Mizoram hi Tuikuk tiduhdahah puh a ni a, Burma atanga rawn chhukte tiduhdahah pawh puh a ni. Chakma tiduhdahah pawh puh a ni fo a, hnam tlem zawkte chunga rilru tha lo pu-ah puh a ni fo. Tun hnaiah pawh Chakma-te tiduhdahah puh a ni leh ta.
May ni 29-ah khan ACHR (Asian Centre for Human Rights) chuan "2009 India Human Rights Report" tih an tlangzarh a, chu lehkhabu-ah chuan Mizorama cheng Chakma-te dinhmun a chhe hle a, Mizoram hian a tirethei hle ni awma tarlan a ni.
Mizorama Chakma khuate chu hriselna lamah an dinhmun a chhe hle a, damloh nikhuaah pawh Chakma-ho chu 'ojhas" (Chakma traditional doctor) te mai maiin an enkawl thin nia tarlan a ni.
Mizoram leh Bangladesh inrina vela cheng Chakma-te chu an khawsak a hniam hle a, India sorkar-in heng mite tana a ruahman - Border Area Development Programme pawh dik lo taka state sorkarin a hman avangin heng lai vela cheng Chakma te chuan hma an sawn phah chuang lo nia tarlan a ni bawk.
Mizoram sorkar hnuaia hnathawk tur laknaah pawh Mizoram sorkar chuan middle school level tal Mizo tawng thiam a phut a, hei vang hian Chakma te'n sorkar hna an hmu ve thei lo niin "2009 India Human Rights Report" chuan a sawi.
Chakma khuaa sikul hrang hrang Mizo subject an zir si lo a, chuvang chuan Chakma te'n hna zawn kawngah pawh inthliarna an tawk ta thin niin report chuan a sawi a, hei vang hian Chakma te'n sorkar hna an hmuh theih loh phah niin a sawi nghe nghe.
India sorkar hnuaia home ministry hmalaknain India leh Bangladesh inrina chu hung mek a ni a, hei vang hian Chakma khaw 49-a mi 35,438 te chuan mahni in leh lo an chan phah niin report chuan a tarlang a, mahse, zangnadawmna emaw chhawmdawlna emaw engmah an dawng si lo niin a tarlang bawk.
Chakma-ho in leh ram te chu sorkarin Land Acquisation Act of 1894 tlawhchhanin a chhuh (acquire) a, chumi avang in leh ram chante chu state sorkarin a ngaihsak leh si lo niin "2009 India Human Rights Report" chuan a sawi a ni.
Report-in a tarlan dan chuan, ministry of home affairs-in Border Area Development Programme atan 2004-05 chhungin cheng nuai 1,556 a sikchhuak (release) tawh a, 2005-06 chhungin cheng nuai 903.48, 2006-07 chhungin cheng nuai 2262, 2007-08 chhungin cheng nuai 2086 a sikchhuak tawh bawk. Mahse, ACHR team-in ramri an tlawh lai chuan Chakma te tana hmasawnna hnathawh sawi tham a awm lo niin report-ah chuan an ziak.
Mizorama Chakma te hi hriselna lam (basic healthcare), zirna lam leh hmasawnna lamah te an hniam hle a, chu chu state sorkarin a ngaihsak loh vang niin report chuan a tarlang a, Mizoramah Chakma hrim hrim an chep rual hian Chakma Autonomous District Council pawna cheng Chakma te chu an chep lehzual niin report chuan a tarlang bawk.
ACHR report-a a lan dan chuan, Mizoram sorkar hian Chakma te hriselna turin hna a thawk lo.
Asian Centre for Human Rights hi NGO (non-governmental organization) a ni a, New Delhi-a hmunpui nei, Asia khawmualpuia human rights leh fundamental freedoms chawisanga humhalh tura indin an ni.
An pawl hmingah 'Asian' tih a lang kuau na a, India, Sri Lanka, Bangladesh, Nepal leh Philippines te an hma deuh bik. An director hi Chakma-pa, Suhas Chakma a ni.
No comments:
Post a Comment