India Prime Minister Manmohan Singh

¢ Lalthlamuana Ralte

Kar kal ta Zirtawpni khan India president chenna in Rastrapati Bhawan-ah sorkar thar lakluh a ni a. A vawi hnihna atan Manmohan Singh chu democracy ram lian ber India prime minister a ni leh ta a, Jawaharlal Nehru hnua a zawna prime minister hna chelh thei awm chhun a ni ta.

Manmohan Singh hi India prime minister neih tawh zinga mithiam chungchuang a nih vang te, a hun hmasa zawka economy hmasawnna avang te, amah hi economist ropui a nih vang te, kum 1991-a India ramin sum leh paia harsatna namen lo a tawh laia khaichhuaktu a nih vang te, India hmel tidanglamtu a nih vang te, politician hmingtha a nih vang te hian mite ngaihsan a hlawh hle a ni.

September ni 26,1932 khan Punjab-a thingtlang khaw pakhat Gah-ah a lo piang a, an unau hi 10 an ni a, a upa ber a ni.

A pianna khua Gah hi Pakistan ram chhunga awm a ni a, independence hlima India leh Pakistan inthen (partition) lai khan India ram lamah insawn lutin Amritsar-ah an khawsa a. An chhungkua hi thei rep ro zuara eizawng an ni a, an khuaah hian electricity a awm loh avangin bati eng hnuaiah te lehkha a zir nasa hle a, a mit pawhin a that loh phah zui ta nghe nghe a ni.

A naupan lai atangin lehkha zir peih tak a ni a, a zir lai bak thil dang pawh a chhiar peih viau a. Lehkha a chhiar reng thin avang hian a pa Gurmukh Singh phei chuan: "Heti i nih chuan prime minister i la ni hial ang," a ti thin niin a nau Daljit leh Surjit te chuan an sawi nghe nghe a ni.

A unaupa Daljit chuan: "Kan unauah chuan amah chiah hi lehkha zir peih a awm," a ti bawk.

Tualchhung sikul-ah bul a tan a, chumi hnuah Hindu Sabha College atangin a graduate a. A zir chhunzawm zel a, kum 1954 khan Panjab University, Chandigarh atangin MA (Economics) a zo leh a. Lehkha thiam chungchuang a ni a, MA exam-ah hian pakhatna a ni nghe nghe.

A thiam em avangin Cambridge University-a (UK) a zir chhunzawm theihna tur Fellowship a hmu a. St. John's College, Cambridge University-ah hian Economics chu first class-ah a pass a, chumi hnuah Nuffield College, Oxford university-ah a Ph.D a zo leh a ni.

Oxford leh Cambridge university te hi khawvela zirna hmun hmingthang leh hlun ber berte a ni, heng hmun pahniha lehkha zir thei ngatte phei hi chuan ngaisang hle a, 'Oxbridge academician' tiin an ko thin a ni. Oxford leh Cambridge-a a zir lai pawh hian Manmohan Singh hian thiamtheih lawmman chi hrang hrang a dawng nual a ni. A hnu lamah pawh chawimawina engemaw zat a dawng bawk.

India rama a lo let leh hnu chuan Punjab University-ah lecturer hna a thawk a. Naupang tein kum 33 mi lek a nih laiin professor-ah hlankai a ni a, he university-a professor naupang ber a nghe nghe. Heng hun lai atang tawh hian a subject, economics chu a thiam em avangin mite ngaihsan a hlawh a, a mize ngainatawm tak avangin zah a hlawh hle bawk a ni.

A zirtir chhuak pakhat Prof. H.S. Shergil chuan: "An bula Manmohan Singh a kal chang chuan zirlaite hi an phun sap sap thin. Tunlai huna filmstar kan ngaihsan ang chiah hian ngaihsan a hlawh thin," a ti.

Mize zawi chi a ni a, chapo lo leh inngaitlawm tak a ni bawk. Prof. VK Gupta pawhin inla babu chi a nih lohzia sawiin, "A hnuaia Ph.D ka zir laiin department thleng thirsakawrin min phur a, kei lah chu ka rit ropui si a," a ti bawk.

Kum 1969 atangin Delhi University hnuaia Delhi School of Economics a zawm a, Professor of International Trade hna a thawk a. Kum 1976 khan Jawaharlal Nehru University, New Delhi ah Honorary Professor ah a tang bawk.

Academician ropui leh economics thiam chungchuang a nih avangin sorkar laipuiah nihna pawimawh tak tak a chelh thin a, economics lam panga nihna pawimawh chin phei chu a chelh deuh vek tawh a ni. Chungte chu - kum 1971-72 chhung khan Economic Advisor, Ministry of Foreign Trade; 1972-76 chhungin Chief Economic Advisor, Ministry of Finance; 1976-80 ah Director, Industrial Development Bank of India; 1977-80 chhungin Secretary, Ministry of Finance (Department of Economic Affairs). Kum 1982-85 chhungin Governor, Reserve Bank of India; 1985-87 ah Deputy Chairman, Planning Commission of India a ni a. Chumi hnuah kum 1990-91 khan Advisor to Prime Minister of India on Economic Affairs a ni leh a. Chumi hnuah June 21,1991 atangin Finance Minister hna a chelh a, chuta tang chuan politics-ah a inhmang zui ta a ni. Heng bakah hian nihna pawimawh dang engemaw zat a chelh bawk.

Kum 1991 June thla khan khatih laia prime minister PV Narasimha Rao chuan Dr. Manmohan Sing hi finance minister ni turin a sawm a. A sawm ti ila a ngen a ni mah mah zawk. A chhan pawh kum 1985 bawr chho Rajiv Gandhi hun lai atang khan Economic Reform bultan a ni a, kum 1991 bawr chhoah hian India ramin sum leh pai (economy) lamah harsatna namen lo a tawk a. Ram dang nena insumdawntawnna lamah India a tlahniam em em a, ram chhung thil dehchhuah nasa takin a kiam a, thilsiamtute leh sumdawngte an mangang a. Chutih laiin sorkar leiba a pung thur thur mai a, sum lakluh a tlem tial tial mai bawk si a.

Chutia mangang taka ram hruaitute an awm lai chuan pawisa puk tur dilin international financial institutions (IMF & World Bank) an dawr a. Anni lam chuan sorkar chu khuahkhirhnate hlip a, inthlah zalen a, ram dang sumdawngte laka inhawngzau tur leh ram chhung thilsiamtute zalentir turin an lo nawr a. Chutianga hmala tur chuan mi thiam chungchuang leh an mi hriatchian Dr. Singh hi an duh a, finance minister atana la lut turin sorkar chu an lo nawr ni hialin an sawi.

Tichuan, IMF leh World Bank duhdan ang chuan India ram economy tlachhe mek tungding turin politics a la inhmang ngai reng reng lo Manmohan Singh chu Narasimha Rao-a sorkar chuan finance minister atan lalut ta a. Huaisen takin hma a la nghal a, eptu lam party thenkhat (Left front, BJP, etc.) te sawiselna karah New Economic Policy a duanchhuah chu chak takin a kalpui ta a. Tunhma atanga lo kalpui tawh sumdawnna leh thilsiamna lama inkhuahkhirhna dan rip pui puite chu hlih a ni a, India economy chu a hawngzau ta a ni.

A thiamna leh finna leh taimakna hmangin India economy sawngnawi tawh tak mai chu kaihthawhin a awm leh ta a ni. Economic Reform avang hian Dr. Singh hi India ram mai ni lo khawvelin a ngaihsan phah zual hle nghe nghe a ni. Tichuan union finance minister ah May 15,1996 thleng a thawk a, congress sorkar a lo tlak khan a bang ta a ni. Hemi hnu hian Rajya Sabha-ah Opposition Leader a ni leh a, kum 2004 May thla a Prime Minister a nih thleng khan he nihna hi a chelh a ni.

Kum 2004 inthlanpuiah khan congress party leh a thurualpui (UPA) chu sorkar siam thei khawpin an chak a. An hotunu Sonia Gandhi chuan prime minister nih a duh loh thu a sawi leh ta thut a, Dr. Manmohan Sing chu prime minister atan a rawt nghal a. Tichuan May 19,2004 khan sorkar siam tura sawm a ni a. A hnu May 22,2004 khan India rama Hindu ni lo Prime Minister hmasa ber atan lakluh a ni ta a ni. Term khat a hman zawh hnuah an party leh an sangawizawnpuiten sorkar an siam leh thei a, May 22 ah bawk chuan prime minister atan lakluh a ni leh ta. A nupui Gursharan Kaur nen hian fanu pathum an nei bawk.

Manmohan Singh hi India Prime Minister zingah a hminga 'r' tel lo hmasa ber a ni a, Sikh zinga he dimhmun chelh hmasa ber a nih bakah Hindu ni lo prime minister awmchhun a ni a, minority (hnam/sakhaw tlem) zinga prime minister hmasa ber a ni bawk.

Mi nun zawi leh mawlmang taka khawsa chi a ni a, India ram politician zingah mipui ngaih a corruption laka fihlim awm chhun tlem te zingah a tel a. Chanchinbu miten a hming lemah Mr. Clean, Mr. Congeniality tih te pawhin an lo vuah thin. Kum 2002 khan Outstanding Parliamentary Award hlan a ni nghe nghe bawk.

Related Posts :