Aizawl nu lar tak pakhat, thuziak lama inhmang tak chuan 'pherh' (tuai) awmpui a nei a, mahse, tunlai hian a bo a bo mai.
"A rawn haw tlai a, a kalna tur sawi miah lo hian a chhuak daih a, rei fe fe a chhuak bo fo mai. Han zawt ila, engmah a sawi duh mang si lo. Mahse, tunah chuan thil awmzia kan hre tawh..." tiin chu nu chuan Zozam Weekly a hrilh.
July ni 2-ah khan Delhi High Court chuan mawngkawhurte tana thu lawmawm a puang a, mawngkawhurte leh neih inang - 'sex' hmangte hremna tur Indian Penal Code-a inziak chu a hnawl a nih kha. India ram hmun hrang hrangah tuai, patil leh mawngkawhurte an lawm hle a, High Court thutlukna hi lawmin an 'party' mup mup mai. Chu chuan Aizawl pawh a lo kalkal bik hauh lo; Aizawla pherh-ho chuan he thutlukna lawmna hun hi an lo hmang ve thin.
Tun hnaia Aizawl pherh-ho hian Delhi High Court thutlukna hi an lawm fo a, khawi khawiah emawh 'party' an huaihawt ve thin. Amaherawhchu, mi ram te angin pherh-ho hi pawl dinin an insuihkhawm lem lo a, gay rights activist an awm hek lo a, chuvangin hetia party te siama an lawm pawh hi thianho thil tih ang deuh a ni. Engpawhnise, pherhho hian tunhnaiah he thutlukna lawmna hun hi an hmang fo.
Aizawl nu lar tak, pherh awmpui nei te pawh hian an awmpui hi party-naah a kal fo tih an hrechhuak a, mahse, an party-na hmun leh tute nen nge an party tih erawh a sawi duh lo. An zawh ngial pawhin an party tih bak a sawi duh lo.
Tun hnai kum li/nga velah hian Mizoramah tuai-ho hi kawng hrang hrangin an rawn langsar hle a, eizawnna lama hlawhtling tak tak pawh sawi tur an awm nual. Tin, showbiz (entertainment khawvel) pawh an luhchilh thuk ve hle a, khawlaiah pawh hmeichhe incheia inchei tuai hmuh tur an tam hle.
2008 June 25-1 July issue-ah khan Zozam Weekly chuan Aizawla tuai-ho chungchanga survey a neih chanchin a lo tarlang tawh a, chu issue-ah chuan an hming leh vengte thupsak an ni. Mahse, rei lo teah tuai-ho chu TV-ah an inlan ta mai a, a ruhlangin an inlar lehzual a tih theih awm e. Zozam Weekly chuan he thil hi 'social issue'-ah ngaiin a buaipui a, an chanchin zirchianna tihchhuah a nih atanga a kum khatna velnaah chuan Delhi High Court-in mawngkawhurte dan pawna hnawlna a pawm loh avanga pherh-ho an lawm thu tarlan a ni leh ta a nih hi!
No comments:
Post a Comment