I tawnah Vala lu a hai!

Dholai chu Vairengte thlang lawka mi a ni a, Dolaia khua, Mizoram ngei nia sawi a ni. Mahse, Assam lamin an chang rih a, MLTP Act pawhin a huam lo.


Chu khuaa chengte chuan 'MIZODWAR' an hawng a, chu dawr chu zu dawr a ni. A hmingah 'Mizo' tih a tel avangin a neitute chu Mizo an ni tihna a ni ngawt lo, 'MIZO DAWR' ni lova 'MIZODWAR' a nih zawk avang hian a neitute Mizo an ni lo tih a chiang hle.

Mizoram chhuahka kawngpui pawimawhin he khua hi a paltlang a, ni tin zan tinin Mizo engemaw zat an tlan tlang thin. Chutianga Mizo khualzinte hip nan chuan dawr an lo siam a, chawhmeh leh insakna bungrua te ni lovin zu an lo zuar ta a ni. Mizote panna lai an hre hle tiin a sawi theih ang.

Mizoram pelh hlek tawh chuan Mizote hian zu dawr hi hmuhnawm an ti thin hle nia sawi a ni a, mahni venga zu in ngai lote pawhin ram pawnah chuan an in deuh zel nia sawi te pawh a ni. India ram khawpui thenkhata Mizoram House awmnaah chuan Mizoram House kawtah zu dawr a awm thin a, 'kawng i kan dawn em?' tih chu Mizoram House-a thleng khualzinte inzawh fo thin zawhna hlimawm a ni! Zu tawnah Vala lu a hai leh thin!

Zu leh Mizote
Kima chu kum 16 mi a ni a, tleirawl a hre ve tawh. A naupan laiin a nu leh pa an inthen a, a hnu lawkah a nu chu a thi. A pa chu zungawlvei a ni a, nupui dang a neih avangin Kima chuan nuhrawn a hrawn ta.

A nu thar chu Kima chungah chuan a tha lo hle; a vua a, kut a thlak fo. A tiduhdah thei hle.

Kima chuan naupang tein meizuk a ching ta mai a, ganja te pawh a zu ta hial mai. Dendrite te pawh a hnim thin.

A hrisel lo hle a, a khua a sik hluah hluah fo. Lu nain a tibuai deuh reng bawk. Lehkha lah a thiam thei lo nasa mai.

Khawvelah hian a khua a har a, a zak ngawih ngawih reng thin. A dinhmun chu lungawithlak loh a ti hle a, vanduai riau te'n a inhre thin. Khaw eng a hmu ngam meuh lo.

Home-ah an dah ta a, a tirah chuan a pa pawhin a tlawh ve thin. Mahse, tunah chuan tlawhtu a nei ngai tawh lo.

Human Rights and Law Network: Mizoram te chuan Mizoram home hrang hranga naupangte dinhmun an zirchiang a, social welfare deptt. hnuaia inziaklut home 27-a naupang zinga za zela 33.91 te chu zu ngawlvei nu leh pa nei an ni. Za zela 40 velin an nu leh pa te chu zungawlvei ni chiah lo, mahse, zu in thin an nih thu an sawi bawk.

Home 27-a naupang 47.08% chu nu leh pa inthen kara mi an ni a, an nu leh pa te inthenna chhan ber chu an nu te uire vang leh an pa te zungawlvei vang a ni.

Synod-in a lo zirchian tawhnaah chuan hmeithai 64% chu zu vanga hmeithai an ni a, hmeichhe enkawl ngaite enkawlna hmuna hmeichhia 64% vel chu zu tuartu niin ani hian a sawi a ni.

AMGUA huaihawt, "MLTP Act hman zui zel hi a tha a ni" tih thupui hmanga debate, June ni 5-a neihah Rev Lalchungnunga, Aizawl Theological College lecturer chuan Synod Social Front-in zu-in Mizote zinga nghawng a neih dan chungchang an lo zirchian tawh thu sawiin, chu zirchiannaah chuan hmeithai 64% chu zu vanga hmeithai an ni a, hmeichhe enkawl ngaite enkawlna hmuna hmeichhia 64% vel chu zu tuartu an ni tih an hmuchhuak tiin a sawi.

Mizote hian zu an in nasa em tih zawhna chu, zirchian fak a nih loh avangin rinthu bakin a chhan theih loh. Amaherawhchu, he hnam hian zu hi a buaipui hle a ni tih erawh a chiang.

M Lalmanzuala ngaihdanah chuan pi leh pute hun laiin zuin Mizote a tibuai ngai lo, 'Missionary te zirtirna avang chauhin Mizote'n zu hi sualah kan ngai' tih chu a ngaihdan a ni.

"Pi leh pute hunah zu an hmang thiam em em," tia sawiin, sap missionary te'n an awp hnamte an awp hneh theih nan an hnam nun an tihchhiatsak thin a, Mizote zingah pawh zu te, sa thithun te, nula rim te leh Mizo nun dan te an sawichhia niin a sawi. Chuta tang chuan Mizote'n zu hi sualah kan ngai ta tih chu a ngaihdan a ni.

Mizo zinga Kristian hmasate zinga za zela 80 vel chu michhia an ni a, zu an in phak ve loh avangin zu chu hmelma enin an en ta niin a sawi bawk. Chu chu tunlai thil awmzia hmanga entirna pein tiang hian a sawi:

"Kan chhiahhlawh tur chief minister leh minister te'n cheng nuai 17 man car-in min tlankhum zuai zuai a, huat enin kan en a ni lo'm ni?" tiin. Chutiang chu huat ena kan en ang hian Kristian hmasate pawhin zu hi huat enin an en tih chu a sawi dan a ni.

Rev Lalchungnunga chuan Mizo history ziaktu hmasa Rev Challiana leh Rev Liangkhaia te'n hmanlai atangin zuin Mizote nun a tibuai tawh tiin an ziak tih chu tanchhanah hmangin, "Kan hun hrechiangtute'n zu that lohzia an hriat vangin" Kohhran chuan zu a duh lo tiin a sawi thung.

Engpawhnise, Mizoramah hian The Mizoram Liqour Total Prohibiton Act, 1995 (MLTP Atc) hmangin Mizoramah zu khap a ni a, he dan hi 1997 atanga vawiin thlengin hman a ni. Chu dan hman hnu-ah chuan excise & narcotics deptt. chuan (1997-2009 May ni 15 thlengin) zu atangin Rs 161946673 an hmuchhuak tawh.

2008 kha zu atanga sum an hmuh hnem ber kum a ni a, Rs 18548981 an hmu. Hetah hian an man sa zu in phalna neite hnena an hralhna te, chhiah leh pawisa inchawitir te, an zu man sa an tihriral zui dan zawng zawng atanga an sum hmuh belhkhawm a ni.

2000 kumah khan zu atangin Rs 8024205 an hmu a, chu chu an hmuh tlem ber kum a ni.

'Local zu' kan tih mai, 'country liquor' hi MLTP Act hman chhungin litre 422554.5 an man tawh bawk. 2007 kha local zu an man tlem ber kum a ni a, litre 26764.745 an man. An man hnem ber kum - 2004-ah chuan litre 49520.645 an man.

A senchi (IMFL) hi MLTP Act hman chhungin an man hnem tawh viau; 750 ml dawng um chi hi um 80937 an man tawh a, 375 ml dawng chi um 59075 man tawhin, 180 ml dawng chi um 7001 an dawng tawh bawk.

A senchi hi Aizawlah chuan um puitling (750 ml) lo chu lei tur a tam lo khawp mai.

MLTP Act hman a nih hnuah excise 7 narcotics deptt. hian mihring 42261 an man tawh bawk. Mihring an man tlem ber kum chu 2008 kha a ni a, mi 2850 an man. 1999-ah khan mi 5265 an man a, chu chu mihring an man hnem ber kum a ni.

Zu leh sum heti zat hi an hmu tawh a, mihring engemaw zat an man tawh bawk. Mahse, excise deptt. hian zu in phalna neite an chawm zo lo!

Mizoramah hian zu in phalna nei mimal (civil mi) 276 an awm a, Zozam Weekly-in a hriat theih chinah sipai bang 2461 an awm bawk. Amaherawhchu, sipai bang zingah hian mi 1558-te phalna chauh a nung.

Excise deptt. hotute hnen atanga thu dawn dan chuan, phalna neite (civil mi) hi thla khata um 10 te in tura doctor chawh te an ni fur a, chutih laiin an zu man zinga engemaw zat chu a him loh vang leh chhan dang dang avang tein magistrate te'n an lo tiriral (destroy) thin si a, chuvang chuan phalna neite mamawh zat pek tur an nei thei ta mang lo thin a ni.

"A tlem zawngin chhut ila; mi pakhat hi um 6 zel dawng tur ang pawhin chhut ila, thla khatah um 1300 emaw a lo ngai a, chu pawh chu kan daih chuang lo. An hriatthiamna hi kan ngen fo reng a ni," excise officer pakhat chuan a ti.


Zu khapna hmuna Zu bazar
Millennium Centre-a dawr nghaktu pakhat chuan Krismas Bazar a nin chhan ber chu, "Zu rui an tam lutuk," tiin kumtir lamah khan a sawi.

"Tlangval zu rui, thil lei tum pawh ni lo an rawn kal a, lo biak that vek an ngai bawk si. Zan lamah phei chuan zu rui hi an tam khawp mai," a ti a, he shopping mall sweeper pakhat chuan, "Hmun phiah leh chhuat nawh pawh a buaithlak khawp mai, grape wine baw niau nuai a tam a," a lo ti ve bawk.

Millenium Centre-ah hian Krismas vuakvetah khan zu rim nam an tam hle a, tawngkam thar - 'Mille-Wine' tih te pawh a piang nghe nghe. Amaherawhchu, a hnawksak zawnga khawsa erawh an awm lem lo a, vantlang zinga rui chhur chhur pawh an awm lem lo.

Sapzu-ah chuan Aizawlah hian rum - plastic um chi hi kumtluanin a lar berin a rinawm a, Krismas vuakvetah pawh chutiang chu a tam thin. Nikum kum tawp lam atang khan Vodka rum a lar hle nia sawi a ni a, a rim a nat loh avangin hmeichhia pawhin hetiang hi an duh tiin zu inmi te chuan an sawi thin.

Vodka-ah chuan Romanov a lar hle a, hetiang zu - Assam-a Rs 160 vela an hralh hi Aizawlah chuan Rs 500 aiin a tlawm meuh lo nia hriat a ni.

Bacardi rum pawh, Silchar-a Rs 400 vela an zawrh a ni a, Aizawlah chuan Rs 1000 man te a ni. McDowell No 1 (rum) pawh Aizawl atanga hnai te - Lailapur-ah Rs 125 man a ni a, Aizawlah chuan Rs 500 man vel a ni.

Mizoram thenawm Assam-ah chuan rum thenkhat - Old Monk, Contessa tih vel hi um khat Rs 135 man a ni a, Aizawlah chuan Rs 600 man vel a ni. Whiskey kan hriat lar deuh - Royal Stag, MacDowell's No 1, AC Black te ang hi Assam-ah Rs 210 man a nih laiin Aizawlah chuan Rs 600-700 man vel a ni tlangpui bawk.

Bagpiper plastic um chi hi a phurh vel a remchang a, Mizoram a rawn lut hnem reng a ni. Assam-ah um 1 Rs 135 man a nih laiin Aizawlah chuan Rs 500/600 man lam daih a ni. Chutiang chu a nih avangin Aizawla lakluh hi a hlawk hle a ni.

Aizawlah hian sapzu zuar an awm nual a, motor-a semkual chi pawh an awm. A lei duhte'n sms te an han thawn zeuh a, innghahna hmun tur sawi felin a zuarte chuan an va pe ru zeuh ta thin a ni. Hetianga ti hi mi pathum vel an awm nia hriat a ni.

Chutianga pe kual thinte chu an 'luck' hle a, an hmelhriat tha, an ngaih pawimawh zawng nih pawh zu inmite zingah chuan intihtheihna tham a tling!

'Local' pawh chutianga pekual thin chu an awm; an taksaah hrui an hreng a, hruiah chuan 'funte' khaiin, jacket puk deuh te an hak hnan a, bazar velah te hian an zuar kual mai thin.

Sipai zingah pawh a ruka zu hralh an awm; Contesa rum chu nikum Krismas vuakvetah pawh khan sipai hnena zu lei theite chu an intithei hle; December ni 20 thleng khan Rs 600-in an zuar a, ni 21 atang chuan Rs 700-ah a kai! Royal Challenge pawh sipai hnen atangin Krismas vuakvetah khan Rs 1000 velin a lei theih. Hetiang zu hi Silchar velah chuan Rs 430 vel man a ni.

Tualchhung zu bazar pawh ngaihnawm tham a awm;
Rangvamual leh Phunchawng velah zu an sa a, chu chu Aizawl nuhovin an kharchhawng thin, chu chu Aizawlin zu a hmuh dan ber tiin a sawi theih ang.

Zozam Weekly-in zuzuar a kawmte chuan kharchhawng hi mi 1000 vel an nih an ring. An zawrh tirh atangin an an zawrh dan leh an kalpui vel dan a la ngai char char niin an sawi hlawm. An sa a, inah an zuar a, a hlawmin an pe thin bawk. A hlawmin an khar a, Aizawlah an zuar a, mahni inah emaw, khawlaiah emaw an zuar thin.

Rs 600 velin litre 10 an lei tlangpui a, Rs 1000 man zet a nih lai te pawh a awm. Chu chu Aizawlah a han zuar leh a, a bin an hlep tlangpui niin a zuarte chuan an sawi.

"A bin te hlep thin mah ila man hlau reng rengin kan awm a, a hahthlak. Zu zawrh hi mithatchhe tih chi a ni lo," kharchhawng pakhat chuan a ti.

Taxi-in Rangvamual leh Phunchawng atang hian zu hi an la mai thin a, private motor hman tur an hriat chang chuan an lawm thei viau.

Zuzuarte chu rethei leh khawsak harsa tak tak an ni hlawm niin an sawi.

"Mirethei te te kan ni, retheih vanga zuar kan tam ngawt ang. Eizawnna te a vang a, vawi hnih khat lo tih tawh chuan han tih zui mai hi a awl a ni," zuzuar pakhat chuan a ti. "Rethei lo chu 10-ah 1 an tling lo ang. Zuzawrh hi hausakpui tur chuan nghah rei a ngai a, vanneih a ngai bawk. Min man chuan kan chhia a ni deuh ber mai a," pakhatin a ti ve bawk.

Tikte 1 an ti a, local zu litre 2 1/2-a tam a ni. Chu chu Rs 150-200 man a ni tlangpui a, a mantu lamin an veh ngawrh deuh chang chuan Rs 300-ah te a kai niin an sawi. Tikte chu zu inmite tawngkam lar tak a ni a, funte a lar hle bawk. Funte 1 hi Rs 100 man vel a ni.

Hetih lai hian Aizawla zu lalut thin, mahse, rethei lem lo an awm ve bawk. Zu khapna khawpuiah hian sapzu/a senchi lei mai tur a awm reng a, lei tur neih hi sum leh pai zawnga chhut chuan thil hlawk tak pawh a ni.

Zu chhia vanga thihna
1997 atangin Mizoramah Mizoram Total Prohibition Act hman a ni a, chu dan chu hman a nih hnuah zu chhe in vangin Mizoramah mi 55 an thi tawh.

Mizoram Excise & Narcotics Deptt. te'n an chhinchhiah dan chuan he dan hman tan kum - 1997-ah khan zu chhe in vangin mi 4 an thi a, pakhat chu hmeichhia a ni.

1998 leh 1999-ah zu chhe in vanga thi an awm lo a, 2000-ah erawh mi 9 an thi. Mipa 7 leh hmeichhia 2 an ni.

2001-ah mi 14 an thi a, hmeichhia an awm lo. A kum leh 2002-ah erawh zu chhe in vanga thi an awm lo.

2003-ah 3 an thi a, mipa vek an ni. Ruihhlo Do Kum puan pass kum 2004-ah khan mipa hlir 6 an thi a, Kumpuan hman tan kum 2005-ah mi 6 bawk an thi.

Kumpuan hman tan kuma thi mi 6 zingah hian hmeichhia an tam zawk; 4 an ni!

Kumpuan puan nawn kum 2006-ah mi 5 an thi a, mipa vek an ni. Kumpuan puan nawn leh kum 2007-ah mi 2 an thi a, mipa ve ve an ni.

2008-ah mipa hlir 6 an thi a, 2009-ah erawh zu chhe in vanga thi an la awm lo.

Zu chhia kan tih mai hi Methyl Spirit pawlh a ni tlangpui. Methyl Spirit hi 'spirit' tia kan sawi mai, mistiri te'n furniture ilo tihtlet nana an hman thin - 'varnish' an tih hi a ni. Chi hrang hrang a awm bawk na a, a inang tlangpui. Zu chhe in vanga thi mi 55 zinga 36 chu Methyl Spirit pawlh an in vanga thi an ni.

Methanol an tia, mithiamte chuan an thliar hrang deuh na a, Methyl Spirit te nen ang khat a ni. Chutiang pawlh an in avang chuan mi 1 a thi tawh.

Cancer damdawi - Pathedine te pawh an pawlh thin. Nachhawkna chak tak, cancer natna veite chiu nana hman thin a ni a, ruih nana hmang te pawh an awm nghe nghe. Chutiang damdawi zu-a pawlh an in avangin mi 2 an thi tawh.

BEDC pawlh an in avangin mi 2 an thi tawh bawk. Heta BEDC hi dawidim chi khat a ni a, B leh E leh 'dawhkan' tih thlukin an lam a, chutiang chuan sawi a ni mai thin.

Burma Economic Development Corporation chu Burma sipai sorkar hnuaia corporation pakhat a ni; Burma sorkar hnuaiah hian foreign trade enkawltu board leh corporation 10 a awm a, chu'ng zinga pakhat chu a ni. BE dawidim pangah hian BEDC tih a inziak a, chu chu a kengtu sumdawngte'n dawhkan tih thlukin BE tiin an lam ta mai niin a lang.

An zu inah eng nge pawlh a nih chiah hriat lohte pawh a awm a, chutiang zu in vang chuan mi 14 an thi a ni.

Zu leh hlemhletna
Pa pakhat chuan doctor hnenah zu in phalna a dil a, chu chu a hralh leh thin!

He pa hian doctor-in damdawi a chawhna lehkha siam sa a nei a, Aizawl Civil Hospital medical superintendent hming ziak hnanin, pakhat Rs 1000 te'n a hralh leh thin a ni.

Zu chawhtu doctor hian hetianga hralh atana tih a ni tih a hre lo nia hriat a ni a, amaherawhchu, damlo en miah lovin zu a chawh thin a ni tih erawh a chiang.

He thil hi tun hnaiah excise hotute'n an hrechhuak a, Aizawl Police Station-ah FIR an thehlut ta a ni.

Excise hotute hian medical superintendent hming sign hi an ringhlel ngang a, an chhuichiang ta a ni. May ni 28-ah khan FIR hi an thehlut a, mahse, bumin an lo awm hman tho! He pa buaipui vanga zu in phalna nei mi 8 hnenah excise lam hian zu an lo pe hman!

He thil hi police te'n an chhui mek a, April atang khan he thil hi he pa hian a lo buaipui tawh nia hriain, mi 14-in zu in phalna an lo neih phah hman a ni.

He pa zara zu in phalna neite hi inhnaih te tea khawsa an ni hlawm a, chhungkhat tia sawi theih an ni fur. Chutah chuan ngaihtuah theih tak mai thil a awm; excise hnen atangin zu an lachhuak a nih chuan an han thawhkhawm ang a, sumdawn nana hman an tum a ni thei.

Hriat theih chinah he pa zara zu in phalna neite zingah hian hmeichhiate pawh an awm nual a, nutlingte pawh an awm.

Zu-in hlemhletna a hrinchhuah lian tak pakhat chu jail tang tura aikal lak hi a ni awm e.

"Ka nau a nia, zu a zuar a, an man ta a. An chhangchhe lutuk a, a fate an la naupang si a, ani ber a tan chuan a fate chawmtu tur an awm lo a, tihian ka tang ta a ni," tiin Central Jail-ah ngei nu pakhat chuan Zozam Weekly a hrilh.

A nau zu chu ama ta angin a sawi a, a nau tan ai a tang ta a ni awm e. Chutiang chu an tih fo dan pawh a ni!

Zuzuarte hian an aia tang tur an nei fur nia hriat a ni. Ukil pakhat pawhin, "A dik alawm, thenkhat chu a tana han tang chi hi an ni lo a, tute emaw, an aia tang tur an nei sa thlap thin. An inbe fel sa a, an man veleh an ta angin an lo sawi mai thin," tiin Zozam Weekly a hrilh.

"Inman ringawt hi chu a sawt lo. Min man kan hlauh leh inman tir loh dan tur kan ngaihtuah ve a ngai a ni mai a. Min lo man a nih leh kan tang a, kan chhuah hnuah kan chhunzawm ve leh mai a. Chhunzawm loh chu tih tur dang kan hre hlei nem," tiin zuzuar pakhat chuan an dinhmun a sawi.

Aikal lak tur nei lote chuan jail-ah an fate an hruailut fo. Zu vangin nu ber an man a, jail tang tura a chungthu rem a ni, jail a tan chhungin a fate lo enkawltu tur an awm loh chuan jail-a hruailuh mai an ngai. An fa te chu hnute hne lai an nih phei chuan jail-a hruailuh loh theih an ni lo, hruailuh ngei ngei an ngai zawk.

Hetih lai hian nuthlawi pakhat, Central Jail-a tang tawh chuan vawi tam tak tang tawh mah se a tang thin tih hi a fapain a la hre lo niin Zozam Weekly a hrilh!

2004-ah khan a pasal nen an inthen a, fapa pakhat an nei. An fapa chu a pain a chang a, ani'n zu a zuar bawk nen, a fapa chu a hmu khat hle.

"Jail-ah ka tang tih a hre ngai lo hrim hrim. Hrilh ka phal lo, a pi leh pu te paw'n an phal lo," a ti.

Hrilh a phal loh chhan chungchanga zawhna chu, "Naupang tan a tha lo alawm. 'A zin' te ti se a pawi lo, a tha zawk daih," tiin a chhang a ni.

Zu vanga hlemhletna lian dang leh pakhat chu sorkar hnathawkte chungchang hi a ni awm e. Mizoram sorkar hian zu khap mah se a hnathawkte chuan duhtawkin zu an buaipui thei ti ila kan sawi sual tam pui awm lo e. Department picnic nikhuaa zu a tel thin thu te hi chu thuhran ni se, Mizorama a senchi laluttu liante hi chu sorkar hnathawk an ni. Zin nikhuaah an hawn thin mai a ni lo a, Krismas dawnah te hi chuan petrol man thawhkhawma department motor Silchar vela zu la tura tir an awm thin.

MCS officer H Lalthlangliana chuan Vairengte-ah magistrate hna thawka kum 3 vel a awm chhunga a thil hmuhchhuah chu, MLTP Act bawhchhe nasa bertu chu officer te, public figure-te leh miliante an ni tih a ni, tiin June ni 5-ah khan AMGUA huaihawt "MLTP Act hman zui zel hi a tha a ni" tih thupui hmanga debate-ah a sawi a nih kha.

Zu vanga man, jail tang leh pawisa chawi te hi rethei leh berh ve tak tak an ni tlangpui a, miliante chuan he dan vang hian an tuar lo khawp mai. Chu chu hlemhletna a ni.

Zawh loh nghawngkawl?
Mizoramah Total Prohibition Act hmangin zu khap a ni a, zu khap lekkawhtu Excise and Narcotics Deptt. hnuaiah erawh thawktu 565 an awm. Hei hian kan dinhmun a hril ruak awm e.

Tennis Court thlangah hmunhma an nei ve a, chutah chuan commissioner hovin an inbun thin. Mahse, an office chu sak that a ni a, sum lam harsatna avangin chu pawh chhunzawm theih lovin hun engemaw chen chu a tangkhang.

Excise commisionarate hi mi in luahin an awm reng thin a, tunah chuan Tennis Court thlanga an building chu la peih lo mah se thawktu thenkhat chuan an luah tawh.

Mizoram kawtchhuah, Vairengteah check gate an nei ve a, chu hmunah chuan Mizoram pawn atanga lirthei rawn tlan lut te lo tidingin zu an phurh leh phurh loh an lo enfiah thin. Chu check gate chu Inspector 1 leh SI 2 leh ASI 1-in an ho a, excise sipai 23 an awm.

Mizorama lut tur lirthei zawng zawng deuhthawin an paltlang a, mi 30 pawh tling lo tan chutiang han ven chu a hautak mai a ni lo, a ngaihna a awm lo. Lirtheite chuan thil chi hrang hrang an phur a, a thenin leirawhchan, a thenin buhfai, a thenin balu. Chutiang zawng zawng endik tura lo hlang thlaa hlang leh let leh tur chuan mi 100 tel teh meuh an awm a ngai ang. Chuti chung pawh chuan an hna chu an hlenchhuak thei ang em aw!?

Vairengte tih lohva Mizoram kawtchhuah dang leh chu Lengpui Airport hi a ni. Chu hmunah phei chuan indaih lo tih tawngkam te chu a sang lutuk, check-tu an awm lo hrim hrim. Chuvang chuan, "A hausa deuh, thlawhnaa zin theite chuan duhtawkin zu an hawn thei reng," tih tawngkamte pawh a ri ta fo reng a ni.

Excise-ho hian lirthei lam pawh an tlachham hle; Aizawl District hi Gypsy 2, motor lian (407) 3 hmangin an vil a, commisionarate-ah Gypsy 3 leh bike 6 a awm bawk.

Motor-te hi officer te'n an kawl a lo tul ve a, zu leh ruihhlo umbo tur hian he deptt. hian lirthei an indaih lo hle. Lirthei thenkhat chu a chhe tawh hle a, a chhuat pawp hrep hrup te pawh a awm.

Related Posts :