Mizoramah Anthurium

2002-ah khan horticulture deptt-in anthurium chi an chawlut a, chu chu Mizoram sorkarin heti lama hma a lak tan dan a ni. A ching tur mi 24 an zawngchhuak a, chu'ng mite chu a chi pein, anthurium chu Mizoramah a par ve ta.


Mizoram sorkar chuan chuta tang chuan Anthurium lamah hma a la zui ta zel a, a bultantu sorkar chu sorkar dangin a thlak hnuah pawh chak zawka hmalak zui tum a ni.

Horticulture deptt.-in anthurium a chawkluh tirhah khan a ching turin mi an zawng a, an hmunhma a that leh that loh leh tui an hnianghnar tawk em tih te an enfiah hnuah mi 24 an thlangchhuak ta a, chu'ng mite chuan zaah za an hlawhtling niin an sawi.

Aizawl bakah Serchhip, Lunglei, Champhai leh Kolasib-ah te pawh anthurium hi an ching tawh a, a chingtute chuan Zo Anthurium Growers Association dinin, chu pawlah chuan member 400 vel an awm.

Anthurium chingtute hian Zopar hnenah an hralh a, Zopar hian ram pawnah an thawnchhuak thin. A hralhna a that avangin a chingtute hian an nei daih lo reng zawk niin an sawi. Mizoram anthurium an thawnchhuah hnem ber tumah chuan thla khat chhungin par 100000 an thawnchhuak a, kuminah chuan an an thawnchhuah hnem ber tumin par 40000 an thawnchhuak a ni.

Mi thenkhat chuan anthurium chu miliannuho eizawnna tiin an sawisel a, a tira a chingtute erawh chuan mi 24 zingah khan miliannu an tel lo tiin hei hi an pawm lo. "A tira a chingtute zingah milian kan awm lo. Tunah te chuan kan lo thahnem ve tawh a, milian te pawh an awm ve tawh ang," tiin anthurium chingtu pakhat chuan a sawi.

Amaherawhchu, anthurium chin hi a tirah a hautak hle a, senso pawh a tam tham viau. Chu chu a chingtute'na an sawi dan pawh a ni. Chutiang ti thei tur chuan nei ve tawk tak nih chu ngai tura ngaih a ni. Tin, hmunhma neih that leh tui hnianghnar a tul a, chu chu horticulture deptt-in a chi dawng tur an thlannaa an tehkhawng pakhat pawh a ni. Mirethei zingah hmunhma nei tha leh tui hnianghnar an awm ang em?

"Milian han tihah minister nupui te, officer lian ber ber nupui vek an ni e tihna a ni kher lo, mi awmthei zawkte an ni e tihna a ni. Rethei bakberh tan chuan anthurium hi han tih rual a ni lo," tiin chanchinbumi pakhat chuan a ngaihdan a sawi.

Anthurium Festival pawh tum 4 neih a ni tawh a, August ni 7&8 khan a tum 4-na chu Reiek-a Tourist Centre-ah neih a ni. Anthurium Festival-ah hian Mizoram sorkar mi pawimawhte an tel tha hle; tourism minister S Hiato-in a hawng a, chief minister-in a khar a ni.

"Anthurium hi pangpar mawi tak, Mizoram pawhin kan hmingthanpui mek a ni a, a chinna leh enkawlna lamah a hautak deuh avangin, mirethei zawkte pawhin eizawn nana an hman ve theih dan sorkarin a ngaihtuah chho zel ang," tiin Festival kharna hunah chief minister Lal Thanhawla chuan a sawi.

Mizoramin khualzinmite a hip theih nana hetiang Anthurium Festival buatsaih a ni chu tha hlea a hriat thu sawiin, "Kan tourism industry chawikanna pakhat a nih bawk avangin uar chhoh zel pawh kan tum ang," a ti.

Related Posts :