¢ Debbie Chawngthu
Tun tum chu vun ro leh hmai tihfai dan kan tarlan hmain zawhna rawn lut i han chhang hmasa phawt teh ang...
Q. Ka hmai ah hian ser, kut tin a thaina vel a awm tam lutuk a, a tihreh dan min lo hrilh hram la, ka hmai chu a ngo a mahse a mam lova, a attractive lo lutuk bawk.
= A hmasain hmeichhia i ni turah ngai phawt ila, vun ngo lam hi chu a tlangpuiin an vun a ro lam anih thin avangin vun ro emaw mawm lutuk lo enkawl dan han hrilh hre mai che ila, a pawi lo turah ngai ila. I hmaia ser chu nangma kut tin ngeia i thai rang anih chuan i kut tin chu a tawiin han pu ve chhin teh, chutilo chu hun lo kal lehzel turah a rang belhchhah ange. Hetiang ser/rangah hi chuan regular takin aloe vera hnawih thin ang che. Aloe vera plant i neih chuan han zai phel la, a hnai kha i ser chiah nan hmang thin ang che. A bura awmsa pawh leitur a awm tho a, chutiang chi i hmang anih chuan a ser lai massage nan hmang ang che. Aloe vera hi tinreng damdawi pakhat ve a ni a, ser, thak, bawl, allergies, arngeng leh intih kan palh chang pawhin inhnawih mai tur a ni a, mahse regular taka inhnawih/inchulh loh chuan vawileh khata result lang mai anih loh avangin taimak erawh a ngai hle thung. Tin, damdawi dawr hrang hrangah pawh ser damdawi te hi leitur a awm nual tawh a, mahse heng ser damdawi te hi ngeih loh a awm ve theih avangin aloe vera chu thla hnih chhung tal nitin han inhnawih la, anih loh chuan doctor rawnin i vun mil ngei tur ser damdawi i hmang dawn nia.
Hmai mam tur chuan a fai a ngai a, lotion/cream hmanin a zir a ngai bawk. Thlai hring, thei, theitui, bawnghnute leh tui te hi kan taksain a mamawh a, kan hrisel phah mai bakah kan vunin a that phah a ni. Cosmetic hman nasat lutuk hi vunin a hua a, tin, a theih hram chuan quality tha hman thin tur a ni. Vun mawmin vun ro tana a siam a hman chuan a mam thei lova, chutiang bawkin vun ro tan chuan vun ro tana siam chauh hman thin tur a ni. Vun ngo hi chu a sensitive tlangpui a, chhun nisa hnuaiah i vahchhuah dawn apiangin sunscreen chak vaklo hmang ziah ang che. I product hman reng reng sensitive skin tana siam chauh hmang la, mut dawnin hmai phih ziahin moisturiser inhnawih leh ang che. I hmai chu a bawl nilovin a mam lo niawmin i rawn thai langa, chutiang anih chuan nitin khawizu hmangin i hmai chu i hman hun apiangin darkar 1 tal i chiah thin dawn nia, lapua bawnghnuteah chiahin chu chuan i hmai leh nghawng hru chhuak thin bawk la, darkar chanve hnuah tui lum pep pep i phihfai leh dawn nia. Nitina hruk pawh a pawi lo.
VUN RO ENKAWL DAN
• I vun a ro thap anih chuan artui chhungmu pakhatah sertui tlem far la, olive oil pawlh lehin inhnawih ang che. A ro thleng nghak la, chutah tui pangngaiin phihfaiin a hnu ah tui vawt takin phihfai leh ang che.
• Astringent hian vun a tih ro avangin i vun a ro sa chuan astringent hman pawhin alcohol tel lo hmang ang che. Ruahtui tlak tam lai chuan astringent hmang lovin baby soap leh tui pangngai hmang zawk bawk ang che.
• Cleansing milk hian vun chuar tur a veng a, vun ro a tih nep bawk avangin hman tel a pawi lo ang.
• Vun ro neih vanga i buai anih chuan thil dang inhnawih buai vak lovin baby oil inchulh thin ang che.
• Vun ro nei i nih a i hmai i massage zawha lotion hman tur i duh anih chuan hetiang hian siam ang che ~~ Rosewater fian thum, glycerine fian thum leh lime juice fian hnih chawhpawlh la, i hmai chiah nan hmang thin ang che. Burah i siam sa chu dahin fridge-ah dah tha la, face mask i hman zawhah i hmang leh zel mai dawn nia.
HMAI TIHFAI LEH STEAMING
I hmai i tifai ngun lo anih chuan make-up pawh han hmang la, a nalh tak tak thei lo ang. Chuvangin, nalh duh chuan faina ngaih pawimawh tel hi a ngai a, nitin inbualin hmai phei chu fai taka dah reng tur a ni. Vun mawm nei tan chuan nikhatah medicated soap hmanga vawithum tal hmai phih hi a tha a, hnar leh khabe lai hi a mawm duh bik avangin helai hi nuai uluk bik tur a ni. Vun ro tan chuan hmai phih pawhin sahbawn aiin face wash, vun ro tana siam hman a tha a, cleansing milk pawh hi a tha khawp mai. Steaming hi vun ro leh vun mawm tan hmai tihfai nan a ngai ve ve a, vun mawm tan chuan kar khatah vawihnih a tawk a, vun ro tan chuan kar khatah vawikhat tih hi a tawk khawp mai. Steaming hian vun kua a bal a ti chhuak a, hmai bawl tur a veng thei a ni. Steaming hi a that rual rualin vun no lam leh sensitive tan chuan tih loh a tha zawk a, chumi ai chuan vur tlang dah vawh hmanga hmai phih hi a tha zawk a ni. Steaming i tih chuan i lu chu towel in khuh la, tui hu chhuak lo turin siam ang che, hmun khat chauh ur lovin i lu kha ti che kual la, minute 10 i tih chuan a tawk mai.
No comments:
Post a Comment