Mizoramah Pherh

Mizoramah hian mawngkawhur an awm a, vantlangi hriatpui te pawh an awm. Mahni inthup te an awm bawk. Amaherawhchu, pherh zawng zawng hi mawngkawhur erawh an ni lo.

NGO pakhat - FXB chuan Mizorama 'pherh' (tuai) te hi an buaipui a, pherh nihna atanga chhanchhuah leh natna hlauhawm laka an himna tur an ngaihtuah vanga buaipui an ni.

FXB te hian nikum khan pherh 206 an enkawl a, kuminah hian 200 chuang an nei tawh. Nikumah khan pherh 200 enkawl tum an ni a, mahse, enkawl ngai an tam vangin an tum aia tam an enkawl ta a ni. Kuminah hian 300 an tinzawn a, kum chanve vel chhungin 200 vel chu an nei leh der tawh. He'ng an enkawlte hi mipa nena 'sex' hmang thin an ni tlangpui a, MSM (Men Having Sex with Men) tia sawi an ni.

FXB enkawl MSM zinga thenkhat chuan mipa nena khawsak hi an sim a, amaherawhchu, bed room-a mi khawsak dan te a inhriatpui theih loh avangin huai taka 'an sim' tih chu a ngamawm chiah loh mai thei.

Thudawn dan chuan MSM zinga za zela 40 hi kawppui nei, nupui nei an ni a, chu chu khawvel huap pawha an chhut dan a ni. MSM han tih hian a hmeichhia zawk anga tang leh a mipa zawk anga tang an awm a, tang kawp thei an awm bawk. Aizawlah hian khawtlang leh Kohhrana inhmang pangngai tak, khawtlangin hetiang ti tura an rin hauh loh, mahse, MSM ni si an awm nual nia hriat a ni. Zozam Weekly-in survey a lo neih tawhah pawh chu chu a lang.

FXB regional director Dr Sangzuala chuan, Aizawl khawpuiah tuai an tam thawkhat tih sawiin, "An tam thawkhat chuan ka hria a, a tuin nge practice, tu te'n nge practice lo tih erawh hriat a har a ni. An practice ngei tih kan hriat loh chu puh ngawt chi pawh a ni leh chuang lo,” tiin Zozam Weekly a hrilh.

“Mawngkawhur han tih ngawt hian sawi tawh angin thliar thiam a har” tia sawiin, “Aizawl khawpuiah hian mi 500 chuang awm turah kan ngai,” a ti bawk.

A tam zawk hian an nihna an pawm lo nia sawiin, “A tam zawk hian an nihna an pawm lo. A tam zawk hi an zak bawk, an nihna an pawm loh avanga zak pawh an ni mahna,” Sangzuala chuan a ti.

Mizo te'n kan hmuh tlanglawn ber leh tuai nia kan hriat chat theihte chu tlem te chauh an nih thu sawiin, “Cross dresser leh a tawng nem angte hi an langsar tlangpui a. Hengho hi kan hriat fuhhote an ni mai zawk” a ti bawk.

"A thenkhat erawh mi pangngai an nih lohna a awm lo. Mi fel tak takte an ni a, khawtlang leh Kohhran thlenga kan chhawr theihte anni a. An lak tlak a, an hman tlak em em bawk. MSM chet angin an che ve kher lo. Tuai tih avang hian an vaiin mawngkawhur anni vek lo a, mawngkawhur anga ngaih vek chu a fel bik lo," tiin a sawi.

“Chutih rual erawh chuan zak lo zual bik hi an awm a, a zak thei lo law law chu kan hre vat mai zel. A tam zawk mahni nihna pawm lo te hi chuan an inpawm tlat loh vang leh an nihna pawm harsa an tih avanga zak pawh an ni mahna,” tiin a ngaihdan a sawi a ni.

"Khawtlanga inhmang tak takte'n hetiang hi an duh ve reng, hetiang mite lo khawsakpui thei hi rin loh tak tak an awm," tia sawiin, chutiang chu a nih avangin a tawpah khawtlangin a tuar thei a, natna te pawh an thehdarh thei, tiin a sawi.

"Keini chuan 'tuai' kan tihte hian hriselna lama enkawlna dawng se kan ti a, chu chu kan thil tum pawh a ni. Hriselna lama tha deuh enkawl law law hi a tul, chuti lo chu khawtlangah rin aia nasain natna hlauhawm an thehdarh thei," tia sawiin, "Hriselna lama enkawl leh counselling pek hi kan enkawl dan a ni a, Pathian thu te pawh kan hrilh thin," a ti bawk.

"Society-in kan en dan hi a pawimawh khawp mai. Anmahni siamthat dawn chuan society-in kan pawm a tul," a ti bawk.

Mizo te'n Kristianna atangin pawm harsa kan ti, tia sawiin, “Hman lai ata tawh tuai te hi an awm tawh. Study mumal tak pawh neih a harsa a, mipui mimir hian kan Kristianna vangte hian kan pawm lo hrim hrim bawk a. Mizote hian hman ata tawh pawm harsa kan ti bik hrim hrim niin ka hria,” ti.

IPC Section 377 chungchanga a ngaihdan sawiin Sangzuala chuan, "He dan hi khawiah mah an hmang tak tak lo. Siamtha lovin a nih dan ngai hian kal zel pawh ni se khawiah mah an hman tak tak a rinawm loh," a ti. He dan hi Mizoramah pawh vawi khat mah hman a la ni ngai lo.

"He dan hmang hian MSM te chu na taka hrem theih an ni a, khawtlangin a pawm loh phah thei bawk a. Chutiang a nih avang chuan MSM te hian damloh nikhuaah pawh doctor an pan ngam loh phah thei. MSM chu an awm reng a, hriselna lama enkawlna an dawn loh chuan a hlauhawm. IPC Section 377 vang hian khawtlang an hlau thei a, hriatchhuah an hlauh vangin doctor an pan loh phah thei. Chuti zawng chuan ngaihtuah theih tak a ni," a ti.

Zozam Weekly-in a zirchiannaah chuan tuai 26 zinga 38.46% zet chuan mipa nen sex an hmang tawh tih an sawi.

Mipa nena sex hmang tawhte zinga 3 chu nupui nei tawh an ni! 2-in pawm lai an nei a, pakhat chuan a then tawh!

Mipa nena sex hmang tawh zinga zaa 90 chuan ngaihzawng atan mipa an duh a, zaa 20-in pherh (chu pawh hmeichhia an ni lo a), zaa 10-in hmeichhia an duh. (Chhangtu thenkhat chuan mipa, hmeichhia leh pherh an duh vek.) Chuti a nih chuan mipa leh mipa inngaihzawn a hluar tihna a ni ang a, mipat mipatna pawh a hluar ang tih a rin theih.

Mipat mipatna hmang tawhte hi pherh nuam ti an ni deuh vek; an zinga 80% chuan pherh nih hi nuam an ti a, 20% chauhin nuam an ti lo.

Pherh nih pianpui zingah sex hi a hluar niin a lang; mipa nena sex hmang tawh zinga 70% chuan pherh nih hi an pianpui a nih thu an sawi a, 30% erawhin an duhthlanna a nih thu an sawi.

Mak deuh mai chu mipa nena sex hmang tawh zingah piangthar inti an tam tlat mai hi a ni; zaa 70 lawih an ni!

Bishop Stephen Rotluanga chuan tuai leh mawngkawhurte hi Bible phal loh a nih thu a sawi a, chutih rual chuan anmahni hriatthiam chu tul a ti thu a sawi thung.

"Tuai an awm a, hei hi a chhan chi hrang hrang a awm. Mahni duhthlanna ni miah lova hetiang ni te an awm thei a, chutih rual chuan thiante vang leh intihhmuh thil vanga ni ta te pawh a awm theih ang. An dinhmun hi hriatthiam a ngai a, pawngpaw hnawl ngawt theih an ni lo. Anmahni hriatthiamna thuk tak nena enkawl an ngai a ni. Amaherawhchu, Bible atanga chhut chuan hetiang hi mihring nihphung chu a ni lo a, Pathian duh dan a ni lo. Keini Kohhran chuan 'homosexuality' hi kan pawm lo," tiin Zozam Weekly a hrilh.

"Pathianin mipa leh hmeichhiaah min siam a, mipa leh hmeichhia chu inthlahpung zel turin min siam a. Chuvangin, mipa leh mipa emaw hmeichhia leh hmeichhia emaw khawsak dun chu Pathian ruahman dan a ni lo. Pathianin nupa ni tura a ruahman chu mipa leh hmeichhia a ni. Chutianga ti ve thei lova mahni anpuite nena lo inkawpte chu puih an ngai a ni," a ti bawk.

Social Worker Vanramchhuangi (Ruatfela Nu) chuan, "Kristian kan nihna atanga thlir chuan inneihna chu mipa leh hmeichhe karah a ni tur a ni," tiin mawkawhurte chu pawm chi-ah a ngaih loh thu a sawi.

Ruatfela Nu hian tuai leh mawngkawhurte hi buaipuiin a lo kawm tawh thin a, ani ngaihdanah chuan hetiang mite hian puih an ngai a, an dinhmun hrethiam chunga puih a tul.

IPC Section 377 hi dan awmze nei takah a ngai lem lo, he dan hian hman a hlawh loh em vanga chutiang ngaihdan nei chu a ni.

"He dan hmang hian mawngkawhurte an hrem tak tak lo a, dan awmze nei lo a ni mai. He dan hi mahni anpui kawp chingte hremna ai chuan mipa naupang khuaikhem chingte leh ran pawl thinte hrem nan an hmang zawk a, chuvangin he dan hi an siamtha emaw siamtha lo emaw, dan tangkai tak a ni lo hrim hrim," tiin a ngaihdan Zozam Weekly a hrilh.

Pherh-ho chu uluk taka zir chunga enkawl an ngai a ti a, rin phak bakin hetiang mite hian society an tibuai thei ang tih chu a rin dan a ni.

"A inthup loho kan hria a ni mai a, a inthupho hi eng zat nge an nih tih leh eng mi nge an nih kan hre lo. Miin hetiang ti tura kan rin miah loh, pa pangngai nia kan hriat, mahse, mawngkawhurte mamawh tlat si te hi an awm a, tuna a lan danah chuan hetiang hi an tam phian hmel lehnghal! Kan hriat miah loh leh hlauhna chang pawh kan hriat miah loh lai hian hetiang mite hian natna tha lo te hi an lo thehdarh reng thei. Miin nupui a nei a, tu hmeichhia mahin an pasal te hi mawngkawhurte nena khawsa turin an ringhlel lo ang. Lo khawsa ta se a tuartu tur chu nu leh an fate an ni," Ruatfela Nu chuan a ti.

Zozam Weekly-in pherh-ho a zirchiannaah chuan khawtlang leh Kohhrana inhmang tak takte pawhin pherh-ho hi an beisei fo niin pherh-ho chuan an sawi a, mawngkawhur thenkhat phei chuan mipain an pawngsual vanga tuai ta niin an insawi nghe nghe.

Engpawhnise, pherhho hi an inthup lem lo a, 'culture' hran neiin hlim takin tuallai an leng ta zawng a nih hi. Chu chu thil tha nge thil chhia?

Related Posts :