Zozám Leh Kei

¢ K Lalrochana, Lunglei

A kum chiah ka chiang ta lo, 2005 kum laihawl vel kha ni tain ka hria, Serchhip-ah Rimawi Khawvel award an sem a, award dawngtute hming kha Lungleia ka chanchinbu enkawla tihchhuah atan ka duh ve si a, zawh tur awm ka hre bawk si lo. A tawpah chuan Aizawl Post, tlai lama a chhuah lai kha a ni a, Aizawl Post chu ka va be ta tawp a. Khatih laia Aizawl Post |halaite Huang ziaktu Sangzuala Hmar biak ka duh thu min rawn chhangtu chu ka hrilh a. Sangzuala phone no min hrilh a, Serchhip-a Sangzuala awm lai chu ka be ta a. Hei hi Sangzuala Hmar nen kan inhriat tanna a ni a, tin, Zozam Weekly-a bul ka tan ve na tiin a sawi theih ang.

Sangzuala nen hian a hnuah ka in be zeuh zeuh a, Lunglei lama Zozam Weekly corespondent tur an mamawh thu leh ka theih tur leh tur loh min zawt a. Hetih hun lai hian Zozam Weekly hi ka la hmelhriat lutuk lem lo a, ka chhiar ve zeuh zeuh chauh. A enkawltu zingah Sangzuala bak hriat ka nei lo a, ani lah chu a hmel pawh ka la hmuh ngai loh, phone-a ka biak thin kha a ni mai a, zuam lo tak chungin 'aw' ka ti ta ngawt a. Heta tang hian Zozam Weekly-ah hian Lunglei lam thuthar ka ziak ve ta zeuh zeuh a, tun thlengin ka la ziak ta zel a. Kum khat dawn chu ka thawhpuite hre miah lovin Lunglei lam news ka thawn a, anni pawhin tunge ka nih hre miah lovin, ka thuziak chu a ngai ngaiin an lo chhuah ve mai thin bawk.

Zozam Weekly corespondent-a ka awm hnuah pawh kum khat dawn lai chu ka thawhpuite hmel hmuh miah lovin ka awm a, Pu TK-a, Justin-a, Hmingsanga, Muantea, ka pi Ngaizuali, Remruata Renthlei, Tetea tih ho te hi eng ang hmel pu nge an nih a, eng ang mize pu nge an nih ka hre miah lo. Ka news ziah ve chhun chhun te chu internet-ah ka thawn mai thin a, an lo chhuah ve mai thin.

Kum 2006 kum tawp lam kha ni tain ka hria, Lunglei MSU te'n adviser-a min hman ve avangin Conference hmang turin Aizawl lamah ka naute ka hruai a. Aizawl ka thlen veleh ka biak ngun deuh ber Sangzuala ka bepawp a, Zozam Office tlawh ka chak thu ka hrilh a, office awmna lai te min hrilh a, hriat a lo awl phian!

Zak tak chungin Zozam Office-ah chuan ka lut ve ta rawih a, "Lunglei atanga lo kal ka nia" ka'n tih chuan Sangzuala chuan "Rochana i ni maw" min ti vat! Pu TK-a te ho min han hmelhriat tir zung zung a. Tunhnua ka ngaihtuah let leh hian khatih laia ka lo zak der vel kha ka inchhir ngawt mai!

A hminga Lunglei atanga ziaktu awm ve ta chu Lunglei mipuiten Zozam Weekly an chhiar tam leh tam loh a rukin ka thlithlai ve reng thin. Chanchinbu dang ang bawkin an chhiar liam vel mai mai ni te hian a chang chuan ka hre thin. Mahse, 'MLA DAWT BILL' a rawn chhuah chiah khan Zozam Weekly hian mipui ngaihven a hlawh a, Lunglei khawpui chhung hmun tin maiah khan an sawi sup sup kha a ni ber mai a. Aizawl lam ang bawkin Lunglei lam chanchinbuah pawh article chi hrang hrang a hring teuh a. A hnu lawkah 'Aizawl Civil Hospital OPD chhawng bo' an rawn phawrhchhuak leh a, hmun tin maiah khan Aizawl Civil Hospital chhawngbo kha mipuite khan kan zawng leh luai luai mai a. Dik tak chuan Zoram pum tuam chhuak, Zoram mipui sukthlek her danglam dawrh thei thuchhuahna chanchinbua a kil khata ka lo thu ve thei ringawt mai kha hmai a uang a, a nuam ve ang reng phian (Ka tangkai ve vak lo na a).

Lunglei lama chanchinbu enkawl nei ka nih ve avangin 'regular' tak chuan Zozam Weekly-ah hian ka ziak thei lo a, tunhnaiah phei chuan hriselna lam that loh nen, ka ziak meuh lo a ni ber. Hetih rual hian kan sawi tel ve mai mai duh chu Zozam Weekly vang hian vuak em chu tuar lo mah ila, eng eng emaw chu ka tuar ve niin ka hria.

'Lungleiah KS an tlem' tih thupui hmangin Lungleia KS te chanchin Zozam Weekly-a ka ziak avangin 'addict' leh KS te enkawl thin pawl pakhat chuan na ang reng takin min chhuahchhal a, police leh magistrate emaw ka nih inti ni awm fahranin an office-ah te khan min ko a, ka thulakna te min zawt ang lawp lawp a, kei lah chuan ka sawi duh bik der si lo a, a tawpah chuan kan intha then ta ringawt a. Anmahni bakah anmahni tantu tu tu emaw khan 'Lunglei hming i tichhia' ti zawng khan min an khum bawrh bawrh a, thiamthu sawi dawn ila, sawi tur ka ngah nen, thiamthu sawi ka tum lo a, news chu news a ni ti ve tlat kha ka nih avangin ka ziak a, ka ziak zo tawh a, engmah sawi zui ka tum lo a, thiamthu sawi lah ka tum hek lo. Tihian, ka ngawi a, kan ngawi hlen tlang ta chu a ni mai awm e. Zirlai pakhat, zirtirtuin a hnute a khawisak chungchang, MSU-in thuchhuah an siam, ka chhuah chhawn tumin, zirtirtu lam chhung te'n kan in-ah min lenchilh tawh bawk. Hei hi thil mak a ni hran lo, chanchinbumi chuan kan thuziak avangin lenchilhtu kan tawng fo. Mahse mak zawk ta em em chu, Lunglei chanchinbua ka ziak haw mang si lova Zozam Weekly-a ka ziak an haw ta em em bik mai kha a ni. Hei hi chu tun thlengin ka la hrethiam lo.

Kei teh lul, Zozam Weekly chhungkuaa ka tel ve thei hi ka lawm a, Aizawl ka kal changa ka thawhpuite, Justin-a te, Remruata te, Muantea te, Tetea te, Hmingsanga te leh Sangzuala te hnathawh dan ka hmuh apiang hian 'thil thar' zirchhuah ka nei ziah a, an hnen atang hian thil tam tak ka zirchhuak a, ka hriat loh tur tam tak ka hriat phah bawk. Ka hriat loh awm chhun chu Debbie Chawngthu hi nula nge a nih nu tih chiah a ni.

A tawpna atan chuan a neitu Pu TK-a leh Pi Ngaizuali te hian min enkawl thiam ka ti a, an hnuaia thawh a nuam a, kan thawk zel ang a, helai kan chenna chhimkun atang hian thu ropui tak ka la rawn vawrh chhuak ve ngei ang!

Related Posts :