Phai chanchinbua lang thin Mizo pitar

Chanchinbu-a lan hi thil har tak chu a ni ve awm e. He mi hi chu tualchhung chanchinbu-ah mai ni lo, phai chanchinbu-ah a lang fo.


Amah chu Thangbawihi a ni a, June ni 3-ah khan kum 100 mi niin a thi. Kum 100 a tling hi a ropui a, mautam vawi 3 a paltlang hi a danglam tiin a sawi theih ang.

1909-ah a piang a, a pian ni tak hi hriat a ni lo. Amah chuan lo vah laia piang a nih thu a chiang. 2007 Mautam nen khan Mizo nuna thil pawimawh tak mautam vawi thum a paltlang a ni.

2007 Mautam dawn velah khan phai chanchinbu lamah mautam chungchanga Thangbawihi titi a lang hi a lang fo a, mautam vawi hnih lo paltlang tawh a nih thu an tarlang tel thin. National Geographic leh TV mi leh sate pawhin mautam chungchang chhuichiang tura Mizoram an rawn tlawh changin Thangbawihi hi an tlawh deuh zel thin.

1958 mautam kha mumal taka chhinchhiah a ni lo a, Pu C Rokhuma chhinchhiah bak thuneitu lam pawhin record an vawng lem lo niin a lang. Thangbawihi hi chu thil hre rei thei tak mai a ni a, a hriatna a that em avangin mautam chanchin hre chiang chaka Mizoram rawn tlawhtu phai chanchinbumite chuan an tlawh deuh zel reng a ni. Chutah 1911 Mautam a lo paltlang tawh bawk nen, phai chanchinbute chuan a thil hriat leh a tawnte an ngaihlu hle.

Mautam chungchang bakah sik leh sa leh khawchin danglam dan chungchangah pawh phai chanchinbu lamah Thangbawihi titi hi a lang fo.

NE Sun leh thlakip chhuak chanchinbu MW te chuan Thangbawihi titi behchhan hian news story an lo siam tawh nghe nghe.

An naupan laia Mizovin khawchin leh sik leh sa an chhiar dan a danglam nasat tawhzia a sawi te chu chanchinbu hrang hrangah a lang fo a ni.

Thangbawihi hi a hriselna a tha hle a, kum 100 a tlin thlengin hriau bengah khawlla a thun thei. Puanthui lam hi a tuina lam a ni a, kum 100 a nih thlengin a puanthuikhawl a hmang thei. Thingpui a in chak chang pawhin midang tibuai lovin amaha lum a tum hram hram thin.

Tun hnaiah heart attack a nei a, lung tha lo vang hian June ni 3-ah a thi ta a ni.

Fa 6, tu 30, tuchhuan 61 a nei a, khup thum pathum a hmu bawk.

Related Posts :