Rap Chunga Thil

¢ Lalthansanga Chinjah

Hman lai chuan rap chungah bel-in emaw zu an bilh a, kum thum zet a vei hnu pawhin, a la thlum lo ve an ti a, chu chu RAP chunga THIL an ti a, uluk tak leh puithu takin an hawng thin a ni awm e!

Lal No an nei a, Nopui an nei a, Noleng an nei a, Rap chunga mi kher lo Zupui, Zufang, Buhtun Zu etc., an nei bawk a, chu'ng chuan an Khuangchawi, Sechhun, Chawn leh Kut ni vang thlaah-te hlimna a pe thin a. Zu an hman dan kha hlim nan a ni ber a, zuphawk an kaihchhuah a, an lam nikhua phei chuan nuam an ti em em a, Pu K Zawla (L) phei chuan, hetiang tluka hlimna hi khawvelah a awm bik lo ang, a ti hial reng a ni.

Kum 1920 hnu lamah erawh chuan sorkar hnathawk - Babu leh Rahsi-te an lal ta em em a, tlangval zurui, buaina siam, tlangchil tur an tihte pawh, an thiante nen an chhan ta thin a, mipuiin an zilh dawn pawhin sual rawn-ah an puh a, heta tang hian nun dan tha chu a chhe tan ta a, Mission sapte'n Kristian tan hmelma-ah min puan hnan a....zu hi buaipui a ni ta mup mup mai a....tun thlengin an heti ta a nih hi..!

He THIL, Zu, (civilisation) aia upa zawk hi sorkar pawh hian an do thin tak na a, thosi (sikserh natna pai) ang maiin an la do hneh theih mawlh lo a, khap a ni tak na a, mihur kap ang maiin ven zawh tak tak lah a ni hek lo! Upa na na na chu hneh pawh a har a ni ang!! Genesis Bu-ah Nova zu siam leh a ruih chungchang kan hmu. Babulon, Assuria, Phoenicia, Palestine, Suria leh Aigupta ramah te zu siam a lo ni tawh a, Isua thilmak tih hmasa ber pawh kha tui uain-a chantir a nih kha! (Heta uain tih hi sap tawnga wine tih atanga lak a ni, KJV-ah vawi 231 hman a ni, zu sawi nan Bible hian a hmang vek, ruih theih a ni vek bawk, Mizo tawnga uain kan tih vang hian zu a nihna a bo chuang lo, a chak lo deuh a ni mai.) Persian ho thawnthuah phei chuan, Lal Jemshed-a'n kel vun-in, ip a siamtir a, chutah chuan grape zu a bilh a, pumna damdawi atan a hman thu a lang a, 600 BC laia, Europe rama an bilh ve erawh chu chhinphui nachang an hriat loh avangin a hang a, chumi hnuah Puithiam Dom Perignon-a'n om chhinna (cork) a hmuchhuak a, tha takin an dahtha thei ta a ni. Zu hi han chhui han chhui chuan sakhuana nen a inzawm deuh tlat a, chuvang chuan a ni ang piantharna tak tak nei lo ringtu intite pawhin ringtu tan chuan sacrament peng (zu hi) thlahthlam tak tak theih a ni lo an tih fiamthu reng thin ni!
CHAWLTUININGZU...Chu chu Pi leh pute tawngkam a ni lo'm ni kha? Archaeological-ho chuan kum 8000 liam daih tawhah khan zu hi awm tawhin an chhut. Gaelic-ho chuan zu sawi nan Uisge betha an hmang a, chu chu sap-hovin Whisky an ti a, nunna tui (water of life) tihna asin! Damdawiah an hmang thin tlat alawm! Aigupta-ho chuan zu hmingah Al-kohl an ti a, sap hovin 'alchohol' an tih tak hi niin powder fir tihna a ni. Russian-ho chuan an zu thulkhung hming atan Vodka an ti a, tui thiang (little water) tihna a ni. A hming a mawi leh that vang hian zu an nihna a bo chuang lo.

ZU hi a bo ang em?
Greek-ho chuan zu hi thudik puanchhuahna a ni an lo ti daih tawh a, miin a harhfim laia a sawi duh loh, a thup tlat hi a ruih hnuah a puang fo reng a ni. Misual dawp nan pawh hian hmang zauh zauh thin sela, hriat belh tur a awm nual mai thei asin ! Winston Churchill-a pek khan, 'zuin ka hnen atanga thil tha a lalkchhuah aiin zu atang hian thil tha ka lachhuak tam zawk' zuk ti pek a! A hmang tangkai thiam hle ni tur a ni. Intihhlim nan te hian zu hi a serh zinga a mei ni mai hialin a lang tawh. Thuhriltu ( 10:19)-ah pawh uain hian mi a tihlim thin a ti hial reng a ni. Mi tihlim thintu a nihna pawh a awm ve reng a nia! Sapho pawhin 'ni khat hlim i duh chuan zu in la...' an lo ti reng a ni ! Damdawi tam zawkah hian tun thleng pawhin pawlh a ni reng a ni.

ZU hi buaipui a ni ta viau, intuten an buaipui a, a zuarte'n an buaipui bawk a, a mantute'n an buaipui hle bawk a, roreltuten an buaipui bawk a, Kohhran hian kut kuangkuah chungin a buaipui bawk. Mahse, heti taka chimawm leh tihbaiawm hi ni mah sela, sual tinreng bul erawh hi chu ni berin a lang lo, (a tha ber ka tihna erawh a ni hran nek love!) Zu in miah lo, hlemhle, eiru, thenawmte ram nek ching, hna hmuh nan a midangte tlawn ching, thil man tih to thut hreh miah lo, dawt sawi leh thamna lak hreh miah lo, Kohhran-a inhmang tak tak, pawisa khelh leh eiruk pawisa miah lo, rilru uire an tam si hi! Zu in thinte hian a Zuartute an hmusit a, a zuartuten a In thinte an hmusit let a, khap a nih poh leh a pung tual tual a, a neiten an hawn sen deuh a,a neih lo deuh ten an hawn; dup deuh a ni ber e.

Zu..Milian inkawmna chahbi pawimawh ber, mi chhe zawk te kawmkar hrut tirtu, a thenin damdawi atana an hman, a thenin sual tih nan an hman bawk, a thenin sum tuak nan an hman, a thenin lung in bang zut phahna, a maka mak hrim hrim zu hi...

Vanram kaina chu a ni hauh lo a, mahse, Vanram kai loh phahna pawh a ni bik chuan a lang lo! (Mission sapte pawn an in tho an tia lawm an ti!!). Ram changkangah chuan thingpui ang maiin an ngai a, an rui zauh thin tak na a, an hmang thiam tawh a, an 'problems' a ni ve lutuk lo.Ram hnufual leh thuanawp apiangah sual tinreng bula ngaih a ni thin a. Zu hian buaina leh thil tha lo tinreng a kaihhnawih tih chu history atang hian a lang reng mai. Zu vang hian nawhchizawhna te (KS), hurna te, rukruk te, tualthah te, accident te, buaina te, hlemhletna etc te hi a kaihhnawih ngei mai. Sual tinreng bul an tih pawhin a dikna lai a awm, mahse, sual tinreng chhuahna (seeds) erawh chu a ni bik kher lo. Eden huanah pawh khan zu a awm kan hre lo, (Nova hunah a lang chauh). Mahse, sualna zawng zawng zinga sualna lian ber a chhuak tho tih chu Hindu leh Mosolman te'n hre lo mah se Kristian (inti) te chuan kan hre awm e. Sualna kan tih ang sualna chi reng reng hi chu mihring rilru leh thinlung atanga chhuak a ni a, chuvang tak chuan chutiang sualna tih chingte chunga rorelna chak chu sorkar hian a kenkawh a ngai zawk mai a ni. Tualthah hi sual lian a ni a, a hremna pawh na tak a ni a, sakaw zirtirna nen pawh a inkalh tlat a,chuvangin mi tam takin tual an that ngam lo thin. Zu vanga sualna kawng hrang hrang ti thinte pawh hi a hremna dan khauh tak awm hran leh mai sela, a dik mai lo'm ni ?

Entirnan - miin thinrim vang liau liauva tual a thah chuan tuna a hremna hi a tawk, zu vanga a thah chuan tun aia hremna dan khauh zawk hi awm sela, chutiangin, sual tihna kawng hrang hrangah pawh zu vanga tisual an nih chuan a hremna dan chu khauh lehzual zawk mai sela, heti lutuk hian Zoram hian zu hi a buaipui lo tur, ka ti thin. Dik tak chuan zu in ngai lo leh duh lote'n a thuin zu ngawl an vei a, a duhhoin a practical-in zungawl an vei ni ber hian a lang.

Zu khap burna dan (Total prohibition act ) hian dan zah lohna leh pawisak lohna a thlen tih chu America rama Prohibition period atangin a chiang hle. Chutiangin, kan ramah pawh hian khap bur tih hian a zuartute tan a laktir sauh a, a inte'n in tur neih loh hlauin hma an la bawk a, dan khauh tak awm reng si hi hlauhawm awm tak, mahse, hlau miah lovin thlirliam a ni ta mek zawng a nih hi. Total Prohibition Act hi hi hlih duh lo tam tak an awm, a dik lo lo e. Hlih ni tak ngat se, hun engemaw chen chu sualna chi hrang hrang a punlun hle ngei ang. Chhungkua, khawtlang, Kohhran leh sorkar pawh a buai ngiang ang, mahse, buai zualpui hun kan pelh/thlen meuh hunah chuan hmanlai kan ngai kher lo ang. Hei hi zu a tha tih vang hrim hrim ni lovin, khawvel thang zelin a nawr mek a ni zawk a, tunah ti lo mah ila, tih hun a la thleng tho tho dawn. Tin, Total Prohibition Act hlih a nih vang hian zu hi phalrai tur tihna a ni lo a, dan hnuaiah dan angin a leng zawk mai tur a ni.

Hemi kawngah hian Kohhran pawh hi a inenchian a ngai, a lu len lohna turah a ring a rawlh fo a tul fo em ni? Kohhran hian Kristian tih hi sakhaw pawl pakhat a ni a, Krista ringtute tih hi sakhaw dang, pawl pakhata inzawmkhawm a ni tih hi a chian a ngai. He Kohhran huang chhunga Kristian tam takte hian zu hi an in duh chauh ni lovin an mamawh a ni tih pawh a haider fo tur a ni bik lo. Lal Isuan buh lem leh buh tak a sawi hi Kohhran hian a chawm reng, pakhat huain pakhat mal a sawm bik anga maw? Zu hi ka fak awzawng bik lo, kum 30 liam ta atang khan ka hmel hriat tawh, khang hun atang daih tawh khan zu-a Mizote ngaihdan hi tun ang ni lovin zalen takin khuahkhirhna hnuaiah awm chu ni sela, Seven Nights in Hospital lamtluang zawh a ngai lo tur.

Zu hi khuahkhirh ni sela, dan hnuaiah ralti takin leng ve mai rawh se. A duh chuan in sela, a duh lo chuan in lo mai rawh se. Hurna kawng te, uirena kawng te, rukrukna kawng te... chutiangin, a ti ngam leh duh chuan an zawh mai a, a ti duh lo chuan an zawh lo mai. Thil dik lo leh tha lo titute chu dan a awm alawm, dan chuan hrem mai rawh se. Sual,
sual kan tih hian zu-ah chauh pet goal i tum lo ang u. Kan rilru leh thinlung hi a pawimawh zawk. Dik tak chuan, hemi kawngah hi chuan Kohhran pawh hi ka thiam loh asin, zaa za Kristian awmna tiin kan chapo a, kan rilru leh thinlung hneh turin an thawk zo leh si lo, nge Bible dang hi an keu zawk? Pastor hi lirthei nei hrim hrim turah an inngai ta em ni? Nge, officer-ah an inngai ta zawk? Fate eiruk leh sawn pai/thlak zepbona bung leh chang hi Bible-ah a awm chiah maw? Kohhran hruaitu zu leh pawisa khelh, eiruk pawisa lo, mahni hna a rinawm lo, mipat-hmeichhiatna kawnga zu in mi aia hleihluak taka kal dan hi Bible-in mi hrilh chiah em?

Kohhran hian a huang lo a dai hnem lutuk a, chu chuan YMA-ah hri chhia a tuhlut a, khawtlangah a kai a, chhungkua, mimalah a kai let ni ta ber hian a lang. Kohhran hi kawra hman chi a ni lo e. Zu hi in haw tak taka in duh lo tak tak a nih chuan zu in te, zu rimnam te etc hi phuar (ex-communicate) ngam ula, thawhlawmte pawh hi khawn lo ngam rawh u. Pathian ram hi sum thianghlim lo tel lo pawh hian a zau dawn tho tho.

Sorkar pawh hian zu chungchanga Total Prohiobition Act hman hi chu paih ngaihtuah tha ngei sela, Control Act lampang siam tur hian huaisen takin hma la ngam mai rawh se. Tunah hian ti lo mah sela engtik niah emaw chuan kan la hmang ngeiin a rinawm tlat (India Constitution chu rigid and flexible a nih hi). He dan chungchangah hian mipui rawn kher tulin a lang lo, mithiam rawn a fuh zawkin a rinawm, anni'n uluk leh ngun takin ngaihtuah zawk mai rawh se. Zu thlarau hian Mizote hi min run khawlo zo tawh a, a bilhah a tho tawh lo a, chumi ngei mai chu siamthat a ngai ta zawk a ni.

Zu hi total chuan prohibit lo ila, duh huna va lei zauh tur hi dan hnuaiah awm reng mai sela, hemi thleng thei tur hian sorkar hian dan siam law law se.!!! Hei hi mi tam tak ngaihdan a ni miah lo, engtik hunah emaw chuan a thleng tho tho ang (after 2500 AD?). Huaisenna tel lo chuan hlawhtlin hi a har teh a nia ! Abraham Lincoln chuan kum zabi 19-na daih tawh khan zu chungchang sawiin 'used by everybody, repudiated by nobody' zuk ti daih tawh a! (Mi zawng zawng hman, tuman an hnawl duh loh!)

Sualna leh zu sawi zawm tlat tumtute hian sualna leh TV, sualna leh computer, sualna leh mobile phone, sualna leh eiruk leh rinawm loh chauh pawh hi sawi zawm ve sela! TV hi hman thiam loh chuan sualna thlentu a ni thei, computer leh mobile handset phei hi chuan sawi chhuah ngam loh khawp sualna a siam mek, a la siam zel ang. Thafamkimpa, i bulah khan langchhuak mai lovin i fate khan eng sualna nge heng technology-a sanna hian a siamsak chiah i hriat hun chuan i ha i la thial ngei ang a, a hnem nan zu hi i la lem khulh mai lo ang maw? Engpawhnise, zu hi chu i fak lo ang u, zu permit pek pawh hi i sawimawi lo ang u, mahse, hunin min nangching a nih si chuan, a hun thliar thiam ila a finthlak ngei ang. Kan thlir dan hi a dik tawk lo fo thin. Party reng reng pawh hi rulling an nih chuan Pathian ruatah an pawm hmak zel a, opposition an nih erawh chuan Pathian ruatah an pawm duh si lo fo. Opposition Pathian hi a nep deuh bik thin emaw ni tehr eng le!?

Sualna chi hrang hrang hi Pathian lo kal thlengin a awm dawn tho tho, chung zinga member upa ber zinga mi chu zu hi a ni chiang alawm. Misual chu a awm ve reng dawn, i khuahkhirh theih erawh chuan buaina i pumpelh a ni mai. Zu chungchangah hian a tha ber kan tlin ngang loh chuan a dawttu kan thlan mai a tha ang. Kan ram hruaitute hi 'lawless guardian of laws' an nih tuma'n kan phal lo ang, chuvangin, kan ram siam nan leh hmasawn nan hian dan rorelna ( rule of law) a awm tak tak theih lehzual nan he dan (Act) kan sawi tihbo emaw siamthat emaw kawng zawh tur hian 'to be or not to be' an tih thuai a hun ta. He thlarau vakvai hian Isua lo kal hi a hmuak ve reng reng dawn a, rip chhungah kan khung thei lo a nih rau rau chuan hnungkhirh chunga kan sezawl chhuah mai hi a tha ta lo'm ni? That hi chu a tha thlawt lo, mahse a awm reng dawn si!!!

Zu thlarau tak hi chu maw! Kohna hming lem i nei lo a nih pawhin Setana Dawi ka ti teh ang che..i lo rapthlak lutuk! Mahni chhia leh tha hriatna mi rukbosaktu tur rukru chu ka kaah ka tulh lutin pumchhungah ka khawi thin ang maw? Ram sakawlh anga min siam thei chu tha tho lungsi takin ka lawm thin ang maw? A va han rapthlak em! -William Shakespeare. [Othello].

Related Posts :