Hriat loh Pasaltha

A hming pum chu Lalneihtluanga a nia, Maneiha tia koh a ni. A naupan lai atanga India ram hmelhriat hlawh pha ngat khawpa boxing thiam a ni a, tunah erawh labourer a ni. PWD-ah MR-in a thawk a, "A tul tul kan thawk thin," a ti.

Maneiha te rual hi an naupan lai atanga India ram hmelhriat hlawh an ni reng reng. Robert Zohmingthanga te, Rosema Colney te, Zothanmawia te, Lalnuntluanga te, Sanglura te, midang pawh an la awm. Zoramthanga te generation dawta mi, Mizoram boxing-ah 'generation hnihna' Mizoram boxing-a 'generation pahnihna' tiin a sawi theih ang. An naupan laiin SAI-in Special Area Games Scheme hnuaiah a enkawl a, Mission Vengthlangah boxing zirin an inkulh a ni.

An naupan lai chuan Sub-Junior National Boxing Championship-ah te hian Maneiha te thianho hi an chetha thei hle a, category zawng zawng deuh thawah te final an lut thin!

Phai chanchinbu-ah an hming a lang fo a, anmahni vangin phai chanchinbu-ah 'Mizoram' tih a lang chuai chuai fo. Kum 10 chuang liam taah kha chuan phai chanchinbu-ah khan 'Mizoram' tih hi a la lang khat teh a nia!

Phai chanchinbute chuan Mizo naupangte boxing thiamzia an tarlang chuai chuai thin a, India ram boxing chu Mizoramin a awp hneh hle tih thu te, Maneiha te thianho chu an puitlin hunah India ram tihmingthatu an la ni dawn ti tein an tarlang thin.

An lo thanglian a, a then phaiah boxing khelin an khawsa, a then erawh Mizoramah. Mahni kawng kawng an zawh ta. Mizoram hian he mite thianho hi a hre ta meuh lo emaw'n chu a tih theih.

An zinga pakhat Maneiha chu Pro Fight-ah a lo lang teh nawlh a, he Mizoram hian a tana medal tam tak lo hnekchhuak tawhtu hi a piang ve a ni tih pawh a hre tawh awm lo e tih hnuah Maneiha chu ring chhungah a rawn lang hlawl mai.

Mahse, Dinsanga hmaah a tlawm ta.

Dinsanga chu Maneiha te generation hnua boxer langsar tlem te te zinga mi a ni a, ani pawh hi Maneiha ang bawka beidawn vanga tum aia hmaa boxing chawlhsan ve tho a ni.

Maneiha chuan tum engemaw zat Mizoram hming a lo titha tawh a, Mizoram tan hian gold medal 7 vel a la tawh. Mahse, boxing leh Mizoramin engmah a peklet loh avangin a mangang a, chaw leh tui mamawh ve tho a nih avangin boxing khelh reng chu a tan thil awmze nei lo mai a ni.

"Kan hmingthat ve laia eng hna mah kan hmu thei lo kha ka rilru a na em a ni," tiin Zozam Weekly a hrilh.

"Eizawnna ngaihtuah ve a ngai a, boxing khelh zel kha awmzia a awm tlat lo. Thiam lohna tam tak ka nei ang, ka tumruh tawk lo pawh a ni mai thei, mahse, keini aia tling lo zawkte pawh sorkarin hna a pek laia eng hna mah ka hmu ve thei lo kha ka rilru a na em a ni. Ka tumruh loh vangah in ngai a nih pawhin ka pawm tho a, mahse, keini aia tling lo zawk an lak laia a chuanga kan han tang kan han tang chu na ve duh tak a ni," a ti bawk.

"Police an lak dawn te pawhin min thiam fo a, 'intlar pawh a ngai lo' te an ti a, mahse, eng hna mah ka hmu ve chuang lo..."

Maneiha chuan boxing khawvela a luh tirh te a ngaihtuah a, a chang chuan a zak thin. Chu'ng chu zak chung chungin a sawi a, Mizoram aiawha a zinchhuah hmasak ber tum, Delhi-a a zin tuma Rs 300 chauh a neih thu thlengin a sawi.

"Sawi pawh hi a zahthlak zawk, kan harsa lutuk hi sawi a zahthlak," a ti nghe nghe.

Boxing a lo khel chu inchhir chang te pawh a nei; "Inchhir chang ka nei, kan vanglai hun tha kan hmanna a ni a, boxing hmangin engemaw tak chu thlen ka tum thin. Zoramthanga te pawhin an thei a, a sang thei ang ber thlen tumin ka be ve hram hram thin. Mahse, engmah thawhchhuah loh chuan a ngaihna a awm lo, kan tui ngang a, kan inhnek mai mai a ni," a ti.

Maneiha hian Mizoram chhung leh Mizoram pawnah medal dahthat buaithlak tham khawpa tam medal a lo hnekchhuak tawh a, mahse, a zat a sawi mai thei lo. A certificate te pawh Pro Fight-a a hneh lo Dinsanga'n a kawl vek a, en mai tur a nei tlat lo.

"Dinsanga nen hian hna zawngin kan chhuak dun thin a, kan certificate kengin kan inzui chhuak ve thin a. Mahse, kan certificate aia hlu a lo tam a ni ang, kan hlawhtling ngai lo. Kan veng a lo hla bawk a, certificate vel pawh chu ka hawn peih ta lo a, Dinsanga'n a kawl vek. Halral vek a nia ka duh ni," tih chu hemi chungchang a sawi dan a ni. Sum leh pai hnekchhuah tur a awm tih hriain hun engemaw chen a chawlhsan hnuah Pro Fight-a tel turin boxing-ah a let leh a, mahse, a thianpa lakah quarter finla-ah a vanduai ta si!

Chu'ng thu a sawi lai chuan Maneiha chu a lung a leng a, naupang te an nih laia boxing an zir tan dan te a ngaihtuah chuan a'n nui leh rih thin!

A beidawng ngang a, 1995-ah khan naupang tein boxing a chawlhsan ta ringawt mai. "Ka thiam loh a awm ang tih chu ka hria, mahse, kan hmingthat ve lai pawhin hna ka hmu thei lo a, tawng mawi lo ni lo sela, midangin hna tha tak tak an hmu zel si a, kan khawsak a lo harsa si a, ka bei a dawng ta a ni tawp mai. Bei hram hram peih loah min ngai a nih pawhin a awm tho a, mahse, kan dinhmun ang atang chuan khawlh tak a ni," Maneiha chuan a ti.

"Min tiam a, mahse, midang an la leh daih zel a, rilru a na ve duh a sin!" a ti bawk.

Boxing a chawlhsan hnuah hian 1998-ah boxing a luhchilh leh zuai a, Senior National Boxing Championship-ah Mizoram ai a'n awh leh lawp lawp a. Chumi hnuah chuan vawi khat chu Mizoram Open-ah a tel leh bawk.

"Ka ngaihtuah hian boxing ka lo khel hi chu inchhir chang ka ngah mai, kan hun tha zawng zawng awmze nei lovin kan hmangral ni mai te'n ka hre thin. Mahse, boxing hi chu kan tuina ngang a nia, inchhir tak tak thu chu a awm lo a," tiin Maneiha chuan a sawi.

"Boxing ka khelh tirha ka rilru te ka ngaihtuah let chang hi chuan tun thlengin ka rilru a la na thin," a ti bawk.

PWD-ah MR-in a thawk a, "Kan pute'n tul an tih tih kan thawk mai," tiin a hna chungchang chu a sawi. Pro Fight-ah Rs 40000 inchuh tur a awm tih hriain a hmangaih hmasaah chuan a'n let leh a, thla khat awrh insawizawiin boxing chu a'n bei leh ta a ni. Mizoram Boxing-a 'golden generation' tia sawi ngama tel pha zingah, Pro Fight quarter final-a Maneiha inhnek kha Mizoramin a hmuh hnuhnun ber chu a ni ta awm e. Chutah pawh mi tam tak chuan amah an lo hre tawh lo lehnghal! Vawi tam tak Mizoram autir tawh thintu kha tunah chuan labourer a ni a, Mizoram tan hriat zui tlak a ni ta lo te pawh a ni mahna!

Maneiha hneh loh Laldinsanga pawh kha Maneiha ang bawka a naupan lai atanga India hmelhriat hlawh, international thlenga medal lo hnekchhuak tawh a ni a, mahse, boxing khelh zel chu awmzia awma a hriat loh avangin a glove te pawh a lo dahtha tawh.

Mizoram tan hian boxing-ah gold medal 3, silver medal 2 leh bronze medal 3 a lo hnekchhuak tawh a, naupang te a nih laiin India ram ai a awh pha daih tawh. Mahse, a hmangaih boxing chu harsatna avangin a chawlhsan daih.

Police-ah vawi thum a intlar tawh a, a tling ngai lo. Police-ah hian 'sports quota' te pawh a awm a, mahse, international boxer hian chu 'quota' chu a chang pha lo.

"2001-ah khan All India Police Meet-a Mizoram Police aiawha tel turin police hotute'n min sawm a, ka lawm em em a, hlawh ka nei ve tawh dawn tih ka ngaihtuah chuan ka phur ngang mai. Mahse, min la lo a, a hnu-ah pawh ka'n ti ve lauh lauh a, ka tling ngai lo, a chhan ka hre bik lo," tiin Dinsanga chuan Zozam Weekly a hrilh.

"Kan han intlar ve a, mahse, ka tling lo a, chutih laiin khawi lai MLA bial emaw football tournament-a best player kha sports quota-ah an la tih han hriat chuan rilru hi a na vawng vawng thei," tiin boxing a hlawkpui lohzia a sawi.

"Boxing-ah hian international thlenga sang tak thlen tum ka ni a, ka naupan lai te chuan ka phur thei em em a. Mahse, ka rin ang a lo ni lo khawp mai," a ti.

"Awmzia a awm loh avangin ka chhungte pawh an beidawng a, boxing chawlhsan turin min ti fo. 'Awmzia a awm chuang lo, khel tawh suh' min ti thin a, mahse, ka khel lui zel a. Kan tui ngang a, kan khel a ni mai a, a tawpah chuan 'heti ringawt chuan awmzia a awm lo' ka ti ve ta a ni," tiin boxing a chawlhsan tak dan a sawi.

"Kan chawlhsan a, mahse, kan tui em a, chawlhsan tak tak thu hi chu a awm lo a, pawisa a awm dawn chuan han khelh leh chang ka nei," tia sawiin Dinsanga chuan, Pro Fight pawh hi pawisa inchuh tur a awm vanga khel a nih thu a sawi.

"Boxing-a ka lo kal hi inchhir chang ka nei a, a chang phei chuan ka inchhir ngawih ngawih thin. Piang tha leh ila chu tha deuhin lehkha ka zir ang, boxing chu awmzia a awm lo," tiin a naupan laia India ram beisei kai pha Dinsanga chuan a inchhir thu hial a sawi.

"Boxing ka luhchilh dan, theihtawp chhuaha kan lo tih ve thin dan te ka ngaihtuah hi chuan ka rilru hi a na ngawih ngawih thin," a ti bawk.

Dinsanga hian a thiante pawhin retheihna avangin boxing an chawlhsan fo thu a sawi a, "Kan tawng lo haw lo se, chhungkaw harsa tak tak atanga chhuak kan ni fur a, support-tu neih loh chuan hun pum senga boxing khelh chu har tak a ni," a ti.

Dinsanga hian SSA boxing coach hna a chelh mek a, mahse, tawng mawi lo ni lo sela, tih tham an hlawh lo.

Dinsanga te rualpui boxer pakhat, Mizoram tana medal lo hnekchhuak ve nual tawh Sangkima phei chu loneiha eizawng turin Pamchung-ah a pem daih! Boxing chu chawlhsan ve chiang tak a ni.

Maneiha pawhin an generation chungchang sawiin, "Boxing kan khelho mai a ni lo a, thianho, unau anga inngai kan ni a, tun thlengin a theih ang angin kan la inngaihsak dial dial thin. Chhungkaw harsa tak tak kan ni hlawm a, rethei taka boxing kan khelhho lai ngaihtuah hi chuan lung a leng duh khawp mai," a ti.

Maneiha hi Rosema leh Robert-a nen light fly-ah an awmho thin a, anni pathum han inel vel hi a hun lai chuan boxing tuipuite titi a tling thin.

Khawvel hian a tana thil tha titu hi a hai chawk!

Related Posts :