Mizorama Remna champha kum 23-na, Mizo Hnam Run-a lawmnaa MNF president Zoramthanga thusawi chu hnam pasaltha thenkhat chuan an helh hle.
Chief Minister, MNF president Zoramthanga chuan, “Mizoram Remna hi Mizoram aiawha ding MNF te duhthusam a ni lo a, India sorkar duhthusam pawh a ni lo a. Pathian remruatna angin a lehlam tawn ve ve te inhnuhhniam theihna anga inremna a ni. he kan inremna man hi a sang em em a, thisen tam tak leh tuarna chhiarsen lohin a lei chhuah a ni a. Kan hlutin kan chawm lian zel tur a ni,” a ti.
Zoramthanga chuan inremna chungchang sawibelhin, “Inremna kan neih a tulna chhan tobul hi Mizo hnam a ral mai lohva, hnam anga a din khawchhuah theihna tur duhna thinlung lo piangchhuak ‘Mizo Nationalism’ leh ‘Indian Nationalism’ indona avanga lo piang chhuakin a hrin chhuah, indona a lo reh theihna tur atana remna chu a ni. Kha indona kha MNF-in independence a puan vang tia ngai an awm ang, a dikna chen pawh a awm ang, mahse a nihna tak chu kha kha a ni lo. Mizo hnam dam khawchhuah duhna Mizo Nationalism vang a ni. Hnam dam khawchhuahna hi Independence, State leh District Council hi a ni lo. Kha ramah khan a ram neitute engtinnge anawm, engang thuneihna nge an neih tih hi a ni zawk,” a ti bawk.
“Inbiak lai pawh khan India sorkar khan kan dinna bul ber ‘Mizo Nationalism’ phatsan turin vawi khat mah min nawr chhin miah lo, min hmin dawn lo tih an hriat avang a ni. Keini pawhin India Nationalism tichhe turin kan bei hek lo. Kan inhriatthiam lohna kha politics level-ah dawkanah i sawi reng ang u, silai tellovin kan ti tawn mai a ni,” tiin a sawi.
“Inbiakna nei turin kan Kohhran hruaituten 1966 buai tirh kum atang khan min ngen thin, MNF cabinet-in a taka India sorkar nen inbiakna neih a remtihna hmasa ber chu March 1970 kha a ni. Hemi bawhzui hian 1971-ah Shillong-ah India intelligence te nen inbiakna neih kan remtih thu kan hriattir- Europe leh khawvel hmun hrang hrangah inbiakna a rukin kan kalpui thin, a tak taka inbiakna kan neih tan tak tak chu Jan. 1976 kha a ni. A tirte inbiakna kan neih tan 1971 atanga remna kan neih 1986 chu kum 15 a ni,” a ti bawk.
Zoramthanga chuan inremna hlawhtling berte zinga mi a nih thu sawiin, “Kan remna hi India ram mai pawh ni lo khawvel huap pawhin remna hlawhtling berte zinga chhiar tlak a ni. India ramah pawh remna tam tak, Nagaland remna, Assam Accord leh Tripura remna te pawh a lo awm tawh thin. Mahse, Rajiv Gandhi ngeiin remna a siampui dangte kan en chuan hlawhtling tluanchhuak sawi tur a awm lo. Mizoram remna erawh chu hunin a finfiah remna (time tested peace) a tling a ni. Khawvel hmun dangah pawh remna siam a lo ni tawh thin, hetiang remna hlawhtling kan neih ang hi sawi tur a vang em em a ni.” tiin Mizoram leh India sorkar inremna hlawhtlingzia a sawi.
Inremna hlawhtling tak neih a nih theihna chhan chu movemnet kalpui dan a puitlin vang nia sawiin, “Hetianga remna tluantling kan neihna chhan bul ber pakhat chu kan movement kalpui dan kha a puitling em vang a ni. ‘Pathian leh kan ram tan’ tiin tum fel tak neia rammu kan ni. A pahnihnaah chuanpolitics-a phuba lakna kha kan hotupa ber Pu Laldenga khan a phal lo a, politics-a kan khingpuite tihnat leh thah hial duhna kha MNF hotute khan an phal lo. Chutianga kutthlakna Headquarters thuchhuaka tih a awm miah lo. Sum chhuhluihna na taka, mite ru bova, suma tlan tirna ang chi a awm hek lo. India ram leh khawvel helna leh underground zingah politics-a an hmelmate nunna lakna leh sum lakluhna atana inrukbonate a hluar em em a ni. Keini chuan khatiang kha kan ti ve lo. Chuvangin kan remna pawh hi a tlo a ni,” a ti.
Zoramthanga thusawi hi hnam pasaltha, rammu sipai thenkhat chuan an ti thei lo hle.
PAMRA member te chuan an helh hle a, ngawih bopui mai an tum lo. Anmahni chauh hnam sipai an ni lo a, midangte nena inrawnkhawma sawiho antum.
PAMRA hruaitute chuan, “June 30-a Pu Zoramthanga thusawi hnu atang khan vawiin thlengin Mizoram hmun hrang hrang atangin chanchin ngaihven anla awm reng,” tiin Zozam Weekly an hrilh.
Mahse, anmahni maia hmalak erawh tih chiah ngai lovin midangte nena inrawn khawma hmalak erawh tulin an hre thung a.
“PAMRA hi hnam pum huap a nih angin helaia mi tlemte ina thu tihtluk mai mai chi a ni lo. Hnam pum huap a nih ang ngeiin kokim zawka hmalak dan kan sawiho a ni. He thusawi tuar theitute nen kan vaia inhmuhkhawm pawh a la ngai mai thei,” an ti bawk.
Zozam Weekly-in a biakpawh hnam pasaltha pakhat chuan, “Kha thusawi pawi tak vang khan mu tha ngam lopawh an awm tawh mai thei asin. Hnam pasalthate hi Mizoram atanga umchhuah min tum tihna em ni?” tia sawiin, “Rammut hun laia thil thleng zawng zawng kha headquarter thuchhuak a nih lova keimahni duh dan ang anga kan kalpui a nih chuan khatih hun laia tuartute khan phuba an la duh thei asin,” a ti bauh mai.
“Zalenna sual lai chuan thil tam tak kan duh dan ang ni lo pawh a thleng a, sawi lawk theih leh ruahman theih loh thil tam tak pawh a thleng a ni,” a ti.
“Tun hnuah miin zalenna pawh sual lo ang leh a hunlaia mi awmtha duh lo misual tangrang tih tur hre lo min ti mai tur asin. Hnam pasaltha te rilru hi a na a ni,”a ti.
“Pu Zoramthanga thusawi ang chuan kum 1970 March hnu lama ram leh hnam tana nunna hlante reng rengin India constitution tan nunna an hlan ang a nia. Chu chu kan tum a ni reng reng lo, Mizo hnam tan independence a ni kan sual ni” a ti bawk.
Hnam pasaltha pakhat chuan, “Kha indona kha independence duhna avanga lo awm a ni. India hnuaia awm leh tho duhna avanga zalenna sual a ni lo. Mizo hnam dam khawchhuah duhna leh a hranga kan awm theihna atan thisen hlan a ni zawk. Zoramthanga thu sawi hi kan ngai thei lo,” a ti.
“Tuna sawi ang hi chuan remna pawh hi chhiat phah hlauhawm a ni a. Zalenna suallaia thil tih zawng zawng kha headquarter thu chhuak a nih siloh chuan tu thuchhuak nge ni ang?” a ti bawk.
Zozam Weekly chuan hnam pasaltha te hi a be pawp hlawm a, mahse, huai taka han sawi ngam an awm meuh rih lo. Chu mai ni lovin a huhova hmalak an tum thu leh tun dinhmunah chuan hming tarlan pawh an la duh rih loh thu an sawi hlawm. Mahse, hmalak ngei erawh an tum thu an sawi thung.
An zinga pakhat chuan, “Pu Zoramthanga thusawi ang chuan Independence kan sual reng reng hlei nem. Chutiang rilru chu kan puin ka hre lo. India lak ata indan kan duh avanga zalenna sual kan ni. Mizo hnam dam khawchhuahna chu India lak ata kan inlakhranin a awm thei dawna kan hriat vanga rammu kan ni,” a ti.
MNF secretary zinga mi, Ex-MNA vice president K. Lalsawmliana chuan Zoramthanga thu sawi chu huat tur awma a hriat loh thu sawi thungin, “A thu sawi kha han tih vak tur a awm pawh ka lo hre lo a. Remna tluantling kan neih avanga lawmna a sawi ni maiah ka ngai a,” a ti.
“Zalenna sual kawngah thil tam tak tawn tur a awm a. A bik takin tunlai chhanah phei chuan thil rum tak tak leh nasa tak tak - suicide kan tih ang chi te kan hre nasa a. Chutiang lakah chuan kan fihlim a, kan ti ve lo a tihna angah ka ngai mai,” tiin Zozam Weekly a hrilh.
Hnam Pasaltha thenkhat chuan ngawih bopui mai an tum lo a, hmalak dan tur duan an tum.
An zinga pakhat chuan, “Inbiakna hmasa ber 1970 tih pawh hi ka helh,” tia sawiin, “Khata inbiakna kha inbiakna tak takah kan ngai dawn em ni? Kan va chiang lo ta nuai ve!” a ti.
No comments:
Post a Comment