Tlem tal

¢ Lalhruaitluanga Chawngte

Hma takah ka tho a, ka tih thin danin pawnah chhuakin ka insawizawi a, ni chhuah hmaa a thui thei ang ber kal ka tum a ni.

Tuipui kama ka kal lai chuan hla taka thil phe lauh lauh ka hmu a, ka thlen thui deuh hnu chuan mihring a ni tih ka hre thei.

Ka kal zel a, chu mi chu ka hmu chiang ta viau mai. Tuipui kamah tlangval pakhat a lam niin ka hria. Ni thar lawm nan a lam a ni ngei ang.

Ka kal zel a, a bul hnai ka thleng ta. Chu tlangval chu a lo lam hauh lo. A thil tih ka'n hmu chu, ho ka ti lutuk a, ka 'si' vang vang mai. Lui kama starfish te chu a chhar a, luiah a thehlut tlauh tlauh mai a nih chu.

A chhan ka'n zawt a:

"He'ng starfish te hi tuifawnin vaukamah a rawn lenchhuak a, anmahniin luiah an let leh thei tawh lo. Ni chhuah hman chuan an thi vek ang, an thih mai loh nan luiah ka theh phei a nih hi."

Vaukam zauzia ka'n ngaihtuah a, vaukam pum pui deuh thawah chuan starfish a tlep tuar mai bawk si, chu tlangval chuan hna awmze nei hauh lo a thawk a ni.

Zing ni chhuah hmain starfish chu luiah a theh phei hman meuh dawn loh tih ka hrilh ta ringawt mai. "En ta che, vaukam zawng zawng hi stafish-in a khat emaw tih tur a ni a, ni chhuah hmain engtin nge i theh phei hman tehlul ang. I thil tih hian awmzia engmah a nei dawn lo tih te chu i hre reng lo'm ni?" tiin.

Tlangval chu a'n chawl det a, ka thil sawi chu a ngaihtuah a ni. Mahse, a chawl rei lo, starfish chu a chhar a, tuipui lamah chuan a theh phei leh ta nghauh nghauh mai.

Min rawn en ha a, chutah starfish pakhat chu tuipui lamah chuan a'n theh phei a, chutih pah chuan, "Ani tan tal khan awmzia a awm alawm."

A kun a, a chhar a, a theh phei zel. A chawl lo.

Chu tlangval chu ka in lam panin ka kalsan ta a, mahse, a thil sawi chu ka rilru-ah a cham ta reng thung.

Tlangval thil sawi chuan ka rilru a luah ngang a, ka inher vut a, amah panin ka let leh ta tawp mai.

Ka va thleng phei a, starfish chu tuipui lamah chuan kan theh phei dun ta ngat ngat a.
('The Star Fish' tih lehlin a ni.)

Related Posts :