuan Aizawla sipai ram zau tak mai chu chuti teh luain a ngai pawimawhin a hre lo bawk nen, Aizawla Assam Rifles commandant a dawr ta a ni:

"Sakawrpu lane hi in sawnchhuak tur a ni. Sipaiah lal ber i ni a, kei civil-ah ka thu ber bawk. Keini pahnih kan inrem chuan a tawk mai," tiin a sawi.

Sipai lal pawh chuan a lo aw ve mai bawk. Assam Rifles-te chuan tuna New Market-a an sakawrpuho chu Babaji Veng lamah an sawn thla ta a, Sakawr inte chu chawhmeh zawrhna tura chei a lo ni ta a ni. Dawrpuia dawrkaite chuan tih rih loh an duh a, mahse, nakinah a la tawt thuai dawn avangin sabji bazar neih chu a tul si. Chu chu New Market intan dan a ni. Dik tak chuan New Market hmun tur pawh tun aia zau fea ruahman a ni. Mahse, sorkar tharte a lo piang chho a, ram an inpe darh zo ta a ni awm e. Aizawl khawpui hi ruahman anga a kal a niha, a thang zel a nih chuan bazar pakhat chu a tawt lutuk dawn a, tiin Thakthing khamah pawh bazar in ropui tak sak turin ruahmanna siam a ni a, mahse, ruahmanna chu a piangchhuak zo lo, mimal in a ding ta fur mai.

Thil thenkhat chu tawngkaa tihfel mai theih a ni, a thu a zirin. Tunhma chuan Shivaji Tilla leh Khatla kawnte pawh sipai ram vek a ni a, mahse, Aizawl khawpui tana ruahmanna siamtute chuan tawngkain an va dawr a, an ram zau tak, luah sen loh chu an dil chhuak mai. Civil ram a lo ni ta mai a nih hi.

Chutiang teh nuai chu he Aizawl khawpui hian a paltlang a, duat a hlawh lo hle. Chu khawpui chuan traffic jam vanga harsatna namen lo a tawk ta pawh hi a mak hran lo e!

Related Posts :