¢ LN Tluanga
Boxing leh Wrestling tuipuitu tlemte chu kan titi ho a, chinchang hre ber Pu John Lalkaisanga chu sipai pensioner a ni a, boxing a khel nasa a. Army Boxer hial niin training a nei tha a. Trainer a ni zui bawk a. "Boxing leh Wrestling hi Mizo tan game tha tak a ni ang. Tiatpui zel inkhin a ni a. Mzo chuan mahni tiatpui chu kan zuam zel a. Kei pawh sipai ka nih hnuin ka zir chawp a, ka tawng sangin ka hmingthat phah viau a ni," ti zawngin Boxing leh Wrestling chu a sawi mawi a.
Kan pawm zawng tak a ni a, association din kan rawt ta a. Mahse mi 10 pawh kan kokhawm zo lo, tumruh takin Amateur Boxing leh Wrestling Association chu September ni 4, 1963 chuan kan din ta a. Hruaitu hmasate chu hetiang hian kan vuah a:
President: LN Tluanga, Electric Veng
Gen.Secretary: RZ Thangchhuaka, Venghlui
Treasurer: L Pachhunga, Khatla
Coach: John Lalkaisanga, Venghlui
Kan din tirh laia kan beisei leh tum ber chu India rama lan ve phak chu a ni a, Asia leh khawvel Champion tih te chu kan beisei pha lo reng reng. Mizoram khawiah mah club din a la awm lo a. Tleirawl leh tlangval boxing tuipui deuhte chu kan fuih a, rei lo teah ngaihventu an lo awm ta mai a. Pu John Lalkaisanga hian a tlawh kualin, a tiphur thiam em em mai a.
1st Assam Rifles chuan boxing hi an lo uar hle tawh a. John Lalkaisanga pawh Trainer (Instructor) atan an lo ruai a. Chuvang chuan Assam Rifles boxing lai te chu kan en ve ta a. Kan naute boxing zirlaiho chuan mipui hmuha boxing khelh an chak ve ta a. Tichuan Mizoram Boxing Tournament hmasa ber chu November ni 4, 1963 khan Theater Hall-ah kan buatsaih ve ta a, kan coach John Lalkaisanga birthday a lo ni hlauh lehnghal.
Category hrang hrang, inbei tur an lo awm ve hman reng tawh a. Zan thum lai tournament khelh nan kan hmang a. Theatre Hall pawh a khat ve ziah mai. Miin boxing an hlut tan ve hle niin kan hria a, kan tha pawh a tho phah hle.
Tichuan Aizawlah leh Zokhaw lamah club a ding ta nual a. Tournament neih leh pawh boxer ho chuan an chak avangin Lammualah Boxing Tournament chu kan buatsaih ta a. Mipui pawh an thahnem thei hle a. Boxer tha fu fu an awm tawh a. Palian category-ah phei chuan mi hmuh chak tham R Biakliana (tunah coach) te, Ngurvunga te an lo lang ruau mai a.
Palian R Biakliana leh Ngurvunga te han in-boxing phei chu hmuhnawm kan ti vek a, mit tla dawn dawnin kan thlir a ni ber mai. Ngurvunga (Pangzawl) chu vannei deuh zawkah tangin a champion ta a ni.
Hetih hun lai vel hian All Assam Rifles-in tournament an nei zo hlim a, an champion - Gurkha, AR-a mi chuan kan Mizo champion Ngurvunga te in-boxing kha a en ve a, a cho em em mai a, in-boxingna hun remchang siam turin min ngen a. Kan rin loh takin Ngurvunga lah chuan a lo chakin a lo cho ve tho mai a. An in-boxing hun chu kan ruat ta a, Lammualah an inbei ta a ni.
Entu mipui pawh an tam khawp mai a, round khatna an han tan a, Assam Rifles champion chu tha zang tak mai hian a perh sawn thauh thauh a, a kuttum chuan inveng ngun em emin a vilik zauh zauh reng a. Hnek vak tum hmel pawhin a lang lo a, Ngurvunga tan pawh inhnekna remchang awm lovin, round khatna chu a tawp der mai a, mipuiin ho an ti hle.
Round hnihna an han tan leh a, a ngai te bawkin Assam Rifles champion chuan a kut a phet zauh zauh a, a zuang kat zak zak reng a. Inhnek tak tak a la awm chuang lo. Ngurvung pawhin hnek vak ngaihna a hre lo ni awm tak a ni. An han inveh leh a, an vei kual zak zak a, Ngurvunga'n remchang a hmu ta. A khingpui pa thle zak zak leh kuttum vilik karah chuan a kut dinglam ngeiin a khabe vei lamah a han chhoh dawm siah mai a. Boxer tuar rual a ni lo. Champion pawhin a tuar bik lo, a zangthal zawngin a tlu ta zuah mai a ni.
Tualchher boxer-in All Assam Rifles champion a knocked out ta a, ropui kan tiin kan hlim ngei mai.
Mipui thawm pawh a nasa hle, chang tum, kut beng leh au ri chu pui rem rem tak a ni. He thil thleng hian boxing boruak a sep kang hlein ka hria.
1966 - rambuaiin min nang ta hlauh mai a. Boxing platform hungna puan sen sei pui pui te pawh kha a dahna thingrem a lo hnaih avangin MNF rammu tur bomb tihpuah palh hmasa ber tuma thi ta martar-te leh hliamte thisen hrukfai nan kan hmang then ta nual nghe nghe.
Keiniho hnungah thangthar te'n boxing chu an tuipui zel a. Aizawlah Sport Association te mumal taka lo dingin Sporting Club te chu a hmunpuiah hnuk lutin affiliated member-ah an siam ta zel a. Chutah boxing leh wrestling te pawh 1980 vel khan a hranga dah a ni ta a ni.
(He thu ziaktu hi Amateur Boxing & Wrestling Association president hmasa ber a ni a, MLA hlui a ni.)
No comments:
Post a Comment