¢ Biakchungnunga (Bch-a)
Stallone a naupan lai nun hi a hrehawm em em a, lungleng reng reng leh mite tihduhdah leh hmuhsit tuarin a hun a hmang ral ve a ni. Rairahtea chu.
'Sly' tia an koh, Sylvester Stallone hian Hollywood star a nih hma hian kawng hrehawm tak tak engemaw zay a lo paltlang tawh. Rocky Balboa leh Rambo te hi ni khat thil thua lo thleng thut a ni lo. Hetiang ni thei tur hian "Kawng awlsam a nilo..." tih hla hi Krismas sa rimin a ur, mihlim te'n "Hlimna ni ropui chu a eng..." tih hla an nawn ngun tluk zetin Sly hian a nawn ngun ta ve ang. A-list actor a nihna mai piah lamah hian Stallone-a chanchin hi ngaihnawm tham tak a ni.
A tetlai thiante chu Lalthavela tluk zeta mahni engmah ni si lova mite hmusit ching tak an ni hlawm. A hming - Stallone tih hi Looney Tunes nen a inmil em avangte leh Lalfinga (Pastor fapa) tluk zeta mit kalh (Lalfinga hi chu a mit a kalh tak tak pawh a ni lo, mite tlin lohna hi a hmu thei em mai pawh a. Sly erawh a kalh tak tak) a nih vangte leh a pian laia tihpalh thil thua doctor te'n a facial nerve an tihchhiat palh avanga a hmui sawi leh a tawng fiah lo te chu hmuhsit nan leh chhaih nawmnah nan tak an hmang thin.
Kum 5 a tlinin a nu leh pate leh a nau Frank te nen chuan Maryland lamah an pem ta a ni.
A nu leh pate chu an inthen leh avangin Sly chuan pahrawn thar a nei ta. A pahrawn hi pizza (Lalthavela leh Lalfinga te la ei ve loh, Bch-a ei tawh) siamtu a ni. Stallone hian a senlai kha hmuhsitna leh khawharnain a hmangral a, a rawn tleirawl chhuak tur zet zawng Burma mi jail tan nuam ti laklawh an sawi ang mai lah ni, police te nen inchhungkhatna sawi tur em em nei si lovin an inhmu kur dup mai.
Chutia suahsual rawng bawl reng ta na na na chu a tawpa tawpah chuan (Lalthavela hnung zuiin) sikul 10 zet atanga hnawhchhuah a tawh takah naupang sualho an dahkhawmna sikul-ah chuan a lut ve ta rawih mai.
Stallone-a hi a classmate te chuan an yearbook-ah chuan, "Most Likely to End Up in the Electric Chair" (Lalfinga te anga an sual man tela sorkarin a la tihhlum tur tihna ni maw) tiin an ziak hlawm.
A lunglenna leh mal ngawih ngawiha a inhriatna te tihbo a tumna lamah, high school a kal lai hian sports lamah a tui hle. Lalfinga te ang maiin a suangtuahna a kawm kual vak vak thin a, amah leh amah chu thei ber angah a inngai tlat thin. Amaherawhchu, Lalfinga te ang lo takin he a suangtuahna te hian star ni thei turin a chherchhuak leh tlat lawi si.
Lalthavela ang maiin a zirlaiah te chuan khawngaihna mark vangin kumtawpah pawl a sawn ve leh hram thin a. Engemaw ti tiin scholarship hmu vein Switzerland rama American College-ah a inziak lut ve hlauh mai. He college atang hian drama lam a tui tan ta a ni. A tawpah chuan Bch-a tih a hriat vang pawh ni chuang lovin a chemkalna a hrechhuak ve ta. Stallone chuan a hmalam hun atan lemchan a thlang ve ta. College-a 'Death of a Salesman' an chan tum phei chuan a entute chuan thuthmun atanga dingchhuakin kut an beng hluah hluah mai.
Lalfinga ang maia suangtuahna rama cheng thin Sly chuan Lalfinga ang lo takin a suangtuahna te tipuitling turin ke a pen tan ta. University of Miami ah drama zir turin a inziak lut a, mahse, University a zo tep tihin kum 1969 khan New York lam a pan ta daih thung. Stallone-a acting career bultanna ve zawng "Saruakin ka lo piang a" ti ni awm takin Broadway show-a the All-Nude Score te leh zahmawh rawngkai film The Party at Kitty and Stud's tihte a ni vei nulh nia.
Kum 1971 khan Woody Allen-a film Bananas-ah chang turin an thlang ve nawlh a, The Godfather-a chan ve a dilna erawh an hnawl thung. A hmui sawih vang hian film chang turin role a hmu ve thei der lo mai. Lalthavela nula 'bem' ang chauh a ni, an hmu chiang a, an hnar leh zel.
Nimahsela, Lalthavela, beidawnna avanga mi pangngai nunphung pha tawh lo, "Tu pu nge" tih hla kurpui nguaitu te ang lo takin Sly erawh a beidawng ve duh tlat lo. Stallone chu film-a chan tur thawnthu (script) ziak lamah a ramtang ta. Tichuan film lar tak mai Rocky chu a ziakchhuak ve nawlh mai a ni.
Stallone a film thawnthu ziak, film-a an siam hmasak ber kum chu 1974 kha niin The Lords of Flatbush tih a ni a, he film-ah hian Stallone pawh a chang ve nghe nghe.
Love song a ni lo, lengzem a ni lo, Stallone-a hnehtu chu boxing a ni daih. Muhammed Ali leh Chuck Wepner te inhnek chu hmuhnawm a ti ngang mai. Chu chuan Rocky ziak turin a pui ta a ni. Rocky chu budget tlem tein an han produce a, Stallone chuan chan ve a chuh tlat avangin a chang ve ta nge nge. Kha film script kha Stallone khan ni thum chhungin a ziak zo vek a, kha film khan Oscar for Best Picture a dawng zui a, kha film vang vek khan Stallone-a chuan Oscar nomination for writer and actor a hmu ve hial a ni.
Stallone chu ziak lamah a tui chho zel a, 1985 a lo herchhuah meuh chuan action film lar zet mai Rambo chu a ziak zo ta der mai pawh ni lovin an chang zo der tawh. A hmuhnawm em em bawk. Rocky leh Rambo te avangin Hollywood action hero tiin a lar ta . Lalthavela ten lar tuma fiamthu nuihzatthlak loh tak tak, mi fiamthubu atanga an chhiar an lo sawi chhawn mai mai laiin, Stallone-a chuan 1990's bul lam khan comedy (film hlimawm) lamah a hming chher ve a han tum a. Comedy film Oscar leh Stop!Or My Mom Will Shoot te a han chan ve hnu meuh chuan, comedy chu a chemkalna a ni lo tih hrechhuakin film pa rep rep tak mai Cliffhanger, Demolition Man, The Specialist, Judge Dredd te leh Assassins te a chang leh ta daih thung.
Hetih hunah meuh hi chuan Lalthavela te'n Farstar cigarette (tlawn 20 a awm a) an zak laiin Sly chuan vawi khat film chanah pawh dollar million 20 a hlawh daih tawh. Million 20 hlawh tawh mah se Stallone chuan Cop Land film chu Robert De Niro leh Harvey Keitel te chanpui ve hrim hrim a duh vangin dollar 60,000 lek hlawhin kha filmah khan a chang ve a ni. 1998 khan animated film Antz-ah a aw a hmanir ve a, Stallone-a tan chuan hlawhtlinna pakhat a ni.
Stallone-a chuan a project atan Get Carter, Eye See You leh Driven te a neih leh a, heng film te hi amahin a ziah leh a produce te a ni hlawm.
Stallone hian hmangaihna lamah a nu leh pate a chhun ve emaw'n teh reng ni, a nupui hmasa ber Sasha Czack nen kum 11 an inneih chhungin fapa pahnih Sage Moonblood leh Seth a.k.a Seargeoh an nei a. Chumi hnuah actress Brigitte Nielsen nen kum 3 an innei leh a, tichuan tunah hian a nupui pathumna model Jennifer Flavin nen fanu pahnih Sophia Rose leh Sistine Rose te an nei leh a ni.
Sly chanchin hi tihian i han titawp dawn teh ang- lemziak fawmkhawm nuam ti mi, polo khelh leh thawnthu ziah nuam ti ve tak, Oscar pawh lo dawng tawh, director, producer, partner in Planet Hollywood, mipali te tana pa, pasal leh action hero a ni.
No comments:
Post a Comment