Interview : John Michael Bilton (UEFA 'A' Licensed Coach)

West Virginia, USA-ah khuan Indian pakhat, infiamna lama tui zet mai Dr Francis Saldanha a awm a, ani chuan company pakhat FS Sports a din a, chu company kaltlang chuan Indian football hi chawisan a tum a ni.

Nikum lam pawh khan India Under-16 team chu USA-ah an hruai thla (sponsored) a, Mizo naupang Malsawmfela chuan goal a thun miah miah a, top scorer a zu nih nghe nghe kha.

FS Sports bultumnain, All India Football Federation (AIFF) leh Mizoram Football Association (MFA) te nena tanghoin UEFA Pro License nei, kum 30 teh meuh mai coaching lo luhchilh tawh John Michael Bilton chuan July ni 7 khan Aizawl a rawn thleng hlawl mai. A tuk atangin Mizoram Under 16 team, member 30 te chu Ramhlun Sports Complex-ah a hrual a, Mizo naupangte hi football a zirtir mek.

John Michael Bilton hian U-16 team te hi exercise hautak fe fe pe lo mah sela, naupangho chu zan lamah an sil urh zel! "A mi kaihhruai dan hi a mak ngawt mai, a ruka mi kaihhruai 'tough' dan a thiam tlat," an ti.

Thenkhat chuan: "Ani min kaihhruai hma kha chuan kan inkhel reng reng hi field laiah hian kan tlankhawm tup tup a, tunah chuan field pum mai hi kan hmang tangkai tawh a, kan game chu inthlak tawh tak a ni," an ti a, chu thu chu a ni 3-naah khan an sawi hlawm a ni.

Han sawi thui zel pawh a chakawm viau a, kar khatnaa attacking a beihtir dan leh ball a luh fuh dawn loha mahni lama kirpui (recycle) leh dan vel a zirtir dante chu hmuhnawm tak a ni. 'Ani hian kumtluanin han kaihruai thei mai se...' tih hi practice session entu tam tak thusawi a ni.

Kum 63 mi, UEFA 'A' Licensed Coach John Bilton chuan tiang hian a sawi...

Mizo naupangte ni 5 vel i enkawl hnu hian beiseina êng a awm dawnin i hria em?
Tehreng mai, Mizo naupangte hian zirthiam an duhzia an lantir a, hmasawn an duhzia an lantir bawk a, an nungchang a tha em em a, kaihhruai an nuam bawk a ni.

Tam takte hi chu an football hmakhua a êng khawpin ka hria, mahse, eng chen (eng level) nge an thlen dawn chu ka hre lo a, chu erawh an mawhphurhna a ni. Kar hnih chhung leka ka tih theih hi chu a beitham ve ang reng si a.

Mizo naupangte hi tactic lamah eng angin nge i hmuh? India ramah Haryana leh state dang naupangte i lo kilkawi tawh a...
Nia, Haryana leh Goa lamah rei lo te ka lo teikual tawh a, mahse tactically-a training pek ka la nei hlawm lo a, mahse chuti chung chuan India rama ka kal ve tawhnaah chuan Mizo naupangte chu tactic-ah chuan an chungnung hlein ka hria. Mahse, England leh hmun tam zawk ka tlawh ve tawhte chu tactic-ah chuan sang tak an ni hlawm. Chuvang chuan Mizo naupangte hi tactic lamah kaihhruai nasat an tul tih ka hria a, kar hmasa lam khan lehlam pawlte nawr dan (attacking) lam ka beihpui a, tunkar hian mahni lam venhim dan (defending) ka beihpui leh a ni.

Mizo naupangte hian footballer tha tak ni turin eng nge an tlakchham?
Ka sawi tawh ang khan tactical awareness hi an tlachham niin ka hria. Tin, a bulthut tlakchham an nei nual mai bawk a, entirnan, defending lamah 1-V-1 leh 2-V-2 ang te, Discipline-Defending...Chu chu kan tlachham deuh a ni.

Chet ran (agility) te, balance te, thawhho/tanho te leh tlan chak te an mamawh a, chutih rual chuan technical skill an nei tha hle thung a, an rilru pawh a paukhauh viauin ka hria. Inrintawkna nei chunga dam thlap mai, cool taka an awm thiam a ngai; a chang chuan an che leh phut phut mai thin. 'An ngaihtuahna zawng zawng an pek a ngai' ti ila a dik ber awm e.

Kan khelmual char leh bumboh tak maiah hian tuk tin tlai tin mai kan inkhel ve bauh bauh mai chu a ni a, khaw that laia khu luai, khaw chhiat laia berh burh mai a ni a, hetiang dinhmun atang hian engtin nge maw footballer tha tak ni tura kan inchherchhuah ve theih ang le?
Nia, in dinhmun chu hetiang hi la ni rih mah se kan ngainep thiang ngawt lo a nia. Lei char, lung/bumboh leh lei dûra inkhelh hian ball khalh/thunun dan min thiamtir a, chu chu advantage tha tak a ni ve tlat. Kawng lehlamah chuan a that lohna tam tak a awm ve tho bawk a, khelh a hahthlak bikin ke te hi a nain a kham thêm thûm duh bik a, inhliam a awl bik a, kar hmasa pawh khan kan naupang 2 chu an inhliam nghe nghe. Mahse, hei hi lo hre teh u, tuna in training na hmun hi kum 25 vel kal taa England-a kan training-na hmun nen khan a inang reng a ni. Khatihlai khan Astro-turf khelmual te hi kan la nei ve lo a, phul (grass pitch) chu nei tawh mah ila, tlai lama kan practice na hmun chu lei char a la ni vek. Tunah chuan astro-turf leh grass pitch te kan nei vek tawh a ni.

Leeds United-a hun i hman lai vel kha min han hrilh teh. Alan smith, Harry Kewell leh Paul Robinson teho kha i lo kilkawi tawh niin kan lo hria a, midang lar deuh, kan lo râlhriat âwm ang te an la awm em?
Northern Ireland tana khel thin Warren Pheiny te, Leicester leh Kilmarnock tana lo khel tawh Alan Maybrick te, Middlesbrough, Real Madrid leh Tottenham Hotspur tana khel tawh Jonathan Woodgate teho hi a lar deuhte chu an ni a, chutih hunlai chu kum 1996 leh 2000 inkar kha a ni. Khatih hunlai, kum 16 leh 18 vel an nih laia Leeds Academy-a awmho kha za zela 35 vel chuan football hi eizawnnan an hlawhtlinpui a ni. Hetiang zat zet mai an hlawhtling hi thil ropui leh chhuan tlak tak chu a ni ve. Academy-a inzirho hi a tlangpuiin za zela 10 vel chauh hlawhtling chhuak anga ngaih theih an ni.

Leeds United bak, i coaching experience dang min lo hrilh teh.
Rotherham United-ah kum 4 fitness coach-in ka awm a, Oldham Athletic-ah fitness coach-in ka awm a, Notts County-ah coach-in ka awm a, Tranmere Rovers-ah fitness coach-in ka awm tawh bawk a, tuna ka awmna Doncaster Rover-ah hian tunhmain youth development coach ka ni tawh a, he club-ah hian tun thla ni 22-a ka haw thlak hunah technical development coach ka nihna hi ka chhunzawm leh dawn a ni. He club-ah hian kum 9 leh kum 16 inkar naupangte kaihhruai hna ka thawk a ni.

Europe khawmuala football thuneitu sang ber UEFA-in 'A' License Coach nihna a pek che hi neih a har viau em? Exam ang chi te paltlang a ngai em? Eng nge UEFA Licensee nih chu a tangkaina ni reng reng?
UEFA Pro License hi course paltlang tur an ruahman ka paltlang vanga nei thei ka ni a, chumi zulzui chuan Pro License Course pahnih - Turkey leh Cyprus-ah ka paltlang ve ve a. Chuvanga he license nei thei hi ka ni. 'A' License hi award sang tak mai a ni a, coach pawh ni mah ila, thil awlai lo tak mai a ni. A chhan chu thil tam tak thiam bel a ngai a, coaching pangngai i ti mai ang, 4-4-2 hriatthiam ringawt hi a ni teuh lo mai, social worker i nih a ngai a, a chhan chu thalai emaw mi tu pawh i enkawl thiam a ngai a, mi biangbiak thiam te a ngai a, hmahruaitu i nih thiam a ngai a, mi rilru i hneh thiam a ngai a, mi i tihphur thiam a ngai bawk. Chuvangin coach ni tur hian thiamthil hrang hrang neih ngah a lo pawimawh em em mai a, thil awlai tak a ni hauh lo.

Player thenkhat, England-ah Work Permit an hmu thei lo tih thu te hi kan lo hre ve fo a, Work Permit tih hi eng nge maw a awmzia ni ber le?
England-a cheng i nih loh chuan professional contract i ziah dawn reng rengin Ministry of Employment hnen atangin Work Permit i neih phawt a ngai a, chu permit nei tur chuan European passport i neih phawt a ngai. European passport nei tur hian England, Wales, Ireland, Scotland emaw Europe ram dangah emaw, i nu leh pate emaw, i pi leh pute khua leh tui an nih a ngai leh ta bawk a. Leeds-a ka awm lai khan Australian naupang Harry Kewell hi kan la lut a, ani hian European passport a nei thuai a, a chhan chu a nu leh pate hi England chhuak an nih vang a ni. Chu chu European passport neia work permit hmuh theih dan kawng awlsam ber chu a ni a, kawng dang a la awm leh a. Ram aiawha (full international) vawi 20 tal khel tawh (capped) i nih chuan work permit i hmu thei bawk, a chhan chu high level-a inkhel tawh i ni tih finfiahna a ni. Europe ram thenkhat, Holland leh France angah te chuan England-a work permit hmuh a harsat ang hian a harsa ve lem lo.

Engatinge season liam taah khan Barcelona ho hi hneh an har viau mai le? Hetiang taka an thatna chhanah hian Frank Rijkaard kha nge tuna an coach Pep Guordiola hi kan fak tak ang?
Aaa...Guordiola hi a hun takah a lut a ni i tih mai teh ang, an kalphung a thlak danglam vek mai a, he team hi field chhung khawi hmun mai pawha ball uma la nalh nalh thei awmchhun (Spanish Club zingah) an ni a. Team tam tak hi chu lehlam pawlin ball an chhuhsak hnu hian half-way line-ah an kir a, an ball hloh chu an lo châng tawp a ni ber a, mahse, Barcelona hi chu an fit em em mai a, khawi hmunah pawh ball an zawng vek mai a ni. Ball an chan te hian an keng rei lo a, rang takin an sem chhuak zung zung bawk a, chuvangin an coach thar hi ka fak lo thei lo a ni. Hetiang hi Mizo naupangte pawh ka zirtir mek a ni.

Kumin UCL Final kha i lo en ve ang a, Barcelona in Manchester United an sawp tum kha...
Nia, Manchester United khan an player-te kha an awm lohna turah an dah pek alawm le!! Barcelona bei turin an game thlak an han tum ngawt pek a, awmzia a lo awm der si lo. An khelh thin dan khan khel se chu awmzia a awm mahna. Giggs te kha a sir deuhah han tlantir leh sela, Ronaldo leh Rooney te pawh kha hmalamah han awm dun leh se chuan awmzia a awm mahna!! Mahse, an rilru-ah khan hlauhthawnna (fear element) an awm tlat a, an manager khan Barcelona hlauhthawnna thinlung nen a khelhtir a ni berin ka hria.

England-ah hian eng vangin nge tunhma zawng aia foreign player, heng Brazilian te, Argentine te, Italian te leh Spaniard hote kan hmuh tam tak em em mai le? English Premier League-in hma a sawn viau vang kan ti thei em?
A chhan lian tak tak pahnih a awm a; pakhatnaah chuan sum leh pai a tam em vang a ni a, chu sum tamna chhan chu TV leh Advertising etc. vangte hi a ni. Pahnihnaah chuan England hian player tha tak, ama chhulchhuak ngei a tlachham ta êm bawk a ni. Hetianga England-in player tha a neih tak lohna chhan chu player te'n kum 18-19 an nih lai vel hian chance an nei tawh lo a, kum tam tak kal taa hetiang rualin chance an neih ang kha nei ve tawh hek lo le.

Tunlai football transfer sum tam tak veivirna hi eng nge maw i hmuh dan ni ve reng le? Ronaldo, Kaka etc...teho man leh mual chungchanga i ngaihdante min han hrilh ve reng reng teh...
Nia, FIFA hian hetiang sum tam lutuka player lei ang chi hi chu a khap turah ka ngai. Entirnan Manchester United te ang hian pound maktaduai tel tak meuh mai bank-ah pawisa an nei a, chutihlaiin an inchawilian/an inzuar thiam em em mai si a, heng player man to tak takte lei tur hian anmahni leh anmahni an in-bank-loan a, chuvangin kei chuan FIFA hian club te sum hman tur zat hi bithliah (cap) se ka duh a ni. An sum leh pai dinhmun a zirin khuahkhirh se ka tihna a ni. Chutih rualin UEFA pawh hian player te hlawh tur zat hi bithliah deuh se chu ka ti.

Hun kal tawha player zingah tu nge i duh ber, tunlaia la khel zingah pawh?
Sawi thiam a va har ve...an tam mai a...mahse Nobby Stiles te, Allan Noble te, anni hi England midfield player pahnih an ni a, kum 1966 World Cup an champion tuma tha tak mai kha an ni a, tin, goalkeeper Gordon Banks kha a tha em em mai bawk a...Tunlaia la khelho zingah chuan Dennis Bergkamp leh Thiery Henry te hi an tha ka ti hle.

Kum 30 teh meuh mai coaching i lo buaipui tawh a, kum 60 i pel tawh bawk si a, kan ram kilkhawr tak ni sensa hnuaia i'n chet vel hi chuan i chau ve deuh thin lo maw? Chutih rual chuan i la fit hmel zek zawk riau mai bawk si a...
Ni khata vawi hnih thum vel training session neih dawn hi chuan fit hi a ngai em em mai a, tunlai ni sa hnuaiah phei chuan fit a ngai lehzual, tin chawlh hahdamna hun ngah a ngai bawk. Ka hna (coaching) hi nuam ka ti em em mai a, nuam ti lo ila chuan helai pawh hi ka rawn thleng nang.

Engtikah nge coaching hi chawlhsan i tum?
E khai (nui chungin), kum sawm tal chu ka la peih ka ring.

Nakum FIFA World Cup lo awm turah hian tu nge i rin? EPL season tharah pawh hian?
World Cup-ah chuan Brazil ka ring leh ber, Germany hi chu an rinduap deuh a, France leh Holland hian inlak thar an mamawh a, Spain pawh an ti tha ngawt chuan ka ring. Italy hi chuan hmelthar an mamawh a ni, chuvangin Brazil hi ka ring ber mai. EPL lamah chuan Manchester United hi an striker tha tak tak pahnih tel lovin engtin nge an kal tâk ang tih mi tam takin an sawi luai luai a, chutihlai chuan Manchester City pawh hian player thar chu an lei hnem ngiang mai bawk a. Mahse, kei chuan Arsenal hi ka beisei sang khawp mai, Liverpool pawh chutiang thovin.

Mizorama i rawn chuanchhuah avang hian kan lawm tak zet a ni, nang anga football coach ropui hi kan la hmu ngai lo a, i inhawngin i professional em em mai bawk si a, i hun tha tak min pek avangin ka lawm e.
Kei tak a nia lawm ni, ka awm nawm loh hlau reng rengin buai takin hun in hmang a, in hnathawh zawng zawng hi ka hlut tak zet a ni. Hetiang interview na hun tha min pek avang pawh hian ka lawm e.

Related Posts :