BEAUTY TIPS

¢ Debbie Chawngthu

I mithmul dum tura i duh chuan zantin i mut hmain castor oil hnawih thin ang che. I hmui a mam thalo anih chuan nikhatah vawikhat ghee hnawih ziah la, a mam thuai mai ang. B awnghnute khar fiante khat, sertui fiante khat leh khawizu fiante khat chawhpawlh i hmaiah hnawih la, minute 10 i chiah hnuah phihfai leh la, i lang ngo sawt mai ang. Luphut i tihreh duh chuan coconut oil fiante khat leh sertui fiante khat chawhpawlhin i lulei massage thin la, a reh mai ang. I lulei i nuaiin i tin hmang lo hram la, minute 5 chhung massage hnuah shampoo hmangin su leh mai zawk ang che.

Sahbawn hi hman reng a tha lova, vun ro nei tan phei chuan hman miah loh a tha zawk a ni. Vun mawm nei tan erawh chuan hman a pawi lo. Tui ringawta hmai phih hi a tha viau bawk a, mahse tleuh puat lovin ngun taka phih tur a ni. Mawm ei tam hi vun tan a tha lova, bawng thau leh ar thau phei chu ei zawh hnuah arngeng a lo awm thuai mai a ni. Mawm ei tam lutukin arngeng a awm duh bawk. Model te hi an inngun em em a, hmeltha hle mahse an hmai a mam loh chuan hna an hmu lo mai a, artui kan hian arngeng a awmtir ve theih avangin ei pawh an ei ngai mang lo a ni.Nisa hian vun a tichhe duh hle bawk a, nisa hnuaiah awm tam suh. Arngeng la deh hun lo khawih hi a pung duh a, khawih chak viau mah la, insum hram hram ang che.

Dal dip hi thlasik laia vun tihfaina tha tak a ni a. Dal i hman duhtawk tur leh bawnghnute thur khal leh tui tlem chawhpawlh la, i hmaiah hnawih rawh. Hei hi vun ro tan pawh a tha tho a, tin, face apck ang pawhin a hman theih a ni. Face pack i siam dawn chuan dal powder ah bawnghnute thur khal fiante khat, sertui tlem far leh tui tlem telh la, a diak hnuah i hmaiah hnawih ang che. Minute 20-30 chiah la, tuiin phihfai leh ang che. I phihfai hnu chuan i vun a tharlam riauvin i hira ang. Vun ro nei tan chuan sertui telh lovin khawizu telh mai tur a ni. Face pack atang chauh nilo, shampoo atan pawh a tha a. A hmasain oil lum i lulei leh samah hnawih pawht la, chutah powder-ah khan bawnghnute thur khal fiankhat tleh ang che. I hnawih hmain i sam ti huh phawt la, i lulei dimtein nuai pah ang che. Shampoo hi fai taka tleuh tur a ni. Luphut tihreh nan sertui pawlh la, a tha bawk.

Q.1 Ka vun hi a mawm a, a kua a zau bawk a, arngeng hawlphum ka nei bawk thin a, engtia tih chi nge ni ang?
= Arngeng hawlphum hi vun mawm nei leh tifai tha tawk lo ten an nei duh bik a. Ni khatah vawithum tal face wash (for oily skin) leh tuiin phihfai ziah la, chutah lapua astringent in tihnawm leh la, dim thei ang berin i hmai hru thin ang che. Mit vun pan lai hi mawm nei lo anih avangin astringent i inhnawih anih pawhin hru tel suh ang che. I vun kua a zau anih chuan zan mut dawn hmai phih zawhah toner in hru thin ang che.

Q.2 Ka tleirawl tirh atang nail polish ka hmang tawh a, hnawih loh chuan ka tin a nung lovin a eng tlat mai a, engtia tih chi nge?
= Kan tin hi kan taksa dang ang bawka boruak mamawh a ni a, boruak a hmuh loh chuan a lo eng in a nung lo thin. Kar hnih khat hnawih lovin han dah chhin teh, hnawih lo thei lo i nih erawh chuan rawng dal lam inhnawih thin ang che. Nail polish hi karkhatah vawikhat tal hnawih that ziah tur a ni a. Entirnan: Inrinniah tifai la, a tukah hnawih leh chauh ang che. Zankhuaa hnawih lova i dah theih chuan boruak a lo hip ve a, i tin tan a tha a ni. Nail polish i hman dawn reng rengin base-coat hmang phawt thin ang che, base-coat a awm remchang mai lo anih pawhin rawng awm lo hnawih phawt la, rawng nei chu i hnawih leh dawn nia. Hnawih tawh loh i duh anih chuan a ngai anga awm tur chuan hun a duh rei ang tih hria la, hnawih lovin oil in massage ngun la, zuah lo hrih bawk ang che. Chutianga i tih chuan thla tlemteah tin rawng pangngai i nei thei ang.

Q.3 Kum 20 mi chauh ka la ni a,ka dul a kiar tlat mai a,ka dul tih thep dan tur min hrilh thei ang em?
= Taksa awm tir dan fimkhur tawk loh vangin dul hi a kiar thei a. I dinin ip thin la, a tirah hrehawm i ti anih pawhin ngaiah i nei chho ve mai ang. Bawkkhupin mu thin la, a ziaawm bawk ang. A hnuaia exercise lak dan tur tarlan hi han chhin ve teh..

1) Khumah mu la, i ban ngil takin a sir ve veah dah rawh. Engmah ring lovin zawi muangin thawh tum la, zawi muanga mut tum leh ang che. Hetianga i tih zin chuan i dul kha a lo tang ang a, a thep sawt ang.

2) Chhuatah emaw khumah mu thluang zar la, i ban a sirah ngil takin dah rawh. I ke pahnih kha inches 18 vela sangah tikang chho la, number 10 thleng chhiar ang che. Zawi muangin ti tla leh la, i tih tlak lai hian number 10 chhiar leh ang che.

I mawngbawr sawizawi nan hetiang hian ti bawk ang che..

1) Chhuatah puan phah la, lehlam lehlamah let tawn rawh.

2) Cycle chuan hian mawngbawr a ti te a, dul kiar a tinep bawk.

3) Chhuatah mu la, i ban i dar zawnah ngil takin phar rawh. I ke veilam zawi muangin ti kang la, i taksa nena right angle in dah rawh. I taksa tang vak chuang si lovin i ban dinglam awmna lamah ke veilam kha zawi muangin then vel rawh. I ke i dah thlak hmain a hmaa i dah ang khan dah leh la, chutah muang tein ti tla riai riai ang che.

Related Posts :