Grape Wine Leh Khawtlang Nun

¢ Lalremruata Renthlei

Grape vangin khawtlang nun a nawm phah zawk, chu chu Hnahlan khaw paho ngaihdan a ni.

Tun hma chuan Mizoram khaw dang ang thovin Hnahlanah chuan rakzu a lar hle a, Pathianni tlaiah phei chuan rakzu in hmuh tur an tam thin.

Mahse, Grape an ching a, Grape khawvel chuan an khawtlang nun a thlak danglamta dawr mai. Tunah chuan zurui bual bual chunga insual hmuh tur an awm tawh lo.

Tun hma chuanzuiruih vanga Pathianni tlaia insual pawh a tam thin. Thankima chuan, “Ruih vanga buaina siam leh insual buai nuai nuai a awm ngai tawh lo,” a ti.

“Tun hma chuan Pathianni tlaia tlangval insual laih laih chu hmuh tur a awm thin. Mahse, a awm ngai ta lo,” a ti.

Hnahlan khua hian grape an ching a, an grape chin atang chuan grape wine an siam a, chu chu in tin deuhthawin an nei.

He khua hi ramri depa awm a ni. Burma sumdawngin an chiah piah a, an chak lakna ber pakhat pawh Burma sumdawng an nihna chen a awm.

Thankima chuan, “Tunah chuan mi tin mai hian kan phak bak aia lian, kan enkawl zawh loh aia lian mah huan kan nei deuh vek a, hnathawk turin Burma-ho hi kan ruai let tawh zawk,” a ti.

Chakkhai lakna chungchangah, “Ramri depa awm ngang kan ni a, Burma sumdawng atangin chakkhai tam tak kan la,” tia sawiin, “Mahse, Champhai te ang emin kan chhawr tangkai lo a ni thei a. Sumdawng leh chakkhai lakna atan chuan kan hmang nasa khawp mai,” a ti.

“Sumdawngte hi an lo kal reng a, tunah phei chuan kan hnathawktute anni tawh mah zawk,” a ti.

Grape chu an tan chanchin tha a nihna chen a awm, “Hnahlan hian leilet kan nei a, hmun tha tak pawh a ni. Mahse, kumpui lingleta leileta hna kan thawh aiin grape hi a hlawk zawk a, leilet chu kan hnuchhawnta mah zawk a ni,” a ti.

Grape chuan Hnahlan khawtlang chu a tichangkang a tih theih ang.

“Kan economic dinhmun hi nasa takin min chawikansak a ni,” tia sawiin Thankima chuan, “Berh te te nia kan ngaihte pawh an changkang tawh tak zet mai. In leh lo hrim hrim pawh a changkang tawh a, kawng tin rengah hma kan sawn a ni. Chu chu kan inchhung bungrua leh kan khawsak phungah a lang reng mai,” a ti.

Hnahlan leh a chhehvel chu grape chinnana hmun duthusam a ni. India ramah pawh hetiang bak a awm bik lo nia hriat a ni.

He khua hian grape hmangin sum an la lut a, tun hmaa Mizo lo neih dan chu a khua in an hnualsuat tawh.

Mahse, za-a za chuan grape chuan hlawkna a thlen bik lo. Thil engkimah a tha a awmin a chhia pawh a awm.

Hnahlan pa Zairemthanga chuan, “A pum puia lakin 70% vel hi chu kan hlawkpui angah a ngaih theih ang,” tiin hemi chungchang hi a sawi.

“30% vel hi chu a tha lo zawnga min hruai thei angah a ngaih ve theih tho ang chu. A tha vek hi chu kan beisei bik lo,” a ti bawk.

Mahse, Zairemthanga ngaihdanah chuan a chhiatna lam aiin a thatna lam a tam zawk.

“Hnahlanah hian kan cheng a, grape hian a chhia aiin a tha lam kawngah min hruai nasa zawk chiang khawp mai,” a ti.

“Thil chiang deuh mai chu tute pawh hian hna an thawk nasa em em mai a ni. Grape hian compettition a rawn siam a, chhungkaw tinin hna kan thawk a, kan thawk nasa em em a. A hlawk a ni tih kan hre chiang a ni. Tu te pawhin compettition kan bei vek ni maiin ka hria,” a ti.

Zairemthanga ngaihdanah chuan Grape chuan Hnahlan khawtlangah taimakna a thlen tlat a ni.

“Hnahlan khawmi 90% vel hi chuan tihtak zetin hna an thawk a ni,” a ti a, “Tlangram loneih kan bansan a, chu ringawt pawh chu environment zawnga thlir pawhin thil tha tak a niin ka hria,” a ti.

Zairemthanga chuan, “Thil dang tam tak zingah kum tina lo neih kan sim pawh hi a tha hle a ni. Hetiang renga kan kal chuan Hnahlan leh a chhehvel hi chu ngaw hmun tha tak a nileh thuai ang ” a ti bawk.

Hnahlan hian leilet pawh an nei thei. Phaizawl tha tak pawh an nei. Mahse, leilet neite pawhin leilet-a kumpui lingleta mahni eikhawp thar ai chuan grape china eikhawp bak aia tamthar chu an thlang zawk tawh.

He khuaah hian thingtlang loneiha kum tina ram tha zuan chu an ti tawh mang lo. Nikum khan VC-in lo atan hmun a theh ve a, in 500 khuaah in 30 vel pawhin loneih an thlang lo.

Vanramhluna pawhin an khua mah ni se hna an thawh nasat thu chu sawi nuam a ti.

“Hna hi chu kan thawk nasa thawkhat viauin ka hria,” a ti a, “Chhun laiah te hian kawm tur reng reng an awm lo. Tun hma deuh chuan grape kan chin hma chuan chhun pachangah pawh khawi hmun hmunah emaw chuan carrom board pen leh card den te an uar ve thin hle. Mahse, tunah chuan chutiang hmuh tur chu a awm tawh lo, a rem tawh lo. Hnathawkin tute pawh an buai a ni,” a ti.

Vanramhluna chuan grape-in thil tha a thlen laiin thil chhia pawh a thlen tia sawi theih tur chu a awm tho nia a ngaih thu a sawi.

“A ruih theihna hi a danglamna a ni a. Dawidim telh loh pawhin a ruih theih a, kan ngam phah deuh emaw chu aw a tih theih,” a ti.

He khua hian sorkar officer, bialtu leh viltu a nei thluah. Chu’ng mite chuan tha takin an hna an tkawh a, Presbyterian Pastor ni thin Rev. C Lianhmingthanga erawh a khaw mipuite’n an fak hle.

“Rev Lianhmingthanga kha Hnahlan chuan kan ngaina khawp mai,” Hnahlan khaw pa pakhat Thankima chuan a sawi.

“Kan changkan lohna a hria a, kan Mizo khawtlang nun kha a hmusit lo,” tiin a sawi zawm a ni.

“Chhangchhe takin an lo kal a, kan zingah khan awmin hma kan sawn theihnan hma a la a ni kan ti lo thei lo,” a ti.

Thankima chuan, “Rev. Lianhmingthanga khan khawtlang nun tha lo kha a vei em em mai a. A tha lo lai kha siamthat a tum nasa thin,” a ti bawk.

“Ho te anga kan ngaih, kan uar em em mai, thil inhawhsaka inpek let leh mai loh thleng khan a sawi thin. Mi thil kan hman hawhin lawmthu sawia inpeklet leh thlengin chuti lam uar tur chuan min ti thin a ni,” a ti bawk.

“Kohhran Upa ramvak thin te pawh khak ni chuang lovin, a that lohna ang chi leh a mawi lohna ang chi te a sawi thin,” a ti.

“Nunphung hrim hrim kha min zirtir nasa a ni. Khawtlang nun siamthat kha a tuipui em em a, chu chu a sawi tam bawk,” a ti bawk.

Zairemthangaa pawhin Rev C. Lianhmingthanga te chungchang sawiin, “Pastor lo awm tawh zawng zawngah kan dahsang khawp mai,” a ti.

“Min zirtir nasa a, Kohhran leh khawtlang angin kan chhuang a ni,” a ti.

“A nupui pawh kha chawhnu naupang inkhawm tichhuaktu a nia, An pa ang maiin a fel a, kan lawm khawp mai. Hnahlanah hian thil tam tak an hnutchhiah a ni,” a ti.

Vanramhluna pawhin hemi chungchang hi sawiin, “An nupain an fel a, an pa tluk zetin an nu a fel tel bawk a,” a ti.

“Grape chin kan tan hma, chutih ruala khua anga kan intihchangkan chhoh tan vel lai a nia an lo awm lai kha,” a ti.

“Hnahlan hian kan khua hi nuam kan ti em em a, chhuahsan hi kan hreh ngawih ngawih thin. |hal lai te hian intihhlimna lam kan uar a, local tournament te siamin kan hlim em em thin” a ti.

“Mahse, Rev. Lianhmingthanga khan chuti ngawt tur a ni lo tiin hmasawnna kawng zawha thanglian chho turin min fuih nasa thin a. Mi fel tak a ni a, an nu pawh nu fel tak a ni,” a ti.

Hnahlan khua hi khawbil ang chuan Mizoram khua zawng zingah an hausa ber hial awm e. Kuthnathawk khua an ni a, an thawhrah chu Mizoram mai ni lo India ram puma hriat a ni.

Sorkar hmalaknain Winery din a ni mek a, he Winery hi an nghakhlel hlawm hle. Winery hmang hian eizawnna ngelnghet zawk an neih theih an beisei. Hnahlan khaw pa ho nghahfak a ni.

Mahse, ruahmanna hmasa a tlawlh a, tun thlengin winery chu an hmang thei ta rih lo.

Hnahlan khuaah In 15 vel chauhin leilet an siam a, a tam zawk chuan leilet siam an bansanta.

“Zawlaidi”chu an nghahfak a ni mek. Sorkar hmalaknaa Zawlaidi puitlin hun tur chu an nghakhlel tak zet. Mahse, an duh angin thil a thleng thei si lo.

“Kuminah hian umnan kan hmang thei turah kan ngai a nia. Mahse, hei kan hmang hman dawnta lo a nih hi,” tiin Vanramhluna chuan a sawi.

“Winery hi kan mamawh ngawih ngawih chu a ni rih a. Hei hi a nihna tur angin hmang thei ila chuan kan tan chuan a thawventhlak khawp ang,” a ti bawk.

Zairemthanga pawhin Winery an mamawh dan sawiin, “Kan thil thar hi thianghlim se kan duh a. Grape Wine hi Mizoram hmun tin renga zawr tlak, hriselna lamah pawh thil tha a nihna leh food item a nihna hi hria ila kan duh a ni,” a ti.

“Chumi atana pawimawh ber pakhat chu a thianghlim tawk em tih a ni a. Tuna kan Winery hi kan hman theih hunah chuan hriselna atan pawha tha zawk fe tur a nih avangin hman hlan hi kan nghakhlel a ni” a ti bawk.

Mahse, beisei ang ngawtin thil a kal si lo. Tunah hian Winery a nihna tur anga a hman theih loh chhan chu ENA vang chauh a ni.

Zozam Weekly-in horticulture septt. officer-te a bepawp a, anni chuan ENA neih theihnan hian theihtawp an chhuah mek niin an sawi.

He ENA hi chini aiawhtu a nih bakah grape wine siamna atana thil pawimawh chungchuang a ni. ENA tel lo chuan tuna Winery atana khawl bun zawng zawngte hi a hmantlak chuang lo a, he ENA hi chahthlen a nih hma chuan grape a um theih loh ta hrim hrim a ni.

An beisei huna an chah thlen theih loh avangin a tam zawk chu Syntex-ah an um leh a ni a, a hnukhawi thenkhat chu sorkarin ENA hi a chah thlen hma theih chuan um hman a ni mahna, chu pawh beiseina chauh a ni.

India ram puma thingtlang khuate zingah, grape tharchhuak hnem ber chu Hnahlan hi a ni awm e. He India ram ropui chungchuangah hian Hnahlan khua aia Grape thar chhuak hnem reng an awm lo.

Kum 10 kal ta vela an thawhrah an seng mek a, tunlai thiamna nena tan kawp a nih chuan Hnahlan leh a chhehvel chu Mizoram mai ni lo India ram pum huap pawha hmun duhawm tak a ni thei ngei dawn a ni.

Zawlaidi chu a tak a chan tak tak hunah chuan khawvel hian agriculture lama Mizoram a hmelhriat theihna hmasa ber a nihmah le!

Related Posts :