Utawk pahnih

¢ Lalhruaitluanga Chawngte

Vawi khat chu, utawk rual khat hi ramhnuaiah kalin an inzui dem dem a, chutia hlim taka an kal lai chuan an zinga pahnih chu khuarkhurumah an tla ta daih mai.

Utawk dangte chuan chu khuarkhurum chu an han en a, a thukzia leh min mai thei a nihzia an hmuh chuan an mangang hle.

An thiante pahnih chu an thi ngei dawnin an hria a, lungngai takin a kotlangah chuan an thu ta thap mai a ni.

Khuarkhuruma tla an thiante pahnih chu an theihtawpa ringin an au a, thi thei dinhmunah an ding tih hrilhin.

Mahse, utawk pahnihte chu an thiante thusawi chuan a tibuai lo, zuanchhuah tumin theihtawp an chhuah ngat ngat zawk.

An chau tawh hle a, mahse, an beidawng chuang lo. An insehruh a, zuanchhuah hram tumin an bei ngat ngat mai.

A kotlang atang chuan an thiante chuan an lo au lauh lauh reng bawk; an tlakna khuarkhurum hlauhawmzia leh thi thei dinhmuna an din thu chu thahnemngai takin an lo hrilh a ni.

Khuarkhuruma tla pakhat zawk chuan an thiante thusawi chu a'n ngaithla chiang a, an dinhmun chu a hrethiam ta. A beidawng a, zuanchhuan a tum ta lo.

Chu utawk chu khuarkhurumah chuan a bawk ta hle hle a, a thi ta nghe nghe.

Pakhat zawk erawhin zuanchhuah tumin a bei ngat ngat a, a insehruh sauh sauh mai.

A thiante chuan an lo au reng a, a dinhmun hlauhawmzia chu hrilhin, hahdam taka thu hle hle mai turin an lo au hlawm.

Mahse, chu utawk chuan a thiante thusawi chu a ngaihtuah lo. A chauh em em hnu-ah pawh a tha neih zawng zawng sawmkhawmin zuanchhuah tumin a la bei ta ngat ngat mai.

Bei tlat ta na na na chu, a tawpah chuan a hlawhtling ta hlauh mai. A zuangchhuak a, a thiante a fin leh thei ta.

A thiante chuan, "Kan thil hrilh che kha i hre pha lo em ni?" tiin an lo zawt var a, mak an ti hle.

Chu utawk chuan a beng ngawn thuin a thiante chu a chhang ta teh daih a, khatia an au vak vak lai te khan 'tang hram hram rawh' tiin an lo au emaw a ti a nih chu!

Lei (longue) hian thil-tih-theihna mak deuh mai a nei a, nunna leh thihna thlen thei hial khawpin thil a ti thei a ni. |awngkam dik lo kan hman hian, tu te emaw a tibuai thei a, an thih phah hial thei. Utawk pahnihteah hian chu chu a chiang; pakhat chu tawngkam dik lo vangin a thi a, pakhat zawk erawh a beng a ngawn avangin chu tawngkam dik lo chu a lo hre thei lo a, a damchhuah phah ta a nih hi.

Related Posts :